Matayo 24

1Fütanga ngü la, fü wü Yesu ayia ace tambasü Mere Kambü ka Me, akpo angbü enü ka-wü. Fü wü kpara kaka arü amala ngü fefe na, gü ba dene, "Mere kpara deyï, ye ceka la, züka Kambü ka Me ne. Wüh jï engu kpekpeke, reke areke!" 2Yesu gü ba, "Yi mere e afï, gü ba, Mere Kambü ka Me la ka-ye kpekpeke ne, de. Angü, ma mala fü yi dene zu ngü, te gara, wüh ena amürü kambü la amürü ʼburu kötö. Da biringbö, te wüh ena ace ao füh kiri ye sela, ena adi ma." 3Fü wü Yesu ayia ace sü la, anü alï angbü ka-wü kpa füh da de ïrï ye Olïve ne. Te wüh koro kpala, fü wü kpara kaka ayia akoro kpakaka, ayi-tata, gü ba, "Mere kpara, mba ngü ladü te ani le ayi-ta ye di. Ye gü ba, 'Wüh ena amürü mere Kambü ka Me la asidi.' Ngü la ena amere te-ye neh elaye? Ah ena adi gbü adu sïkpï, te ye ena adu akoro, angbü ba mere miri füh kotö ne? Anga ngü, te ena agü tamu ngü la fü ani, gü ba, sïkpï la koro eyi gbamari, ah de ne ngü ne?" 4Fü Yesu alügü ngü fü wü kpara ka-ye la, gü ba, "Yi ceka te-yi mbi teka wü mürü fiti, angü wüh ena afiti yi. 5Kükürü de, angü mere bi wü kpara ena akoro, amere mani te ïrï ra, afiti wü bu wü, gü ba, 'Ani me-ani de mere miri, te Me tima teka aküwa wü kpara.' Te di bala, mere bi wü kpara ena ale ngü ka-ewü la. Amba nda-yi, yi mere e ale ngü ka-ewü la de. 6Angü mere bi wü ngü ladü, te wüh ena amere te-wü feke, o adu sïkpï la koro la de. Nguwa wü kpara ena ayia atï de gü, gbü nzö nguwa wü gara kpara. Yiki-tö ena amere te-ye gbü mere bi wü sü füh kotö ne. Kpah bala, gbü wü gara sü, mere siti kpïrï tala ena atï gbü nzö wü kpara. Dela ʼburu wü ngü te wüh ena amere te-wü füh kotö ne, o adu sïkpï koro la de. Wü ngü la ʼburu ena adi baka gina keke, te kpo da emere würüse te ele ayaka. Te di bala, yi mere e akpe cürü de, angü Me ladü, te ena areke wü ngü la ʼburu, ba e te engu le. 9Amba nda-yi, yi ceka te-yi mbi, de yi rü kpekpeke, angü wü kpara füh kotö ne ʼburu ena angbü ekpü yi akpü teka ngü ka-ra. Wüh ena azoro wü gara yi, ato fü wü miri, ato cïnga te ewü. Fü ewü amömörö kpah wü gara yi. 10Gbü wü sïkpï engu la, mere bi wü kpara ka-ra ena ace ngü ka-ra. Gara ewü ena akpo da ekpü yi. Kpah bala, wü gara ena angbü da egü tamu yi fü wü vügü. 11Mere bi wü mürü wu ena akoro teka afiti wü kpara ka Me, gü ba, 'Ani de wü mürü dofo ka Me.' Fü mere bi wü kpara ale ngü ka-ewü. 12Wü kpara ena akpo kpah angbü emere bi wü siti ngü, gbü wü sü füh kotö ne ʼburu. Teka ngü la, mere bi wü kpara ena ace ngü ka-ra. 13Amba te mü tüka te-mü, alala gbü ngü ka-ra, akoro di gbü adu sïkpï la, Me ena aküwa mü aküwa fï mere badi. 14Amba ah le de yi mala ngari ra fü nguwa wü kpara füh kotö ne ʼburu feke, de wüh fü maguma wü, o ra du koro la de." 15Fü Yesu adu amala ngü fü ewü, teka Mere Kambü ka Me, te wüh ena amürü la, gü ba, "Fanü fanü sirimbi ladü, te ena agü tamu sïkpï la fü yi. Angü gara vügü ka Me ladü, te ena akoro, asiti sü, da emere wü gara lara ngü kpa esa Mere Kambü ka Me la, gegege ba e te mürü dofo de ïrï ye Danyele ba ta gügü gbü Ngari Me ne." Dela ngü te Yesu lügü fü wü kpara ka-ye, teka sirimbi, te ena akoro agü tamu sïkpï, te ewü ena amürü Mere Kambü ka Me agbü Yerüsalema tete na ne. De-mü, te mü ngbü etanga ngü ne, ah le fü mü ao fïngangü ka-mü, teka aje si-ngü la mbi mbi mbi. 16Fü Yesu adu amala ngü fü ewü, gü ba dene, "Te yi wu sirimbi la eyi la, yi mere e angbü gbü Yudaya de! Yi kpe ʼduwa kpa enzö mere gümba, agbü gü! 17Kpah