Ebere 3

1Wü di enga wüna, nih ʼburu de wü kpara ka Me, angü Me ï nih me-ye. Te di bala ne, ah le de nih fï ngü ka Yesu mbi mbi mbi, de nih di ezoro engu, da elala tete, de kpa nih ʼbasu mini. Angü Yesu de kpara te Me tima engu, teka akoro, arï nih de zu ngari Me. Yesu kpah de gina enga ni nih, mere mürü gele te ngbü ereke ngü ezengba nih de wü Me. 2Te di bala, ngü ka Yesu fa nda Müse afa, angü Me fe ta Yesu teka tima la me-ye. Fü engu angbü emere tima la de maguma ye biringbö. Müse ta kpah de mürü tima ka Me ta gügü. Engu ngbü ta kpah emere tima ka Me de maguma ye biringbö, da erï wü di enga Yïsarayele. 3Baka te ngü ka Yesu fa nda Müse ka ne, nih ena angbü ecu neh ngü da? Nih ena acu ngü mere kpara? Anga nih ena acu ngü wü di ye, de te engu bï ne? Ah le de yi fï nga ngü la mbi mbi mbi. Enatikine, Yesu me-ye baka mere kpara la, angü engu fü nih eyi wü di Me tete. Te di bala, ah le de nih di ecu ngü Yesu. 4Mere bi nga nzö wü kpara füh kotö ne ʼburu, kundu wü ka-ye kpikpi ye kpikpi ye. Amba kpara de te o wü kundu wü la neh da? Ah de Me de? 5Müse mere ta tima ka Me reke areke. Engu ngbü ta erï wü di enga Yïsarayele de ngü ka Me. Fü engu angbü ta esere fü ewü wü ngü, de te Me ena amere te gara ne. Amba Müse o wü di enga Yïsarayele la me-ye nda de. Me o ewü ka-ye me-ye. 6Amba teka ngü ka Yesu Kurisito, engu ka-ye de Ye Me. Me fe engu, o baka mere Wö nih, te bï nih ʼburu me-ye. Baka te nih to maguma nih eyi fü Yesu ne, ah le de nih rü kpekpeke, fü nih ao jia nih bü nzö eküküte. Te di bala, engu ena afü nih, fü nih angbü tïne wü di Me fanü fanü. 7Wü di enga wüna, yi fï la nga ngü, te wüh ba gbü Ngari Me gbü wazi ka Nzïla Wazi Me ne. Ngü la gü ba, "Dene ngü te ni, Me, le amala fü wü enatikine, gü ba, 'Ah le de wü le ngü ka-ni, Me, de maguma wü biringbö. 8Wü mere e angbü emere ngü, baka nda wü kundu wü ta gügü, ne de, angü wüh ka-wü ta de wü mürü kögö-nzö. Baka ta te wüh ngbü ejiji de wü Müse kpa etü gü ne, wüh le ta adi eje rïrï ka-ni, Me, nda-wü de. 9Angü wüh ngbü ta ere maguma ni, teka awu, anga ni tï eyi ale ta-ngü te ani fanü ya? Mere bi wü kpeke ngü, te ni ngbü mere fü ewü, nda nganga anda, teka wü re teke ʼbasu (40) ne, ngü la rï gbü nzö ewü ʼburu ʼburu nda de. 10Teka ngü la, fü maguma ni ayia ta anzu eküte ewü. Ni le ewü ta de, angü wüh le aje ngü ka-ni nda-wü de. Wüh le rïrï ka-ni kpah de. 11Baka ta te maguma ni nzu eküte ewü ne, fü ni ayia akïna ewü, gü ba, "Wü tï arï gbü züka sü, te ni reke tüngü wü ne, de." ' " Dela ngü ta te Me mala fü wü di enga Yïsarayele, teka kögö-nzö ka-ewü la. 12Wü di enga wüna, yi mere e angbü de maguma yi ʼbasu ʼbasu ne de. Yi mere e ace ngü ka Me de, angü engu ka-ye de mere mürü wazi. 13Ah le de yi ngbü kpah da efï nga wü bu yi, da eto wazi fü ewü, teka fü ewü adi erü kpekpeke, da elala fï bü gbü nga Yesu. Yi mere ngü la te nga sïkpï ʼburu, o yi di la ezükü. Angü te maguma yi ngbü ʼbasu ʼbasu gbü ngü ka Me la, nzö yi ena akoro ka-ye kpekpeke, fü yi adürü te kaje ka Me ka. 14Angü ah le de nih di elala eküte Yesu gö gö gö! Nih di emere ngü la fï bü bala, baka ngü ta te nih to maguma nih tete fefe na ne, zalü koro di gbü sïkpï te nih ena akpi tete. Te nih ngbü emere ngü la bala la, nih ena angbü wü kpara ka Yesu Kurisito fanü fanü. 15Dela si-ngü te Me mala fü nih enatikine, gü ba, "Ah le de nih le ngü ka-ni, Me, de maguma nih biringbö ne. Nih mere e, amere ngü baka nda wü kundu nih tane de, angü wüh ka-wü ta de wü mürü kögö-nzö." 16Wü mürü kögö-nzö, ta te ewü le aje ngü ka Me de ne, ah de wü da? Ah de wü ganzi kpara, te ewü wu ngü ka Me ta la de? Ah bala de! Ah zu de wü gina wü di enga Yïsarayele, te Me tima Müse, teka aküwa ewü esaka wü kpara ka Ezepeto ne. Fü Müse amere bi wü ngü ka talara gbü jia ewü. Amba maguma ewü ngbü ka-ye fï bü ʼbasu ʼbasu. 17Wüh le aje ngü ka Me de, neh teka wü re fe? Wüh le aje ngü ka Me de, teka wü re teke ʼbasu (40). Teka ngü la, fü Me ayia afü kürüfe ye fü ewü. Dela si-ngü de te wüh kpi ta tete ʼburu kpa etü gü, fü ewü ati ewü ciki kpala ne. Wüh nü koro gbü sü, ta te Me reke fü ewü ne, nda-wü tïne de. 18Angü Me yia ta, kïna ewü, gü ba, "Wü tï anü akoro gbü züka sü, te ni, Me, reke tüngü wü ne de." Me kïna ta ewü bala kükürü de, angü güje ewü ma. 19Dela si-ngü te wü gina wü di enga Yïsarayele la nü koro tete na agbü züka sü, ta te Me reke fü ewü, de ne, angü wüh ta de wü mürü kögö-nzö. Wüh le aje ngü ka Me ta nda-wü de.

will be added

X\