Matayo 8

1Fütanga ngü la, fü wü Yesu ayia akö kpa füh rüvü la kötö, angbü enü. Fü mere bi wü kpara ayia afa nganga na. 2Te wü Yesu ngbü enü tete, fü gara komoko, de jiakö eküte ye, ayia akoro kpaka Yesu. Fü engu ayia abu nzökuta ye kötö engagira Yesu, andaʼba te-ye, gü ba, "Akooo, mere kpara! Ye de mere mürü wazi! Ni ngbü eyi-ta ye, te ah gbü jia ye ʼbe la, de ye küwa ni gbü keke ne." 3Fü Yesu ayia ao kpa ye eküte komoko la, gü ba, "Wayi, ma le eyi. Küte mü reke ereke!" Baka te Yesu mala ngü la tete, ʼduwa fü küküte ayia areke, adu da ye. 4Fü Yesu adu amala ngü fefe, gü ba, "Ye mere e amala nga ngü la fü wü gara kpara de, ye je ngü la eyi? Amba ah le de ye nü enü, ye mere ngü, ta te Müse ba gbü Rïrï ka Me ne. Ye za nü, ye nü di kpaka mürü gele ka Mere Me, de ah wa, ah to fü Me teka ngü la. Teka fü wü kpara ʼburu awu, gü ba, küte ye reke eyi fanü." 5Fütanga ngü la, fü wü Yesu ayia anü akoro agbü Kaparanama. Fü gara mere kpara ka wü marajümïya ka wü Rüma ayia akoro kpaka Yesu, andaʼba te-ye fefe, 6agü ba, "Mere kpara, ni koro ayi-ta ye teka de ye küwa gara labï ka-ni, angü keke ngbü emere engu efa sü. Ah ladü kpala, era ara kpa esambü. Wawazi nza eyi ʼburu." 7Fü Yesu alügü ngü fefe, gü ba, "Ni ena anü kpala, aküwa engu." 8Fü mere wü marajümïya la adu amala ngü fü Yesu, gü ba, "Akooo, mere kpara, ni ka-ni de ganzi kpara. Ah tï fü ye arï kpa esambü ka-ni nda de, angü rïrï ka gele ka-wü, wü di enga Yïsarayele, le bala de. Ni wu eyi, gü ba, wazi ye ladü. Te ye mala bü ngü de komö ye la, labï ka-ni la ena aküwa aküwa. 9Ni tï kpah eyi awu ngü la bala, angü ni ngbü kpah esa rïrï ka wü mere kpara ka-ni. Kpah bala, wü gara marajümïya ladü, te ewü di esa rïrï ka-ni. Te ni mala ngü fü gara, gü ba, ye nü enü la, ah ena anü kere, baka te ni mala fefe. Anga te ni mala fü gara, gü ba, ye koro ekoro akine la, ah ena akoro kpah kere. Anga te ni mala ngü fü labï ka-ni, gü ba, ye mere ngü ne bane, ah ngbü kpah emere ngü la kere bala, baka te ni mala fefe." 10Te Yesu je ngü gömö komoko la bala, fü ngü la ayia areke tete afa sü. Fü engu ayia afü te-ye, amala ngü fü mere bi wü kpara, te ewü ngbü efa nga ye ne, agü ba, "Ceka la! Kpara te to maguma ye fere baka komoko la, ma maka füh kotö ne nda-ra la kü de! Ngü te ma ngbü emala fü yi ne, ah de zu ngü. Gbü nguwa nih, wü Yïsarayele, kpara te to maguma ye bala, ah nda ma. Amba ah ka-ye ʼduwa de komoko la, te di de ganzi kpara ne! 11Te di bala, ma emala fü yi dene zu ngü. Mere bi wü ganzi kpara ena ayia agbü gara wü sü nengete nengete füh kotö ne, akoro angbü tundu agbü sü ka Me, de wü Abarayama, Yïsaka