Ngü te sere te-ye 13

1Fütanga ngü la, fü ra ayia afü jia ra, awu gara mere siti nü, te ngbü ekoro gbü mere yï-ngu, de wü nzö ye lorozi. Wü didi nzükpa. Fü wü e angbü eküte wü didi nzükpa la, baka madudu ka wü miri la, angü engu ta de mere wazi esaka ye. Wüh ba ta wü ïrï eküte wü nzönzö la biri biri ʼburu. Wü ïrï la siti gbü jia Me fa sü, angü wü ïrï la ngbü efala ïrï Me. 2Küte nü la ngbü baka küte siya, wü koji-lölö baka nda ewawa, kokomö na baka komö kami la. Te mere siti kpürü la wu siti nü la, fü ah ayia ato wazi ye fefe, teka fü ah adi emere tima di, baka nda-ni. Fü kpürü la adu kpah ato wazi fefe, teka de ah ngbü miri gbü nzö nguwa wü kpara füh kotö ne ʼburu. 3Fü ra ayia awu nga mere ka, eküte gara süka nzö siti nü la. Ka la ena ato ta kpi fefe, amba ka la du ta nzu ka-ye eyi. Te wü kpara wu, gü ba, mere ka de eküte nzö nü la, nzu eyi ne, fü ngü la ayia aga gbü jia ewü ʼduwa ba-neh-ene-la. Fü ewü akpo ale ngü ka siti nü la, da efa nganga. 4Fü mere bi wü kpara akpo angbü egbo nga siti nü la, gü ba, "Siti nü la, ka-ye de mere wazi ye! Kpara te ena afa engu nda kü ma!" Fü ewü adu kpah angbü egbo nga mere siti kpürü la, angü wüh wu eyi, gü ba, kpürü la to wazi ye me-ye fü nü la. 5Te di bala, Me le atïrï siti nü la kere nda la de. Ah gü ba, "Ni ena ace la engu bala, teka wü re bata de tü ye." Fü siti nü la akpo angbü emamala wü angbe cögbörö ngü, da ecu ngü ye, kpah da efala Me. Fü engu ayia angbü miri gbü nzö mere bi nguwa wü kpara füh kotö ne, kpah da ememere ewü, ba e te engu ngbü ele. 6Fü siti nü la akpo da efala Me, kpah da emala siti ngü te Kambü ka Me, be kpah te wü kpara ka Me agbü kpï. 7Fü ah akpo kpah angbü egü gü de wü kpara ka Me de füh kotö ne, da emömörö ewü. Amba Me le anza ngü kaka la de ne, angü sïkpï kaka koro la de. Fü siti nü la angbü de wazi gbü nzö nguwa wü kpara füh kotö ne ʼburu. 8Fü nguwa wü kpara füh kotö ne ʼburu angbü labï ka siti nü la, da ecu ngüngü. Amba ʼduwa wü kpara ka Yesu, de te Me fe ewü ta gügü, o engu mere kotö ne la de ne, wüh le acu ngü siti nü la nda-wü de. Angü Yesu, te di de Kambiliki ka Me ne, fa ewü eyi de ngüte ye. 9Dene ngü ka Me te ma le amala fü yi. Te yi de kpara te güje yi ngbü eje ngü la, ah le de yi je ngü ne. 10Angü wü cïnga ladü, te wü vügü ena akoro, ato te wü kpara ka Me. Wüh ena azozoro wü gara, agü agbü ku. Fü ewü amömörö wü gara. Ngü ma, Me wu ngü la kpo. Te di bala, ah le de yi i maguma yi ai, atüka te-yi, arü kpekpeke gbü ngü ka Me. 11Fütanga ngü la, fü ra ayia awu kpah gara siti nü, te ngbü ekoro gbü tö. Didi na ʼbasu baka nda kambiliki la. Amba nü la ka-ye de mürü mani, te ngbü efiti wü kpara kpah baka Satana. 12Fü eʼbaʼbasu nü, te koro gbü tö ne, angbü emere ngü ka-ye ʼburu gbü wazi ka gina nü, ta te koro gbü ngu ne. Fü ah akpo angbü efiti wü kpara füh kotö ne ʼburu, teka de wüh di ecu ngü gina nü la. 13Fü eʼbaʼbasu nü la akpo angbü ememere wü mere kpeke ngü ka talara. Te engu le amala ngü la, fü wa angbü eyia agbü kpï kpala, etï füh kotö sene, gbü jia wü kpara ʼburu, da ecuru sü. 14Fü ah angbü efifiti wü kpara füh kotö ne ʼburu, bü de wü kpeke ngü ka talara ka-ye la. Fü ah amala ngü fü wü kpara, teka de wüh fo kuru gina nü, ta te koro gbü ngu ne, memere, ae, ao kpa tikpi. 15Fü Satana ato wazi fü eʼbaʼbasu nü la, teka de engu uru wazi guvu kuru gina nü, te wüh fo la. Fü kuru nü la angbü emala ngü, gü ba, "Ah le de wü kpara ʼburu di ecu ngü ni, baka te ewü ngbü ecu ngü Me. Te kpara mere ngü la de la, wüh ena amörö engu amörö." 16Fü eʼbaʼbasu nü la ayia ato kpah gara rïrï fü wü kpara ʼburu, gü ba, "Ah le de wü kpara ʼburu ba ïrï gina nü ne gbü kpa wü ka kokpa, anga eraku wü. 17Mene kpara te ïrï nü la di eküküte ma la, engu tï ase e, anga acïnzï e, kpah de. Wüh ena aliki engu esüka wü bu ye asidi." 18Ïrï gina nü la, wüh ba de namba. Namba la, ah de kama maʼdiya teke bata de füh ye maʼdiya (666). Ah le de yi fï nga ngü la mbi mbi mbi, fü yi awu wü si-ngü gbü ngü la. Angü namba la, ah de ïrï kpara.

will be added

X\