Yudi 1

1De-ra Yudi, enga ni ye Yakobo, te ma di kpah labï ka Yesu Kurisito ne, ma to mandï fü yi, wü kpara te Me ï yi eyi, teka alala gbü ngü ka-ye ne. Wö nih, Me, ngbü ele yi efa sü. Kpah bala, Yesu Kurisito ngbü da eceka kpï fütanga yi me-ye. 2Me di de yi, de ah le yi de maguma ye ʼburu. De ah to kpah gu ngü fü yi fa sü, teka züka maguma ye. 3Wü di enga wüna, ma ngbü ta ereke te-ra, teka aba köcökpa fü yi, teka amala nga küküwa te Yesu to fü nih ne. Amba ma du je gara ngü tïtïne, gü ba, gara wü mürü mani yia egïrï da wü afiti yi. Teka ngü la, fü ra ayia aba köcökpa ne fü yi kere, teka de yi rü kpekpeke. Ma le de yi lala duu gbü ngü ka Yesu. Angü ngü ka Yesu la de zu ngü ka Me, te Me to fü nih, wü kpara ka-ye. Ngü la, wüh tï afü de. Te di bala, ah le de yi ceka te-yi ʼbe, angü wü mürü mani la zi te-wü eyi, nü rï ngbü esüka yi kpala. Wüh gü ba, "Ani de wü kpara ka Me," amba wüh to maguma wü fü Me nda-wü de. Wüh le Miri Yesu nda-wü kpah de. Wüh ngbü egïrï da wü, teka afüfü ngü, teka züka maguma ka Me ne, gü ba, "Te mü ngbü emere waza, de wü gara siti ngü ba e te mü ngbü ele la, ah mere e de. Me ena aboro siti ngü ka-mü la aboro." Amba ngü la bala nda de! Ah ka-ye de wu! Yi mere e aje ngü ka-ewü la nda-yi de! Gara wü mürü dofo ka Me ba ngü ka wü mürü mani la, gbü Ngari Me ta gügü, gü ba, "Te gara, Me ena ato kuru te wü kpara, te ewü ngbü esutu wu, da efiti wü kpara de bala." 5Wü di enga wüna, dene ngü te ma ngbü ele amala fü yi. Me ena ato kuru te siti wü kpara, te ewü le aje rïrï kaka de ne. Yi tï eyi awu ngü la, teka ngü ta te mere te-ye fü nih, wü di enga Yïsarayele ne. Ta gügü, Me küwa wü kundu nih, wü di enga Yïsarayele, esaka wü vügü ka-ewü, wü kpara ka Ezepeto. Amba fütanga ngü la, fü gara ewü ayia ace ngü ka Me, adu amere kögö-nzö fefe. Te di bala, Me ce ta ewü eyi bü bala? Ah bala de! Engu du mörö wü mürü kögö-nzö la ʼburu asidi. 6Kpah bala, ta gügü, gara wü malayïka yia ce ngü ka Me, fü ewü ayia afü te-wü vügü kaka. Angü wüh ngbü ta ele de ani ngbü me-ani, baka mere wü kpara. Te di bala, Me ce ngü la ta eyi bala? Ah bala de! Me yia i ewü ʼburu de nyarï, gö gö gö! za ewü, sötö ʼburu agbü du, gbü mere mbiri sü. Tïtïne wüh fï ladü kpala, gbü mbiri sü la, ecï nga adu sïkpï, te Me ena akolo ngü ka wü kpara ʼburu tete. 7Kpah bala, wü kpara ka Sodomo ake Gomora, bete wü bu wü, gbü wü gara kötï gbamari ede ewü ne, wüh le ta aje rïrï ka Me de. Fü ewü angbü eto te-wü ʼburu ʼburu da ememere waza, de wü gara ngü ka lümü te tï de. Fü Me ayia acuru ewü ʼburu ʼburu asidi. Dela ngü te ena asere fü nih, gü ba, Me ena ato kuru te gara ato, te wü kpara, de te wüh le aje rïrï kaka de ne. Fü ah aza ewü, agü ʼburu agbü mere du ka wa fï mere badi, fü ngü ka-ewü anza kpala. 