Luka 18

1Fütanga ngü la, fü Yesu adu amala gara cingangü de mani fü wü kpara ka-ye, teka asere fü ewü, gü ba, "Wüh mere e ambü de, wüh ngbü fï da eyi-ta Me." 2Fü ah amala fü ewü, gü ba, "Gara miri ta ladü, gbü gara kötï biringbö, te ngbü ekolo ngü ka wü kpara te siti kaje, angü ah fï ngü ka Me ʼburu ʼburu de. Ah ngbü eceka wü kpara gbü jia ye ʼburu kpaakpa. 3Gbü gara sïkpï, fü gara kpara amere siti ngü fü gara würüse wökö gbü kötï engu la. Fü würüse la ayia anü kpaka miri la, teka de engu ye süka ngü ka-ani ake vügü ka-ni la. Miri la le nda de. 4Fü würüse la angbü ekoro kpaka miri la, gbü wü sïkpï ʼburu, teka ngü ka-ye la. Amba miri la le akolo ngü ka würüse la nda de. Fütanga mere bi sïkpï, fü miri la akpo da efï ngü emaguma ye, gü ba, 'Ni ena amere baye? Fanü fanü, ni kpe cürü Me de, ni ngbü kpah eceka wü kpara gbü jia ni ʼburu kükürü. 5Amba ngü ka würüse wökö, te ngbü ekoro gbuuu embü ni ne, ah le de ni kolo ngü kaka la mbi. Angü ah ena angbü ekoro fï bü da embü nzö ni sene, gbü wü sïkpï ʼburu.' " 6Fü Miri Yesu adu amala fü wü kpara ka-ye, gü ba, "Yi fï la nga mene ngü, de te siti miri la mala ne. Ah du le ta-ngü te würüse wökö la eyi, angü ah mbü engu eyi fa sü. 7Yi efï, gü ba, Me tï ale ta-ngü te wü kpara ka-ye neh de? Te wüh ngbü fï bü da eku gba fefe ra de biti la, Me ena ale ta-ngü te ewü ale. 8Ma ngbü emala fü yi dene zu ngü, Me tï ayiri, teka ale ta-ngü te wü kpara ka-ye de. Amba gbü sïkpï te ma ena adu akoro tete füh kotö ne, ma ena amaka bi wü kpara, te ewü di eyi ʼburu nzo gbü ngü ka Me fanü?" 9Fütanga ngü la, fü Yesu adu amala gara mani, teka ngü ka wü kpara, de te ewü ngbü efï emaguma wü, gü ba, ani ka-ani de züka wü kpara gbü jia Me me-ani. Teka ngü la, fü ewü angbü efala wü bu wü afala. 10Fü Yesu amala ngü, gü ba, "Wü kpara ʼbasu yia ta nü kpa etambasü Mere Kambü ka Me agbü Yerüsalema, teka aku gba fü Me. Gara ta de Farusi, gara de kpara te ngbü ero jiase ka wü miri. 11Te Farusi la koro tete etambasü la, fü ah arü tikpi, gbü jia wü kpara ʼburu, aku nda-ye gba fü Me, gü ba, 'Wayi bala Me, ni gbo nga ye, angü ni de züka kpara gbü jia ye. Ni mere siti ngü baka gara wü kpara ne de. Angü wü gara ewü de mürü zi, wü gara ewü de mürü wu, wü gara ewü de mürü waza, wü gara ewü ngbü efiti wü bu wü teka ngü ka gümü e, baka kpara te ngbü ero jiase ne. 12Amba nda-ni, ni ngbü emere ʼburu wü ngü, te reke areke gbü jia ye. Gbü wü sïkpï lorozi, ni ngbü eʼbï te-ni du ʼbasu. Ni ngbü kpah eto wü tari wü e ka-ni ʼburu fü ye. Fanü fanü, ni de züka kpara!' 