Luka 1

1Wayi bala, mere kpara Teyofile, ma ngbü eba ngü ne fü mü teka ngü ka Yesu Kurisito. Angü bi wü kpara kpo ta eyi, ere da eba ngü teka ngü ka Yesu, ta te engu ngbü emere esüka nih de sene ne. Wüh ba ngü la, gegege baka te ewü je gömö wü kpara, de te ewü wu ngü la ta cu de jia wü ne. Kpah bala, ma ngbü ta egïrï lö ngü la. Ma maka eyi mbi. Tïtïne fü ra adu afï, gü ba, ah reke fa sü, te ma ena aba nga wü ngü, de te mere te-wü la, ʼburu fü mü. 4Ma mere bala, teka de mü wu mbi mbi mbi, gü ba, ngü ka Yesu, ta te ewü ngbü erï mü di ne, ah ka-ye de zu ngü fanü. 5Gbü wü re ta te gina Erode ngbü mere miri tete, gbü nga nzö sü ka Yudaya, gara mürü gele ka Me ta ladü de ïrï ye Zakarïya. Ïrï wara ka ta de Elïzabeta, te di kpah gbü nguwa Arona. 6Wü Zakarïya ake wara ye, Elïzabeta, ta ʼbasu mini de züka wü kpara gbü jia Me, te ewü ngbü emere wü rïrï ka Me ʼburu de maguma wü biringbö. 7Amba, wüh bï ye ta nda-wü de, angü Elïzabeta ka-ye ta de wündü. Kpah bala, wüh gbe ka-wü ta eyi ʼbasu mini, re ka-ewü nye sü kpah eyi fa sü. 8Gbü gara sïkpï, wü Zakarïya de wü bu ye ngbü ta emere tima ka-wü gbü Mere Kambü ka Me agbü Yerüsalema. 9Fü ewü amere gele ka mafe kpara, teka afe mene kpara, te ena arï agbü nzïla sü kpa esambü ka Me, teka adi ecuru rü de züka se ye baka kïcï kpala. Fü ïrï Zakarïya akoro me-ye. Fü Zakarïya arï agbü nzïla sü teka amere tima ka gele la engakara Me. 10Gbü lö-ra te Zakarïya rï tete kpala, fü mere bi wü kpara angbü nda-wü da eyi-ta Me kpa etanü. 11Fü malayïka ka Me ayia akoro kpaka Zakarïya kpa esambü ka Me kpala, arü gbü kokpa ede cangalï, de te wüh ngbü ecuru züka se-rü fü Me tete na la. 12Te Zakarïya wu malayïka ka Me la, fü fïngangü kaka ayia adürü ka cürü. 13Fü malayïka la amala ngü fü Zakarïya, gü ba, "Zakarïya, mü kpe cürü de, angü Me je gba ka-mü eyi. Wara mü, Elïzabeta, ena abï ye komoko fü mü. Fü mü agü ïïrï na Yüwane. 14Mü ena angbü de tadu teka ngü kaka. Kpah bala, mere bi wü kpara ena angbü de tadu teka ngü kaka-na. 15Angü ah ena adi de mere kpeke kpara gbü tima ka Me. Te di bala, ah tï anzö fï nda de. Angü, gbü sïkpï te wüh ena ayaka engu tete, Me ena ato wazi ka Nzïla Wazi ye fefe. 16Ah ena alügü mere bi wü di enga Yïsarayele, ta te ewü dürü gbü ngü ka Me ne, ʼburu te züka kaje ka Me. 17Engu ena angbü endoro, da emere tima ka Me, gbü wazi ka Nzïla Wazi Me, gegege baka nda Ïlïya, mürü dofo ka Me ta gügü ne. Ngü te engu ena arï wü kpara di ne, ena areke ngü esüka wü wö ye wü jaji, de wü di wü ʼburu me-ye. Ah ena arï wü mürü kögö-nzö, de wüh fü maguma wü, adu angbü emere züka ngü gbü jia Me. Ah ena areke kpah maguma wü kpara, teka fü ewü angbü nzo, acï nga Mere Miri te Me ena atima." Dela ngü ta te malayïka ka Me mala fü Zakarïya. 