bala, te siti ngü la koro maka mü, te mü ngbü efe te-mü kpa esa e la, mü mere e adu arï kpa esambü, akö wü e ka-mü tïne de. Mü kpe ʼduwa akpe, angü siti ngü la ena amaka mü. 18Te siti ngü la koro maka mü, da esö e ka-mü kpa gbü yï la, mü mere e adu kpa ekötï, ato züka bongo te mü kpah de. Mü kpe ʼduwa akpe. 19Gbü wü sïkpï la, mere siti cïnga ena amere wü würüse, te ewü ena adi de bu wü, kpah bete mene ewü, de te ewü ena adi de wü vürü jaji eküte wü ne. Dela ne cïnga ne! Cïnga la ena afa wü gara cïnga füh kotö ne ʼburu. 20Ah le fü yi adi eku gba fü Me, teka de siti ngü la mere e akoro gbü sïkpï ka Me de, angü wüh ena ani wü möngïtï ʼbaranga ʼburu ani. Anga ngü la mere e amere te-ye gbü bigü kpah de, angü agö bete zü ena amere yi esiti, te yi ena akpe la. 21Kü baka te Me mere kotö ne, mere cïnga baka e la mere te-ye nda la de. Gara cïnga te ena akoro baka engu la fütanganga na, ah ena adi kpah ma. 22Fü Me adu afï nga wü kpara ka-ye, te engu fe ewü ne, gü ba, 'Te di bala, ni ena akolo sïkpï la mba cogbo, teka ngü ka wü kpara ka-ni la, angü wüh ena akpi.' Te Me ena amere ta bala de la, de bane kpara biringbö, te ena aküwa te gara, esaka siti ngü la, ena adi kpo ma." 23Fü Yesu adu kpah amala gara ngü fü wü kpara ka-ye, gü ba, "Gbü wü sïkpï la, wü mürü wu ena akoro, adi efiti wü bu wü. Gara ena agü ba, 'Ni de miri, te Me tima ni teka aküwa wü.' Gara ena agü ba, 'Ni nda-ni de mürü dofo, te ni ngbü emala ngari Me fü wü kpara.' Wüh ena akpo angbü emere bi wü ngü ka talara, te ena afiti wü kpara ʼburu. Wüh ena agïrï kpah kaje teka afiti cu yi, wü kpara ka-ra. Te di bala, yi ceka te-yi ʼbe, yi mere e aje ngü ka wu ka-ewü la nda-yi de! Te gara kpara mala ngü fü yi, gü ba, 'Miri te Me tima ne koro eyi! Ah ladü kpakine,' anga 'Ah ladü kpane,' yi mere e ale ngü kaka la nda-yi kpah de. 25Yi ceka te-yi mbi, angü ma ngbü eyi emala ngü ne fü yi te enga gina dene, o ngü la koro la de, teka fü yi amba jia yi amba, angü wü mürü wu la ena afiti yi. 26Te di bala, te wüh mala fü yi, gü ba, 'Yi ceka la! Miri te Me tima ne koro eyi! Engu ladü agbü gü kpala,' yi mere e anü kpala nda-yi de. Kpah bala, te wüh gü ba, 'Miri la wo te-ye eyi kpakine la,' yi mere e ale ngü la nda-yi kpah de. 27Kükürü de, angü dudu ka-ra, Ye kpara ka Kpï, wü kpara gbü nga nzö sü füh kotö ne, ena aci awu ngü la te nga wü ʼburu. Angü ah ena adi baka ülele te ngbü eü, da elofo sü. Dudu ka-ra ena adi bala, ah tï awo te-ye de! 28Angü wü kpara ʼburu ena awu ngü la. Ah ena adi baka sü te kö nü di ladü tete, fü wü nügünü, de wü gara wü lu, abiti te-wü ʼburu füh kö nü la. 29Fütanga ngü la, gara wü ngü ena ayia kpah amere te-wü kere, baka ngü ta te wüh ba gbü Ngari Me, gü ba dene, 'Wü lara ngü ena akpo da emere te-wü kpa gbü kpï. Angü kokpï, de wü e kpa tikpi ʼburu, ena akpo da eyiki. Wü küfara ena akpo kpah da egügürü. Ra ena afü te-ye baka biti. Fe tï adu asü kpah de.' 30Fütanga ngü la, de-ra Ye Kpara ka Kpï, fü ra adu tïne akoro. Wü kpara ʼburu ena aci da eku gba ka cürü, angü wüh ena awu ra agbü kpï kpala, te ma ngbü ekoro de mere wazi, baka Mere Miri. Fü ewü aci ʼburu acu ngü ra. 31Kono ena awü, fü wü kpara aje ʼburu. Fü ra ayia atima wü malayïka ka-ra, teka abiti wü kpara ka-ra, te ma fe ewü ne. Wüh ena abiti ewü edebu wü sü bala ne ʼburu, akoro di fere. Fü a angbü tundu de ewü fï mere badi." 32Fü Yesu adu amala gara ngü fü ewü gbü mani, gü ba, "Ngü ka dudu ka-ra ena adi baka ngü ka wü rü. Angü te yi wu wü rü, te ngbü eyi ayi, da eto to kpa wü la, yi ngbü egü neh fe? Yi tï eyi awu, gü ba, bigü koro eyi. Ah bala de? 33Kpah bala, te yi wu wü sirimbi, te ma mala nganga fü yi ne eyi la, de yi wu awu, gü ba, sïkpï ka dudu ka-ra la koro eyi gbamari. 