Marako 11

1Fütanga ngü la, wü Yesu ngbü fï enü agbü Yerüsalema. Fü ewü anü, anü akoro gbamari ede Yerüsalema, angü wüh le kaje ka Betefage ake Betanïya, te di esa mere da de ïrï ye Olïve. Te wüh nü koro gbamari kpala, fü Yesu ayia atima gara wü kpara ka-ye ʼbasu kpa engagira nü, 2gü ba, "Wü nü enü agbü kötï de kpa engakara wü la. Te wü koro kpala, wü ena amaka dongï, te wüh i, o kpala, enganga na, te wüh lï fefeh na la de. Wü furu dongï la, wü du di fü ni akine. 3Te wüh yi-ta wü, gü ba, 'Wü ngbü efuru enga nü la teka ne?' la, de wü lügü ngü fü ewü, gü ba dene, 'Mere kpara ka-ani ngbü ele me-ye. Ani ena alügü fü wü enatikine.' " 4Te wüh je ngü la, fü wü kpara ʼbasu la ayia anü agbü Betanïya. Fü ewü amaka enga dongï, te wüh i o etanü, ede möngïtï. Fü ewü ayia afuru dongï la, ba e te Yesu mala fü ewü. 5Fü wü gara kpara ayi-ta ewü, gü ba, "Ah mere baye, te wü ngbü efuru enga dongï ne?" 6Fü ewü ayia alügü ngü fü ewü, gü ba dene, "Mere kpara ka-ani ngbü ele me-ye. Ani ena alügü enatikine." Fü wü kpara la ale. Fü ewü ayia aza dongï la, adu di kpaka Yesu. 7Te wüh koro de dongï la kpaka Yesu, fü ewü agü wü bongo ka-wü füh gügü na. Fü Yesu ayia alï fefeh na, anü di agbü Yerüsalema. 8Fü mere bi wü kpara ayia akoro, teka agbo nga ïrï Yesu. Fü gara ewü agbala bongo ka-wü kötö te kaje. Wü gara ngbü nda-wü edoro wü zukpa rü, da egü te kaje, teka agbo nga ïrï Yesu di. 9Fü gara wü kpara atï kpa engagira nü fefe na, gara ewü nda-wü kpa sidi. Fü ewü angbü ʼburu egbo nga ïrï Yesu, da ebï ci, da emï koko, gü ba, "Nih gbo nga ïrï Me! Me to wazi fü mü, angü ah tima mü fü a me-ye! 10Mü za wazi ka kundu kundu nih Davidi! Mü koro eyi angbü gbü nzö a, baka mere Miri Davidi engu! Me di de mü! Nih gbo nga ïrï Me kpa gbü kpï!" 11Baka te Yesu nü koro agbü Yerüsalema, fü ah anü arï kpa etambasü Mere Kambü ka Me. Fü ah aceka kpï, aceka wü ngü de kpala ʼburu. Fü ewü ayia de wü kpara ka-ye, nzükpa de füh ye ʼbasu ne, adu kpa gbü Betanïya, ara kpala, angü sü yia etï atï. 12Kpurutokokpï la, fü wü Yesu ayia ace Betanïya, edu agbü Yerüsalema. O wüh ngbü enü tete, fü tala ayia amere Yesu. 13Fü Yesu aceka kpï, awu nzö rü figi, te kpakpa na bi abi. Fü ah afü kpuru akoro kpala, de ni maka rïrï na. Te wüh nü koro kpa esa rü la, rïrï na nda ma, ka-ye bü kpakpa na kükürü. Angü ah de fe kaka, te ngbü erï tete na, nda de. 14Fü Yesu ayia akïna rü engu la, gü ba dene, "Mü ngbü fï bala. Wü kpara tï azü rï mü tïne fï de, fï mere badi." Fü wü kpara ka Yesu ayia aje ngü de te engu mala la. 15Te wü Yesu du koro tete agbü Yerüsalema, fü ewü ayia anü akoro etambasü Mere Kambü ka Me. Fü ewü amaka mere bi wü kpara kpala, te ewü ngbü ecïnzï wü nü de wü lu, teka fü wü kpara adi ese, eto laʼbï tete fü Me. Wü gara ngbü nda-wü da ekura jiase. Fü ngü la ayia asiti gbü jia Yesu afa sü. Fü engu ayia aliki ewü ʼburu asidi, anzinzi wü cangalï de wü gbaʼda ka wü kpara la, agbogbofo ʼburu kötö. 16Fü ah amaka kpah wü gara kpara te ewü ngbü da ebï e ka-wü, ekolo sü di kpuru etambasü Kambü ka Me la. Fü Yesu ayia atïrï kaje la te ewü, gbere. 