Matayo 22

1Fütanga ngü la, fü Yesu adu kpah amala gara ngü fü wü kpara la gbü mani, gü ba, 2"Ma le asere la fü yi, kaje te Me ngbü ele, de wü kpara ʼburu koro tete wü kpara ka-ni. Kaje la, ah baka e dene. Gara miri ta ladü, te reke mere karama teka ye ye, te ele aza würüse. Fü miri la atima ngü fü mere bi wü kpara, teka de wüh koro, wüh zü karama la. 3Te sïkpï ka karama la tï tete, fü miri la ayia atima wü kpara ka tima ka-ye, de wüh nü, wüh ï wü kpara, de te ni tima ngü fü ewü terane ne, gü ba, 'Tïtïne sïkpï ka karama tï eyi. Wüh koro ekoro ʼburu enatikine, azü e.' Amba wü kpara, de te wüh ï ewü ne, wüh le akoro nda-wü de. 4Fü engu adu kpah atima wü gara kpara ka tima ka-ye, gü ba, 'Wü nü, wü mala ngü fü wü kpara, de te ni ï ewü ne, kpekpeke, gü ba, "Tïtïne ni mörö mere bi wü yiti ka-ni eyi. Wüh zï wü e la kpah eyi ʼburu, ce o nzo. Ah le de wü koro kere, teka azü wü e la, angü wü e la ena asiti!" ' 5Amba wü kpara la, yi fï ngü teka karama la nda-yi de! Fü yi ayia anü ka-yi, teka amere wü ngü ka-yi, ba e te yi ngbü ele. Fü gara anü ka-ye, amere tima agbü yï ka-ye. Fü gara anü nda-ye, ase wü e ka-ye. 6Fü wü gara azoro wü kpara ka tima ka miri la, amemere lara ewü, adu amömörö ewü ʼburu. 7Fü ngü la ayia ake te miri la afa sü. Fü engu ayia atima wü marajümïya ka-ye, amömörö wü kpara la, acuru kötï ka-ewü ʼburu asidi. 8Fütanga ngü la, fü engu adu amala ngü fü wü kpara ka tima ka-ye, gü ba, 'Tïtïne, wüh reke wü e teka karama ne ʼburu eyi nzo. Amba wü kpara, ta te ni ï ewü teka azü karama ne, wüh le akoro nda-wü de. Te di bala, ni ena amere ngü wü e ka-ni ne, neh baye? 9Te ah bala, de wü nü te enga wü kötï biri biri ʼburu, de wü gïrï bü mene wü kpara te wü ena amaka, wü ï ewü, de wüh koro, wüh zü wü e ne.' 10Fü wü kpara ka tima la ayia abaya te enga wü kötï. Fü ewü ayia abiti wü kpara te ewü maka ne, wü siti wü kpara, abe kpah te wü züka wü kpara mini. Fü wü kpara asi gbü kambü, de te wüh ngbü ezü e ka karama gbügbü na ne, ʼduwa gbe! 11Fü miri la ayia arï kpa esambü, teka aceka wü ngba ka-ye ne. Fü jijia ayia atï eküte gara kpara biringbö, te to züka bongo te-ye nda de. 12Fü engu aï kpara la, amala fefe, gü ba, 'Awuba ni deyï, ah mere baye, te ye le ato züka bongo, te ni to fü ye ne, nda-ye de ne?' Fü jia kpara la ayia avi. Dada te engu ena alügü ngü nda ma. 13Fü miri la amala ngü fü wü kpara ka tima ka-ye, gü ba, 'Wü zoro engu, de wü i lölö na, de wü kpakpa na ʼburu. Wü za engu, wü gü gbü mbiri sü kpa etanü kpala, de ah ngbü, ah ku gba da enyüma gbü te-ye kpala.' " 14Teka ngü la, fü Yesu adu kpah amala ngü fü wü kpara la, gü ba, "Me ngbü eï wü kpara ʼburu de wüh küwa, amba wü kpara te ewü ena akoro kpaka Me, wüh ena adi biri biri. Wüh ena adi ʼduwa mene wü kpara, te ewü ena afü maguma wü, ale ngü ka Me de maguma wü biringbö." 