Luka 7

1Fütanga ngü la, fü Yesu ayia de wü kpara ka-ye, anü akoro agbü Kaparanama. 2Gara mere kpara ka wü marajümïya ka wü Rüma ta ladü kpala, te labï kaka ngbü eke efa sü. Keke la fa engu eyi, ah yia ta ekpi akpi. Te mere kpara la je nga Yesu, fü ah amala ngü fü wü gara kovo ka wü Yïsarayele, de wüh nü kpaka Yesu, ayi-tata de engu koro, ah küwa labï ka-ni la, angü ngü labï kaka la ke tete na ta fa sü. 4Te wü mere kpara ka wü Yïsarayele la koro tete kpaka Yesu, fü ewü andaʼba te-wü fefe, gü ba, "Akoo mere kpara! Ah le de ye le ta-ngü te komoko la, aküwa labï kaka, angü engu de züka kpara fanü fanü. 5Ah jï ta kambü ka biti-te fü ani me-ye, angü ah le ngü ka nguwa ani, wü Yïsarayele, fa sü." 6Te Yesu je ngü la bala, fü ah ayia kürrrü, anü de wü kpara la. Te wüh nü koro gbamari ede gba mere kpara ka wü marajümïya la, fü mere kpara la ayia awu ewü te ewü ngbü ekoro. Fü ah atima gara wü awuba ye, anü amaka Yesu te kaje. Fü ewü amala ngari mere kpara la fü Yesu, agü ba, "Mere kpara, deyï, ye mbü te-ye de. Angü ni ka-ni de ganzi kpara, ah tï fü ye arï kpa esambü ka-ni nda-ye de, angü rïrï ka gele ka-wü, wü di enga Yïsarayele, le bala de. 7Te di bala, ah tï fü ni akoro kpaka ye me-ni kpah de. Amba ni wu eyi, gü ba, wazi ye ladü. Te ye mala ta bü ngü kpa da ye kpala la, labï ka-ni la ena aküwa aküwa. 8Angü ni tï kpah eyi awu ngü la bala, teka te ni ngbü kpah esa rïrï ka wü mere kpara ka-ni ne. Kpah bala, wü gara marajümïya ladü, te ewü di esa rïrï ka-ni. Te ni mala ngü fü gara, gü ba, ye nü enü la, ah ena anü kere, baka te ni mala fefe. Anga te ni mala fü gara, gü ba, ye koro ekoro akine la, ah ena akoro kpah kere. Anga te ni mala ngü fü labï ka-ni, gü ba, ye mere mene ngü ne, ah ngbü kpah emere ngü engu la kere, baka te ni mala fefe." 9Te Yesu je ngü la bala, fü ngü la aga gbü jijia. Fü engu afü te-ye, amala ngü fü mere bi wü kpara, te ewü ngbü efa nga ye ne, agü ba, "Kpara te to maguma ye fere baka komoko la, ma maka füh kotö ne nda-ra la kü de. Anga gbü nguwa nih, wü di enga Yïsarayele, kpara te to maguma ye bala, ah kpah ma. Amba ah ka-ye ʼduwa de komoko la, te di de ganzi kpara ne." 10Fü wü kpara, ta te ewü tima ewü ne, ayia ace Yesu te kaje sela. Fü ewü adu akoro kpaka mere kpara la, amaka labï la, keke kaka nza eyi! 11Fütanga ngü la, fü Yesu ayia de wü kpara ka-ye, anü agbü gara kötï de ïrï ye Nayïna. Fü mere bi wü kpara angbü efa nga ewü. 12Gara würüse wökö ta ladü gbü kötï la, ah bï ye kü bü ngbee biringbö, jaji komoko. Fü mbarase la ayia akpi ka-ye. Te wü Yesu nü koro kpa emöngïtï ʼbaranga ka kötï la, fü ewü amaka te-wü de mere bi wü kpara, te