Ngü te sere te-ye 1

1De-ra Yüwane, mürü tima ka Yesu Kurisito. Dene wü ngü te Yesu sere cu me-ye fere, baka roto. Me gü tamu wü ngü ne fü Yesu me-ye, teka de engu sere fü wü kpara ka-ye. Ah de wü ngü te ena amere te-wü amere kere. Fü Yesu Kurisito ayia atima malayïka ka-ye, asere wü ngü la fere. 2Teka ngü la, fü ra ayia akpo da eba wü ngü, de te malayïka ka Me sere fere ne ʼburu, gbü buku ne. Angü ah de zu ri Me bete nda Yesu Kurisito. 3Te di bala, ah le fü yi adi etanga buku ne fü wü kpara, teka fü Me ato wazi fü yi. Mene wü kpara te ewü ena aje ngü la, fü ewü ale de maguma wü ʼburu la, Me ena ato kpah wazi fü ewü. Angü sïkpï ka ngü la koro eyi gbamari. 4De-ra Yüwane, ma ngbü eba köcökpa ne fü yi, wü kpara ka Yesu, te yi ngbü engbü gbü wü mere kötï lorozi, gbü nga nzö wü sü ka-nih, ka Asïya. Me di de yi, da eto gu ngü fü yi teka züka maguma ye. Angü ta gügü, Me ka-ye kü ladü. Enatikine engu fï ladü. Engu ena angbü ka-ye bala fï mere badi. Ngü kaka tï anza nda de. Nzïla Wazi Me ngbü kpah de yi, angü ah ngbü engbü ede kpökpö ka Me. 5Yesu Kurisito ngbü kpah de yi, angü engu de kpeke kpara. Wü vügü kaka to ta mere cïnga tete, fü ah ai maguma ye kpekpeke, fü ah alala fï bü gbü ngü ka Me. Te wüh mörö engu tete, fü Me azükü engu, baka gina kpara esüka wü kövö. Wawazi na fa sü, fa nda wü miri füh kotö ne ʼburu. Nih gbo nga ïrï Miri Yesu! Angü ah le nih eyi cu de maguma ye ʼburu. Nih gbo nga ïrï Miri Yesu, Angü engu kpi teka afa nih gbü wü siti ngü ka-nih ʼburu. 6Nih gbo nga ïrï Miri Yesu, angü ah fe nih kpah eyi. Ah ena ao nih baka wü miri, gbü sïkpï te engu ena adu akoro tete. Nih gbo nga ïrï Miri Yesu! Angü ah ena ao nih wü kovo ka-ye, teka fü nih agbo nga ïrï Me agbü kpï fï mere badi. Nih gbo nga ïrï Miri Yesu fï mere badi! Angü engu de mere mürü wazi. Ah di bala. 7Wü di enga wüna, yi ceka la! Yesu ena adu akoro füh kotö ne fanü. Engu ena ayia agbü kpï de mere wazi ye. Fü wü kpara füh kotö ne ʼburu awu engu. Wü vügü kaka, ta te ewü sö sasajikara de dü ne, wüh ena awu engu kpah cu de jia wü. Wü kpara ʼburu, de te ewü le ngü kaka de, wüh ena aku gba, angbü kpah de mere cürü teka kokoro kaka-na la. Wayi, ngü la ena amere te-ye bala fanü! 8Dene ngü te Me mala fü nih, gü ba, "Ni de gina kpara, ni kpah de adu kpara." Me de mürü wazi, te mere wü ngü ʼburu me-ye. Ta gügü Me ka-ye kü ladü. Enatikine engu fï ladü. Engu ena angbü ka-ye bala fï mere badi. Ngü kaka tï anza nda de. 9Ah de-ra Yüwane, enga ni yi. Wüh to cïnga te ra eyi fa sü, teka ïrï Yesu Kurisito, fü ra atükü te-ra, arü kpekpeke, kpah baka nda-yi. Fü ewü adu azoro ra, agü agbü ku gbü Patemo sene, angü ma le ace ngü ka Yesu nda-ra de. 10Gbü gara sïkpï ka Me, fü Nzïla Wazi Me ayia arï emaguma ra. Fü ra ayia aje ri kpara, te ngbü ewü kpa ekürüfe ra, baka gba kono la. 11Ri kpara la wü, gü ba, "De-ra deyï, ni le asere bi wü ngü fere. Ah le fü ra aza köcökpa, aba wü ngü, de te ni le asere fere ne gbügbü. De ma tima köcökpa la fü wü kpara ka-ni gbü wü mere kötï lorozi la, agbü Efeso, Sïmïrïna, Peragamo, Tïyatïra, Saradi, Fïladelefïya bete Lawüdïkïya." 12Te ma je ri kpara la bala, fü ra ayia afü te-ra, teka aceka kpara, de te ngbü emala ngü fere ne. Fü ra ayia awu Miri Yesu Kurisito, Ye Kpara ka Kpï. Ah ngbü etü wü lamba lorozi, te wüh reke gbü diki-se. Ah to züka bongo ngboro bala, zalü ngbüüü kpa kötö. Fü ah agï ku bongo, akolo tü ye di, te ngbü eci aci baka diki-se la. 14Susu-nzö vi ʼduwa avi kpïlïlï bala! Jijia na ngbü eci baka mi-wa la! 15Lölö ngbü eci didiki! baka se te wüh to gbü wa ka boro. Riri na ngbü engböngbö, da ewü wooo! baka mere vuru ka ngu, te ngbü etökö. 16Ah zoro wü küfara lorozi gbü kpa ye ka kokpa. Fü mere maguruma te dere fa sü, angbü ekoro gögömö na. Fü gbügbüra na angbü eci gbele gbele! baka ra, te ngbü esü me-ye. 17Te ma wu Miri Yesu de bala, fü maguma ra ayia akolo ʼduwa tuu! Fü ra atï erï lölö kötö, baka kövö la. Fü Miri Yesu ayia ao kpa ye ka kokpa gbü nzö ra, amala ngü fere, gü ba, "De-ra deyï, ma kpe cürü de! Ah de-ni Yesu. Ni de gina kpara, ni kpah de adu kpara. 18Ni de E-küwa kpara. Wüh mörö ni ta amörö, amba ni zükü gbü kpi la eyi fï mere badi! Ni de wazi teka anza ngü ka kpi ʼburu ʼburu asidi! Kpah bala, ni ena azükü wü kpara ka-ni, te ewü di gbü mbükü ne ʼburu, fü ewü aküwa fï mere badi." 19Fü Miri Yesu adu amala gara ngü fere, gü ba, "Ah le de ma ba wü ngü ne, angü ni yia esere kpah gara bi wü lara ngü fere. Ni ena asere wü ngü te ewü ngbü emere te-wü tïtïne. Fü ni asere kpah wü gara ngü, te ewü ena amere te-wü te gara. Te di bala, ah le de ma ba wü ngü la ʼburu, atima fü wü kpara ka-ni, te ewü di agbü wü gara sü de lorozi ne." 20Fü Miri Yesu adu amala fere, gü ba, "Si-ngü teka wü küfara lorozi de esaka ni, bete wü lamba lorozi ne, ah bane. Wü küfara lorozi, de wü lamba lorozi ne, ah de wü kpara te ewü to maguma wü fü ni, gbü wü mere kötï lorozi ne."

will be added

X\