15Fütanga ngü la, fü wü Farusi ayia abiti te-wü, angbü efï ngü, gü ba, "Ani ena afiti Yesu, de engu mala siti ngü, teka fü ani azoro engu tete, neh baye baye?" 16Fü ewü atima wü gara kpara ka-wü, bete wü gara kovo ka Miri Anïtïpa Erode, kpaka Yesu. Fü ewü akoro amaka Yesu, amala ngü fefe na, gü ba, "Mere kpara, ani wu eyi, gü ba, ye de kpeke kpara, te ye ngbü emala zu ngü ka Me fü ani fanü fanü. Angü ye kpe cürü wü kpara nda-ye ʼburu ʼdö de, ye ngbü ele ka-ye ʼduwa ngü ka Me. 17Te di bala, gara ngü ladü te ani le ayi-ta ye di. Ah tï atï fü ani angbü fï bü da ese ngürü ani fü Kayïsara, miri ka wü Rüma, te ngbü gbü nzö ani ne? Anga ah tï de? Rïrï ka Müse gü neh fe?" 18Amba Yesu, mü wu fïngangü ka-ewü la nda-mü eyi kpo. Fü mü ayia amala fü ewü, gü ba, "Wü de wü mürü mani! Wü le afiti ni bala neh teka ne? 19Wü za la biri jiase sela, wü sere fü ani." Fü ewü aza gara jiase biringbö, ato fefe. 20Fü Yesu adu ayi-ta ewü, gü ba, "Kuru kpara, bete ïrï kpara, de eküte jiase ne, ah de nda da?" 21Fü ewü alügü ngü fü Yesu, gü ba, "Ah de kuru Miri Kayïsara." Yesu gü ba, "Wayi, ah mbi! Te ah de kuru miri la, de yi lügü e ka miri fü miri. De yi lügü nda Me kpah fü Me." 22Te wü mürü mani la je ngü, de te Yesu lügü fü ewü de bala ne, fü ewü ayia anga. Fü ewü ayia ace Yesu de wü kpara ka-ye sela, anü sü ka-wü. 23Wü gara wü kpara ta ladü esüka wü di enga Yïsarayele, te wüh ngbü eï ewü, gü ba, wü Saduke. Wü kpara la, wüh ngbü efï nda-wü, gü ba, te kpara kpi eyi la, ah kpi eyi fï badi, ah du azükü gbü kpi la nda tïne de. Gbü sïkpï la, fü wü gara Saduke la ayia akoro kpaka Yesu, ayi-tata gbü mani, gü ba dene, 24"Mere kpara, gara ngü ladü te ani le ayi-ta ye di. Müse ba ta ngü fü ani gbü Rïrï ka Me, gü ba, 'Te kpara kpi, ce wara ye, o wüh bï ye ake di la de la, ah le de enga ni ye na za würüse gbü nganga na la, teka abï ye dada na, angü ïïrï ena adürü.' 25Amba, te wü kpara ena azükü gbü kpi azükü fanü fanü la, ngü la ena adi baye? Angü gara wü komoko ta ladü, wüh guvu ni wü lorozi. Fü gigina aza würüse, fü ah akpi ace würüse la, o wüh bï ye ake di la de. Fü gara enga ni ye na ayia aza würüse la. 26Fü ah ayia kpah akpi, o wüh bï ye la de. Fü ebabata enga ni ye na ayia aza würüse la. Fü ngü la amere te-ye bala, te nga ewü lorozi la ʼburu, wüh bï ye te würüse la nda-wü de. 27Fü würüse la adu akpi nda-ye tïne sidi nga ewü ʼburu. 28Te wü kpara ena azükü azükü gbü kpi fanü la, würüse la ena adi neh wara da? Kükürü de, angü wü kpara de lorozi la ʼburu, za ta würüse la eyi wara ewü tete!" 29Fü Yesu adu amala ngü fü wü Saduke la, gü ba, "Yi fï nda-yi, gü ba, Me tï azükü wü kpara gbü kpi nda de? Yi dürü bala, neh teka ne? Yi le aje si-ngü gbü Ngari Me de, neh teka ne? Yi le awu wazi ka Me kpah de, neh teka ne? 30Gbü sïkpï te Me ena azükü wü kpara