bete Yakobo, wü kundu nih ta gügü ne, me-wü, angü wü ganzi kpara la to maguma wü eyi fere. 12Amba mere bi wü di enga Yïsarayele, te ewü ngbü efï, ga, ani de wü kpara ka Me me-ani ne, wüh ena aliki ewü, ato agbü mbiri sü kpa etanü kpala, fü ewü angbü eku gba, da enyüma gbü te wü de mere cïnga, angü wüh le ngü ka-ra de." 13Fü Yesu adu amala ngü fü mere kpara ka wü marajümïya la, gü ba, "Ah mbi. Mü go ka-mü ego. Labï ka-mü küwa eyi, angü mü to maguma mü eyi fere." Bü ciki gbü lö-ra engu la, fü labï ka mere marajümïya la ayia aküwa gbü keke la. 14Gbü gara ra, fü wü Yesu anü akoro kpa gba Sïmüna Petero, fü ewü amaka ni ye wara Petero, te ra kötö ka keke, angü küküte na rï ngbü wüwütü bala. 15Fü Yesu ayia azoro kpa würüse la, fü keke la ayia anza. Fü würüse la ayia anü amere kümü, ato fü ewü. 16Ah te ekoro etamurago la, fü mere bi wü kpara ayia aza wü mürü keke, bete mene ewü te siti wü di enga me ngbü emere ewü, akoro de ewü kpaka Yesu. Fü Yesu aliki wü siti wü di enga me la guvu wü kpara la ʼburu asidi. Fü ah aküwa kpah mere bi wü gara mürü keke la ʼburu. 17Ngü te Yesu küwa mere bi wü mürü keke la, tï kpini de ngü ta te mürü dofo Yïsaya ba gbü Ngari Me ta gügü, gü ba, "Miri te Me ena atima ne, ah ena aküwa nih gbü wü keke ka-nih ʼburu." 18Fütanga ngü la, fü mere bi wü kpara aci akoro, abiti te-wü, angbü ede Yesu. Te Yesu wu bala, fü ah ayia amala ngü fü wü kpara ka-ye, gü ba, "Ani lï elï gbü zabu, anü kpa etangu." Ah mala bala, angü ah le anü arï ewü kpala. 19Wüh la bü ereke te-wü, fü gara mürü rïrï biri ayia akoro kpaka Yesu, amala ngü fefe, gü ba, "Mere kpara, ni ele afa nga ye, gbü wü sü ʼburu, te ye ena angbü enü tete. Ni ena alala fï gbü nga ye, ni tï ace nga ye de." 20Fü Yesu alügü ngü fü komoko la, gü ba, "Ah le de mü wu awu, gü ba, te mü le afa nga ra la, züka ngü te mü ena amaka füh kotö ne nda ma. Angü de-ra, Ye Kpara ka Kpï, sü fere füh kotö sene, teka ara, afe te-ra tete, nda ma. Angü wü zaza ngbü era nda-wü gbü wü gö ka-wü. Wü lu ngbü era nda-wü kpah gbü wü suta ka-wü. Amba nda-ra sü fere bala nda ma." Te komoko la je ngü la bala, fü ah adu ace da efa nga Yesu. 21Fütanga ngü la, fü gara kpara ka Yesu biringbö, ayia amala ngü fefe, gü ba, "Mere kpara, wö ni gbe eyi. Ni le adu acï nganga. Te ah kpi eyi la, fü ni ati engu feke, fü ni adu akoro afa nga ye sidi." 22Fü Yesu amala ngü fefe, gü ba, "Mü ce wü di enga ni mü, te ewü le ngü ka-ra de ne, de wüh ti wö mü me-wü, angü wüh ka-wü eyi baka wü kövö. Amba nda-mü, mü koro, mü lala gbü nga ra." 23Fütanga ngü la, fü Yesu ayia de wü kpara ka-ye, alï gbü zabu, teka anü kpa etangu mere ngu Galïlaya. 