Kolosayï 1

1De-ra Pawülü, te Me fe ra mürü tima ka Yesu Kurisito ne, a ba köcökpa ne fü yi me-a, ake enga ni nih Timoteyo. A ba köcökpa ne fü yi wü kpara ka Yesu agbü Kolosayï, kükürü de, angü yi de züka wü di enga ni a, te yi lala eyi eküte Yesu Kurisito. Wö nih, Me, di de yi, da eto gu ngü ka-ye fü yi de züka maguma ye. 3Gbü wü sïkpï ʼburu, a ngbü eku gba fü Me, Wö ye Miri ka-nih Yesu Kurisito ne, da egbo nga ïïrï na, teka ngü ka-yi. 4A ngbü egbo nga ïrï Me bala, kükürü de, angü a je nga yi, gü ba, yi to maguma yi eyi ʼburu fü Yesu Kurisito, kpah da ele te-yi de wü bu yi, wü kpara ka Yesu, de maguma yi biringbö. 5Kükürü de, angü yi ngbü eyi eo jia yi teka küküwa, de te Me reke o fü yi agbü sü ka-ye agbü kpï ne. Küküwa la, wüh mala nganga ta eyi fü yi gügü, gbü sïkpï ta te Epafürasï mala zu ngü ka Yesu fü yi tete na ne. 6Tïtïne ngü ka Yesu la kpo eyi da ebaya gbü nga nzö wü sü, füh kotö ne ʼburu. Fü mere bi wü kpara, te ewü ngbü eje ngü ka Yesu la, akpo da efü maguma wü, ele ngü la de maguma wü biringbö. Ngü la ngbü emere te-ye kpah baka ngü te yi ngbü emere esüka yi agbü Kolosayï kpala, akpo gbü sïkpï ta te Epafürasï mala ngü ka Yesu fü yi tete, gü ba, "Me tima Yesu eyi, teka aküwa nih, teka züka maguma ye ne." Epafürasï, ta te mala ngü ka Yesu fü yi ne, engu de züka kpara, ah kpah de kpeke kpara, te a le engu fa sü, angü ah ngbü emere tima ka Yesu de maguma ye biringbö kpah baka a. Teka ngü la, fü a atima engu kpaka yi teka amala ngü ka Yesu fü yi. 8Ah du mala nga yi fü a sene me-ye, gü ba, Nzïla Wazi Me to wazi eyi fü yi, teka fü yi angbü ele wü bu yi di. 9Teka ngü la, akpo gbü sïkpï te a je ngü ka-yi la tete, fü a angbü fï bü da eyi-ta Me teka yi gbü wü sïkpï ʼburu, de Me di de yi, da eto Nzïla Wazi ye emaguma ye, teka fü yi adi ewu wü ngü, de te Me ngbü ele ne, adi emere mbi mbi mbi. 10Te di bala, yi ena angbü fï bü da emere wü ngü, de te ena areke gbü jia Miri ka-nih Yesu Kurisito, da efa nganga mbi mbi mbi. Te yi ngbü emere züka ngü la bala, Miri Yesu ena angbü de mere tadu teka yi, fü yi awu ngü ka Me areke areke, anü di kpa engagira nü. 11A ngbü kpah eyi-ta Me, teka de Me to mere züka wazi ka-ye, te fa wü ngü ʼburu ne, fü yi, teka fü yi adi engbü de tadu ka Me emaguma yi, erü kpekpeke, da etüka te-yi gbü wü cïnga ka-yi ʼburu. 12Nih gbo nga ïrï Wö nih Me de tadu, angü engu fü nih eyi züka wü di ye tete, teka fü nih amaka kpah züka ngü, de te engu reke o fü wü kpara ka-ye agbü kpï ne. 13Angü Me küwa nih eyi gbü siti wazi ka Satana, ta te zoro nih baka biti ne. Fü Me adu aza nih, ao esa wazi Ye ye, Yesu Kurisito, te engu le fa sü ne. 14Angü Yesu Kurisito kpi teka afuru nih gbü ku ka Satana, kpah teka fü Me aboro wü siti ngü ka-nih. 15Kpara te wu Me de jia ye nda ma, amba nih tï eyi awu Me eküte Yesu Kurisito, angü engu de Me, te za küte baka nih. Yesu ka-ye ta kü ladü, o Me mere wü e la de. Me o engu ba Miri gbü nzö wü e, de te engu mere ne ʼburu. 