8Amba wü mürü mani la, wüh ce ngü ka Me eyi asidi. Wüh le aje rïrï kaka nda-wü de, kpah baka siti wü kpara ta gügü ne. Wü mürü mani la gü ba, Me ngbü emala ngü fü ani gbü roto. Amba ngü ka-ewü la, ah de ngü ka Me nda de! Angü wüh ngbü ememere bi wü ngü ka lümü, de wü waza bü faaa, baka e te ewü ngbü ele. Wüh le akpe cürü mere wü kpara ka-wü kpah de. Wüh ngbü kpah da esoko wü malayïka asoko! 9Amba ah de siti ngü teka adi esoko kpara. Angü Mïkayele, te di de mere wü malayïka ka Me ne, mere ngü bala kpah de. Ta gügü te Müse kpi tete, fü Mïkayele, ayia akoro teka ati kö Müse. Fü Satana ayia kpah akoro da ega yïkï ake di. Amba Mïkayele soko Satana ta nda de. Mïkayele mala bü ngü fü Satana, gü ba, "Me ena akolo ngü ka-ye me-ye." 10Amba wü mürü mani la, wüh le ngü ka soko fa sü. Wüh ngbü efala ngü ka Me afala, angü wüh je si-ngü gbü ngü ka Me nda-wü ʼburu ʼburu de. Fïngangü ka-ewü ka-ye baka nda siti wü nü la. Teka ngü de te ewü ngbü emere la, Me ena ato kuru te ewü ato. 11Wü di enga wüna, fanü fanü, Me ena ato kuru te wü kpara la ato. Angü ngü ka wü kpara la ka-ye ʼburu esiti. Wüh ka-wü kpah baka Kayïna, angü wüh ngbü emere fï bü siti wü ngü. Wüh kpah baka Balama, angü wüh ngbü eto te-wü ʼburu ʼburu teka gümü ngü ka jiase. Wüh le aje rïrï ka wü mere kpara ka-wü nda-wü de, baka nda Küra ta gügü ne. Te di bala, Me ena anza ngü ka-ewü te gara ʼburu ʼburu asidi, baka te engu mere ta fü Küra ne. 12Wü mürü mani la ngbü engbü esüka yi, da ezü e tundu de wü yi. Wüh ngbü emala ngü, gü ba, "Ani kpah de wü kpara ka Yesu, baka yi." Amba ah bala de! Wüh kpe cürü Me nda-wü de. Wüh gü ba, "Ani ngbü da erï wü kpara de ngü ka Me," amba wüh ka-wü de wü mürü fiti! Rïrï ka-ewü ka-ye ʼburu de wu! Wüh gü ba, "Ani ngbü eceka kpï fütanga wü kpara ka Me," amba wüh ngbü efï ka-wü bü nzö nga wü. Wüh ka-wü gegege baka agö te ngbü ebïrï, baka e te yia elï alï la, amba ah ni jia ra bü kükürü. Wege ena aza ka-ye, anü sü di ka. Ah du lï nda tïne de. Kpah bala, wüh ka-wü baka mene wü rü, te ewü kpi akpi, wüh tï arï nda-wü tïne de, angü wüh gbigbi sï ewü eyi. 13Wü kpara la ngbü ememere ngü ka lümü bü faaa! baka ngu te si fa sü, te ngbü ekö bi wü ca-e enü di, da eli edere ngolo ʼdüü ʼdüü ʼdüü! Wüh ka-wü kpah baka ca-e te wege ngbü efe. Te di bala, yi mere e arï gbü ngü ka-ewü la nda-yi de, angü Me ena ato kuru te wü kpara la te gara, agü ewü gbü mbiri sü, fü ngü ka-ewü anza fï mere badi. 14Ta gügü, Enoka, kundu kundu ye Adama ne, mala ta ngü teka wü mürü mani la eyi. Angü Me sere ta ngü la me-ye fefe, o ngü la mere te-ye la de, gü ba, "Te gara, Me ena ato kuru te siti wü kpara, de te ewü le ngü kaka de ne. Angü Me ena akoro füh kotö