tete gbü kpi, ngü ka za-te ena adi nda ma. Angü, te Me zükü wü kpara eyi gbü kpi la, Me ena adu afü ewü baka wü malayïka ka-ye, fü ewü angbü fï mere badi agbü kpï. 31Amba, Me mala gbü Ngari ye, teka ngü ka züzükü ka wü kpara gbü kpi, gü neh fe? 32Me mala ta ngü fü Müse, gü ba, 'De-ni Me, ni de vüngüte ka Abarayama, ake Yïsaka bete Yakobo.' Amba gbü ra ta te Me mala ngü la tete, o wü Abarayama kpi ka-wü eyi gügü. Fïngangü ka-yi gü ba, Me ena amala ngü teka wü kövö, gü ba, 'Wüh de wü vüngüte ka-ni?' Ah bala de. Me mala ngü la, angü wü Abarayama ka-wü eyi ladü ezükü, agbü sü ka Me fï mere badi." 33Dela ngü ta te Yesu mala fü wü Saduke, gü ba, Me ena azükü wü kpara ka-ye, fü ewü angbü fï mere badi agbü sü ka-ye agbü kpï kpala. Ta te mere bi wü kpara gbü sü la je ngü la bala, fü ngü la aga gbü jia ewü ʼburu afa sü, angü Yesu za ngü gömö wü Saduke eyi. 34Te wü Farusi wu, gü ba, Yesu za ngü gömö wü Saduke eyi ne, fü ewü aci akoro kpaka Yesu. 35Fü gara mere kpara esüka ewü, te di de mürü rïrï, adu afï nga gara yitangü, teka are maguma Yesu di. Fü Farusi la ayi-ta Yesu, gü ba, 36"Mere kpara deyï, nda-ni yitangü kpah ladü. Esüka wü Rïrï ka Me ʼburu, kpeke rïrï, te fa wü bu ye ʼburu, neh engu deyi?" 37Yesu gü ba, "Kpeke rïrï te Me to fü ani, gü ba dene, 'Mü le Mere Me de maguma mü ʼburu. Mü o fïngangü ka-mü kpah ʼburu eküküte. Mü to te-mü kpah ʼburu fefe.' 38Dela kpeke Rïrï te Me to fü ani, te fa wü bu ye ʼburu. 39Gara Rïrï engu na, gü ba dene, 'Mü le wü bu mü kpah baka e te mü ngbü ele küte mü.' Dela gina wü kpeke Rïrï ta te Me to fü ani. 40Wü ngü de ʼbasu la biti wü si-ngü ta te Müse, de wü gara wü mürü dofo ka Me, ba gbü Ngari Me ne eyi ʼburu, gbü ewü." Dela ngü ta te Yesu mala fü wü Farusi, teka kpeke Rïrï ka Me. 41O wü Farusi ngbü ʼburu tete ede Yesu, fü Yesu adu ayi-ta ewü, gü ba, 42"Yi ngbü eo jia yi da ecï nga Kurisito, Miri te Me ena atima teka aküwa yi ne. Ah mbi. Fïngangü ka-ye gü ba, wüh ena abï engu neh gbü nguwa da?" Wüh gü ba, "Miri la ena adi kundu kundu ye Mere Miri Davidi, te ena angbü gbü nzö ani kpah baka Davidi." 43Yesu gü ba, "Miri la ena adi baka Davidi fanü? Angü Davidi ba ta ngü cu me-ye, gbü wazi ka Nzïla Wazi Me, gü ba dene, 44'Me mala ngü fü Miri ka-ni, gü ba dene, "Ye ngbü gbü kokpa ka-ni sene! Angü ni fe ye, o eyi Mere Miri! Te di bala, ye ena angbü gbü nzö wü kpara ʼburu! Angü ni ena ao wü vügü ka-ye ʼburu esa lö ye!" ' 45Te Davidi mala, gü ba, 'Engu de Miri ka-ni la,' te di bala, wawazi na fa nda Davidi de? Ma ngbü emala fü yi, gü ba, ngü kaka ena afa nda Davidi ka!" 46Dela ngü ta te Yesu mala, teka Mere Miri, te Me ena atima teka aküwa wü kpara. Fü komö wü Farusi la agu ʼburu agu, wüh du mala gara ngü tïne de. Fütanga ngü la, gara kpara te du le aga yïkï ake di nda tïne ma.

will be added

X\