24Baka te ewü yia, nü la mba ce bane, wüh te eje kpala de, gbu gbu gbu! mere wege te ekoro, da efe jia ngu la de wazi. Fü zabu akpo da eyiki, efüfü te-ye, da ekolo ngu gbü ye efa sü. Zabu la yia ta ebu ewü abu agbü ngu. Amba Yesu, mü ngbü ka-mü era ara. 25Fü wü kpara ka Yesu ayia akoro azükü engu, amala ngü fefe, gü ba, "Mere kpara, mere kpara! Ani te ekpi! Ani te ekpi! Ye zükü la ezükü, de ye küwa ani!" 26Fü Yesu ayia azükü, amala ngü fü ewü, gü ba, "Yi ekpe neh cürü ne? Yi to maguma yi fere mbi mbi la fï de?" Fü engu ayia arü, atata wege ake mere ngu la, gü ba, "Wüh nga anga." Fü sü ayia anga ʼduwa, ngbiii! 27Fü ngü la aga gbü jia wü kpara ka Yesu la afa sü, fü ewü angbü emala ngü esüka wü, gü ba, "Apa! De bane neh ene ngü ne? Mene komoko ne, neh baye baye, te engu ngbü emala ngü bü de komö ye, fü wege ake ngu angbü eje riri na ne?" Dela ngü ta te Yesu mere, te engu to rïrï fü mere wege tete. 28Te wü Yesu kö mere ngu la tete de wü kpara ka-ye, fü ewü anü akoro agbü gara sü de ïrï ye Gadara. Baka te ewü ngbü la enü tete, fü ewü amaka te-wü de wü mürü maröfö ʼbasu, te siti wü di enga me ngbü emere ewü kpekpeke efa sü, eküte ewü dela gü tïne de! Wüh ngbü ta engbü ka-wü etü wü mbükü. Te di bala, wü kpara tï aguru sü te kaje engu la tïne de, teka ngü ka-ewü. 29Te wü mürü maröfö la wu Yesu te ngbü ekoro, fü ewü ayia akpo eba rere, da emala ngü fü Yesu, de mere ri wü kpa tikpi, gü ba, "De-ye, Ye Mere Me, ye ele amere de ani ne ngü ne? Ye le ato kuru te ani bü gügü, o adu sïkpï koro la de, neh teka ne?" 30Amba mere bi wü mba ka kötï ta ladü gbamari gbü sü la, da ezü e ka-wü. 31Fü wü di enga me la afüwa te-wü fü Yesu, gü ba, "Te ye le aliki ani guvu wü kpara ne asidi la, de ye tima ani, fü ani anü arï guvu wü mba la." 32Fü Yesu ayia ale ngü ka-ewü la, amala ngü fü ewü, gü ba, "Wayi, wü nü enü, wü rï aguvu wü mba la." Fü wü di enga me la akoro guvu wü kpara ʼbasu ne, anü arï aguvu wü mba la. Te di bala, fü wü mba la aci ʼburu de mere woro, yurrru! ago kpa esa gö, agürü agbü mere ngu. Fü ewü anzö ngu, akpi ʼburu kpala. 33Te wü kpara, de te ewü ngbü eceka kpï fütanga wü mba la, wu ngü la bala, fü ewü ayia ale woro, anü agbü mere kötï, amala nga ngü, te Yesu mere la, fü wü kpara kpala, gü ba, "Yesu liki wü di enga me guvu wü mürü maröfö de ʼbasu ne eyi asidi." 34Te wü kpara agbü mere kötï je nga ngü la bala, fü ewü amala, gü ba, "Dela sirimbi!" Fü ewü ayia akö te-wü ʼburu, anü kpaka Yesu, andaʼba te-wü fefe, de ah ce sü ka-ani la ace. Fü wü Yesu ayia alï gbü zabu, anü sü ka-wü.

will be added

X\