Matayo 20

1Fütanga ngü la, fü Yesu adu kpah amala gara mani fü ewü, gü ba, "Gara ngü ladü, te ma ele amala fü yi, teka züka ngü te yi ena amaka kpaka Me. Gara komoko ta ladü, te di de mere yï ka rïrü ka-ye. Fü wü rï-rü kaka la ayia andri. Gbü gara sïkpï, fü komoko la ayia kpurutokokpï, anü agïrï wü kpara teka amere tima gbü yï ka-ye la. 2Fü ah amaka wü gara kpara, aro mö de ewü areke areke teka tima la, gü ba, 'Ni ena ato jiase fü wü baka kama biri (100), teka tima ka sïkpï biringbö.' Fü wü kpara la ale. Fü komoko la ayia atima ewü agbü yï ka-ye. 3Ah te ekoro gbü lö-ra menewa, fü engu adu kpah kpa te kaje. Fü ah awu wü gara kpara, te ewü ngbü ka-wü erürü te kaje bü kükürü bala. 4Fü engu amala ngü fü ewü, gü ba, 'Wü nü enü amere tima agbü yï ka-ni kpala. Ni ena ato jiase fü wü areke areke, teka tima la.' 5Fü wü kpara la ale, ayia anü fütanga wü bu wü. Sidi nga ewü la, etü ra, fü mürü yï la ayia kpah, anü agïrï gara wü kpara teka tima ka-ye. Fü ah amala ngü fü ewü kpah bala. Fü ah adu kpah anda nga ye gbü lö-ra bata ka tamurago. Fü ah amaka kpah gara wü kpara, atima ewü agbü yï ka-ye la. 6Gbü wü ngü la ʼburu, tima kaka agbü yï ne nza nda la fï de. Ah te ena akoro kpah gbü lö-ra ʼburuve ka tamurago, fü engu adu kpah anü amaka wü gara kpara, te ewü rü ngbü ka-wü bü kükürü te kaje. Fü komoko la ayi-ta ewü, gü ba, 'Ah mere baye, te wü ngbü erürü te kaje sene, bü kükürü kükürü gbü ra ne gbuuu, de bane? Wü le amere tima de?' 7Fü wü kpara la alügü ngü fefe, gü ba, 'Anga kpara te ena aza ani gbü tima nda kpah ma ne, ani ena amere baye?' Komoko la gü ba, 'Ah mbi, te ah bala, wü nü enü sidi nga wü bu wü, amere tima agbü yï ka-ni kpala.' 8Te wü kpara la mere tima tete te nga wü ʼburu, koro di etamurago, fü komoko la ayia aï mere kpara ka tima ka-ye, amala ngü fefe, gü ba, 'Ye nü enü, ye ï wü kpara ka tima la biri biri ʼburu, de ye to jiase fü ewü ʼburu yoo, na tima te ewü mere la. Ye kpo de mene wü kpara, te ewü koro sidi ne, akoro te mene ewü, te ewü kpo de tima kü kpurutokokpï ne.' 9Fü wü kpara ta te ewü koro gbü tima, gbü lö-ra ʼburuve ka tamurago ne, akoro aza jiase ka-wü biri biri ʼburu, baka kama biri, kama biri, kpah baka e te engu le ato fü mene wü kpara, te ewü koro kü kpurutokokpï ne. 10Wü kpara ta te ewü kpo de tima kü kpurutokokpï ne, fü ewü awu wü bu wü, te ewü ngbü emaka jiase de bala ne, fü ewü angbü de tadu, efï ngü emaguma wü, gü ba, 'Wayi, te ah bala la, ani ena amaka nda-ani jiase tïne afa sü!' Amba de, wüh ena ato jiase la fü ewü ʼburu kpah bü ngbee kama biri, kama biri, baka nda wü bu wü la. 11Fü maguma wü kpara, ta te ewü kpo de tima kü kpurutokokpï ne, ayia asiti. Fü ewü akpo da emala ngü eküte mere kpara la, teka jiase de te wüh to fü ani