Ngü te sere te-ye 11

1Fütanga ngü la, fü ewü aza ndugu gala, ato esaka ra. Fü Miri Yesu amala ngü fere, gü ba, "De-ra deyï, ma za ndugu gala la, de ma nü di agbü Mere Kambü ka Me agbü Yerüsalema. Te ma koro eyi kpala la, de ma re nga ngboro kambü la, de pipiti na, bete maga na to kpa tikpi. De ma re kpah cangalï de te wüh ngbü eto laʼbï fü Mere Me fefeh na la. Ma du kpah, ma tanga mene wü kpara, de te ewü ngbü egbo nga ïrï Me de kpala ne ʼburu, teka fü ni, Yesu, aceka kpï fütanga ewü mbi mbi mbi. 2Amba ma mere e are tambasü de, ma tanga mene wü kpara etambasü la kpah de. Kükürü de, angü Me le eyi teka fü wü vügü arï kpala. Wü vügü la ena akoro azoro sü agbü Yerüsalema kpala, agbene wü e gbügbü ʼburu. Fü ewü angbü gbü nzö wü kpara de kpala de wazi, teka wü re bata de tü ye. 3Te di bala, de-ni Yesu, ni ena ato wazi fü kpeke wü kpara ka-ni ʼbasu, teka fü ewü amala ngari ni fü wü kpara, teka wü re bata de tü ye ne. Wü kpara la ena angbü eto bongo ka cïnga eküte wü, fü ewü angbü erï wü kpara, teka de wüh fü maguma wü." 4Mürü dofo Zakarïya mala ta nga wü kpeke kpara ka Yesu de ʼbasu ne eyi gügü, gü ba, "Wüh ngbü baka rü de ïrï ye olïve, te ngbü erï, de mü gbü ye ne. Wüh kpah baka lamba de mü-wa gbü ye, te ngbü eci, ereke areke. Kükürü de, angü Me to wazi ye eyi fü ewü, teka fü ewü amere tima ka-ye la di." 5Me to kpah wazi eyi fü ewü, teka fü ewü amere wü kpeke ngü di. Te gara kpara yia emere ewü esiti la, wüh ena auru engu bü de komö wü kükürü, fü ah akpi, angü wa ladü gömö ewü. 6Me to kpah wazi eyi fü ewü, baka wü mürü dofo ka-ye ta gügü ne, teka atïrï agö, de ah mere e alï de. Te di bala, gbü wü re bata de tü ye, te ewü ena angbü emala ngari Me endondoro di, agö tï alï de. Ngü la ena amere te-ye bala, teka ato cïnga di te wü kpara füh kotö ne, de wüh ce siti ngü ka-wü, adu ale ngü ka Me. Me to kpah wazi ye eyi fü ewü teka afü ngu, akoro di baka ngüte, kpah de wü gara lara ngü, te ewü ena adi emere. Dela wü ngü te ena amere te-wü, gbü wü re bata de tü ye ne. 7Fütanga re bata de tü ye, gara kpara te di baka siti nü la, ena akoro agbü mere siti du, teka agü gü de wü kpara ka Yesu de ʼbasu la. Fü siti kpara la afa ewü de wazi ye, amörö ewü asidi. 8Ngü la ena amere te-ye cu gbü mere kötï, de te wüh mörö Miri Yesu gbügbü na ne, angü wü kpara gbü sü la, wüh ka-wü de wü mürü kögö-nzö, baka wü kpara ka Ezepeto bete nda Sodomo ta gügü ne. Teka ngü la, fü kö wü kpara de ʼbasu la angbü ka-ye kötö sela, teka wü sïkpï bata de tü ye. Angü wü kpara gbü sü la, le ati kö wü kpara la nda-wü de. Te di bala, mere bi wü kpara ena ayia te nga nzö wü sü füh kotö ne ʼburu, angbü ekoro eceka kö wü kpara ka Yesu de ʼbasu ne, da efala. 