Ngü te sere te-ye 16

1Fütanga ngü la, fü ra ayia aje ri Me, te ngbü ewü kpa esambü la, da emala ngü fü wü malayïka de lorozi ne, gü ba, "Tïtïne, ah le de wü yia, wü za wü ndüʼba ka-wü eza, teka fü wü anü atökö siti wü e, de gbü ndüʼba ka-wü la, gbü nzö wü kpara füh kotö de kpala. Angü maguma ni, Me nzu eyi eküte ewü, teka te wüh le ngü ka-ni de!" 2Teka ngü la, fü gina malayïka ayia anü, atökö siti e de gbü nda-ye ndüʼba la, füh kotö akine. Fü wü e la angbü eto wü ka eküte wü kpara, coʼdo coʼdo bala. Kükürü de, angü wüh le ngü ka siti nü te koro gbü ngu la eyi, da eba ïïrï eraku wü ne. 3Fü eʼbaʼbasu malayïka la ayia anü, atökö siti e de gbü nda-ye ndüʼba la gbü mere yï-ngu. Fü jia ngu la afü te-ye, akoro baka ngüte kövö, bïbïrï bala. Fü wü si, de wü gara e, te ewü ngbü gbü yï-ngu la, ayia akpi anza le le le ʼburu! 4Fütanganga, fü ebabata malayïka ayia anü atökö siti e de gbü nda-ye ndüʼba la, gbü wü jürü ngu, de wü ze füh kotö ne ʼburu. Fü wü ngïla ngu de füh kotö ne afü te-wü ʼburu, akoro baka ngüte. 5Fü malayïka de te ngbü eceka kpï sidi nga wü ngu ne, amala ngü, gü ba, "Wayi bala, Mere Me, ma ngbü egbo nga ïrï mü! Ta gügü, mü ka-mü kü ladü. Enatikine, mü fï ladü. Ngü ka-mü ena angbü bala fï mere badi. Mere Me, ma ngbü egbo nga ïrï mü! Angü ngü ka-mü ka-ye nzïla! Mü de züka Miri! Mü ngbü ekolo ngü ka wü kpara, ereke me-mü! Kuru de te mü to te wü kpara ne, ah tï eyi te nga ngü ka-ewü la kpini! 6Angü wüh ngbü ta emömörö wü kpara ka-mü, de wü mürü dofo ka-mü. Wüh tökö ngüte wü kpara ka-mü ta eyi fa sü, baka ngu agö! Te di bala, enatikine mü ngbü fü wü züka ngu ta ngïla, te wüh ngbü enzö ne, koro di eyi ʼburu ngüte tete. Gara züka ngu, te wüh ena adu anzö ne, nda tïne ma! Wayi! Ngü la mere te-ye fü ewü bala kü ʼbe! Angü wüh gïrï me-wü!" 7Fütanga ngü la, fü ra ayia aje ri gara kpara, te ngbü ewü gbü cangalï, de te di engagira Me ne, gü ba, "Wayi bala, Mere Me, ma ngbü egbo nga ïrï mü! Angü mü de mere mürü wazi! Mü ka-mü de züka miri! Mü ngbü ekolo ngü ka wü kpara füh kotö ne ʼburu ereke areke! Wü ngü ʼburu de te mü ngbü emere ne, wüh reke fa sü!" 8Fütanga ngü la, fü ebabala malayïka ayia anü atökö siti e de gbü nda-ye ndüʼba la, gbü jia ra agbü kpï. Fü e la ato wazi fü ra. Fü ra la akpo angbü ecucuru wü kpara tïne baka wa la. 9Teka ngü ka wazi ra la, fü küte wü kpara angbü ecuru, da ekeke efa sü. Fü ewü akpo angbü esoko Me, da esiti ïïrï, teka kuru de te engu to te ewü ne. Amba wüh le afü maguma wü, ace siti ngü ka-wü, adu angbü ecu ngü Me, teka mere wazi kaka la, nda-wü de. 10Fütanga ngü la, fü eʼbuʼburuve malayïka ayia anü kpah, atökö siti e de gbü nda-ye ndüʼba ne, mbiii te sü, de te siti nü, de di ye nzükpa la, ngbü tete. Fü sü la atï ʼduwa mbirrri! Kpara tï aceka kpï tïne de, ka mbiri sü la. Fü wü kpara, ta te ewü di gbü sü la, angbü ʼburu de mere keke, da enyüma gbü te wü, teka keke la. 11Fü ewü angbü esoko Mere Me agbü kpï ne, da esiti ïïrï, teka ngü ka keke, de wü ka de eküte ewü ne. Amba gbü ngü la, wüh le afü maguma wü, ace siti ngü ka-wü kpah de. Wüh lala ka-wü fï bü gbü siti ngü ka-wü la. 12Fütanga ngü la, fü