Efeso 6

1De-yi wü jaji, ah le fü yi adi eje ri wü wö yi, de wü ni yi, angü ngü la reke gbü jia Miri Yesu fa sü. 2Angü Me mala eyi bala gbü Ngari ye, gü ba, "Ah le fü mü adi ecu ngü wö mü ake ni mü, da eje rïrï ka-ewü." Fü Me adu kpah amala gara ngü gbü ngü la, gü ba, "Te mü mere bala la, de-ni, Me, ni ena ato züka ngü fü mü, fü wü sïkpï ka-mü asibi füh kotö ne afa sü." 4De-yi, wü wö ye wü jaji, yi mere e adi erï wü jaji ka-yi de siti maguma de, angü ngü la ena ake te ewü. Amba ah le fü yi adi erï ewü ereke areke, te züka kaje, baka Miri Yesu te ngbü erï nih. 5De-yi wü labï, yi di eje ri wü mere kpara ka-yi, da ele ngü ka-ewü de maguma yi biringbö. Yi di emere wü rïrï ka-ewü, da ecu ngü ewü acu, angü te yi mere bala, yi ngbü dela eyi emere rïrï ka Yesu Kurisito. 6Yi mere e amere ngü baka wü gara labï, te ewü ngbü emere tima ka-wü bü gbü jia wü mere kpara ka-wü, teka fü ewü angbü egbo nga ani, ne de. Amba ah le de yi wu, gü ba, ani kpah de wü labï ka Yesu Kurisito. Te di bala, ah le de yi mere wü ngü ʼburu, de te Me ngbü ele ne, de maguma yi biringbö, angü dela ngü te ena areke gbü jia Me. 7Yi mere wü tima fü wü mere kpara ka-yi kpekpeke, de gümü ye mini, baka te yi ngbü emere tima ka Miri Yesu. 8Ah le de yi wu, gü ba, te mü mere züka ngü la, Miri Yesu ena aküwa mü, ato takpa fü mü, anga mü de labï, anga mere kpara. 9De-yi, wü mere kpara, ah le kpah de yi mere züka ngü fü wü labï ka-yi. Yi mere e ato cïnga te ewü de. Ah le de yi fï nga mere kpara ka-yi, Yesu Kurisito, te di agbü kpï ne. Angü Yesu tï afï nga yi ba wü mere kpara ne nda de. Te yi mere siti ngü, Yesu tï afüwa yi teka ngü mere ka-yi la nda kpah de. 10Wü di enga wüna, dene adu rïrï te ma le amala fü yi. Yi rü kpekpeke eküte Miri ka-nih, Yesu, angü engu de mere mürü wazi. 11Nih ngbü egü gü de wü Satana. Te di bala, ah le de yi za wü e ka gü, de te Me to fü yi, ne ʼburu esaka yi, teka fü yi agü gü di areke areke. Yi rü kpekpeke gbü ngü ka Me, angü Satana ena afiti yi de mani ka-ye. 12Angü, gü de te nih ngbü egü ne, nih ngbü egü gü la de wü kpara füh kotö ne nda-nih de. Nih ngbü egü gü de wü siti wü di enga me, bete wü miri ka-wü, de te ewü ngbü esiti sü de füh kotö ne, de siti wazi ka-wü. Kpah bala, nih ngbü egü gü de wü siti wü lara wazi gbü wege kpa tikpi ne ʼburu. 13Te di bala, ah le fü yi aza wü e ka gü, de te Me to fü yi ne, angbü di nzo. Teka te Satana koro, agü gü kpaka yi la, de yi i maguma yi, yi rü kpekpeke baka wü komoko gbü ngü ka Me. Te yi mere bala, Satana tï aza esaka yi de. 14Te di bala, de yi reke te-yi ereke, teka gü la. Gina ngü, ah le de yi le zu ngü ka Me de maguma yi biringbö, angü ngü ka Me la, ah baka ku etadu kpara, te ngbü ei bongo ereke areke. Yi di kpah emere wü ngü te di mbi gbü jia Me. Angü te yi mere bala, Satana tï aza esaka yi de. 15Ah le kpah fü yi angbü nzo, gbü wü sïkpï ʼburu, teka adi emala ngü ka Yesu fü wü kpara, da egu maguma wü di. Te yi mere bala, ah baka te yi to züka kamaka eyi gbü lö yi. 16Ah le kpah de yi to maguma yi ʼburu fü Me. Angü, te yi mere bala la, mani ka Satana, te di baka siti keze ne, tï amaka yi de. 17Ah le de yi o jia yi te Yesu Kurisito, angü engu de kpara te ena angbü eküwa yi me-ye. Angü Yesu Kurisito fü nih baka madudu ka se la, te wü marajümïya ngbü eto gbü nzö wü teka gü. Kpah bala, ah le de yi zoro Ngari Me gö! adi etanga gbü wü sïkpï ʼburu, angü ah de dü, te Nzïla Wazi Me to fü yi, teka fü yi amere gü di de wü Satana. 18Gbü wü ngü la ʼburu, te yi le amaka wazi teka arü di kpekpeke la, ah le de yi di eyi-ta Me gbü wü sïkpï ʼburu, baka te Nzïla Wazi Me ngbü esere fü yi. Yi ceka te-yi mbi, teka fü yi adi kpah eyi-ta Me fü wü bu yi, wü kpara ka Me, ʼburu. 19Yi di kpah eyi-ta Me fere mini, teka de Me to wazi fere, fü ra ace ngü ka cürü asidi, adi esere si-ngü ka Yesu fü wü kpara mbölö mbölö, de wazi ra ʼburu. 20Angü dela si-ngü te Yesu Kurisito fe ra mürü tima ka-ye tete, teka adi emala ngü ka-ni fü wü kpara füh kotö ne ʼburu. Amba tïtïne, wüh i ra eyi gbü ku teka ngü ka Yesu la. Ngü ma! Yi yi-ta Me fere, de ma i maguma ra, ace ngü ka cürü asidi, teka adi fï bü emala ngü ka Yesu fü wü kpara, baka te Me fe ra, de ma di emala ne. 21Kpara te ma tima engu de köcökpa ne, ah de enga ni nih de ïrï ye Tïkïko, te di de züka kpara, te ngbü emere tima ka Me de züka maguma ye. Engu ena amala nga ra fü yi, teka fü yi awu wü ngü de te ngbü emere ra, de wü bu ra ne, ʼburu me-ye. Kpah bala, engu ena ato wazi fü yi gbü ngü ka Me. 23Me, te di de Wö nih, ake Miri ka-nih Yesu Kurisito, di de yi wü di enga ni a, wü kpara ka Yesu de kpala ne ʼburu. De Me to gu ngü ka-ye fü yi, kpah de wazi ka-ye, teka fü yi adi ele te-yi di esüka yi, kpah teka fü yi ato maguma yi ʼburu fü Yesu Kurisito. 24De Me o züka maguma ye eküte yi ʼburu, angü yi le ngü ka Miri ka-nih Yesu Kurisito eyi, de maguma yi biringbö. Dela adu ngü te ma mala fü yi, de-ra Pawülü.

will be added

X\