ewü bï kö mbarase la, enü di, ati. Fü ni ye mbarase la angbü enü fütanga kö enga ye la, da eku gba. 13Te Miri Yesu wu ngü la bala, fü cïnga würüse la arï tete. Fü ah amala ngü fefe, gü ba, "Ye ku gba de!" 14Fü Yesu anü akoro gbamari, amofo kaʼda de te wüh bï kövö fefeh na la. Fü wü kpara la ace te-wü, arü. Fü Yesu amala ngü fü kövö la, gü ba, "Mbarase, ma emala ngü fü mü, mü zükü ezükü, mü yia tikpi!" 15Fü kövö la azükü, ayia tikpi, akpo da ero mö. Fü Yesu aza engu, alügü fü ni ye na. 16Fü ngü la ato cürü te wü kpara la ʼburu. Fü ewü akpo da egbo nga ïrï Me, da emala ngü, gü ba, "Wü ceka la, mere mürü dofo ka Me koro eyi esüka ani!" Fü wü gara amala nda-wü, gü ba, "Yesu de kpara te Me tima me-ye, teka aküwa ani!" 17Fü tofo ngü ka Yesu la, awü abaya te nga nzö kötï gbü sü la ʼburu. 18Te wü kpara ka Yüwane Mürü Babatïza je nga Yesu, teka wü ngü de te engu ngbü emere de bala, fü ewü anü amala nganga fü Yüwane agbü ku kpala. Te Yüwane je ngü la gömö wü kpara ka-ye bala, fü ah aï gara wü kpara ka-ye ʼbasu, 19atima ewü kpaka Miri Yesu, teka ayi-tata, gü ba, "Ye ngbürü me-ye de Ye Me, ta te Me mala nganga na, gü ba, ni ena atima füh kotö ne? Anga ah le de ani cï nga gara kpara te ena akoro?" 20Te wü kpara la nü koro kpaka Yesu kpala, fü ewü amala ngü fefe, gü ba, "Yüwane Mürü Babatïza tima ani, teka ayi-ta ye, gü ba, 'Ye ngbürü de Ye Me, ta te Me mala nganga, gü ba, "Ni ena atima füh kotö ne?" Anga ah le de ani di la fï bü ecï nganga?' " 21Wü kpara la koro ta, maka Yesu, te ngbü eküwa mere bi wü mürü keke, kpah da eliki siti wü di enga me, te ngbü emere wü gara kpara. Ah ngbü kpah da eü jia mere bi wü kpara, de te ni eyi ani ne. 22Baka te Yesu mere ngü la nza tete, fü ah adu alügü ngü fü wü kpara ka Yüwane Mürü Babatïza la, gü ba, "Yi du edu, yi mala nga wü ngü, de te ma ngbü emere, ne ʼburu fü Yüwane, gü ba, 'Wü kpara de te jia ewü ni ani, wüh kpo eyi eceka kpï. Wü kpara de lö wü walawala, wüh kpo eyi enü nü. Wü mürü jiakö küwa eyi. Wü kpara te güje ewü do ado, wüh kpo eyi eje ngü. Wü kövö kpo eyi ezükü gbü kpi. Wü mürü cïnga ngbü eyi eje ngari Me. Wü ngü la ʼburu ngbü eyi emere te-wü, ba e ta te wü mürü dofo ba gbü Ngari Me ne.' 23Te di bala, yi mala fefe, gü ba, 'Mene kpara te ena alala fï bü eküte ra, Me ena aceka engu ba züka kpara ka-ye, fü ah angbü de mere tadu te gara.' " 24Fü wü kpara la ayia adu kpaka Yüwane, mere kpara ka-wü. Fü Yesu adu afü te-ye, akpo angbü emala nga Yüwane fü mere bi wü kpara la, gü ba, "Yi ngbü efï teka Yüwane, egü neh fe? Ta te yi ngbü enü kpa etü gü, da eje ngü gömö Yüwane ne, yi nü kpala neh teka ne? Yi ngbü ta