Matayo 23

1Fütanga ngü la, fü Yesu arü amala ngü fü wü kpara ka-ye, de mere bi wü kpara la ʼburu, 2gü ba, "Mene wü Farusi, te ewü gü ba, ani de wü mürü rïrï ne, wüh ngbü nda-wü bü erï wü kpara de Rïrï te Me to fü Müse ne, kükürü kükürü bala. Wüh wu Rïrï di bü kpo, amba wüh mere wü ngü, te ewü ngbü erï yi di la, nda-wü de. Te di bala, ah le fü yi adi eje wü ngü, te ewü ngbü erï yi di la, fü yi angbü emere ereke areke. Amba yi mere e angbü emere mani baka nda-wü la de. Angü wüh ngbü emala fü yi, de yi di emere Rïrï ka Me, amba nda-wü, wüh le adi emere Rïrï ka Me de maguma wü ʼburu nda-wü de. 4Wüh ngbü eza wü gara mere bi rïrï ka-wü, eo kpekpeke füh Rïrï ka Me, baka mere tiri e, te ewü ngbü eo gbü nzö wü kpara. Amba cu de-ewü bane, wüh mere Rïrï engu la nda-wü de! 5Wü mürü rïrï la, wüh ngbü emere mere bi wü rïrï ka gele ka-wü la, teka de wü kpara wu ani baka züka wü kpara ka Me. Teka ngü la, fü ewü angbü eba wü Ngari Me eküte wü e, angbü ei eraku wü, wü gara gbü wü kpa wü. Fü ewü angbü fï bü eto bongo, te wüh ngbü emere tima ka Me di ne, eküte wü, teka fü wü kpara adi eceka ani ba wü züka kpara ka Me. 6Kpah bala, wüh ngbü ele, de wü kpara ʼburu di ecu ngü ani. Teka ngü la, te ewü koro gbü sü ka karama, anga te ewü rï kpa esambü ka biti-te la, wüh le ʼduwa adi engbü füh züka kpökpö, kpa engagira nü. 7Kpah bala, te ewü maka te-wü de wü kpara te kaje la, wüh le de wüh di egü mandï fü ani, da ecu ngü ani acu, kpah da eï ani, 'Mere kpara.' 8Amba de-yi, wü kpara ka-ra, yi mere e ao te-yi, de wü kpara di ecu ngü yi ne de. Yi mere e ale de wüh di eï yi, mere kpara ne, kpah de, angü ma de mere kpara ka-yi ʼduwa me-ra. Te di bala, yi ʼburu de wü di enga ni. Kpah bala, yi cu ʼduwa ngü Me. Yi mere e acu ngü wü kpara füh kotö sene, ao ewü memere baka Wö yi, Me ne, kpah de. Angü Me, te di agbü kpï ne, de Wö yi ʼduwa me-ye kpikpi ye. 11Te mü le angbü mere kpara esüka wü bu mü la, ah le de mü fü te-mü baka labï, te ngbü emere tima fü wü bu ye. 12Te mü le ao te-mü memere la, Me ena adu ao mü baka labï. Amba te mü o te-mü baka labï la, Me ena adu ao mü mere kpara me-ye." 13Fü Yesu adu afü te-ye, akpo da emala ngü fü wü mürü rïrï la, gü ba, "De-yi wü Farusi, te yi gü ba, ani de wü mürü rïrï ne, Me ena ato mere kuru te yi te gara, angü yi de wü mürü mani. Yi gü ba, ani de züka wü kpara ka Me me-ani, amba yi le to ngari Me, de te ma ngbü emala ne, nda-yi de. Gara siti ngü ka-yi te fa sü, angü yi ngbü kpah etïrï kaje fü wü gara kpara, de wüh mere e, ale to ngü ka Me la kpah de. Te di bala, yi de wü mürü mani! 14De-yi wü mürü rïrï, Me ena ato mere kuru te yi te gara, angü yi de wü mürü mani. Yi ngbü ezi e ka wü würüse wökö gbü mani, ece ewü, eo gbü cïnga. Yi ngbü kpah eyi-ta Me, teka mere bi lö-ra, de wü kpara di ecu ngü ani, kpah teka fü ewü