18Te Zakarïya je ngü la bala, fü mamaguma akolo. Fü ah ayia amala ngü fü malayïka la, gü ba, "Ngü la, ma ena awu baye baye, gü ba, ah de zu ngü? Angü tïtïne a gbe ka-a eyi ʼbasu mini fa sü." 19Fü malayïka la alügü ngü fefe, gü ba, "Ma de malayïka Gabürele. Ma ngbü erü engakara Me, teka angbü emere wü tima kaka-na. Engu tima ra me-ye teka amala ngü la fü mü. 20Mü le aje ri ra de, neh teka ne? Te di bala, mü tï aro mö de. Mü ena angbü aböbö, zalü akoro gbü sïkpï te wara mü ena ayaka tete." Fü malayïka la ayia anü sü ka-ye. 21Gbü lö-ra engu la, fü ngü la aga gbü jia mere bi wü kpara, te ewü ngbü nda-wü ecï nga Zakarïya kpa etanü ne, afa sü, angü Zakarïya yiri agbü nzïla sü ka Me la eyi fa sü. 22Te Zakarïya koro tete kpa etanü, ah tï aro mö nda tïne de. Fü ah angbü emala ngü fü wü kpara la bü de kpa ye. Fü wü kpara la awu teke, gü ba, Me sere gara ngü eyi fü Zakarïya agbü nzïla sü ka-ye kpala. 23Te sïkpï ka tima ka Zakarïya nza tete, fü engu ayia ago kpa gba ye. 24Sidi nga sïkpï mba cüküʼdaye, fü wara ka, Elïzabeta amaka bu. Fü Elïzabeta amala ngü, gü ba, "Wayi, ni gbo nga ïrï Me, teka züka ngü te engu mere fü ni ne! Angü ngü ta te wüh ngbü efala ni di ne, Me reke ngü engu na la eyi." Fü Elïzabeta ayia awo ngü la teka fe ʼburuve. Ah mala fü wü kpara ʼburu ʼburu de. 26Fütanga ngü la, fü Me ayia atima malayïka ka-ye, Gabürele, kpaka gara jaji würüse de ïrï ye Marïya, agbü gara kötï de ïrï ye Nazareta, gbü nga nzö sü ka Galïlaya. Ngü la mere te-ye, o bu Elïzabeta mere eyi fe maʼdiya. Marïya ta de jaji würüse, te wüh dara engu fü gara komoko de ïrï ye Yüsefa, ta te di gbü nguwa Miri Davidi. 28Fü Malayïka Gabürele ayia arï kpaka Marïya kpa esambü, amala ngü fefe, gü ba, "Mandï fü mü, Marïya. Mü ngbü de tadu, angü Me ladü tundu de mü. Ah o züka maguma ye eyi te mü, fü ah ato mere wazi fü mü teka ngü la." 29Te Marïya je ngü la bala, fü mamaguma agürü. Fü ah angbü da eyi-ta tete-ye, gü ba, si-ngü gbü mandï la gü neh fe? 30Fü malayïka la amala ngü fefe, gü ba, "Marïya, mü kpe cürü de, angü ngü ka-mü reke gbü jia Me fa sü. 31Mü ena amaka bu, fü mü abï ye komoko, agü ïïrï na Yesu. 32Mbarase la, ah ena angbü mere kpara. Wüh ena angbü eï engu Ye Me. Mere Me ena ato wazi fefe, de ah ngbü mere miri füh kpökpö ka kundu ye, Davidi. 33Ah ena angbü mere miri gbü nzö nguwa Yïsarayele ʼburu, fï mere badi. Wazi miri kaka tï anza kpo fï de." 34Baka te Marïya je ngü la bala, fü ah amala ngü fü malayïka la, gü ba, "Apa! Ngü la ena amere te-ye bala, neh baye baye? Baka te ni wu ngü ka komoko nda-ni la de ne." 35Fü malayïka alügü ngü fefe, gü ba, "Nzïla Wazi Me ena ato wazi la fü mü me-ye. Angü mbarase de te mü ena abï ne, ah ena adi de Ye Me. 36Mü ceka la, mürü mü, Elïzabeta, maka bu kpah eyi, gbü gbe ye. Wü kpara ngbü ta efala engu, gü ba, 'Ah de wündü, ah tï abï ye de.' Tïtïne engu eyi de bu, fe maʼdiya dene. 37Angü ngü te ena afa Me, nda kü ma." 38Te Marïya je ngü la bala, fü ah amala, gü ba, "Wayi, ma de labï ka Me. Ma eyi esa rïrï kaka. Ah le fü ngü la amere te-ye fere, baka te mü mala la." Fütanga ngü la, fü malayïka la ayia ace engu, anü sü ka-ye. 39Te Marïya je nga Elïzabeta, gü ba, engu eyi de bu ye ne, fü ah ayia bü kere, gbü wü sïkpï la, anü aceka Elïzabeta, agba wü Zakarïya, te di eze wü da agbü Yudaya. 