Matayo 25

1Fütanga ngü la, fü Yesu adu kpah amala gara mani fü ewü, gü ba, "Sïkpï ka dudu ka-ra, Ye Kpara ka Kpï, ena adi baka ngü te mere te-ye fü wü jaji würüse nzükpa, ta te ewü reke te-wü, ecï nga komoko, te le akoro aza kiri wü. Fü ewü ayia aza wü lamba ka-wü, asiya. Fü ewü ayia anü gbü biti la, kpa gba kiri wü, te komoko le aza ne. Fü ewü angbü kpala da ecï nga komoko la. 2Wü gara jaji würüse de ʼburuve ne, wüh de kpeke wü kpara. Fü ewü aza kpah gara mü-wa ka-wü gbü kölökö, anü di mini. Amba wü gara ewü de ʼburuve ne, wüh ka-wü de töndö wü kpara, wüh za gara mü-wa nda-wü de. 5Amba komoko ne, mü koro nda-mü kere de. Teka ngü la, fü wü jaji würüse nzükpa ne, ayia andïrï, atï ʼburu de ra. 6Ah te enü akoro etü biti la, fü komoko la ayia akoro, agüka wü kpara ʼburu agüka. Fü ewü ayia aje ri wü kpara da emï koko, de wü rere kpa tikpi, gü ba, 'Wayi! Komoko te le akoro aza tangbase ka-ani ne, koro eyi! Wü za lamba ka-wü eza, de wü koro kere! Teka de ani nü, maka te-ani de ewü, kpa te kaje kpala!' 7Fü wü jaji würüse de nzükpa ne ayia atïtï, azükü gbü ra, amaka wü lamba ka-wü ʼburu nuuu! Fü ewü ayia sela, akpo da ee ku lamba ka-wü, amba mü-wa nza eyi! 8Fü mene töndö ewü de ʼburuve ne, amala ngü fü wü bu wü, gü ba, 'Akooo, wü di enga ni ani, wü le mba ta-ngü te ani de mü-wa, angü nda-ani nza eyi!' 9Fü mene wü jaji würüse de ʼburuve, te jia ewü mba amba ne, ayia alügü ngü fü wü bu wü la, gü ba, 'Du mü-wa ka-ani mba cüküʼdaye. Ah tï atï tüngü ani ʼburu nda de. Wü kpe kere, wü se nda-wü.' 10Fü töndö wü jaji würüse la akpe anü teka ase mü-wa. Fü watï ye kiri ewü ne ayia akoro fütanga ewü la. Fü wü mene kpeke ewü, te ewü di nzo ne, ayia anü, amaka te-wü de wü komoko la. Fü ewü ayia atï de lamba ka-wü engagira nü, anü de wü komoko la agba ka. Fü komoko la aza ewü, arï di kpa esambü, de te wüh reke teka karama la, ani mö nga wü gö gö gö! 11Fütanga ngü la mba cüküʼdaye, fü mene töndö ewü ne adu akoro, arü emöngïtï, da eï ï, gü ba, 'Mere kpara! Mere kpara! Ye ü möngïtï fü ani ke!' 12Fü komoko la alügü ngü fü ewü, gü ba, 'Wü neh wü da? Ni wu wü nda-ni de! Ni tï adu aü möngïtï ka-ni kpah de!' " 13Fü Yesu adu amala ngü fü wü kpara ka-ye kpekpeke, gü ba, "Yi ceka te-yi ʼbe, de yi reke te-yi, ngbü nzo! Angü yi tï awu sïkpï, anga lö-ra, de te ma ena adu akoro tete na ne, nda-yi de." 14Fütanga ngü la, fü Yesu adu kpah amala gara mani fü wü kpara ka-ye, gü ba, "Sïkpï ka dudu ka-ra, Ye Kpara ka Kpï, ena adi kpah baka ngü, te mere te-ye fü wü kpara ka tima ka gara komoko, te yia nü nengete, agbü gara sü. Te komoko la yia enü tete, fü ah aï wü kpara ka tima ka-ye, ato jiase esaka ewü biri biri ʼburu, de wüh mere tima di, teka fü jiase la aga. 15Fü engu ato jiase fü gina kpara baka kama ʼburuve. Fü ah ato jiase fü eʼbaʼbasu kpara, baka kama ʼbasu. Fü ah ato nda ebabata kpara, kama biri. Ah ngbü ye süka jiase la fü ewü bala, te nga wazi ewü gbü tima. Fü ah ayia anü sü ka-ye agbü gara sü. 16Fü mene kpara te maka jiase kama ʼburuve ne, fü ah anü amere tima de jiase la. Fü ah ayia amaka gara fefeh na kpah kama ʼburuve. 17Fü eʼbaʼbasu kpara, te maka nda-ye kama ʼbasu ne, anü, amere kpah bala. Fü ah ayia amaka kpah gara fefeh na kama ʼbasu. 