Kolosayï 3

1Wü di enga wüna, ah baka te nih kpi ta eyi tundu de wü Yesu. Fü Me adu azükü nih gbü kpi la kpah tundu de ewü, angü nih lala eyi eküküte. Te di bala, ah le de yi o maguma yi, de wü fïngangü ka-yi ʼburu, teka ngü ka Me agbü kpï. Yi mere e afï nga wü e ka füh kotö ne de. Angü Yesu, de te yi lala eküküte ne, ah ngbü eyi füh kpökpö ka mere miri, gbü kokpa ka Me agbü kpï. 3Kpah bala, yi wu kpo, gü ba, nih kpi ta eyi de wü Yesu. Te di bala, nih tï afï nga siti ngü ka kotö ne nda-nih tïne de, angü Me küwa nih eyi, teka te nih lala eyi eküte Yesu Kurisito ne. Te di bala, wü kpara füh kotö ne tï awu ngü ka küküwa, te nih maka la, nda-wü de, angü küküwa la wo te-ye awo, guvu Yesu Kurisito. 4Kpah bala, gbü sïkpï te Yesu, E-küwa-nih, ena adu akoro, teka asere te-ye tete fü wü kpara füh kotö ne ʼburu, baka Mere Miri, engu ena asere nih fü ewü, baka züka wü kpara ka-ye nzïla. 5Te di bala, ah le de yi ce siti gümü wü ngü ka füh kotö ne asidi. Yi ceka wü ngü la gbü jia yi baka e te yi kpi eyi akpi. Yi ce ngü ka waza, ngü ka yala, de wü siti fïngangü ka lümü ʼburu asidi. Mü za würüse, anga komoko ngbee biringbö, de yi ngbü duu ake di. Yi ce ngü ka gümü e kpah asidi, angü te mü ngbü ekpi gümü e la, ah ba e te mü ngbü eo wü e la baka me ka-mü. 6Dela si-ngü te maguma Me ena anzu, fü ah ato kuru te wü kpara, te ewü ngbü emere wü siti ngü de bala ne. 7Angü ta gügü, o yi le ngü ka Yesu la de ne, yi ngbü ta emere wü siti ngü de bala gbü wü sïkpï ʼburu, kpah baka wü bu yi. 8Amba tïtïne, yi mere e adu arï gbü wü ngü la tïne de. Yi mere e agü gü de wü kpara de. Yi mere e angbü de siti maguma kpaka wü kpara kpah de. Yi ce ngü ka kanga, ambalaʼba, de wü soko ʼburu asidi. 9Yi mere e angbü esutu wu esüka yi de. Angü, gbü sïkpï ta te yi to maguma yi tete fü Yesu ne, yi ce wü diri siti fïngangü, ta te yi ngbü emere ne, eyi ʼburu, 10Tïtïne ne, Me fü yi eyi ba to kpara gegege baka ye, teka fü yi adi ewu ngü ka-ni, Me, ereke areke, fü yi angbü emere wü ngü ʼburu baka te ni, Me ngbü ele. 11Te di bala, nih, wü kpara ka Yesu, nih ngbü tïne eyi baka nguwa kpara biringbö. Te mü de enga Yïsarayele, anga ganzi kpara, ah mere e de. Te mü tï eyi esa basa, anga mü tï nda-mü kpah de la, ah mere e kpah de. Te mü wu ngü fa sü, anga mü wu ngü ʼburu ʼburu de la, ah ba ngü kpah de. Te mü de mürü cïnga, anga te mü di de kpeke kpara la, ngü ka-yi gbü jia Me, ka-ye ʼburu biringbö. Angü mere ngü, ah ka-ye duu ngü ka Yesu Kurisito kpikpi ye, angü nih lala eyi eküküte, fü engu angbü emaguma nih. 12Wü di enga wüna, Me fe yi eyi, o züka wü kpara ka-ye tete nzïla, angü ah le yi fa sü. Te di bala, ah le de yi di ewu cïnga wü bu yi, da