Kolosayï 2

1Wü di enga wüna, te ma wu yi de jia ra kpah de la, ngü ma, amba ma le fü yi awu, gü ba, ma ngbü eo to ra ʼburu teka ngü ka-yi, da eku gba fü Me teka yi, wü kpara ka Kolosayï. Ma ngbü kpah eku gba fü Me teka wü kpara ka Yesu de ede yi, agbü Lawüdïkïya la, be kpah te mere bi wü kpara, te ewü wu ra de jia wü la de, kpah baka yi ne. 2Ma ngbü eku gba fü Me bala, de ah to wazi fü yi, teka fü yi arü kpekpeke gbü ngü ka Me, kpah da ele te-yi esüka yi de maguma yi biringbö. Ma le kpah de Me ü fïngangü ka-yi, fü yi awu zu ngü ka Me ʼburu areke areke, teka fü yi angbü de tadu. Angü ah de zu ngü ka Me, te Me sere fü nih gbü wü re ne. Ngü la, ah de ngü ka Yesu Kurisito, E-küwa-nih. 3Angü Yesu ngbü eto wazi fü nih, da eü fïngangü ka-nih duu me-ye, teka fü nih awu mere kpeke ngü, gbü ngü ka Me mbi mbi mbi. Angü ngü ka Me la, ah de mere züka ngü, te wo te-ye awo fü wü kpara. 4Ma mala wü ngü la fü yi bala, angü wü kpara ena afiti yi, de gara türü ngü ka mani ka-wü la fiti. 5Baka te ma di esüka yi kpala ma ne, ah mere e de. Amba nih ladü de nih ma tundu gbü fïngangü, angü ma ngbü kpakine fï bü da efï nga yi. Ma ngbü de tadu, angü ma je nga yi eyi, gü ba, yi ngbü kpala ele te-yi de wü bu yi, de maguma yi biringbö. Yi ngbü kpah erü kpekpeke gbü ngü ka Yesu. 6Wü di enga wüna, tïtïne yi ra eyi fü Miri Yesu. Te di bala, ah le de yi di fï bü emere wü ngü ʼburu, de te engu ngbü ele ne. Yi lala eküte Miri Yesu, baka rü te to sï ye, lala gbü tö, de yi nü de ngü kaka kpa engagira nü. Yi rü kpekpeke gbü ngü ka Miri Yesu, de te wüh rï yi di la, de yi di eo to yi, da egbo nga ïrï Me, gbü wü sïkpï ʼburu. 8Yi ceka te-yi mbi, angü wü gara kpara ena afiti yi de töndö rïrï ka-wü. Angü wüh gü ba, rïrï ka-ani la, ah de rïrï ka Me, amba ah de ngü ka Me nda de! Ah ka-ye de mere wu! Ah ka-ye de siti rïrï ka gele ka wü me ka wü kundu wü. Dela rïrï ka Yesu Kurisito nda de. 9Ah le de yi lala te zu ngü ka Yesu, angü Yesu Kurisito de Me gegege baka Wö ye. Fü ewü abï engu ba kpara füh kotö ne, teka asere ngü ka Me la mbölö fü nih. 10Engu kpah de Mere Miri, gbü nzö wü e ʼburu, wü kpara, de wü malayïka ka Me, be kpah te wü siti wü di enga me, de wü muruyi ʼburu. Angü Me to wazi la me-ye fefe. Dela si-ngü te Me to kpah wazi la di fü yi, angü yi ngbü eyi elala eküte Yesu Kurisito. 11Teka ngü ka Yesu, te yi lala eyi eküküte na ne, Me ba tere ka-ye eyi eküte yi, teka asere fü wü kpara, gü ba, yi de wü kpara ka-ni, ka Me fanü fanü. Nda wü di enga Yïsarayele, wüh ngbü etï esa basa, teka asere ngü la fü wü kpara, gü ba, ani de wü kpara ka Me me-ani. Amba, nda-nih tere te Me ba eküte nih ne, ah ka-ye kpikpi ye. Ah de ngü te wü kpara mere de kpa wü ne nda de. Angü Yesu Kurisito za diri fïngangü ta emaguma nih ne eyi asidi, teka fü nih angbü nzïla bakaka. 12Kpah bala, gbü sïkpï ta te yi za babatïza tete, ah baka ta te yi kpi eyi tundu de wü Yesu, fü ewü ati yi gbü mbükü kpah tundu de ewü. Fü Me adu azükü yi gbü kpi la, kpah tundu de wü Yesu, teka te yi to maguma yi eyi fefe. Kpah bala, angü yi le eyi, gü ba, Me zükü Yesu Kurisito eyi gbü kpi, de mere wazi ka-ye. 13Angü te enga gina, yi ngbü ta baka wü kövö, teka wü siti ngü ka-yi, ta te yi ngbü emere ne, angü yi wu ngü ka Me la de. Kpah bala, yi le ngü ka Me ta kpah de. Amba tïtïne, Me küwa yi gbü siti ngü la eyi, teka ngü ka Yesu Kurisito. Angü ah boro wü siti ngü ka-nih la eyi guvu ye ʼburu asidi. 