34Ma ngbü emala fü yi dene zu ngü. Siti cïnga la ena amaka yi fanü, amba ngü la tï anza ngü ka-yi, wü kpara ka-ra nda de. 35Ngü te ma ngbü emala fü yi dene, ah de kpeke ngü, te ena angbü fï mere badi. Angü Me ena agara kotö ne ake kpï, fü ngü ka-ewü anza ʼburu. Amba ngü ka-ra tï anza nda de." 36Fü Yesu adu kpah, amala fü wü kpara ka-ye, gü ba, "Te yi le ayi-ta ra, gü ba, sïkpï, te ma ena adu akoro tete na, ena adi elaye la, ma ena alügü ngü fü yi, gü ba, sïkpï la, kpara biringbö, te wu ngü kaka, nda ma. Wü malayïka agbü kpï, wüh wu kpah de. De-ra, te ma di de Ye Me ne, ma wu kpah de. ʼDuwa Wüba Me wu ngü teka sïkpï la duu me-ye. 37Te di bala, ah le de yi reke te-yi ngbü nzo, angü sïkpï ka dudu ka-ra ena adi baka ngü, ta te mere te-ye gbü re ka mere kundu nih Nüwa ne. 38Angü wü kpara ena angbü ezüfa wü e, da enzönzö wü fï ka-wü, kpah da eza te-wü, wüh tï afï ngü ka Me nda-wü kpah de. Ma ena adu akoro, agüka ewü gbü ngü ka-ewü la, kpah ba e ta te mere agö güka wü kpara gbü sïkpï, te Nüwa rï tete gbü zabu, fü mere ngu la amörö ewü ʼburu ne. 40Ma ngbü emala fü yi dene zu ngü. Gbü sïkpï te ma ena adu akoro tete, te wü kpara ʼbasu ngbü emere tima agbü yï la, ma ena aküwa mene kpara te le ngü ka-ra eyi. Fü ra ace mene kpara te le ngü ka-ra de ne. 41Te wü würüse ʼbasu ngbü eyö zu ka-wü tundu gbü sü biringbö la, ma ena aküwa mene te le ngü ka-ra eyi. Fü ra ace kpah mene te le ngü ka-ra de ne. 42Te di bala, de yi reke te-yi, yi ngbü nzo, angü yi wu sïkpï, de te Miri ka-yi ena adu akoro tete na ne, nda-yi de. 43Ah le de yi fï nga ngü la mbi mbi mbi. Angü te mürü kötï ena awu ta kpo, gü ba, 'Mürü zi ena akoro gbü biti ne, teka azi wü e ka-ni la,' de bane, ah tï ara nda de. Ah ena angbü ta ecï sü, teka afete mürü zi la, aliki, angü mürü zi la ena arï kpa esambü, azi wü e ka-ni. 44Teka ngü la, ma ngbü emala ngü ne fü yi kpekpeke, gü ba, ah le fü yi adi ecï sü, angbü kpah nzo, angü sïkpï ka-ra, Ye Kpara ka Kpï, te ma ena adu akoro tete ne, yi wu nda-yi de." 45Fü Yesu adu kpah amala gara mani fü ewü, gü ba, "Te mü ena adi de mere kpara ka tima gbü nzö wü bu mü la, ah le fü mü amere tima ka-mü mbi mbi mbi. Te mere kpara ka-mü yia nü agbü gara sü nengete la, ah le de mü mere wü ngü ʼburu te engu ce, o esaka mü, da egafa zü-e fü wü bu mü, kpah ba e te engu mala fü mü ne, reke areke. 46Angü te mere kpara ka-mü du maka mü, da emere wü ngü la ʼburu mbi mbi mbi la, ngü la ena ato mere tadu fü mü. 47Ma ngbü emala fü mü dene zu ngü. Mere kpara ka-mü ena ace wü ngü ka-ye ʼburu esaka mü. Fü ah ao mü ba mere kpara, te ena angbü eceka kpï fütanga wü e ka-ye ʼburu. 48Anga te mü fï emaguma mü, gü ba, 'Mere kpara ka-ni tï adu akoro kere nda de,' 49fü mü angbü ka-mü bü tündü, da emimiki wü bu mü, efï ka-mü bü nzö nga mü, fü mü angbü ka-mü bü da ezüfa wü e, da enzö wü fï, eküküya di la, 50de-ra mere kpara ka-mü, ma ena adu akoro gbü sïkpï te mü wu de, fü ra amaka mü gbü ïrï-to. 51Te di bala, ma ena aza mü, ato esüka siti wü kpara, de wü mürü mani. Fü ra ato mere siti kuru te yi. Fü yi angbü da enyüma gbü te yi de ewü, de mere cïnga kpala!"

will be added

X\