Ngü te sere te-ye 4

1Fütanga ngü la, fü ra adu afü te-ra awu kpah gara ngü te sere te-ye fere. Fü ra awu kpï, te ü te-ye baka möngïtï, ngbü baaba. Fü ra ayia aje ri kpara, te ngbü ewü baka gba kono, ge baka mene ta te ma je te enga gina ne. Fü ri kpara la amala ngü fere, gü ba, "De-ra deyï, ma lï elï kpakine, teka fü ni asere wü ngü, te ena amere te-wü te gara ne, fere." 2Baka te ma ngbü eje ri kpara la, ʼduwa fü Nzïla Wazi Me akoro arï esoko ra, ato wazi fere. Fü ra ayia aceka kpï, awu Me te ngbü füh mere kpökpö ka-ye ka miri agbü kpï kpala. 3Fü gbügbüra na angbü eci aci gbele gbele, baka ra. Fü sü alofo ede mere kpökpö kaka la ngbaji bane, da eci aci baka tere, te ngbü elofo sü me-ye. 4Fü wü mere kovo teke biri de füh ye bala (24), ado angbü füh nda-wü kpökpö ka miri, ede mere kpökpö ka Me la, kerekere gbaa. Wüh to ʼburu züka ngbeʼde bu bongo te wü, de wü madudu gbü nzö wü, te wüh reke gbü diki-se, teka asere, gü ba, wüh za esaka wü vügü ka-wü eyi. 5Fü kpökpö ka Me la angbü eci aci baka ülele, kpah de giri wü e, te ngbü ewü gbügbü na, ngbee ngbee ngbee! baka mügbara la. Fü wü lamba lorozi angbü eci engagira kpökpö ka Me la. Wü lamba la ngbü esere ngü, gü ba, wazi Nzïla Wazi Me fa sü, baka e du lorozi. 6Fü mere tambasü te nü anü sele sele bala, angbü engagira kpökpö ka Me la, da eci aci baka jia ngu la. Fü wü angbe cögbörö malayïka ka Me bala (4) angbü ede kpökpö la, de jia wü eküte wü kerekere gbaa ʼburu. 7Nzö gina malayïka la ngbü baka nda kami. Nzö eʼbaʼbasu malayïka baka nda yiti. Nda ebabata malayïka baka nda kpara. Ebabala na la, nzönzö na ngbü baka nzö kpukpu la. 8Mbula wü angbe cögbörö malayïka la ngbü ʼburu maʼdiya maʼdiya. Fü jia ewü angbü eküte ewü bü ʼdaaa bala, esa wü mbula ewü kpah ʼburu. Fü ewü angbü ebï ci, egbo nga Me di, biti de ra mini, gü ba, "Wayi bala, mere Me, mü ka-mü nzïla! Mere miri ka-a, mü ka-mü nzïla! Mere mürü wazi, mü ka-mü nzïla! Ta gügü mü ka-mü kü ladü. Akoro enatikine, mü ka-mü fï ladü. Mü ena angbü ka-mü fï mere badi. Ngü ka-mü tï anza nda kü de." 9Dela ngü de te wü angbe cögbörö malayïka bala la ngbü egbo nga ïrï Me di gbü ci, ecu ngüngü, da ezuru engangagira na. Te wü kovo teke biri de füh ye bala la wu wü angbe cögbörö malayïka la da ecu ngü Me bala ne, 10fü ewü angbü egbi wü madudu ka-wü, eo kötö. Fü ewü angbü eyia kpah ʼburu, etï kötö erï lö Me, angbü ecu ngü Me, da egbo nganga na, gü ba, 11"Wayi bala, Mere Me, a ngbü egbo nga ïrï mü. Ah le de wü kpara ʼburu di kpah egbo nga ïrï mü. Mere Me, mü de mere mürü wazi, fa nda wü kpara ʼburu. Mere Me, mü ngbü mere wü e füh kotö ne ʼburu me-mü. Mere Me, mü ngbü eto wazi fü wü e ʼburu me-mü. Mü mere wü e la bala, angü dela ngü te reke gbü jia mü!" Dela ngü te wü angbe cögbörö wü kovo la ngbü egbo nga ïrï Me di agbü kpï kpala.

will be added

X\