kpah baka nda wü bu ani, te ewü koro sidi ne. 12Fü ewü akoro, awü nga fü mürü yï la, gü ba, 'Ye ceka la! Ani ngbü mere tima gbü mere ra ne gbuuu! Ye nü to jiase fü ani kpah baka nda wü kpara, te ewü koro mba tïtïne, mere tima bü teka lö-ra ngbee biringbö, neh teka ne? Nda-ani, ra ngbü curu ani ne bü kükürü bala?' 13Te mürü yï la je ngü la bala, fü ah alügü ngü fü ewü, gü ba, 'Wü di enga ni ni, ni fiti wü nda-ni de. Angü wü le tïne me-wü, teka amere tima gbü ra biringbö, teka jiase kama biri. Ah bala de? 14Ngü la du siti gbü jia wü neh teka ne? Wü za jiase ka-wü eza, de wü du agba wü. Ni le me-ni ato jiase fü wü kpara, te ewü koro sidi ne, ʼburu bala. 15Wü ngbü engbü de kanga, teka te ni di de züka kpara ne? Ni tï amere ngü de jiase ka-ni, baka ngü te ni ngbü ele ne, de? De bala ne töndö ngü ne!' " 16Te Yesu mala mani la nza tete, fü ah adu amala ngü fü wü kpara ka-ye, gü ba, "Si-ngü ka mani la, ah teka ngü ka-yi wü kpara ka-ra. Angü züka ngü te wü kpara ka-ra ena amaka kpaka Me ne, ah de küküwa fï mere badi, te nga ewü biri biri ʼburu. Mene wü kpara te ewü o ngü ka-wü kötö, Me ena adu afü ewü, ao kpa engagira nü. Amba mene wü kpara te wüh ngbü eo ngü ka-wü memere, baka wü angbe cögbörö wü kpara ne, Me ena adu afü ewü, ao kpa sidi." 17Fütanga ngü la, fü wü Yesu ayia de wü kpara ka-ye, teka anü agbü Yerüsalema. Te wüh ngbü enü tete te kaje kpa etüngba kpala, fü engu ayia ace te-ye arü, aï wü kpara ka-ye nzükpa de füh ye ʼbasu ne, esüka bi wü kpara la, anü de ewü cüküʼdaye edere sü. 18Fü ah amala ngü fü ewü, gü ba, "Wü di enga wüna, yi wu eyi, gü ba, nih ngbü enü dene agbü Yerüsalema. Te nih ena akoro kpala, wüh ena azoro ra, Ye Kpara ka Kpï ne, anü di engagira wü mere kovo bete wü mürü rïrï, te ewü le ngü ka-ra de. Wü mere kovo la ena akolo ngü ka-ra, gü ba, 'Ah le de wüh mörö ra asidi.' 19Fü ewü ayia ato ra fü wü ganzi kpara. Fü wü ganzi kpara la akpo emü ra, da efala ra, kpah da esüma ra de juru. Fü ewü adu abere ra, amörö füh rü gbegbete. Amba Me ena adu azükü ra gbü ebabata sïkpï." Dela ngü ta te Yesu mala fü wü kpara ka-ye, o wüh ngbü enü tete agbü Yerüsalema. 20Fütanga ngü la, fü wara Zebedayo ayia de wü di enga ye ʼbasu, Yakobo ake Yüwane, akoro kpaka Yesu kpikpi wü. Fü engu abu nzökuta ye engagira Yesu, andaʼba te-ye fefe. 21Te Yesu wu bala, fü ah ayi-tata, gü ba, "Ye ngbü ele ne ngü ne?" Würüse la gü ba, "Mere kpara, ngü biringbö te ma ele kpaka mü, ah dene. Gbü sïkpï te mü ena angbü mere miri tete, ah le de mü za wü jaji ka-ra de ʼbasu ne, mü o gara gbü kokpa, de gara ngbü nda-ye gbü kamisü ede mü. Fü yi angbü de ewü gbü miri la." 22Fü Yesu adu amala ngü fü wü Yakobo ake Yüwane, gü ba, "Ngü te yi yi-ta ra di la, yi wu sisi na mbi mbi de. Te