18Fü kiri ewü, de te maka nda-ye jiase ngbee kama biri ne, ayia anü, ajï du, aza jiase, de te mere kpara to fefe la, ati gbügbü. 19Fü mere kpara ka-ewü la ayia ayiri kpala baaala. Fü engu alügü nga ye adu akoro agba ye. Fü ah ayia aï wü kpara ka tima ka-ye, teka aceka jiase ka-ye, de te engu to esaka ewü ne. 20Fü mene kpara, ta te maka jiase kama ʼburuve ne, ayia akoro engagira mere kpara ka-ye la, agü ba, 'Mere kpara deyï, ye to ta jiase fü ni kama ʼburuve. Ye ceka la, tïtïne ni maka gara kpah eyi fefeh na, kama ʼburuve. Te di bala, wü jiase ka-ye eyi ʼburu kutu biri dene.' 21Fü mere kpara kaka-na, angbü de tadu. Fü ah agbo nga ïïrï na, agü ba, 'Wayi! Dela züka ngü! Ye de kpeke kpara! Ni to ta enga tima fü ye, ye mere eyi ʼduwa reke areke. Te di bala, ni ena ace mere bi wü ngü ka-ni esaka ye, fü ni ao ye mere kpara gbü tima ka-ni. Ye koro ekoro, de ani ngbü te sü biringbö tundu ake ye, de mere tadu.' 22Fütanga ngü la, fü eʼbaʼbasu kpara ayia kpah, akoro, agü ba, 'Mere kpara, ye to ta jiase fü ni, kama ʼbasu. Ye ceka la, tïtïne ni maka gara kpah eyi fefeh na, kama ʼbasu. Te di bala, wü jiase ka-ye eyi ʼburu kama bala dene.' 23Fü mere kpara kaka angbü kpah de tadu. Fü ah agbo kpah nga ïïrï na, agü ba, 'Wayi! Dela züka ngü! Ye kpah de kpeke kpara! Ni to ta enga tima fü ye, ye mere eyi ʼduwa reke areke. Te di bala, ni ena ace mere bi wü ngü ka-ni esaka ye. Fü ni ao ye mere kpara gbü tima ka-ni. Ye koro ekoro, de ani ngbü te sü biringbö tundu ake ye, de mere tadu.' 24Fü mene kpara, ta te nda-ka jiase di ngbee kama biri ne, adu akoro sidi nga wü bu ye la, amala fü mere kpara ka-ye la, gü ba, 'Wayi, mere kpara, ye ceka la, jiase ka-ye ta te ye to fü ni ne, ah dene. Ni kpe cürü ye, angü ni wu eyi, gü ba, ye de kpeke kpara. Te ye ru e de la, ye ngbü ka-ye fï bü emaka e. Teka ngü la, fü ni aza jiase ka-ye la, awo gbü tö. Ah dene.' 26Fü ngü la asiti te mere kpara kaka la. Fü ah amala ngü fefe, gü ba, 'Ye de siti kpara! Ye kpah de mürü töndö! Te ye ena awu ta kpo, gü ba, ni de kpeke kpara, te ni ngbü emaka wü e gbü wazi ka-ni la, ye za ta jiase ka-ni la, ao kpaka wü kpara, te ewü ngbü eceka kpï fütanga jiase ne, de, neh teka ne? Baka te ni du ne, de bane ni ena amaka jiase ka-ni la, de gara na füh ye.' 28Fü mere kpara la adu afü te-ye, amala ngü fü wü gara kpara ka tima ka-ye, gü ba, 'Wü za jiase de kama biri la esasaka asidi, de wü to fü mene kpara, te nda-ka di kutu biri ne. 29Angü mene kpara te mere tima kpekpeke, fü ah amaka mere bi e, wüh ena aza kpah gara wü e, ato fefe. Amba mene kpara te mere tima mbi mbi de, mba enga e te di esasaka, wüh ena aza esasaka asidi. 30Amba teka ngü ka komoko ne, engu de töndö kpara! Wü za engu, wü gü agbü mbiri sü, de ah ngbü, ah ku gba, da enyüma gbü te ye de mere cïnga kpala.' " Dela ngü te Yesu mala teka wü kpara ka-ye, de wüh ngbü kpekpeke, da eo to wü, teka tima te ni to fü ewü ne, de wüh di emere de wazi wü ʼburu, zalü koro gbü sïkpï, te ni ena adu akoro tete. 31Fü Yesu adu kpah amala gara ngü fü wü kpara ka-ye la, gü ba, "Gbü adu sïkpï, de-ra, Ye Kpara ka Kpï, ma ena adu akoro de mere wazi, de wü malayïka ka-ra mini. Fü ra angbü füh kpökpö ka-ra, teka akolo lïya ka wü kpara füh kotö ne ʼburu. 