Galatïya 3

1De-yi, wü kpara ka Galatïya, amba yi ka-yi bü töndö kpara bane? E-fiti yi de bala neh da? Angü a mala ta ngü ka Yesu fü yi eyi mbölö. Yi je si-ngü la kpah eyi mbi mbi mbi, baka e ta te yi wu kö Yesu, füh rü gbegbete la, cu de jia yi. 2Te di bala, ma le ayi-ta yi teka ngü biringbö, de yi lügü fere. Yi maka ta wazi ka Nzïla Wazi Me, neh baye baye? Gbü kaje ka gele? Aʼa, ah teka te yi le ngü ka Yesu gömö a de maguma yi ne. Yi le afü ngü la, neh teka ne? 3Nzö yi ma? Yi röfö aröfö? Yi kpo ta da emere tima ka Me de wazi ka Nzïla Wazi Me. Tïtïne yi le afü ngü la, amere de nda-yi wazi, neh teka ne? 4Mere bi wü kpeke ngü, ta te Nzïla Wazi Me mere esüka yi ne, yi ceka bü baka töndö ngü kükürü? Aʼa, ah le de yi ceka wü ngü de bala ba kükürü ngü ne de! 5Me to ta wazi ka Nzïla Wazi ye fü yi, neh teka ne? Ah ngbü emere wü kpeke ngü esüka yi, neh teka ne? Ah teka te yi ngbü efa nga gele ka wü Yïsarayele, da emere wü rïrï engu na mbi mbi mbi? Ah bala de! Ah ngbü mere wü ngü la fü yi bala, angü yi lala eküte ngü ka Yesu, ta te a mala fü yi ne. 6Yi fï la ngü ka Abarayama ta gügü. Wüh ba gbü Ngari Me teka ngü kaka, gü neh fe? Wüh ba ta, gü ba, "Abarayama to ta maguma ye fü Me, fü Me adu aceka engu baka züka kpara ka-ye teka ngü la." Ah teka ngü ka rïrï ka gele nda de. 7Te di bala, ah le fü yi awu, gü ba, zu wü kundu ye Abarayama ka-ye de mene wü kpara, de te ewü to maguma wü eyi fü Me ne. 8Ta gügü, Me wu eyi, gü ba, te gara, wü ganzi kpara ena ato maguma wü fü ni. Teka ngü la, ni ena aceka ewü ba züka wü kpara ka-ni. Fü Me asere ngü la fü Abarayama, kpah baka te wüh ba gbü Ngari Me, gü ba, "Ni ena aküwa nguwa wü kpara füh kotö ne ʼburu teka ngü ka-ye." 9Te di bala, te mü to maguma mü fü Me baka nda Abarayama la, Me ena ato züka ngü fü mü kpah baka nda-ka. 10Amba te mü to maguma mü teka gele ka wü Yïsarayele, gü ba, ni ena amere wü rïrï ka gele la ʼburu areke areke, teka de ngü ka-ni reke gbü jia Me la, Me tï ale ngü ka-mü teka ngü la nda de. Kïna ka Me ena angbü gbü nzö mü. Kükürü de, angü wü rïrï la sibi fa sü. Kpara te tï amere wü rïrï la ʼburu mbi ne nda ma. Ah baka ngü te wüh ba ngü gbü Ngari Me, gü ba, "Wü Rïrï te wüh ba gbü Ngari Me ne ʼburu, te mü ngbü emere wü gara ʼburu mbi, fü mü ace gara biringbö, kïna ka Me ena angbü gbü nzö mü." 11Te di bala, nih wu eyi, gü ba, kpara biringbö te ena aküwa teka ngü ka gele nda ma. Kükürü de, angü wüh ba ta ngü la eyi bala gbü Ngari Me, gü ba, "Mene wü kpara, te ewü le ngü ka-ni, Me, de maguma wü biringbö ne, ni ena aceka ewü baka züka wü kpara ka-ni fanü, fü ni adu aküwa ewü fï mere badi." 12Amba ngü ka Rïrï ka-ye kpikpi ye, ngü ka mato maguma fü Me kpah kpikpi ye. Angü wüh ba gbü Ngari Me, gü ba, "ʼDuwa kpara te ena amere wü rïrï ka gele ʼburu mbi, ah ena aküwa gbü ngü la me-ye." 13Te ah bala, nih ena aküwa baye baye? Angü nih tï amere mere bi wü rïrï ka gele la ʼburu mbi mbi mbi nda-nih de. Nih ena aküwa ʼduwa teka ngü ka Yesu Kurisito. Angü mere siti kuru, ta te Me ena ato fü nih teka ngü ka Rïrï ka-ye, te nih mere mbi mbi de ne, Yesu Kurisito za eyi gbü nzö ye, gbü sïkpï te engu kpi tete füh rü gbegbete. Angü kpi de füh rü gbegbete la, ah de siti kpi. Ngü la, ah tï kpini de ngü te wüh ba ta gbü Ngari Me, gü ba dene, "Ah tï fü kïna ka Me angbü gbü nzö mene kpara, te kpi füh rü gbegbete." 14Yesu Kurisito le azü cïnga bala, teka fü wü kpara ʼburu aküwa teka ngü ka-ni, kpah ba e ta te Me mala fü Abarayama. Te di bala, te nih to maguma nih fü Yesu, Me ena ato wazi ka Nzïla Wazi ye fü nih ʼburu. 