adi eceka ani ba kpeke wü kpara. Te di bala, yi ena amaka mere siti kuru te gara afa sü! 15De-yi wü mürü rïrï, Me ena ato mere kuru te yi te gara, angü yi de wü mürü mani. Yi ngbü endoro gbü wü sü füh kotö ne ʼburu, teka agïrï kpara te yi ena afü, de ah le ngü ka-ani la, gü ba, ah de zu ngü ka Me. Amba te kpara la du le ngü ka-yi eyi la, fü yi adu angbü erï engu, de mere bi wü siti ngü ka-yi, te yi ngbü emere ne. Te di bala, Me ena adu ato mere siti kuru te yi afa sü, angü yi rï engu de siti ngü ka-yi la me-yi! 16De-yi wü mürü rïrï, Me ena ato mere kuru te yi te gara. Angü yi ngbü erï wü kpara de ngü ka Me de mani, amba ngü de te yi ngbü erï ewü di la, ah de ngü ka Me nda de. Yi ngbü emala, gü ba, 'Te kpara kïna te-ye te ïrï Mere Kambü ka Me la, kïna kaka la, tï amere engu esiti de. Kpah bala, te kpara kïna te-ye te ïrï cangalï, te wüh ngbü ecuru laʼbï fefeh fü Me ne la, kïna la mere engu esiti kpah de.' De bala ne töndö ngü ne? Te kpara kïna te-ye bala, fü ah adu ace kïna ka-ye la, Me ena ato kuru tete ato! Angü wü e la ʼburu de kpeke e gbü jia Me. Te ah de Kambü ka Me, bete diki-se de gbügbü la, anga cangalï, te wüh ngbü eto laʼbï fü Me fefeh, bete laʼbï la, wüh ʼburu de kpeke ngü gbü jia Me. 20Te di bala, te mü kïna te-mü te ïrï Kambü ka Me la, mü ngbü dela ekïna te-mü kpah te ïrï Me. Kpah bala, te mü kïna te-mü te ïrï cangalï, te wüh ngbü eto takpa fefeh fü Me ne la, mü ngbü dela kpah ekïna te-mü te ïrï Me. 22Te mü ngbü ekïna te-mü te ïrï kpï la, mü ngbü dela kpah ekïna te-mü te ïrï Me, angü kpï de kpökpö ka Me. 23De-yi wü mürü rïrï, Me ena ato mere kuru te yi te gara, angü yi de wü mürü mani. Angü yi ngbü eo fïngangü ka-yi kpekpeke teka rïrï ka gele ka-yi. Baka te yi ngbü eto tari wü e ka-yi ʼburu fü Mere Me ereke areke ne, ah esiti de. Amba yi le ato maguma yi fü Me de, teka ne? Yi le ale ta-ngü te wü mürü cïnga kpah de. Kpah bala, yi ngbü ekolo ngü ka wü kpara de mani. Yi ngbü emere ngü bala, teka ne? Dela ngü te siti gbü jia Me fa sü. 24Yi gü ba, 'Ani ngbü erï wü bu ani,' amba yi wu ngü ʼburu ʼburu de! Yi ngbü eo fïngangü ka-yi mba teka enga ngü cüküʼdaye, fü yi adu ace memere na ne ka. Yi ngbü baka kpara te gü jia ye bü te enga bükümü cüküʼdaye gbü ngu te engu le anzö, fü ah ayia aza bükümü asidi. Amba mere siti nzeke ladü gbü ngu la. Fü kpara la adu aza nzeke la, anzö, ami aguvu ye! 25De-yi wü mürü rïrï, Me ena ato mere kuru te yi te gara, angü yi de wü mürü mani. Angü maguma yi baka ndüʼba anga sila, de te yi ngbü ezürü bü küküte ereke areke ne, amba yi zürü gbügbü na nda-yi de. Siti fïngangü, de ngü ka zi, bete gümü e sibi emaguma yi fa sü! 26De-mü, te mü gü ba, ni de Farusi ne, jia mü ni eyi ani! Ah le fü mü areke maguma mü, teka de wü kpara ʼburu wu mü, gü ba, mü zu de kpara ka Me fanü. 27De-yi wü mürü