32Fü wü malayïka la abiti wü kpara füh kotö ne ʼburu engagira ra. Fü ra adu aye süka ngü ka-ewü, baka e te kpara ngbü eye süka wü kambiliki ka-ye de wü meme. 33Mene züka wü kpara, te ewü di ba wü kambiliki ne, ma ena aza ewü, ao gbü kokpa ka-ra. Amba mene siti ewü, te ewü di baka wü meme ne, ma ena ao ewü gbü kamisü ka-ra. 34Fü ra adu amala fü züka wü kpara, te ewü di gbü kokpa ka-ra ne, gü ba, 'De-wü, wü de wü kpara te Wüba, Me, küwa wü eyi. Wü koro ekoro akine, de a ngbü de mere tadu gbü züka sü ka Me, ta te engu reke ce o fü wü gügü, o engu mere kotö ne la de ne. 35Angü wü ngbü ta ele ta-ngü te ra, o ra ngbü de wü füh kotö ne. Wü to ta e-mazü fere, o tala ngbü emere ra. Wü to ta ngu fere, o gümü ngu ngbü emere ra. Ma ngbü ta ekolo sü te kaje ba ganzi kpara, fü wü aza ra ngba tete agba wü. 36Ma ngbü ta ngïrïmu, fü wü ato bongo fere. Ta te ma ngbü eke tete, fü wü akoro ta aceka ra, ale ta-ngü te ra. Ta te ma ngbü agbü ku, fü wü akoro aceka ra, ale kpah ta-ngü te ra.' 37Te züka wü kpara la ena aje ngü la bala, wüh ena alügü ngü fere, gü ba, 'Apa! Mere kpara! Ngü la mere te-ye bala, neh elaye? Ani maka ye te tala ngbü emere ye, fü ani ato zü-e fü ye, neh elaye? Gümü ngu ngbü ta emere ye, fü ani ato ngu fü ye anzö, neh elaye? 38Ye koro ta baka ganzi kpara, fü ani aza ye ngba tete agba ani, neh elaye? Ye ngbü ngïrïmu, fü ani ato bongo fü ye, neh elaye? 39Ye ngbü ta eke, anga wüh zoro ta ye gbü ku, fü ani anü aceka ye, ale ta-ngü te-ye, dela neh elaye? Ani wu ngü la nda-ani de.' 40Ma ena alügü ngü fü ewü, gü ba, 'Ma ngbü emala fü wü dene zu ngü. Wü ngü ta ʼburu, te wü ngbü mere fü wü mürü cïnga de kpakine ne, wü ngbü mere dela ʼburu fere. Angü wü mürü cïnga la de wü di enga wüna!' 41Fütanga ngü la, ma ena adu afü te-ra, amala ngü fü siti wü kpara, de te ewü di gbü kamisü ka-ra ne, agü ba, 'De-wü deyï, wü de siti wü kpara! Ma le ngü ka-wü de! Wü yia gbü jia ra sela asidi! Wüh ena aza wü, asö agbü mere wa, te wüh deke teka Satana de wü kpara ka-ye. Wü ena angbü kpala fï mere badi! 42Kükürü de, angü wü le ta-ngü te ra ta de. Tala ngbü ta emere ra, wü le ato zü-e fere de. Ma ngbü ta ekpi gümü ngu, wü le ato ngu fere kpah de. 43Ma koro ta agba wü baka ganzi kpara, wü le aza ra ngba gba wü de. Ma ngbü ta engbü ngïrïmu, wü le ato bongo fere de. Ma ngbü ta eke ake, wü le ale ta-ngü eküte ra kpah de. Wüh zoro ra ta, gü agbü ku, wü le anü aceka ra kpah de.' 44Wüh ena alügü ngü fere, gü ba, 'Apa! Mere kpara! Ngü la mere te-ye bala, neh elaye? Ani maka ta ye de tala te ye neh elaye? Ta te gümü ngu ngbü emere ye ne, ani wu ye nda-ani ta de. Ye ngbü ta enü te kaje, neh elaye? Ye ngbü ta ngïrïmu, anga eke ake, neh elaye? Wüh zoro ye gbü ku ta elaye, fü ani ace ta kpo da ele ta-ngü te ye ne?' 45Ma ena alügü ngü fü ewü, gü ba, 'Ma ngbü emala fü wü dene zu ngü! Gbü wü sïkpï ta te wü ngbü engbü de wü bu wü kpa füh kotö kpakine ne, wü le adi ele ta-ngü te wü mürü cïnga de. Te di bala, wü ngü de te wü le amere fü wü bu wü de ne, wü ce dela da emere cu fere. Angü wü mürü cïnga la de wü di enga wüna!' 46Teka ngü la, wüh ena aza siti wü kpara la, agü ewü agbü mere du ka wa, fï mere badi. Amba teka züka wü kpara ne, wüh ena aküwa ka-wü agbü sü ka Me fï mere badi." Dela wü ngü te Yesu mala fü wü kpara ka-ye teka adu sïkpï, te engu ena adu akoro tete ba Mere Miri.

will be added

X\