14Angü Me kolo ta ngü ka-nih eyi, fü ah aba ngü la gbü köcökpa, gü ba, nih ena akpi akpi fï mere badi, angü nih mere Rïrï ka-ni, Me, nda-nih de. Amba tïtïne teka ngü ka Yesu, te kpi füh rü gbegbete, teka aküwa nih ne, Me du sörö ngü, ta te engu ba teka ngü ka-nih ne, eyi asidi. 15Angü, gbü sïkpï te Yesu kpi tete füh rü gbegbete, Me nza wazi siti wü di enga me eyi, de wü miri ka-wü, de wü muruyi ʼburu. Fü ah ato lümü te ewü gbü jia wü kpara ʼburu, ayia ao ewü tïne wü labï, esa lö Yesu. 16Te di bala, wü di enga wüna, wü gara kpara le ao rïrï ka gele ka-wü kpekpeke ba rïrï ka Me, neh teka ne? Wüh gü ba, yi mere e azü mene e dene de, anga yi nzö mene e dene de. Anga teka gele ka to fu-fe, anga sïkpï ka Me, anga gara gele bane, yi di emere ngü bane, anga yi mere ngü bane de. Amba ma ngbü emala fü yi, gü ba, yi mere e aje ngü ka-ewü la nda-yi de. 17Angü rïrï ka gele ka wü kundu nih la, ah bü baka kuru e, te Me to ta teka asere nga ngü ka küküwa, te ni, Me, ena aküwa nih di ne. Amba zu küküwa la, ah ka-ye duu de Yesu Kurisito kpikpi ye. Te di bala, ah le de nih ce ngü ka gele la, nih du, nih lala gbü nga Yesu. 18Anga te gara kpara koro, fiti yi, gü ba, ah le de yi di ecu ngü wü di enga me, anga wü malayïka, da eku gba fü ewü la, yi mere e aje ngü ka-ewü la nda-yi de, angü yi ena adürü te kaje ka Me. Te mü de kpara ka Yesu la, mü di ecu ʼduwa ngü Yesu kpikpi ye. Wü kpara, te ewü emala siti rïrï de bala, le ao te-wü memere, gü ba, "Wüh sere ngü la fü ani gbü roto." Amba ngü ka-ewü la, ah de ngü ka Me nda de, ah ka-ye de töndö ngü kükürü. 19Wü mürü wu la lala eküte zu ngü ka Miri Yesu ne nda-wü de. Te di bala, nih lala nda-nih eküte Miri Yesu, angü engu baka nzö nih. Nih, wü kpara kaka, tïne baka küküte. Angü Miri Yesu ngbü eto wazi fü nih me-ye, teka fü nih adi ele te-nih de wü bu nih di. Fü nih angbü ba nguwa kpara biringbö, aga, akoro kpekpeke gbü ngü ka Me. 20Wü di enga wüna, ah mere neh baye? Yi wu, gü ba, te yi lala eyi gbü nga Yesu, yi kpi eyi tundu de ewü ne, yi wu bala nda-yi de? Te di bala, wü di enga me tï angbü de wazi gbü nzö yi nda-wü de, angü Yesu za yi eyi esa wazi ka-ewü la asidi. Te di bala, anga yi le adu angbü kpah emere wü rïrï ka wü gele, neh teka ne? 21Yi mere e aje rïrï ka-ewü la nda-yi de, angü wü mürü wu la ena ato rïrï ka gele ka-wü la fü yi, gü ba, gara e bane, yi zü de, yi to kpa yi tete kpah de, angü ngü la ena asiti yi gbü jia Me. Amba dela ka-ye töndö rïrï ka wü kpara füh kotö ne, ah de rïrï ka Me nda de. Ah le de nih wu awu, gü ba, ngü ka wü e füh kotö ne ena anza ka-wü ʼburu anza. Te di bala, wü e la ena asiti nih gbü jia Me, neh baye? 23Fanü fanü, wü gara kpara ngbü efï, gü ba, wü rïrï ka gele la de zu ngü, te ngbü eto wazi fü wü kpara, teka fü ewü areke di gbü jia Me. Wü kpara, te ewü le wü rïrï de bala, ngbü embü te-wü de mere bi wü rïrï la, kpah da eʼbï te-wü, da endaʼba te-wü fü wü di enga me. Amba ngü gbü wü e la ʼburu nda ma. Wü rïrï ka gele la le ta-ngü te kpara, teka fü ah ace siti ngü ka-ye ne, nda de.

will be added

X\