efï, gü ba, Yüwane de töndö kpara, de maguma ye ʼbasu ʼbasu, te ngbü emere ngü baka gala, te wege ngbü efe me-ye ne? Aʼa, ah bala de! 25Anga fïngangü ka-yi, gü ba, Yüwane de mere miri, te to züka bongo eküte ye? Aʼa, ah bala kpah de, angü wü kpara te ewü ngbü eto züka bongo eküte wü, bete wü kpara te ewü di de mere bi wü e esaka wü ne, ngbü kpa etü gü nda-wü de! Wüh engbü ka-wü gbü mere kötï, anga gba wü miri. 26Amba ma wu eyi, gü ba, yi nü ta aceka Yüwane kükürü de, angü engu de mürü dofo ka Me fanü. Wayi, ma emala fü yi dene zu ngü, gü ba, ngü ka Yüwane fa nda wü mürü dofo ʼburu ka. 27Angü Yüwane me-ye de kpara, ta te wüh ba ngü kaka-na gbü Ngari Me, gü ba dene, 'Me mala ngü fü Ye ye, gü ba, "Ni ena atima mürü tima ka-ni kpa engagira nü, teka areke kaje fü ye." ' " 28Fü Yesu adu kpah amala gara ngü fü ewü, gü ba, "Ma ngbü emala fü yi dene zu ngü. Esüka wü mürü dofo ka Me ʼburu, kpara te fa Yüwane Mürü Babatïza nda ma. Amba mene kpara te to maguma ye fere ʼburu, ngü kaka ena afa nda Yüwane ka, angü Nzïla Wazi Me ngbü eto wazi fefe me-ye. 29Mere bi wü kpara je ngari Me ta gömö Yüwane, de wü siti wü kpara ʼburu. Fü ewü ayia ale ngü la, afü maguma wü, aza babatïza esakaka. 30Amba wü Farusi de wü mürü rïrï, le afü maguma wü nda-wü de, angü wüh o maguma wü fï bü teka gele ka-wü. Te di bala, wüh le aza babatïza esaka Yüwane kpah de." 31Fü Yesu adu kpah amala gara ngü fü wü kpara la, gü ba, "Wü kpara te ewü le ngü ka-ra de ne, ma ena amala teka ewü, agü neh fe? Wüh neh baka wü da? 32Wüh ena areke ewü ma! Wüh le züka ngü nda-wü de! Wüh de wü mürü yïkï, baka wü jaji te ewü ngbü ega yïkï esüka wü. Angü wü gara wü bu ewü ngbü ta emala ngü fü ewü, gü ba, 'Ani reke wü ma! Wü le züka ngü nda-wü de. Angü ani ngbü emï kuʼdu fü wü, wü le alo bï de. Ani ngbü ebï ci gba fü wü, wü le aku gba kpah de!' 33Angü, baka ta te Yüwane Mürü Babatïza koro ngbü esüka yi sene, ah zü e fa sü de, ah nzö fï kpah de. Te di bala, wüh ngbü ta efala engu, gü ba, 'Engu de siti wü di enga me guvu ye!' 34Amba de-ra, te ma koro esüka yi sene, ma ngbü ezü e, kpah da enzö e, fü ewü angbü kpah efala ra, gü ba, 'Ma de mürü kü. Ma ngbü kpah eküya. Ma kpah de awuba ka siti wü kpara.' 35Wü kpara te ewü ngbü efala ngü ka-ra ne, ngbü efï nda-wü, gü ba, ani wu ngü fa sü. Amba wüh wu ngü nda-wü kü de. Ah ena adi bü nzö mene wü kpara, te ewü le ngü ka-ra eyi ne, wüh ena angbü ewu si-ngü la me-wü." Dela ngü te Yesu mala fü wü kpara, teka ngü ka Yüwane Mürü Babatïza. 