Ebere 1

1Wü di enga wüna, ta gügü, Me ngbü emala ngü fü wü kundu nih enda nganga gömö bi wü mürü dofo ka-ye. Ah ngbü ta esere ngü la fü ewü cüküʼdaye cüküʼdaye, enü di kpa engagira nü bala. 2Tïtïne gbü wü adu re ne, Me mala ngü ka-ye eyi ʼburu mbölö fü nih gömö Yesu Kurisito, angü Yesu de Ye Me. Ta te Me mere kpï bete kotö tete, ah to tima la esaka Yesu, de engu mere tima la me-ye. Fü Me aza engu, ao kpah Mere Miri gbü nzö wü ngü ʼburu, agbü kpï, zalü füh kotö sene ʼburu. 3Yesu ka-ye de Ye Me, ah kpah gegege baka Wö ye. Engu sere mere wazi ka Me fü nih, teka de wü kpara ʼburu di egbo nga ïrï Me. Te di bala, Yesu, Ye Me, ngbü eto wazi gbü wü ngü agbü kpï, akoro di füh kotö sene, ʼburu me-ye, teka de wü ngü ka-ewü ngbü ʼburu ʼbe. Yesu kpi teka aküwa nih gbü wü siti ngü ka-nih. Fü engu ayia ago agbü kpï, angbü kpala ede kpökpö ka Mere Me, te di de mere mürü wazi ne. 4Te Me o Ye ye baka Mere Miri bala ne, fü ah ayia ato mere wazi fefe na, afa nda wü malayïka ka-ye la di ka. Te di bala, ah le de wü kpara ʼburu di egbo nga ïrï Yesu, afa nda wü malayïka di ka. 5Gara malayïka ladü, te Me mala ngü fefe, gü ba, "Ye de ye ni"? Ah nda ma! Me mala ngü bala, duu teka Yesu, gü ba, "Ye de Ye ni. Enatikine, ni sere ngü la eyi fü wü kpara ʼburu, gü ba, ni de Wö ye." Me mala kpah ngü teka Yesu, gömö gara mürü dofo ka-ye, gü ba, "Ni fefe baka Wö ye na, engu nda-ye baka Ye ni." 6Me mala nga sïkpï de te ni ena adu atima biri Ye ni, de ah koro füh kotö ne, gömö gara mürü dofo, gü ba, "Ah le de wü malayïka ka-ni ʼburu di egbo nganga na." 7Dene ngü te Me mala teka wü malayïka ka-ye, gü ba, "Wü malayïka ka-ni, wüh de wü mürü kitima ka-ni, Me, te ni ngbü etima ewü, adi emere tima ka-ni. Ni ngbü kpah efü ewü gbü wege, efü wü gara baka te-wa, teka de wüh di emere tima ka-ni." 8Amba dene ngü te Me mala fü Yesu Kurisito, gü ba, "Wayi, Ye ni, ni to wazi ni eyi fü ye, fü ye angbü baka ni, Me. Ye kpah de Mere Miri. Ye ena angbü gbü nzö wü kpara ka-ye fï mere badi. Ye ena angbü emere ngü ka-ewü ereke areke. 9Ye ngbü ele de wü kpara ʼburu di emere züka ngü. Angü ye le siti ngü nda de. Dela si-ngü de te ni, Me, fe ye miri tete. Fü ni ato wazi fü ye, afa nda wü bu ye ʼburu. Te wü kpara wu bala, fü ewü angbü ecu ngü ye de mere tadu!" 10Wüh ba kpah ngü gbü Ngari Me teka Yesu, Ye Me, gü ba, "Wayi Me, ye de mere kpara! Ta gügü te enga gina, ye reke kpï bete tö me-ye. 11Ngü ka kotö ne bete ngü ka kpï, ena anza ka-wü ʼburu anza, baka diri bongo, amba ngü ka-ye tï anza nda kü de. 12Ye ena aza ewü, agara agara baka bongo, fü ngü ka-ewü anza. Amba ngü ka-ye ena angbü ka-ye fï da ye. Ye tï akpi nda-ye de." 13Me mala kpah gara ngü gömö gara mürü dofo tüngü Ye ye, gü ba, "Ye ngbü gbü kokpa ka-ni sene! Angü ni fe ye, o eyi Mere Miri! Te di bala, ye ena angbü gbü nzö wü kpara ʼburu! Angü ni ena ao wü vügü ka-ye ʼburu esa lö ye!" Amba Me mala la ngü bala, fü biri gara malayïka ka-ye nda kü de! 14Wü malayïka nda-wü neh wü da? Wüh de wü mürü kitima ka Me, te ewü ngbü emere tima kaka. Fü Me angbü etima ewü teka adi eto wazi fü nih, wü kpara ka-ye, de te Me le aküwa ewü ne.

will be added

X\