13Amba kpara te ngbü ero jiase ne, mü nü rü nda-mü mba edere sü kpala. Mü le ae jia mü tikpi kpah de, teka cïnga emaguma mü. Fü mü ayia andaʼba te-mü fü Me, gü ba, 'Akoo Me, ye ceka la cïnga ni, de ye boro siti ngü ka-ni, angü ni ka-ni de siti kpara.' " 14Fü Yesu amala ngü fü wü kpara ka-ye, gü ba, "Yi fï nda-yi, gü ba, esüka wü kpara de ʼbasu ne, e-reke gbü jia Me neh ngü ka da? Ma emala fü yi dene zu ngü, ngü ka kpara te ro jiase reke me-ye. Te di bala, mene kpara te ngbü eo ngü ka-ye memere, Me tï ale ngü kaka de. Amba mene kpara, te ngbü endaʼba te-ye fü Me, teka wü siti ngü ka-ye la, Me ena ao engu ba mere kpara me-ye." 15Fütanga ngü la, fü gara wü kpara ayia akoro de wü jürü jaji ka-wü kpaka Yesu, de engu o kpa ye gbü nzö ewü, teka de Me to wazi fü ewü. Te wü kpara ka Yesu wu ngü la bala, fü ngü la asiti te ewü. Fü ewü akpo da eliki wü jaji la. 16Te Yesu wu ngü la bala, fü ah ayia aï wü jürü jaji la kpaka ye. Fü ah amala ngü fü wü kpara ka-ye la kpekpeke, gü ba, "Yi ce wü jaji la, de wüh koro kpaka ra. Yi mere e atïrï ewü de. Angü wü jürü jaji cu ngü wü de, wüh mere mani kpah de. Mene wü kpara te maguma ewü di baka nda wü jaji de bala ne, wüh ena aküwa gbü sü ka Me agbü kpï me-wü. 17Ma ngbü emala fü yi dene zu ngü. Te mü le ara fü Me, ah le de mü fü maguma mü ba nda wü jürü jaji. Angü te maguma mü ngbü ba nda wü jaji de la, mü tï arï gbü sü ka Me agbü kpï kpah de." Dela ngü ta te Yesu mere fü wü jürü jaji. 18Fütanga ngü la, fü gara mere kpara ayia akoro kpaka Yesu, ayi-tata, gü ba, "Züka mere kpara, ni ena amere baye, teka fü ni aküwa agbü sü ka Me, fï mere badi?" 19Fü Yesu amala ngü fefe, gü ba, "Mü ï ra züka kpara neh teka ne? Züka kpara füh kotö ne nda ma, ʼduwa Me kpikpi ye. Mü wu bala de? 20Te mü le aküwa la, ah le de mü mere wü Rïrï ka Me ʼburu mbi mbi mbi. Mü wu Rïrï la de? Rïrï la gü ba, 'Mü mere e amere waza de. Mü mere e amörö kpara de. Mü mere e azi e de. Mü mere e adi esutu wu te wü bu mü de. Mü je rïrï ka wö mü ake ni mü.' " 21Fü mere kpara la alügü ngü, agü ba, "Ni kpo da emere wü ngü la eyi kü gügü, o ni di la jaji, zalü akoro di dene, ni ngbü fï bü emere wü Rïrï la." 22Te Yesu je ngü la bala, fü ah amala ngü fefe, gü ba, "Ah de züka ngü. Amba du ngü ladü biringbö te mü mere la de. Te di bala, mü du edu, mü cïnzï wü e ka-mü ʼburu asidi. Fü mü aza jiase engu la, ato fü wü mürü cïnga, fü mü adu alala gbü nga ra, teka fü mü adu amaka küküwa te gara, agbü sü ka Me agbü kpï." 23Te mere kpara la je ngü la bala, fü ah angbü de mere cïnga emaguma ye. Fü ah ayia alügü nga ye, edu agba ye, de mere fïngangü gbü nzö ye, angü engu ta de mere bi wü e esaka ye fa sü. 24Fü Yesu aceka nga mere kpara la. Fü ah amala ngü fü wü kpara ka-ye, gü ba, "Wü kpara te ewü di de mere bi wü e esaka wü ne, ah kpekpeke fü ewü teka afü te-wü, ato maguma wü fü Me! 25Ah baka ya te le arï gbü enga gö sögbe ne. Ah tï eyi arï kpala fanü? Ah tï arï nda de. Amba ngü ka mene kpara de mere bi wü e esaka ye, ah kpah bala. Ah ena adi kpekpeke fefe, teka afü maguma ye, ara fü Me." 26Te wü kpara ka Yesu je ngü la gögömö na bala, fü ewü akpo da eyi-ta tete-wü, gü ba, "Te ngü la tïne bala la, biri kpara ladü te ena aküwa?" 