yi le amaka wazi baka nda-ra la, ah le de yi zü kpah mere cïnga baka nda-ra, de te ma ena azü ne. Yi tï eyi azü mere cïnga, baka nda-ra la? Ngü la tï afa yi de?" Fü ewü ale ngü, gü ba, "Wayi, ani le eyi amere ngü la." 23Yesu gü ba, "Ah mbi. Yi ena azü mere cïnga baka nda-ra fanü fanü. Amba ma tï ao yi baka mere kpara fütanga ra nda-ra de. Ngü la, ah ka-ye de ngü ka Wüba, Me, angü ah reke sü la eyi teka wü kpara ka-ye, te engu fe ewü ne." 24Fü du wü kpara ka Yesu nzükpa ne ayia aje ngü la. Fü maguma ewü ayia asiti eküte wü Yakobo ake Yüwane, da efï ngü emaguma wü, gü ba, "Wüh ele ao te-wü ba mere kpara gbü nzö ani?" 25Te Yesu wu ngü la bala, fü ah adu aï wü kpara ka-ye la ʼburu kpaka ye, amala ngü fü ewü, gü ba, "De-yi, yi wu kpah bü kpo, gü ba, wü miri füh kotö ne ngbü engbü gbü nzö wü kpara de mere wazi. Fü ewü angbü emere wü kpara esa lö wü la, ba e te ewü ngbü ele. 26Yi le amere kpah bala? Ah bala de. Te mü le angbü ba mere kpara esüka wü bu mü la, mü fü te-mü ba jaji, te ngbü emere tima fü wü bu ye. 28Te di bala, ah le de yi fü fïngangü ka-yi baka nda-ra. Angü de-ra, Ye Kpara ka Kpï, ma koro füh kotö ne, neh teka ne? Yi efï nda-yi, gü ba, ma koro ta teka angbü ba mere miri, teka fü wü bu ra angbü emere tima fere? Ah bala nda de. Ma koro teka amere tima fü wü kpara, da ele ta-ngü te ewü. Angü ma ena ato te-ra fü kpi, teka afa wü kpara gbü siti ngü ka-ewü, fü ewü aküwa." Dela ngü te Yesu mala fü wü kpara ka-ye, teka mene kpara te ena angbü memere gbü jia Me. 29Fütanga ngü la, o wü Yesu ngbü fï bü enü te kaje ka Yerüsalema, fü ewü anü akoro agbü Yeriko. Fü ewü ayia sela de mere bi wü kpara gbü nga wü, teka anü agbü Yerüsalema. 30Fü ewü anü amaka gara wü komoko ʼbasu te jia ewü ni eyi ani, te ewü koro ngbü edere kaje. Te wü komoko de ʼbasu la je ngü, gü ba, "Wü Yesu ngbü enü sü dela me-wü ne," fü ewü ayia akpo da eba rere te ïrï Yesu, gü ba, "Yesu! Kundu ye Miri Davidi! Ani wu eyi, gü ba, Me tima ye teka aküwa ani ne! Ye ceka la bü cïnga te ani ne baaa!" 31Fü wü kpara aci ʼburu, amala ngü fü ewü, gü ba dene, "Wü nga anga!" Amba wü kpara de ʼbasu la le ngü ka-ewü la nda-wü de. Fü ewü angbü fï bü eba rere kpa tikpi, gü ba, "Mere kpara! Miri ka-ani! Ye ceka la bü cïnga te ani ne baaa!" 32Te Yesu je ri wü kpara la, fü ah ace te-ye, arü. Fü ah adu aï ewü kpaka ye, ayi-ta ewü, gü ba, "De-wü deyï, wü ele de ni mere fü wü ne ngü ne?" 33Wüh gü ba, "Akooo, mere kpara, a le ta de mü ü jia a, teka de a di eceka kpï!" 34Fü Yesu aceka wü kpara la de mere cïnga emaguma ye, fü ah ayia amofo jia ewü. Fü jia ewü ayia aü te-ye ʼduwa raaa! Fü ewü atï kpah bü ʼduwa gbü nga wü Yesu, angbü enü de ewü. Dela ngü ta te Yesu ü jia wü kpara de ʼbasu la tete.

will be added

X\