40Te engu koro agba Zakarïya, fü ah amaka Elïzabeta, agü mandï fefe. 41Te Elïzabeta je ri Marïya, te gü mandï fü ye ne, fü engu awu ʼduwa te mbarase kpo da emere wutu guvu ye. Fü Elïzabeta amaka wazi ka Nzïla Wazi Me, amala ngü de ri ye kpa tikpi, gü ba, "Marïya, Me le ngü ka-mü eyi fanü, fa wü würüse füh kotö ne ʼburu. Kpah bala, engu ena ato wazi fü mbarase, de te mü ena abï ne. 43De-mü, te mü di de ni ye Miri ka-ra ne, mü koro aceka ra tïne bü cu me-mü bane? Apa! Ngü la neh baye? 44Marïya, mü ceka la, te ma je ri mü, de te mü to mandï fere ne, mbarase kpo ʼduwa da emere wutu de tadu guvu ra. 45Züka ngü di fü mü, de te mü to maguma mü eyi fü Me, teka ale ngü de te engu mala fü mü ne. Te di bala, wü ngü la ena amere te-wü ʼburu tenga riri na, ba e te engu mala fü mü." Dela ngü te Elïzabeta mala fü Marïya. 46Teka ngü la, fü Marïya angbü de tadu, ayia akpo ebï ci, gü ba, "Maguma ra ngbü eyi de mere tadu. 47Ma egbo nga ïrï Mere Me, te küwa ra ne. 48Angü engu fï nga ra eyi, te ma di de labï kaka-na ne. Akpo enatikine, anü kpa engagira nü, wü kpara ʼburu ena adi emala nga ra, gü ba, 'Ma de würüse te Me to züka ngü eyi fefe.' 49Me mere mere kpeke ngü eyi fere. Ma egbo nga ïïrï na, angü engu de wazi fa sü. Ah ka-ye kpah nzïla. 50Wü kpara ʼburu, te ewü ngbü emere rïrï kaka, engu ena aküwa ewü fï mere badi. 51Ah ngbü emere wü mere kpeke ngü. Ah baya wü mürü kögö-nzö eyi, angü wawazi na fa sü. 52Ah gügürü wü miri, de te ewü ngbü engbü gbü nzö wü kpara füh kotö ne, eyi ʼburu kötö. Fü ah aza wü kükürü kpara, adu ao da ewü. 53Ah to mere bi wü e fü wü kpara, te ewü ngbü ekpi de tala ne. Amba wü kpara, ta te ewü di de mere bi wü e esaka wü ne, ah liki ewü eyi de kpa wü kükürü. 54Ah koro teka ale ta-ngü te wü kpara ka-ye, wü di enga Yïsarayele, de züka maguma ye, 55kpah baka ngü ta te engu mala fü Abarayama, gü ba, 'Ni ena amere wü ngü la bala te gara fefe na, de wü di ye ʼburu, fï mere badi,' ne." Dela ci ta te Marïya bï, te engu koro tete kpaka Elïzabeta. 56Fü Marïya angbü kpaka Elïzabeta kpala, teka wü fe bata. Fü ah ayia ago kpa gba wü, agbü Nazareta. 57Fütanga ngü la, fü sïkpï ka Elïzabeta ayia atï teka ayaka. Fü engu ayaka mbarase ka-ye la, jaji komoko. 58Te wü bu ye Elïzabeta, de wü mürü ye na je ngü la, fü ewü angbü de tadu afa sü, gü ba, "Me to züka ngü eyi fefe." 59Gbü sïkpï ʼbajena, fütanga yayaka la, fü ewü akoro, teka agü mbarase la esa basa. Wüh le ta agü ïrï wö ye na, Zakarïya, eküküte. 