27Fü Yesu alügü ngü fü ewü, gü ba, "Kpara te ena aküwa te-ye de tete-ye nda ma. Angü ngü la fa wü kpara eyi ʼburu. ʼDuwa te Me ena aküwa mü me-ye, angü ngü te ena afa Me nda ma." 28Petero, fü mü arü amala ngü fü Yesu, gü ba dene, "Mere kpara deyï, ye ceka la, ani ce wü e ka-ani eyi ʼburu, teka alala gbü nga ye. Te di bala ne, ngü ka-ani ena adi baye?" 29Fü Yesu amala fü ewü, gü ba, "Wayi, yi ena amaka züka ngü amaka. Ngü te ma emala fü yi dene, ah de kpeke ngü. Te mü ce wü e ka-mü teka ngü ka-ra, teka amala ngari Me fü wü kpara la, Me ena ato mere bi züka ngü fü mü, afa nda-mü te mü ce ne ka. Anga mü ce neh ene. Te ah de gba mü, wara mü, wü di enga ni mü, wö mü ake ni mü, anga wü di mü, te mü ce ewü teka ngü ka-ra la, Me ena ato mere bi züka ngü fü mü füh kotö ne, da wü e te mü ce la. Kpah bala, Me ena aküwa mü gbü sü ka-ye agbü kpï fï mere badi." Dela ngü te Yesu mala, teka wü kpara de mere bi wü e esaka wü. 31Fütanga ngü la, fü Yesu amala ngü fü wü kpara ka-ye nzükpa de füh ye ʼbasu ne, gü ba, "Yi wu eyi, gü ba, nih ngbü enü dene agbü Yerüsalema. Te nih ena akoro kpala, wü ngü ʼburu, ta te wü mürü dofo ba gbü Ngari Me teka ngü ka-ra, Ye Kpara ka Kpï ne, wüh ena amere te-wü. 32Angü wüh ena ato ra esaka wü ganzi kpara, fü ewü akpo emü ra, da efala ra, da esü ngüsü gbüra ra. 33Wüh ena asüma ra de juru, fü ewü amörö ra. Amba Me ena adu azükü ra gbü kpi la gbü ebabata sïkpï." 34Amba ngü de te Yesu mala la, wü kpara kaka je sisi na nda-wü de. Angü si-ngü la wo te-ye fü ewü awo, ah rï gbü nzö ewü kpah de. 35Baka te wü Yesu ngbü la fï bü enü te kaje ka Yerüsalema ne, fü ewü anü akoro gbamari ede Yeriko. Fü ewü amaka gara komoko, te jijia na ni ani, te ngbü edere kaje, da eyo e te wü kpara. 36Fü komoko la aje giri mere bi wü kpara, te ewü ngbü enye sü ne. Fü ah ayi-ta ngü teka ngü la, gü ba, "Wü di enga ni ni, e-ngbü emere te-ye ne ngü ne?" 37Fü ewü alügü ngü fefe, gü ba, "Ah de Yesu, te ngbü enye sü me-ye." 38Te komoko la je ngü la bala, fü ah akpo eba rere kpa tikpi, da eï Yesu, gü ba, "Yesu! Kundu ye Davidi! Ni wu eyi, gü ba, ye koro teka aküwa ani! Ye ceka la bü cïnga te ni ne baaa!" 39Fü wü kpara, ta te ewü tï engakara nü ne, ayia amala ngü fefe kpekpeke, gü ba, "Ye nga anga!" Amba komoko la, mü le aje ngü ka-ewü la nda-mü de. Fü mü angbü fï bü da eba rere te ïrï Yesu kpa tikpi, gü ba, "Yesu! Kundu ye Davidi! Ye ceka la bü cïnga te ni ne baaa!" 40Te Yesu je ngü la, fü ah ace te-ye, arü, agü ba, "Wü koro de engu akine!" Fü ewü aza komoko la, akoro di kpaka Yesu. Fü Yesu ayi-tata, gü ba, 41"De-ye deyï, ye le de ni mere fü ye ne ngü ne?" Fü komoko la alügü ngü fefe, gü ba, "Akoo, mere kpara, ma le de mü ü jia ra, teka fü ra adi kpah eceka kpï!" 42Fü Yesu amala ngü fefe, gü ba, "Wayi, ceka la, mü küwa eyi, angü mü to maguma mü eyi fü Me!" 43Yesu bü te emala ngü la bala, ʼduwa fü jia komoko la aü te-ye, raaa! Fü engu ayia kürrrü, akpo efa nga wü Yesu, da egbo nga ïrï Me. Te mere bi wü kpara la wu ngü la bala, fü ewü angbü ʼburu de tadu, kpah da egbo nga ïrï Me teka ngü la.

will be added

X\