10Fü mere bi wü kpara, te ewü le ngü ka Me de, angbü ʼburu de mere tadu te wü, angü wü kpara ka Yesu de ʼbasu la kpi eyi fanü. Wüh ena angbü eto takpa esüka wü, teka ngü la. Angü ngari Me, ta te wü kpara de ʼbasu la ngbü erï wü kpara di ne, ngbü ta eke te ewü ake. 11Fütanga sïkpï bata de tü ye, fü Me adu auru wazi ye guvu wü kpara ka-ye de ʼbasu la. Cukuru! fü ewü azükü gbü kpi, ayia arü cinzili! füh lö wü. Te mere bi wü kpara füh kotö ne wu ngü la bala, fü ewü angbü de mere cürü te wü. 12Fütanga ngü la, fü wü kpara de ʼbasu la aje ri Me, te wü agbü kpï, emala ngü fü ewü, gü ba, "De-wü deyï, wü yia eyia, de wü koro kpaka ni akine." Fü Me adu aza ewü, yooo! ago di agbü kpï, gbü jia wü vügü ka-ewü la ʼburu, de sangu gbü nga wü, gbooo! 13Baka te wü kpara de ʼbasu la ngbü erï tete agbü kpï, fü mere siti yiki-tö akpo angbü emere te-ye. Fü mere bi wü kambü gbü gara faka sü agbü mere kötï ka Yerüsalema la amümürü, atï ʼburu kötö. Fü mere bi wü kpara gbü kötï la akpi kpah ʼburu. Wü kpara te ewü kpi la, wüh ʼburu kutu lorozi (7,000). Fü mere cürü ayia arï emaguma mene wü kpara, ta te ewü lakï ne. Fü ewü akpo da ecu ngü Me, teka mere wazi kaka la. 14Dela la bü eʼbaʼbasu cïnga, de te Me to te wü kpara, de te ewü le ngü kaka de ne. Amba yi ceka ʼbe, angü ebabata cïnga eyi gbamari! 15Fütanga wü ngü la, fü adu malayïka la ayia au nda-ye kono. Fü ri wü kpara akpo angbü ewü agbü kpï, gü ba, "Wayi! Sïkpï la koro eyi dene! Ngü ka wü miri füh kotö ne nza eyi! Dene sïkpï te Me ena angbü me-ye gbü nzö wü kpara füh kotö ne ʼburu. Me o Yesu Kurisito eyi Miri gbü nzö wü kpara ʼburu. Engu ena angbü bala fï mere badi!" 16Fü wü mere kovo teke biri de füh ye bala, de te ewü ngbü ede kpökpö ka Me agbü kpï ne, adu atï kötö eri lö Me, egbo nganga, da ebï ci, 17gü ba, "Wayi, Mere Me, a ngbü egbo nga ïrï mü! Mere mürü wazi, a ngbü egbo nga ïrï mü! Ta gügü mü ka-mü kü ladü! Enatikine mü fï ladü! Ngü ka-mü ena angbü bala fï mere badi! A ngbü egbo nga ïrï mü teka mere wazi ka-mü! Angü mü ngbü eyi gbü nzö wü kpara füh kotö ne ʼburu. Ngü ka-mü tï anza nda kü de, fï furu afuru! 18Wayi, a gbo nga ïrï mü! Angü sïkpï ka-mü koro eyi dene! Mü ena asere wazi ka-mü fü wü kpara, te ewü le ngü ka-mü de ne. Angü mü ena ato kuru te ewü enatikine! Mü ena aye süka ngü ka wü kpara te ewü kpi eyi, bete ewü de te ewü di la ezükü ne. Fü mü aküwa wü kpara ka-mü fï mere badi. Mü ena ato küküwa fü wü kpara, de te ewü mere tima ka-mü reke areke ne. Mü ena ato küküwa fü wü kpara, de te ewü mala ngari mü fü wü bu wü ne. Mü ena ato küküwa fü wü kpara, de te ewü to maguma wü ʼburu ʼburu fü mü ne. Amba mü ena anza ngü ka wü kpara, de te ewü le ngü ka-mü de ne. Mü ena anza ngü ka wü kpara, de te ewü ngbü eto cïnga te wü kpara ka-mü ne. Wayi bala, Mere Me, gbo nga e ngbü te ïrï mü!" 19Fütanga ngü la, fü ra ayia awu Mere Kambü ka Me agbü kpï kpala, te ü te-ye, ngbü baaba. Fü ra awu wü e kpa guvu kambü la kpah ʼburu. Fü ra awu mere züka Sanduku, ta te Me o Rïrï ka-ye gbügbü, teka asere fü wü kpara ka-ye, gü ba, ni de vüngüte ka-wü ne. Fü ülele angbü eci ʼduwa le le le bala! Fü mügbara angbü esüsürü! Fü yiki-tö akpo da emere te-ye, de wü timiri te ngbü egügürü ʼduwa ba-neh-ene-la.

will be added

X\