emere züka ngü fü ewü bu, da ele ta-ngü te ewü, gbü wü sïkpï ʼburu. Yi mere e angbü eʼdu ngü yi de. Yi di emere wü ngü ʼburu ferrre. Maguma yi mere e adi enzu kere kere de. 13Yi di engbü de gu maguma esüka yi. Te gara kpara mere yi esiti la, yi ce ngü la fefe. Ah le de yi di eboro siti ngü ka wü bu yi, kpah baka te Miri ka-nih Yesu ngbü eboro siti ngü ka-nih ne. 14Mere ngü te yi ena angbü emere esüka yi, ah dene. Yi di ele te-yi esüka yi de maguma yi ʼburu, angü te yi mere bala la, ngü ka-yi ena angbü kpah ʼburu biringbö. 15Ah le de Yesu Kurisito to wazi fü yi, teka fü yi angbü de gu maguma esüka yi. Angü dela si-ngü te Me ï yi tete, teka fü yi angbü tundu ba kpara biringbö. Ah le kpah de yi di egbo nga Me gbü wü sïkpï ʼburu. 16Ah le de ngü ka Yesu Kurisito ngbü fï emaguma yi, gbü wü sïkpï ʼburu, teka fü yi awu ngü kaka areke areke. Te di bala, ah le kpah de yi di erï wü bu yi de ngari Yesu, da eto wazi fü ewü. Yi di kpah ebï wü ci ka Me esüka yi, da egbo nga ïrï Me di de mere tadu. 17Wü di enga wüna, dela kpeke ngü te ma mala fü yi. Ah le de wü ngü, te yi ngbü emere, anga emala esüka yi ne, de yi di emere wü ngü la ʼburu de ïrï Miri Yesu. Yi di kpah egbo nga ïrï Wö nih Me, teka ngü ka Yesu. 18Dene ngü te ma le amala fü yi, wü würüse. Ah le fü yi angbü eje ri wü watï yi. Angü te yi ngbü emere bala la, ngü la ena areke gbü jia Miri Yesu afa sü. 19Nda-yi wü komoko, ma emala fü yi, gü ba, ah le fü yi angbü ele wü wara yi ale. Yi mere e adi emere ewü esiti de. 20Nda-yi wü jaji, ngü te ma le amala fü yi, ah kpah dene. Ah le de yi di eje rïrï ka wü wö yi de wü ni yi gbü wü ngü ʼburu, angü ngü de bala reke gbü jia Me fa sü. 21Nda-yi, wü wö ye wü jaji, de wü ni ewü, yi mere e adi erï wü jaji ka-yi de siti maguma de, angü ngü la ena asiti fïngangü ka-ewü. 22Teka ngü ka-yi, wü labï, ma emala fü yi, gü ba, ah le de yi di eje rïrï ka wü mere kpara ka-yi gbü wü ngü ʼburu. Yi mere e adi emere wü züka ngü bü teka jia wü mere kpara ka-yi, teka de ngü ka-yi reke, ne de. Yi mere e adi emere tima, te wüh to fü yi, de maguma ʼbasu ʼbasu de. Ah le de yi di emere tima ka-yi de maguma yi ʼburu biringbö, baka te yi ngbü emere tima ka Miri ka-nih Yesu Kurisito. Ah le de yi di emere tima ka-yi kpekpeke, angü yi wu kpo, gü ba, te gara, yi ena amaka züka wü ngü, de te Miri Yesu reke, o agbü kpï fü wü kpara ka-ye ne. Angü zu mere kpara ka-yi, de te yi ngbü emere tima kaka-na ne, ah ka-ye de Yesu Kurisito. 25Amba mene wü kpara, de te ewü ngbü emere siti ngü ne, ah le de wüh wu awu, gü ba, Me ena ato kuru te ani te gara. Angü Me ena akolo ngü ka wü kpara ʼburu, ah tï afüwa kpara biringbö nda de.

will be added

X\