sene, de mere bi wü malayïka ka-ye, gbe gbe gbe, teka aye süka ngü ka wü kpara füh kotö ne ʼburu. Ah ena ato kuru te siti wü kpara, teka siti wü ngü te wüh ngbü emere ne, baka siti ngü mündü, te wüh ngbü emala, da esoko Me di ne, de wü gara siti ngü kpah ʼburu." Dela ngü te Enoka mala ta gügü, teka ngü ka wü mürü mani la. 16Dela eyi ngü te ma le amala fü yi, teka wü mürü mani la. Yi mere e aje rïrï ka-ewü la nda-yi de, angü wüh ngbü engbü ka-wü fï bü da ega yïkï, da emala ambalaʼba eküte wü kpara. Wüh ngbü emere ngü ka-wü, baka te wüh ngbü ele. Wüh ngbü egbo nga wü de tete-wü, da eo te-wü memere. Wüh ngbü kpah da ecu ngü wü kpara de mani, teka de ani maka züka e esaka ewü tete. 17Wü di enga wüna, yi fï la nga ngü, ta te wü mürü tima ka Yesu Kurisito mala fü yi gügü, 18gü ba, "Gbü adu wü sïkpï ka-nih dene, wü gara kpara ena akpo da efala ngü ka Yesu. Wüh ena akpo da emere wü ngü, baka e te ewü ngbü ele." Dela ngü ta te wü mürü tima ka Yesu mala fü yi. Ah bala de? 19Enatikine wü kpara la koro eyi! Wüh ngbü eyi esiti fïngangü ka-yi, teka de yi ye süka yi. Wüh ngbü emere wü ngü ʼburu, baka te ewü ngbü ele, angü wazi ka Nzïla Wazi Me emaguma ewü nda ma. 20Wü di enga wüna, ah le de yi lala nda-yi fï bü eküte Yesu, da enü de ngü kaka kpa engagira nü. Yi di fï bü eku gba fü Me, gbü wazi ka Nzïla Wazi Me. 21Ah le de yi lala gbü ngü ka Me, angü Me le yi fa sü. Yi o jia yi te Miri Yesu, angü engu ena aküwa yi me-ye, agbü sü ka-ye agbü kpï, fï mere badi, teka züka maguma ye. 22Amba, teka mene wü kpara de maguma wü ʼbasu ʼbasu ne, yi di ewu cïnga ewü, de yi di kpah esere züka kaje fü ewü kere, angü wüh ena adürü gbü siti ngü ka wü mürü mani la. Teka mene wü kpara, te fïngangü ka-ewü siti eyi esaka wü mürü mani la, yi di kpah ewu cïnga ewü. Amba ah le fü yi adi ekpe cürü siti ngü ka-ewü la akpe, angü siti ngü ka-ewü la ena asiti kpah fïngangü ka-yi. 24Nih gbo nga ïrï Me, angü engu ena ato wazi fü yi me-ye, teka fü yi arü di kpekpeke, gbü ngü kaka. Te di bala, yi tï adürü te kaje ka Me de. Baka te Me zürü yi eyi nzïla ne, ah ena aza yi, akoro di agbü sü ka-ye agbü kpï, fü yi angbü kpala de mere tadu. Nih gbo nga ïrï Me! Engu me-ye de Mere Me, kpikpi ye! Nih gbo ïrï Me! Angü engu küwa nih eyi fï mere badi, teka ngü ka Miri ka-nih Yesu Kurisito. Nih gbo nga ïrï Me! Engu de mere mürü wazi! Nih gbo nga ïrï Me! Engu de Mere Miri, te ngbü gbü nzö nih fï mere badi! Nih gbo nga ïrï Me! Ta gügü, o Me mere kotö ne la de, Me ka-ye kü ladü. Nih gbo nga ïrï Me! Ngü kaka tï anza kpo fï de, zalü fï mere badi. Nih gbo nganga fï bala, nü di kpa engagira nü, fï mere badi! Gbo nga e ngbü te ïrï Me! Ah di bala! Dene adu ngü ka-ra fü yi. De-ra Yudi.

will be added

X\