Ngü te sere te-ye 19

1Fütanga ngü la, fü ra aje ri mere bi wü kpara agbü kpï, te ewü ngbü egbo nga ïrï Me, de wü koko, de wü karayi, da ebï ci, gü ba, "Nih gbo nga ïrï Me! Angü Me de kpara te küwa wü kpara ka-ye me-ye! Nih gbo nga ïrï Me! Angü engu me-ye de mere mürü wazi! 2Nih gbo nga ïrï Me! Angü engu de züka miri, te wu da eye süka ngü ereke areke! Nih gbo nga ïrï Me! Angü Me to kuru te wü kpara ka Babïlona la, tï eyi kpini! Me to kuru la te ewü, teka wu ka-ewü, de te ewü ngbü efifiti wü kpara füh kotö ne, de wüh ce ngü ka Me asidi ne. Me to kuru te wü kpara ka Babïlona la, Angü wüh mömörö mere bi wü kpara kaka-na eyi! Nih gbo nga ïrï Me! Angü Me to kuru eyi te ewü, teka ngü la! Ah to kuru la te ewü bala kü ʼbe!" 3Fü ewü adu kpah abï gara ci de mere ri wü, gü ba, "Nih gbo nga ïrï Me! Angü ah curu mere kötï ka Babïlona la eyi! Wü kpara te ena adu angbü kpala nda tïne ma!" 4Te di bala, fü wü mere kovo teke biri de füh ye bala la, bete wü angbe cögbörö malayïka de bala, te ewü ngbü engbü ede kpökpö ka Me ne, fü ewü aci ʼburu, atï kötö erï lö Me, teka acu ngüngü na, da ebï ci, gü ba, "Wayi, ah di bala! Nih gbo nga ïrï Me!" 5Fütanga ngü la, fü ra aje ri kpara, te wü koro gbü kpökpö ka Me, gü ba, "De-yi, wü kpara ka Me ʼburu, de te yi le ngü kaka ne, yi gbo nga ïïrï na! De-yi, wü kpara ʼburu, de te yi ngbü emere ngü ka Me ne, yi gbo nga ïrï Me!" 6Fütanga ngü, de te ri kpara la wü tete ne, fü ra aje ri mere bi wü kpara, te ngbü ewü, da engo baka mügbara, kpah baka giri mere vuru ka ngu, te ngbü etökö la. Wü kpara la ngbü ebï ci, gü ba, "Nih gbo nga ïrï Me! Angü engu de Mere Miri ka-nih! Nih gbo nga ïrï Me! Angü engu de mere mürü wazi! Nih gbo nga ïrï Me! Angü engu de miri, te ngbü gbü nzö wü kpara ʼburu me-ye! Wayi bala, nih gbo nga ïrï Me! 7Enatikine, ah le de nih ngbü ʼburu de mere tadu! Angü mere sïkpï koro eyi! Kambiliki ka Me ngbü eyi ereke te-ye, teka aza wara ye. Wara ka la ngbü kpah eyi ereke te-ye, teka za-te ka-wü! Wüh ngbü eyi ereke mere karama enatikine! Nih ngbü de mere tadu, da egbo nga ïrï Me!" 8Wara Kambiliki ka Me la, ah de wü kpara ka Yesu, te ewü to maguma wü eyi fü Yesu ne. Me to züka bongo eyi fü ewü, te vi avi kpïlïlï bala. Fü ewü ato eküte wü, teka züka tima ka-wü, ta te ewü ngbü emere, ereke areke gbü jia Me ne. 9Fütanga ngü la, fü malayïka la amala ngü fere, gü ba, "De-ra deyï, ah le de ma ba wü ngü ne aba fü wü kpara ka Yesu, gü ba, 'Karama de te wüh ngbü ereke teka za-te ka Kambiliki ka Me ake wara ye ne, ah ena adi de mere züka ngü gbü sïkpï engu la. Ah le de wü kpara ʼburu reke te-wü, ngbü nzo, teka te Me ena aï ewü, akoro di gbü karama la, fü ewü angbü de mere tadu.' " Fü malayïka la adu kpah amala ngü fere, gü ba, "Dela zu ngari Me fanü fanü." 10Fü ngü la aga gbü jia ra afa sü. Fü ra atï kötö erï lö malayïka la, teka acu ngüngü. Fü malayïka