Yakobo 3

1Wü di enga wüna, ma je eyi, gü ba, mere bi yi ngbü ele angbü mere kpara, teka adi erï wü bu wü de ngari Me. Ah le de yi ceka ngü la ʼbe ʼbe ʼbe feke! Teka ne de, angü de-a, de te a ngbü erï wü bu a de ngari Me ne, te a mere ngü dürü la, Me ena ato mere kuru te a afa sü, afa nda wü bu a la nde ʼburu. 2Yi wu eyi, gü ba, nih ʼburu de wü kpara ka küte, te nih ngbü emere wü gara wü siti ngü. Nih ngbü kpah da emala gara wü dürü ngü. Te mü mala ngü dürü de komö mü de la, amba mü de kpeke kpara, te wu da emere wü ngü ʼburu mbi. 3Yi ceka la, mba mbarase cüküʼdaye, te za enga rü esaka ye, angbü eliki bi wü yiti, enü de ewü kpa te sü, baka te engu ngbü ele. 4Ah kpah bala, teka ngü ka zabu. Te mü di de enga rü, te wüh ngbü eji zabu di esaka mü la, mü tï eyi afü zabu la, anü di agbü sü ba e te mü ngbü ele. 5Ah kpah bala, teka ngü ka komö mü. De te komö mü di kpah bü mba enga e cüküʼdaye eküte mü ne, ah de wazi gbü ye, teka amala mere cögbörö tiri ngü di. Ah gegege ba enga nye-wa te tï gbü ke gü gbü karanga. Enga nye-wa la tï eyi acuru mere sü bane, anza ʼburu nde. 6Wü mene siti ngü te ekoro te komö mü la, wüh kpah gegege ba enga nye-wa, angü wü siti ngü sibi gbügbü fa sü. Ah tï eyi acuru züka fïngangü emaguma mü, asiti ʼburu asidi. Angü Satana ngbü eto wazi fü komö mü la me-ye, teka fü mü adürü, akpi gbü ngü la. 7Wü gara kpeke wü kpara ladü, te ewü wu ngü fa sü. Wüh tï eyi azoro siti nü, afü ao ba nü ka kötï. 8Te di bala ne, kpara ladü te ena afü komö ye, de ah ce da emala siti ngü? Kpara bala ma! Te nga sïkpï ʼburu, komö wü kpara ka-ye nda fï bü emala wü ngü, enü di kpa engakara nü. Te di bala, komö kpara ka-ye ba mere siti kpürü, te a gömö ye mböömbö, ecï kpara, teka ade. 9Komö nih ngbü emala ngü ʼbasu ʼbasu. Ah emala züka ngü, ah emala kpah siti ngü. Nih ngbü egbo nga ïrï Wö nih Me, de komö nih la. Nih ngbü esoko wü bu nih, kpah de komö nih la. Anga Me o wü bu nih la ba kuru ye de? 10Dela, ah de züka ngü? Biri komö nih de biringbö ne, fü wü züka ngü, de wü siti ngü angbü ekoro ʼburu ʼdö sela? Wü di enga wüna, ngü de bala tï fü nih, wü kpara ka Me, nda de. 11Kpara tï eyi amaka siti ngu ake züka ngu ʼburu gbü biri du-kpa-ngu biringbö? Manga tï eyi afü te-ye, arï, akoro rï ngenee? Mbamu tï eyi afü te-ye, arï, akoro rï gamba? Ah teka maguma kpara kpah bala. Te maguma mü biringbö la, mü tï adi emala ngü ʼbasu ʼbasu te komö mü de. 13Wü di enga wüna, yi gü ba, ani de wü kpeke kpara te ani wu ngü fa sü? Te di bala, ah le de yi di eo to yi, teka adi emere wü ngü, te ena areke gbü jia Me. Yi mere e acu ngü yi de. Yi o ngü ka-yi kötö, baka nda wü jaji. Te yi ngbü emere bala la, wü kpara tï eyi awu, gü ba, yi de kpeke wü kpara ka Me fanü fanü. 14Te kanga ladü emaguma mü, anga te mü di de mürü zü, te mü o te-mü, teka angbü ba mere kpara gbü nzö wü bu mü la, te ah bala, de mü mere e afï, ga, ni wu ngü fa sü, ne de, angü dela ka-ye wu. Angü kpara te wu ngü kpo, gbo nga ye de tete-ye nda de. 15Wü ngü de bala, dela ngü ka Me nda de. Dela ngü ka kotö ne, ah de ngü ka Satana. 16Ma mala ngü la bala kükürü de, angü te wü kpara kpo eyi da engbü de kanga emaguma wü, gara ewü le eyi akoro mere kpara fü wü bu wü, engakara nü la, ah esiti! Te di bala, wü kpara de bala ena akpo da ewü nga esüka wü, da ememere wü gü esüka wü, kpah da ememere wü gara wü ngü ka lümü. Dela, ah de ngü ka Me? 17Aʼa! Ah bala de! Angü te mü wu ngü ka Me eyi fanü fanü la, mü tï amere siti ngü kpo fï de. Mü ena agu maguma mü kpina, angbü emere wü ngü ʼburu ziii, da eje ngü ka wü bu mü. Mü ena awu cïnga wü bu mü la, da ele ta-ngü te ewü. Kpah bala, yi ena angbü de wü bu mü de maguma yi biringbö. Mü tï afiti ewü de mani nda-mü de. 18Wayi, ah fanü, te mü wu ngü ka Me fanü fanü la, mü ena angbü engbü ka-mü fï de gu maguma. Mü ena angbü kpah egu maguma wü bu mü, teka fü wü bu mü adi engbü kpah de gu maguma kpina, baka nda mü. Te yi mere ngü la bala, ah ena adi de mere züka ngü gbü jia Me.

will be added

X\