15Wü di enga wüna, yi fï nga ngü la mbi mbi mbi. Te wü kpara ʼbasu nzö ngüte esüka wü la, gara kpara tï eyi akoro afü ngü ka vüngüte ka-ewü la? Aʼa, ngü bala ma! Angü wüh reke ngü ka-wü eyi esüka wü. 16Ah kpah bala teka ngü ka vüngüte ezengba Me ake Abarayama ne. Angü Me nzö ngüte ake Abarayama ta gügü, o wüh bï Müse la de. Fü Me amala ngü fü Abarayama, gü ba, "Ni ena ato züka ngü fü ye, fü ni ato kpah fü kundu ye, te wüh ena abï fütanga ye." Yi ceka la, te wüh ba ngü la gbü Ngari Me, wüh ba, gü ba, "wü kundu ye," baka mere bi wü kpara ne, nda-wü de. Wüh gü ba "kundu ye," te di kpara ngbee biringbö. Kpara la, ah ka-ye de Yesu Kurisito, te di de mere kundu kundu ye Abarayama. 17Wayi, ngü te ma ele amala fü yi, ah dene. Me nzö ngüte ake Abarayama ta gügü, o wüh bï Müse la de. Fütanga ngü la, baka mere bi re kama bala teke biri de füh ye nzükpa (430), fü Me adu ato Rïrï ka-ye fü wü di enga Yïsarayele, wü kundu ye Abarayama, gömö Müse. Te di bala, ngü ka Rïrï te Müse to ne, ena afü ngü ka vüngüte la, neh baye baye? 18Te mü ena afï, gü ba, "Me ena aküwa ni, angü ni ngbü emere rïrï ka gele ereke areke la," mü küwa nda-mü de. Angü Me ena aküwa mü ʼduwa teka züka maguma ye. Me mala ta eyi fü Abarayama, gü ba, "Ni küwa ye eyi teka züka maguma ni." Me tï afü ngü la de! 19Te di bala, Me to ta Rïrï ka-ye fü nih, neh teka ne? Me to ta Rïrï la, teka de nih wu mene wü ngü, te di esiti gbü jia ni, Me. Ah to wü Rïrï la, de wüh ngbü gbü nzö nih bala, zalü akoro di gbü sïkpï, te kundu ye Abarayama la ena akoro tete, baka te Ngari Me mala nganga na ne. Te enga gina fü Me ato wü Rïrï ka-ye fü wü di enga Yïsarayele, ah to ta fü wü malayïka ka-ye feke, fü wü malayïka adu ato fü Müse, fü Müse adu asere fü wü di enga Yïsarayele. 20Angü Müse ta de kpara te Me ngbü emala ngü gögömö, de ah di emala fü wü kpara. Amba teka ngü ka vüngüte te di ezengba wü Me ake Abarayama ne, gara kpara te reke ngü la esüka ewü nda ma, ʼduwa Me kpikpi ye, te mere ngü la teka züka maguma ye. 21Yi ngbü efï, gü ba, ngü ka Rïrï ta te Me to gömö Müse, ena afü ngü te Me mala fü Abarayama ne? Aʼa, Me mala ngü ʼbasu ʼbasu nda de. Amba si-ngü gbü Rïrï te Me to fü Müse ne, ah teka aküwa kpara nda de. Ah teka areke kpara gbü jia Me kpah de. 22Me to Rïrï la teka agü tamu siti ngü, te wü kpara ngbü emere, baka te wüh ba gbü Ngari Me, gü ba, wü kpara füh kotö ne ʼburu ngbü esa wazi siti ngü. Teka ngü la, wü kpara, de te ewü to maguma wü fü Yesu Kurisito ne, ena aküwa bü duu me-wü. 23Ta gügü te enga gina, o Yesu Kurisito koro la de, Rïrï ka Müse zoro ta wü kpara füh kotö ne ʼburu, o ewü baka labï. Ngü la mere te-ye zalü koro di gbü sïkpï, te Me tima Yesu Kurisito füh kotö ne, teka aküwa wü kpara, te ewü ena ato maguma wü fefe. 24Angü Rïrï la ngbü ta baka kpara te ngbü egü tamu züka kaje ka Me fü nih, zalü te Yesu Kurisito koro tete, fü nih ato maguma nih fefe. Fü Me adu aceka nih ba züka wü kpara ka-ye teka ngü ka Yesu. 25Tïtïne baka te ngü ka Yesu koro eyi ne, nih du ngbü esa wü Rïrï la nda-nih tïne de, angü nih küwa eyi teka ngü ka Yesu. 26Angü te mü to maguma mü eyi fü Yesu Kurisito la, Me ena aceka mü ba ye ye, angü mü lala eyi eküte Ye ni, Yesu. 27Angü gbü sïkpï ta te yi za babatïza tete, yi gü ba, ani le eyi alala eküte Yesu Kurisito. Fü ngü ka Yesu adu afü yi nzïla, baka kpara te to züka bu bongo eküte ye. 28Te di bala, Me ngbü eceka nih gbü jia ye ʼburu ba wü di ye. Anga te mü de enga Yïsarayele, anga ganzi kpara, ah ba ngü de. Anga te mü di de mere kpara, anga kükürü kpara baka labï, ah ba ngü kpah de. Anga te mü di de komoko, anga würüse la, ah ba ngü kpah de. Nih ʼburu de wü di Me, teka ngü ka Yesu Kurisito, angü nih lala eyi eküküte. 29Kpah bala, te mü de kpara ka Yesu Kurisito la, mü koro kpah eyi kundu ye Abarayama. Te di bala, mü ena aküwa kpah ba e ta te Me mala fü Abarayama ne.

will be added

X\