17Fü ah akpo da erï wü kpara, gü ba dene, "Me mala ta teka Kambü ka-ye, gü neh fe? Me gü ba, 'Kambü ka-ni, ah de sü te wü kpara füh kotö ne ʼburu ena akoro angbü egbo nga ïrï ni gbügbü.' Yi wu bala de? Amba nda-yi, yi du fü tambasü Kambü ka Me eyi, ba sü ka wü mürü zi!" 18Fü wü mere mürü gele bete wü mürü rïrï ayia aje ngü la. Fü ngü la asiti te ewü afa sü. Fü ewü akpo da egïrï kaje de ani mörö Yesu tete na. Wüh maka kaje kere de, angü cürü ngbü emere ewü, teka mere bi wü kpara te ewü le ka-wü ngü ka Yesu, gü ba, "Engu ngbü erï ani de mere kpeke rïrï." 19Etamurago la, fü wü Yesu ayia ace Yerüsalema, ayia adu agbü Betanïya. 20Kpurutokokpï la, fü wü Yesu alügü te-wü, edu agbü Yerüsalema. Te wüh ngbü edu te kaje la, fü ewü adu amaka rü de esikine, te Yesu kïna ne. Rü la ürü ka-ye eyi, de sï ye ʼburu. 21Petero, fü mü adu afï nga kïna, te Yesu kïna rü la di ne. Fü mü amala ngü fü Yesu, gü ba dene, "Mere kpara, ye ceka la! Rü de esikine te ye kïna ne, ah ürü ka-ye eyi!" 22Yesu gü ba, "Ah de wazi ka Me. Te yi to maguma yi fü Me, Me ena ato wazi fü yi kpah bala. 23Ngü te ma emala dene, ah de zu ngü. Te mü ena ato ta maguma mü fü Me ʼburu ʼburu la, Me ena ato wazi fü mü, teka fü mü amere wü mere kpeke ngü di kpah bala. Mü tï eyi amala ngü fü mere siti da la, gü ba dene, 'Mere da la yia eyia, ah tï agbü mere ngu.' Ah ena amere te-ye kpah bala. Amba te maguma mü ngbü ʼbasu ʼbasu la, Me to wazi fü mü nda de. 24Kpah bala, mene ngü te mü ena ayi-ta Me tete na, ah le de mü o maguma mü ʼburu te Me, gü ba, 'Fanü fanü, Me tï eyi amere ngü la fü ni.' Te maguma mü ngbü ʼbasu ʼbasu de la, Me ena amere ngü la fü mü amere fanü. 25Te mü ngbü eku gba fü Me, mü mere e ati ngü te kiri mü emaguma mü de. Mü boro siti ngü ka kiri mü emaguma mü asidi feke, teka fü Me, te di de Wö nih agbü kpï ne, aboro kpah wü siti ngü ka-mü." Dela ngü te Yesu mala, teka kpara te le aku gba fü Me. 27Fütanga ngü la, fü wü Yesu adu anü akoro agbü Yerüsalema. Fü Yesu angbü endoro ka-ye etambasü ka Mere Kambü ka Me. Fü wü mere kovo ayia de wü mürü rïrï, akoro kpaka Yesu, ayi-tata, 28gü ba dene, "De ye deyï, ngü te ye mere esikine de sene ne, ye mere ngü la neh de wazi ka da? Kpara te tima ye, aliki wü kpara etambasü Mere Kambü ka Me ne, neh da?" 29Yesu gü ba, "Gara ngü ladü biringbö, te ni ele ayi-ta wü di feke. Te wü lügü ngü la eyi, fü ni adu amala nga kpara, de te to wazi la fü ni ne. 30Yitangü ka-ni, ah teka Yüwane Mürü Babatïza. Kpara te to wazi fü Yüwane, de ah to babatïza fü wü kpara, neh da? Me to wazi fefe me-ye de? Anga ah mere ngü la de tete-ye?" 31Fü ewü akpo da emala ngü esüka wü, gü ba dene, "Ani ena alügü ngü la fefe, agü neh fe? Te ani gü ba, 'Me to wazi fü Yüwane me-ye la,' ah esiti, angü Yesu ena adu kpah ayi-ta ani, agü ba dene, 'Te di bala ne, ah mere baye, te ani le ngü ka Yüwane de ne?' 32Te ani mala fefe, gü ba, 'Yüwane mere ngü la de tete-ye la,' ah tï kpah de, angü maguma wü kpara ʼburu ena asiti te ani." Wüh ngbü ekpe cürü teka mere bi wü kpara, angü wü kpara ngbü ele ngü ka Yüwane, gü ba, "Engu ka-ye zu de mürü dofo ka Me." 33Te di bala, fü wü angbe cögbörö kpara la adu alügü ngü fü Yesu, gü ba dene, "Ani wu kpara te to wazi fü Yüwane ne, nda-ani de." Yesu gü ba, "Wayi, ah mbi! Te ah bala la, ni tï amala nga kpara, te to wazi fü ni ne, kpah de."

will be added

X\