Matayo 14

1Gbü wü re engu la, Anïtïpa Erode ta de mere miri ka wü Galïlaya. Gbü gara sïkpï, fü miri la ayia aje nga Yesu. Angü ïrï Yesu wü eyi gbü wü sü la ʼburu. 2Te engu je nga Yesu bala, fü ah angbü de cürü. Fü ah amala ngü fü wü kpara ka-ye, gü ba, "Wayi, komoko la, ah ena adi de Yüwane Mürü Babatïza, ta te ni mörö engu ne. Ah ena azükü gbü kpi dela eyi me-ye! Dela si-ngü te engu ngbü emere bi wü ngü ka talara de bala." 3Yüwane kpi ta kükürü nda de. Ngü ladü gbügbü na. Angü Miri Anïtïpa Erode mörö Yüwane ta me-ye, teka ngü ka wara ye, de ïrï ye Erodïya ne. Angü miri la fa ta würüse la esaka gara enga ni ye, de ïrï ye Fïlïpo. Fü ah adu aza engu wara ye tete. Teka ngü la, fü Yüwane ayia amala ngü fü miri la, gü ba, "De-ye deyï, ngü te ye mere la, ah de siti ngü. Ye fiti wara enga ni ye baye? Ah tï ta fü ye amere bala de. Angü dela siti ngü gbü jia Me!" Teka ngü la, fü ngü ake te Miri Anïtïpa Erode. Fü ah ayia azoro Yüwane, agü agbü ku. 5Miri la ngbü ta egïrï kaje de ni mörö Yüwane tete na, amba cürü ngbü kpah emere engu amere, angü wü kpara ʼburu ngbü ta eceka Yüwane, baka mürü dofo ka Me. 6Gbü gara sïkpï, fü Miri Anïtïpa Erode ayia amere mere karama ka-ye, teka afï nga sïkpï, te wüh yaka engu tete na. Enga wara miri la ta ladü, ye würüse. Fü jaji würüse la ayia akpo da elo bï engagira wü kpara, te ewü koro gbü karama la. Fü bï ka jaji würüse la areke gbü jia ewü afa sü. 7Fü miri la ayia amala ngü fü jaji würüse la, akïna te-ye gbü jia wü kpara ʼburu, gü ba dene, "Enga ni, bï ka-ye la reke gbü jia ani fa sü. Mene e te ye ngbü ele, de ye yi-ta ni tüngüngü, ni ena ato ato fü ye. Ni tï atïrï de." 8Fü jaji würüse la ayia akpe kpaka ni ye, ayi-tata, gü ba, "Ni ni deyï, mene e te ye ele de ni yo te miri, ah de neh ene?" Fü ni ye na amala fefe, gü ba, "Ye mala fü miri, de wüh nü, wüh mörö Yüwane, de wüh wa nzönzö na, wüh o gbü gada, wüh koro di fü ye, teka fü ani awu, gü ba, Yüwane kpi eyi fanü." Fü jaji würüse la akpe adu kpaka miri la, amala kpah bala. 9Fü ngü la ato mere fïngangü fü Miri Anïtïpa Erode. Amba teka ngü ka kïna, de te engu kïna te-ye di, gbü jia wü ngba ka-ye ne, ah le ace kïna ka-ye la tïne de, ka vi-jia. Te di bala, fü ah ayia amala ngü fü wü marajümïya ka-ye, teka de wüh nü agbü ku, awa nzö Yüwane, akoro di, ato fü jaji würüse la. 11Fü ewü anü ade ngürü Yüwane, aza nzönzö, akoro di gbü gada, ato fü jaji würüse la. Fü jaji würüse la ayia aza e la, anü di, ato fü ni ye. Dela ta kaje te Yüwane Mürü Babatïza kpi tete. 12Te wü kpara ka Yüwane Mürü Babatïza je ngü la, fü ewü akoro, abï kökö na, anü di, ati. Fü ewü adu anü amala nga ngü la fü Yesu. 13Te Yesu je, gü ba, wüh mörö Yüwane Mürü Babatïza eyi ne, fü engu ayia de wü kpara ka-ye, alï gbü zabu, anü sü ka-wü kpa etangu, gbü sü te kötï di tete ma. Amba mere bi wü kpara je eyi, gü ba, wü Yesu nü sü eyi kpala. Fü wü kpara la aci ʼburu, ayia afa nga wü Yesu to füh gümba de lö wü. 14Te wü Yesu nü koro tete gbü sü la, fü ewü amaka mere bi wü kpara kpala kpah gbe. Fü engu angbü de mere cïnga teka ngü ka-ewü. Fü engu akpo da eküwa wü mürü keke, te wü kpara la za ewü koro di ne. 15Ah te ekoro etamurago, fü wü kpara ka Yesu ayia akoro kpakaka na, amala ngü fefe, gü ba, "Mere kpara, ye ceka la ra te etï. Ani ena amere de mere bi wü kpara ne, neh baye? Tala mere ewü de? Ah le ta fü ye amala ngü fü ewü, de wüh nü kpa gbü wü gara kötï, agïrï e, ase, azü. Angü sü kpakine edere sü, kötï tete nda ma." 16Fü Yesu alügü ngü fü ewü, gü ba, "Dela neh ene ngü ne? Yi mere e ace wü kpara la, fü ewü ago de. Ah le de yi to zü-e me-yi fü ewü." 17Wüh gü ba, "Akooo, mere kpara! Ambata esaka ani sene ngbee ʼburuve bete si ʼbasu. Wü e la ena atï de mere bi wü kpara la atï fanü?" 18Yesu gü ba, "Yi za wü e la, yi koro di kpaka ra akine." 