la ayia amala ngü fere kpekpeke, gü ba, "Ma mere e acu ngü ni de! Angü ni de Me nda-ni de! Ni kpah bü de kpara, te ngbü emere tima ka Me, baka ra, kpah baka wü mürü dofo ka Me, de wü gara kpara, te ewü ngbü elala gbü ngü ka Yesu, zalü koro di gbü kpi ka-wü ne. Ah le de ma cu ʼduwa ngü Me kpikpi ye! Ma mere e acu ngü gara kpara de!" 11Fütanga ngü la, fü ra ayia afü jia ra, awu kpï te ü te-ye, ngbü baaba. Fü ra awu Miri Yesu, te ngbü ekoro agbü kpï. Ah lï ngbü gaa füh nü ka-ye, de küte ye ngbeʼde, te ngbü enü agü gü di. Engu de kpeke kpara, te mere tima ka Me reke areke. Ah kpah de züka miri, te wu da eye süka ngü ka wü kpara mbi mbi mbi. Fü ah angbü eto kuru te mene wü kpara, de te ewü le ngü kaka de ne. 12Jijia na ngbü eci baka ra la. Ah to madudu gbü nzö ye, te ngbü esere, gü ba, wawazi na fa nda wü gara miri ʼburu. Me ba gara ïïrï eyi eraraku. Ïrï la, gara kpara biringbö bane te ena awu da etanga nda ma. Engu wu e ka-ye ʼduwa me-ye. 13Bongo kaka küʼda de ngüte wü vügü kaka, ngbü tïne bü caʼbïrï bala. Wüh gü kpah gara ïrï tete na, gü ba, Ri Me. 14Mere bi wü marajümïya ka Me ngbü da efa nganga. Wüh lï ʼburu ngbü gaa füh wü nü, de küte wü kpah ngbeʼde bala. Wüh to ʼburu züka bu bongo eküte wü. 15Fü mere maguruma, te dere fa sü, angbü ekoro gömö Miri Yesu. Ah ena aza maguruma ka-ye la, amömörö siti wü miri gbü nguwa wü kpara füh kotö ne di. Ah ena ato mere kuru te ewü. Fü ah adoto ewü esatïlö ye, angü wüh le ngü ka Me de. Maguma Me nzu eküte ewü eyi teka ngü la. 16Wüh ba gara ngü eküte bongo kaka, gü ba, "Dene Miri te wawazi fa nda wü gara miri füh kotö ne ʼburu." 17Fütanga ngü la, fü ra ayia awu gara malayïka ka Me, te koro rü ngbü ngengere kpa tikpi, da emala ngü de mere ri ye fü wü lu ʼburu, gü ba, "De-wü deyï, wü koro ekoro ʼburu akine! Angü Me reke mere karama eyi tüngü wü! Wü ena azü mere bi so enatikine, asika di! 18Wü koro ekoro, de wü zü kö wü miri, de wü kpeke wü kpara, kö wü marajümïya, de wü mere kpara ka-wü, kö wü nü, de wü kpara, te ewü ngbü elï füh ewü la, kpah de kö wü gara kpara ʼburu. Wü koro ekoro kere, de wü zü, de wü sika di!" 19Fütanga ngü la, fü ra ayia awu gina siti nü, ta te koro gbü ngu ne, abe te wü miri gbü nguwa wü kpara de füh kotö ne ʼburu, de wü marajümïya ka-wü, te ewü biti te-wü, teka agü gü kpaka Miri Yesu, de wü kpara ka-ye. 20Fü mere siti gü akpo amere te-ye esüka wü Yesu de wü vügü ka-ye la. Fü wü marajümïya ka Yesu azoro siti nü la, bete eʼbaʼbasu nü, ta te koro gbü tö, da efifiti wü kpara de wü lara ngü ka-ye, gü ba, "Wü di eje rïrï ka gina nü ne." Fü ewü agü wü nü la ʼbasu mini agbü mere du ka wa, te mbe ngbü ngbööö ne! 21Fü Yesu aza bü maguruma de gömö ye la, amömörö wü vügü ka-ye la di, ʼburu ʼburu! Fü sü anga, angbü ʼduwa ngbiii! Fü wü lu akoro azüzüfa kö ewü ʼburu asika di, angbü tïne bü ngu ngu ngu bala!

will be added

X\