36Fütanga ngü la, fü gara Farusi de ïrï ye Sïmüna, aï Yesu, kpa gba ye teka azü e. Fü Yesu ayia anü akoro agba ka. Fü ewü angbü ezü e. 37Gara würüse ta ladü gbü sü la, te ngbü emere wü siti ngü efa sü. Te engu je, gü ba, wü Yesu ngbü ezü e agba Sïmüna, fü ah ayia aza züka se-mü gbü kölökö, arï di kpa esambü, gbü nga wü Yesu, o wüh ngbü ezü e. 38Fü würüse la akoro angbü eri lö Yesu, akpo da eku gba de ngura. Fü ngungura angbü ego eküte lö Yesu. Fü würüse la angbü ekö ngura la de su-nzö ye, da efaka lö Yesu. Fü ah adu aza züka se-mü ka-ye la, akpo etökö da efuru eküte lö Yesu. 39Te Sïmüna wu ngü la bala, fü ah akpo da efï nga ngü emaguma ye, gü ba, "Ho! Te Yesu ena adi ta mürü dofo ka Me fanü fanü la, de bane ah wu eyi, gü ba, 'Würüse de te engbü emofo ni ne, ah ka-ye de siti würüse, mürü küla.' " 40Te Yesu wu ngü la bala, fü ah amala ngü fü mürü kötï la, gü ba, "Sïmüna, ni le amala mba enga ngü fü ye." Fü Sïmüna ale ngü, gü ba, "Wayi, mere kpara, ye mala emala." 41Fü Yesu amala ngü fefe gbü mani, gü ba, "Wü kpara ʼbasu ta ladü, te ewü za matiti ka gara kpara. Gara za nda-ye mere bi jiase, baka kama ʼburuve (500), gara za nda-ye ngbee teke ʼbasu de füh ye nzükpa (50). 42Amba jiase esaka ewü ʼbasu mini, teka alügü matiti ka kpara la di ne, nda ma. Fü mürü jiase la awu cïnga ewü. Fü ah adu ace ngü la fü ewü. Te di bala, kpara te ena ale mürü jiase la afa sü, esüka ewü de ʼbasu ne, neh da?" 43Fü Sïmüna alügü ngü fefe, gü ba, "Ni efï, gü ba, ah ena adi de mene kpara de mere bi jiase gbü nga ye ne." Yesu gü ba, "Wayi, ye mala eyi mbi." 44Fü Yesu afü te-ye kpaka würüse la, adu amala ngü fü Sïmüna, gü ba, "Mü wu würüse ne eyi? Ah le ngü ka-ra fa nda-mü ka. Ceka la, te ma koro gba mü sene, mü le ato ngu fere azürü lö ra di de. Amba würüse ne, ah zürü lö ra eyi de ngura ye. Fü ah adu akö de su-nzö ye. 45Kpah bala, tïne te mü gü mandï fere ne, mü faka ra nda-mü de. Amba würüse ne, ah ce da efaka lö ra nda de. 46Mü za ra reke areke, ba ngba ka-mü ne, kpah de. Amba würüse ne, ah za ra cu reke areke. 47Teka ngü la, ma ngbü emala fü mü, gü ba, mere bi wü siti ngü ka würüse la, te engu mere la, Me boro eyi ʼburu asidi. Nih tï eyi awu ngü la bala, angü ah le ra eyi fa sü. Amba te mü gü ba, ni mere siti ngü fa sü de, te ah bala, mü le ngü ka-ra mbi mbi nda-mü kpah de." 48Fü Yesu adu amala ngü fü würüse la, gü ba, "Ma boro wü siti ngü ka-mü eyi ʼburu." 49Te gara wü Farusi, de te ewü ngbü ezü e de wü Yesu ne, je ngü la bala, fü ewü akpo da emala ngü esüka wü, gü ba, "Komoko la ngbü eboro siti ngü ka wü kpara, ne baye baye? Ah ngbü efï, gü ba, ni de Me?" 50Fü Yesu adu amala tïne adu ngü fü würüse la, gü ba, "Mü küwa eyi, angü mü to maguma mü eyi fere. Mü nü enü de gu maguma."

will be added

X\