60Fü Elïzabeta ace kpo, gü ba, "Aʼa, ïïrï na ena adi Yüwane." 61Fü ewü alügü ngü fefe, gü ba, "Apa! Ïrï kpara baka e la ladü gbü nguwa yi fanü? Ah nda ma." 62Fü ewü ayi-ta Zakarïya bü de kpa wü, gbü ngü la, angü ah tï aro mö nda de. Wüh gü ba, "Ye ele de wüh gü ïrï mbarase ne, neh da?" 63Fü Zakarïya ayo köcökpa. Fü ah aba ngü fefeh, gü ba, "Ïïrï na de Yüwane." Fü ngü la aga gbü jia wü kpara ʼburu aga afa sü. 64Kpah bü gbü lö-ra engu la, fü mi Zakarïya ayia afuru te-ye. Fü ah akpo tïne da ero mö mbölö mbölö. Fü ah akpo da egbo nga ïrï Me de mere ri ye kpa tikpi. 65Teka ngü la, fü cürü arï te wü bu ye na la afa sü. Fü ngü la awü, abaya esüka wü kpara te nga nzö rüvü ka Yudaya sela ʼburu, tïne ʼduwa ba-neh-ene-la. 66Mene wü kpara ʼburu ta te ewü je nga ngü la, fü ewü angbü de mere fïngangü, da eyi-ta ngü esüka wü, gü ba, "Apa! Ngü ka mbarase la, ah ena angbü te gara, neh baye?" Angü wüh tï eyi awu, gü ba, mbarase la, Me to wazi eyi me-ye fefe fanü fanü. 67Fütanga ngü la, fü Nzïla Wazi Me ato wazi fü Zakarïya. Fü engu akpo da emala ngü baka mürü dofo, da ebï ci, gü ba, 68"Gbo nga e fü Mere Me, te di de Mere Miri agbü kpï, te ngbü gbü nzö wü kpara ka-ye, wü Yïsarayele. Nih gbo nga ïrï Mere Me, angü ah koro eyi teka aküwa nih, wü kpara ka-ye. 69Me tima kpeke kpara eyi teka aküwa nih, engu de kundu ye Miri Davidi. 70Ah mala ta wü ngü la gügü gömö wü mürü dofo ka-ye, 71gü ba, 'Ni ena atima Mere Miri, te ena aküwa nih esaka wü vügü ka-nih.' 72Wayi, Me sere züka maguma ye eyi fü nih. Ah fï nga ngü ta te engu mala fü kundu nih, Abarayama ne, eyi, 73gbü sïkpï ta te ewü nzö ngüte tete ake di, gü ba, 74'Ni ena aküwa nih esaka wü vügü ka-nih, teka fü nih amere tima ka-ni de wazi, cürü tïne ma. 75Teka de nih ngbü ba züka wü kpara ka-ni, da emere wü züka ngü gbü jia ni, te nga wü sïkpï ʼburu, o nih di la ladü de jia nih, füh kotö sene.' 76Te di bala, de-mü, ye ra, wüh ena angbü eï mü, gü ba, mü de mürü dofo ka Mere Me. Angü mü ena anü kpa engagira nü, da ereke kaje fü Mere Miri te Me ena atima. 77Kpah teka agü tamu ngü la fü wü kpara kaka, gü ba, 'Ah ena akoro teka aküwa ewü, angü ah ena aboro siti ngü ka-ewü.' 78Kükürü de, angü züka maguma ka Me fü nih fa sü. Engu ena atima kpara te ena aküwa nih, te ena alofo sü fü nih füh kotö ne. 79Teka ngü la, sü ena alofo gbü jia wü kpara ʼburu, ta te ewü ngbü gbü mbiri sü ka kpi ne, alofo. Nih ena angbü endoro tïne te züka kaje, de gu ngü emaguma nih teka ngü ka Me." Dela ci ka Zakarïya ta te engu bï teka ngü ka ye ye, Yüwane Mürü Babatïza ne. 80Fü mbarase la aga, akoro mere komoko. Fü engu amaka kpah wazi, angbü kpeke kpara gbü jia Me. Fü engu angbü kpa etü gü kpala, zalü koro di gbü sïkpï, te engu koro gü tamu ye fü wü di enga Yïsarayele tete.

will be added

X\