16Angü Yesu mere wü e ka-ye ʼburu me-ye, gbü wazi ka Me, te di de Wö ye na. Ah mere wü e agbü kpï, de mene ewü füh kotö ne, de mene wü e te nih tï eyi awu de jia nih, be kpah te mene ewü te nih tï awu de. Engu mere kpah wü malayïka, de wü mere kpara ka-wü, anga wü miri ka-wü. Satana, de siti wü di enga me, ta te ewü sü gü te Me ne, engu mere ewü kpah me-ye. Angü Me to wazi fü Yesu, de ah mere wü e la ʼburu me-ye, teka de wüh di egbo nga ïrï Yesu teka ngü la. 17Ta gügü te enga gina, o wüh mere gara e ʼburu ʼburu la de, Yesu Kurisito ka-ye ladü. Te di bala, ah ngbü eceka kpï sidi nga wü e la, da eto wazi fü ewü ʼburu me-ye, de wüh di emere tima ka-wü gbü züka kaje. 18Yesu Kurisito de Miri ka-nih. Ah kpah baka nzö nih, nih nda-nih baka küküte. Ah ngbü eküwa nih me-ye, angü ah kpah de gina kpara, te Me zükü engu gbü kpi. Dela si-ngü te Yesu Kurisito ngbü di mere Miri gbü nzö wü miri, de wü e ʼburu ne. 19Angü Me to wazi ye ʼburu fü Yesu, de ah mere wü ngü ʼburu gegege baka ni, Me. 20Kpah bala, Me mala teka wü e de füh kotö ne, de wü mene e agbü kpï, gü ba, de-ni, Me, ni ena areke ngü ka wü e la ʼburu de ngüte Ye ni, Yesu Kurisito. Angü Yesu kpi füh rü gbegbete teka aküwa nih, wü kpara ʼburu. 21Ta te enga gina, süka yi ngbü de wü Me nengete, angü yi ta ba wü vügü kaka, teka siti fïngangü, de wü siti ngü ka-yi, ta te yi ngbü emere ne. 22Amba tïtïne, Me boro siti ngü ka-yi emaguma ye eyi, teka ngü ka kpi ka Yesu Kurisito. Angü wüh bï Yesu Kurisito füh kotö ne, fü ah akpi teka afü yi ba wü di Me. Te di bala, yi tï eyi arü engagira Me ba züka kpara nzïla, angü gara siti ngü, te wüh ena amala ngü eküte yi tekaka ne, tïne eyi ma. 23Te yi le angbü ba wü di Me la, ah le de yi lala fï bü eküte ngü kaka, da eo jia yi teka ngü ka Yesu Kurisito, ta te wüh mala fü yi ne. Yi mere e ace ngü la de. Angü dela ngü ka Yesu, te wü eyi bala, gbü wü nga nzö sü füh kotö ne ʼburu. De-ra Pawülü, Me tima ra kpah eyi teka fü ra angbü emala ngü ka Yesu fü wü kpara. 24Amba tïtïne ma ngbü ezü cïnga de gbü ku ne, teka ngü ka Yesu la. Te di bala, ma ngbü engbü de tadu teka cïnga la, angü dela ngü te ena ato wazi fü yi. Angü Yesu mala ta ngü, gü ba, wü kpara ka-ni ena azü cïnga bala, teka ngü ka-ni. Te di bala, ah ba e te ma ngbü ezü du cïnga ka Yesu ne, teka ato wazi fü wü kpara kaka. 25Me fe ra mürü tima ka-ye, teka ale ta-ngü te yi, ato wazi fü yi, wü kpara ka-ye. Angü ah mala ngü fere, gü ba, ma mala ngari ni, Me, fü yi, wü ganzi kpara, ʼburu. 26Ngari Me, te engu to fere la, ah de ngü ka Yesu Kurisito. Ta gügü te enga gina, Me wo ngü ka Yesu la awo fü wü kpara ʼburu. Amba tïtïne, gbü wü sïkpï ne, Me du sere ngü ka Yesu Kurisito la eyi fü nih, wü kpara ka-ye, mbölö. Dela mere kpeke fïngangü ka Me, te fa wü ngü ʼburu afa. Angü Me le agü tamu fïngangü ka-ye la fü nguwa wü kpara füh kotö ne ʼburu. Ngü la, ah de ngü ka Yesu Kurisito, te ngbü me-ye emaguma yi. Teka ngü la, nih ngbü eyi ʼburu eo jia nih, teka fü nih aküwa te gara, agbü sü ka Me agbü kpï. 28Dela si-ngü te a ngbü emala ngü ka Yesu Kurisito tete, fü wü kpara ʼburu ne. Fü a angbü kpah da erï ewü kpekpeke, de wazi te Me to fü a ne. Angü a le de wü kpara ʼburu to maguma wü fü Yesu Kurisito, fü jia ewü amba amba gbü ngü ka Me, teka fü ewü angbü ba züka wü kpara ka Me. 29Te di bala, ma ngbü eo to ra, teka amere tima la, anza, de mere wazi, te Yesu Kurisito ngbü eto fere ne.

will be added

X\