19Te wüh koro de ambata bete si la kpaka Yesu, fü engu amala ngü fü bi wü kpara la, de wüh ngbü kötö, füh wü fu-gü sela. Fü engu ayia aza ambata ʼburuve bete wü si ʼbasu la, aceka kpï kpa tikpi, agbo nga ïrï Me tekaka. Fü ah akukuru tü wü e la, ato esaka wü kpara ka-ye, de wüh gafa fü wü kpara la. 20Fü wü kpara ʼburu azü e la, asika di, ace dudu. Fü wü kpara ka Yesu ayia aro du wü e la, asi gbü wü kuwu nzükpa de füh ye ʼbasu. 21Dela ngü ta te Yesu mere, te engu to zü-e di fü mere bi wü kpara. Wü kpara te ewü zü wü e la, wüh ta baka wü komoko kutu ʼburuve (5,000). Amba wüh tanga wü jaji de wü würüse nda-wü de. 22Fütanga zü-e la, fü Yesu amala ngü fü wü kpara ka-ye, gü ba dene, "Wü lï elï gbü zabu, fü wü anü sü nda-wü kpa engagira nü, kpa etangu. Nda-ni, ni ena ato la kaje fü wü kpara ne feke, de wüh go agba wü. Fü ni adu afa nga wü." Fü wü kpara ka Yesu ayia alï gbü zabu anü sü. 23Fü Yesu ato kaje fü mere bï wü kpara la. Fü ewü abaya, teka ago agba wü. Fü engu adu ayia ka-ye sela, anü kpa füh mere rüvü kpikpi ye, teka aku gba fü Me. Fü engu angbü kpala, da eku gba fü Me, zalü koro di gbü biti, 24o wü kpara kaka di nda-wü eyi nengete kpa etü ngu gbü zabu. Fü wege akpo angbü efe jia ngu kpekpeke, da enzi ewü, elügü kpa sidi. Fü ngu angbü ekada de ewü. 25Ah te ekoro emözekpï, fü Yesu ayia akoro, angbü enü kpaka ewü de lo ye füh ngu. 26Te wü kpara ka Yesu wu Yesu, te ngbü enü füh ngu kpaka wü de bala, wüh wu, gü ba, ah de Yesu ne, nda-wü de. Fü ngü la ato mere cürü fü ewü afa sü. Fü ewü akpo da eba rere, angü wüh fï nda-wü, gü ba, "Ah ka-ye de kuru kpara te ngbü ekoro kpaka ani! Dela sirimbi!" 27Fü Yesu ayia kere, amala ngü fü ewü, gü ba, "Yi mere e akpe cürü de. Ah ka-ye de-ra." 28Te Petero wu, gü ba, ah de Yesu, fü Petero amala ngü fefe, gü ba, "Mere kpara, te ah ngbürü de mü fanü la, de mü mala ngü fere, de ma kö füh ngu, ma nü kpaka mü la." 29Fü Yesu amala ngü fefe, gü ba, "Wayi, mü koro ekoro." Fü Petero ayia akö gbü zabu, akpo angbü enü kpaka Yesu füh ngu. 30Baka te Petero wu wege te ngbü efe kpekpeke, fü ah akpo erï gbü ngu ne, fü cürü arï tete. Fü ah aku gba te ïrï Yesu, gü ba, "Akooo, mere kpara, mü küwa ra eküwa!" 31Fü Yesu ayia ato kpa ye kere, azoro engu, amala ngü fefe, gü ba, "Apaa Petero! Amba mü to maguma mü fere fanü fanü, nda-mü neh la de? Mü le awu wazi ka-ra fï de, neh teka ne?" 32Fü wü Yesu ake Petero adu alï agbü zabu kpaka wü bu wü. Fü wege la adu anga. 33Teka ngü la, fü wü wü kpara ka Yesu, te ewü di gbü zabu la, akpo angbü egbo nga ïrï Yesu, gü ba, "Ye zu de Ye Me fanü fanü." 34Fütanga ngü la, fü wü Yesu ayia akö ngu kpa etangu, akoro gbü gara sü de ïrï ye Genezareta. 35Te wü kpara ka Genezareta wu, gü ba, ah de Yesu, fü ewü akpo da amala nganga fü wü kpara gbü sü la ʼburu, teka de wüh za wü mürü keke ka-wü, akoro di ʼburu kpaka Yesu, de ah küwa ewü. 36Fü wü kpara la ayia andaʼba te-wü fü Yesu, de Yesu le fü wü mürü keke, de wüh di emofo bü mö bongo kaka la, teka fü ewü aküwa. Fü Yesu ayia ale ngü la. Te di bala, mene wü kpara, ta te ewü ngbü mofo mö bongo ka Yesu ne, wüh ngbü küwa gbü keke ka-wü la eyi ʼburu.

will be added

X\