Matayo 28

1Gügü kpurutokokpï, gbü sïkpï ka biri ka wü Yïsarayele, te di de sïkpï ka Me ka-nih ne, fü Marïya Egba-Magadala ayia ake gara kiri ye, Marïya ne, anü teka aceka mbükü Yesu. 2Baka te wü würüse la yia ngbü enü tete, fü yiki-tö ayia amere te-ye kpa füh mbükü Yesu kpala. Fü wü marajümïya, ta te ewü ngbü eceka kpï fütanga mbükü Yesu ne, ayia awu malayïka ka Me. Fü ewü akpo angbü eyï ayï de mere cürü. Fü ewü atïtï ʼburu kötö, angbü baka wü kövö la. Fü malayïka la ayia anzi mere da de emö mbükü la asidi. Te wü würüse la nü koro kpa füh mbükü kpala, fü ewü aceka kpï bane, gbo! te malayïka ka Me, te ngbü ka-ye ga füh mere da, ta te wüh o emö mbükü ne! Gbügbüra na ngbü eci aci lelele bala! Bongo kaka vi kpah avi kpïlïlï! 5Fü malayïka la arü amala ngü fü wü würüse la, gü ba, "Yi kpe cürü de! Ma wu eyi, gü ba, yi ngbü egïrï Yesu, ta te wüh bere engu füh rü gbegbete ne. 6Engu sene nda ma, angü ah zükü ka-ye gbü kpi eyi, baka ta te engu mala fü yi ne. Yi ceka la sanga, ta te ewü o kökö gbügbü na ne. Ah eyi kükürü! 7Te di bala, yi nü enü kere kere, yi mala nganga na fü wü kpara kaka, gü ba dene, 'Yesu zükü eyi! Ah tafa ka-ye eyi kpa engagira nü agbü Galïlaya. Wü nü enü, wü ena amaka engu kpala!' Dela ngü te ma le amala fü yi, ah dela." 8Te wü würüse la je ngü gömö malayïka bala, fü ewü ayia kpa füh mbükü la ʼduwa kere, de mere cürü te wü, kpah de mere tadu emaguma wü teka ngü la. Fü ewü anü de woro, teka amala nga ngü la fü du wü kpara ka Yesu la. 9O wüh ngbü la bü enü tete, fü ewü aceka kpï, gbo! te Yesu, te rü te kaje. Fü ah agü mandï fü ewü, gü ba, "Me di de yi!" Fü wü würüse la akoro kpakaka na, atï, abu nzökuta wü kötö, azoro lölö na, da ecu ngüngü na. 10Fü Yesu amala ngü fü ewü, gü ba. "Yi kpe cürü de! Yi nü enü, yi mala fü wü di enga wüna, de wüh nü agbü Galïlaya, angü wüh ena amaka ra kpala." Fü wü würüse la ayia anü amala ngü la, ba e te Yesu mala fü ewü la. 11Amba, o wü würüse la nü koro kpa füh mbükü Yesu la de, fü wü marajümïya, ta te ewü ngbü eceka kpï fütanga mbükü Yesu ne, fü wazi ewü ayia adu akoro. Fü ewü ayia sela ʼduwa, anü akoro agbü Yerüsalema, amala nga wü ngü, de te ngbü mere te-ye kpa füh mbükü Yesu ne, ʼburu fü wü mere kovo ka wü Yïsarayele, gü ba dene, "O ani ngbü efete mbükü, fü yiki-tö ayia amere te-ye. Fü malayïka ka Me akoro, anzi mere da de emö mbükü la asidi. Tïtïne kö Yesu gbü mbükü la nda ma!" 12Fü wü mere kovo la ayia aï wü gara wü bu wü, abiti, teka aro mö de ewü, agïrï mani, te ani ena amere teka ngü la. Fü ewü afï nga gara mani, amaka. Fü ewü ayia aza mere bi jiase, ato fü wü marajümïya la, 13amala ngü fü ewü kpekpeke, gü ba, "Ah le fü yi amala ngü la fü wü kpara, gü ba, 'Wü kpara ka Yesu koro gbü biti ne, o ani ngbü era ara, azi kökö na, anü sü di.' 14Te di bala, yi mere e akpe cürü de. Angü a wu eyi, gü ba, te Miri Pïlatü je, gü ba, wüh zi kö Yesu eyi, o yi ngbü era ara la, ah ena azïnga, fü ah ato kuru te yi. Amba, ngü ma, a ena anü, agu mamaguma me-a." 15Fü wü marajümïya la aje rïrï ka wü mere kovo la, aza jiase la. Fü ewü akpo da esu wu la fü wü kpara, gü ba, "Wü kpara ka Yesu koro zi kö Yesu eyi." Fü ngü la awü, abaya esüka wü di enga Yïsarayele ʼburu, zalü akoro di enatikine dene. 16Fütanga ngü la, fü du wü kpara ka Yesu, nzükpa de füh ye biri ne, ayia anü agbü Galïlaya. Fü ewü anü alï kpa füh gümba, ta te Yesu mala nganga na fü ewü ne. 17Fü ewü akoro amaka Yesu kpala. Baka te ewü wu Yesu, fü ngü la aga gbü jia ewü afa sü. Fü ewü abu nzökuta wü kötö, agbo nga ïïrï na. Amba maguma gara ewü fï bü ʼbasu ʼbasu, angü ngü la ngbü gbü jia ewü baka sirimbi. 18Gbü gara sïkpï, fü Yesu akoro kpah, amala ngü fü ewü, gü ba, "Wüba Me to mere wazi eyi fere, mene wazi agbü kpï, de mene füh kotö ne ʼburu esaka ra. 19Te di bala, yi baya, yi nü te nga sü füh kotö ne ʼburu, de yi mala ngari ra fü nguwa wü kpara ʼburu nde. Te wüh le ngü ka-ra eyi la, de yi to babatïza fü ewü te ïrï Wüba Me, de ïrï ra Ye Me, kpah de ïrï Nzïla Wazi Me. 20Yi mala nga wü rïrï, ta te ma mala fü yi ne, ʼburu fü ewü, de wüh di emere kpah bala. Ah le fü yi awu awu, gü ba, gbü wü sïkpï ʼburu, ma ena angbü de wü yi tundu, zalü akoro di gbü adu sïkpï, te ma ena adu akoro tete füh kotö ne." Dela ngü ta te Miri Yesu mala fü wü kpara ka-ye, te engu zükü tete gbü kpi.

will be added

X\