gara malayïka ayia kpah, anü atökö siti e de gbü nda-ye ndüʼba la, gbü mere ngu de ïrï ye Efürata ne. Bü baka ngü ne, cakara! mere ngu ne nzürü nza eyi! Ngü la mere te-ye bala kükürü de, angü Me wu eyi, gü ba, wü miri ka nguwa wü kpara, to kpa fügö ne, ngbü eyi ereke te-wü, teka akoro agü gü de wü kpara ka-ni. Me mere ngü la bala, teka de wü miri la kö ngu la gbü kagara sü, de wüh koro kere, teka fü ni anza ngü ka-ewü tete. 13Fütanga ngü la, fü ra ayia awu siti wü di enga me bata. Wüh ngbü gegege baka wü arombo la. Gigina koro gömö mere siti kpürü. Eʼbaʼbasu koro nda-ye gömö gina nü, te koro gbü ngu. Fü ebabata la akoro nda-ye gömö eʼbaʼbasu nü, te koro gbü tö, ta te fiti wü kpara ne. 14Fü siti wü di enga me de bata la ayia anü kpaka wü miri, de te ewü ngbü gbü nzö wü kpara füh kotö ne, amala ngü fü ewü, de wüh reke te-wü areke, teka anü agü gü de wü kpara ka Me. Fü wü di enga me la angbü ememere wü lara ngü ka talara, teka afiti wü miri la di. Fü ngü la aga gbü jia wü miri la afa sü. Fü ewü akpo da ereke te-wü, teka anü agü gü de wü kpara ka Me, gbü adu sïkpï, te Me ena ato kuru te siti wü kpara tete. 15Wayi, wü di enga wüna, dene ngü te Miri Yesu mala fü nih, wü kpara ka-ye. Ah gü ba, "Wü di enga ra, yi rü kpekpeke! Angü ma ngbü eyi nzo, teka adu kpa füh kotö. Ma ena adu akoro, agüka wü kpara baka mürü zi, te ngbü egüka kpara gbü biti. Yi ceka te-yi ʼbe! Yi mere e ara ra de! Yi to wü bongo ka-yi, ngbü di ʼburu nzo, teka fü yi angbü de tadu gbü sïkpï la. Angü te ma du maka yi ngïrïmu la, ah ena adi esiti! Lümü ena amere yi afa sü." 16Fü siti wü di enga me de bata la ayia abiti wü miri füh kotö ne ʼburu, agbü sü de te wüh ngbü eï, gü ba, "Amagedona" ne, akpo da ereke te-wü tïne teka amere gü kpaka Me. 17Fütanga ngü la, fü adu malayïka la ayia akoro, atökö siti e de gbü nda-ye ndüʼba la gbü wege. Fü ri Me ayia awü gbü mere kpökpö ka-ye, de gbü Mere Kambü ne, gü ba, "Wayi, ngü engu na nza tïne eyi dela!" 18Fü ülele angbü eü, da eci tïne bü faaa! Fü mügbara angbü esüsürü. Fü yiki-tö akpo kpah angbü eyiki sü tïne ʼduwa ba-neh-ene-la! Yiki-tö la fa wü gara yiki-tö, ta te ewü ngbü emere te-wü te enga gina ne, ʼburu ka. Kü baka te Me reke kotö ne, yiki-tö te mere te-ye bala nda la kü ma! 19Te yiki-tö la ngbü emere te-ye tete, fü mere kötï de ïrï ye Babïlona ne akuru, aye süka ye bata. Fü wü kambü de gbü wü sü la amümürü ʼburu, atï kötö. Me to kuru la gbü mere kötï ka Babïlona la me-ye, angü mamaguma nzu eyi eküte wü kpara de gbü sü la, teka siti ngü ka-ewü, de te wüh ngbü emere ne. Ngü la ngbü memere te-ye kpah bala, gbü wü gara mere kötï füh kotö ne ʼburu. 20Fü cögbörö wü da amümürü kpah ʼburu, atïtï kötö. 21Fü wü cögbörö timiri, te gegere baka wü kombo ka jia ndo la, akpo angbü etïtï gbü nzö wü kpara ʼbi ʼbi ʼbi. Fü wü kpara angbü esoko Me, da esiti ïïrï, teka ngü ka wü timiri la, teka wü cïnga, de te ngbü emere ewü ne. Dela wü ngü ta te mere te-wü, o wü malayïka de lorozi la ngbü tötökö wü siti e, de gbü wü ndüʼba ka-wü tete, füh kotö ne. Angü Me to mere kuru la me-ye te wü kpara, de te ewü le ngü kaka de ne.

will be added

X\