rïrï, Me ena ato mere kuru te yi te gara, angü yi de wü mürü mani. Yi baka wü mbükü te wüh fa de ründü reke areke, amba kpa gbügbü kpala, bü wü biki kpara, te zi eyi azi, te sese ngbü efu afu. 28Ah teka ngü ka-yi kpah bala. Wü kpara ngbü eceka yi baka züka wü kpara nda-wü bü kükürü, amba kpa emaguma yi, wü mani de wü siti ngü sibi fa sü! 29De-yi wü mürü rïrï, Me ena ato mere kuru te yi te gara, angü yi de wü mürü mani. Yi ngbü esu wu te-yi, da ereke mbükü wü mürü dofo ka Me ta gügü ne, gü ba, ani ngbü dela ecu ngü ewü. 30Amba wü kundu yi ngbü mömörö wü mürü dofo la me-wü! Yi ngbü esu wu, gü ba, 'Te ani ena adi ta ladü gbü wü re ka wü kundu ani de kpala la, de bane ani tï ale ngü ka-ewü, te ewü ngbü mömörö wü mürü dofo la, nda-ani de.' 31Amba ngü ka-yi de te yi ngbü emere la, ah kpah baka nda wü kundu yi, angü yi le amörö ra, kpah baka te wü kundu yi mörö wü mürü dofo la. Teka ne de, angü yi le aje ngü ka-ra, te ma ngbü erï yi di ne, nda-yi kpah de. 32Ngü ma! Ah le de yi mere siti ngü la emere bala eküte ra, angü maguma yi ngbü fï bü enzu, baka nda wü kundu yi! 33Yi de siti wü kpara baka wü kpürü! Yi ngbü fï bü da emömörö wü kpara! Yi ena aküwa neh baye baye? Te di bala, Me ena ato mere siti kuru te yi, te gara. 34Amba fanü fanü, Me le ta eyi fü yi aküwa. Te di bala, fü Me amala, gü ba, ni ena atima wü mürü dofo kpaka yi, kpah de wü kpeke kpara, te ewü ena arï yi de ngari ni, Me, teka fü yi afü maguma yi, adu kpaka ni. Amba wüh ena arï yi de ngü la bala ma! Yi tï ale ngü ka-ewü la nda-yi de! Yi ena abere gara ewü, amörö füh rü gbegbete. Fü yi asüma gara ewü gbü jia wü kpara ʼburu. Yi ena aliki kpah gara ewü gbü wü mere kötï ka-yi asidi. 35Te di bala, Me ena ato mere kuru te yi teka ngü la. Ma ngbü emala fü yi dene zu ngü, ah le de yi ceka ʼbe! Ah kpo te kpi ka Abele, gina kpara ta te wüh mörö füh kotö ne, akoro te kpi ka Zakarïya, ta te wüh mörö etambasü Mere Kambü ka Me ne, lïya ka ngüte wü kpara ka Me la ʼburu ena adi gbü nzö yi, angü yi le ngü ka-ra de." 37Fü Yesu adu angbü de mere cïnga, gü ba, "Ööö! Yi ceka la mere cïnga te ena amaka wü kpara ka Yerüsalema ne te gara! Angü wüh ngbü emömörö wü mürü dofo, te Me ngbü etima fü ewü ne ʼburu amörö asidi. Ma ngbü ta ele abiti wü di enga Yïsarayele ʼburu, teka aküwa ewü, baka yï-ngü te ngbü ebiti wü di enga ye, esa mbula ye, amba wüh le nda-wü de! 38Te di bala, Me tï ale ngü ka-ewü kpah de! Ah ena ayia ka-ye ace mere Kambü ka-ewü, ka Me, agbü Yerüsalema de kpala. Fü wü vügü akoro, amümürü mere Kambü la, de mere kötï ka-ewü ʼburu, te gara. 39Ma emala fü yi dene zu ngü. Wüh tï awu ra tïne de, zalü te ewü ena afü maguma wü, adu ale ngü ka-ra, gü ba, Me tima ra me-ye fanü." Dela ngü ta te Yesu mala teka mere kuru, te Me ena ato te wü di enga Yïsarayele ne.

will be added

X\