Wü Mürü Tima ka Yesu 6

1Ta gbü wü sïkpï la, wü kpara ka Yesu ngbü esibi efa sü. Fü siti ngü ayia akoro esüka ewü, angü gara ewü, de te ewü ngbü emala ngü Giriki ne, wüh kpo edi ngü te wü kpara ka Yerüsalema, gü ba, "Te wüh ngbü egafa wü e fü wü würüse wökö la, nda-ani wü wökö maka wü e mbi mbi de." 2Fü wü mürü tima ka Yesu, ewü nzükpa de füh ye ʼbasu ne, ayia aje ngü la bala. Fü ewü abiti te-wü de wü gara kpara ka Yesu la ʼburu, amala ngü fü ewü, gü ba, "Wü di enga wüna, nda-a, ah le de a lala te tima, ta te Miri Yesu to fü a ne. Angü te a ena ace da erï wü kpara de ngari Me, adu alala teka ngü ka magafa e la, ah esiti! 3Teka ngü la, ah le fü yi afe wü gara kpara teka tima la, kpeke wü kpara de te wazi ka Nzïla Wazi Me si emaguma ewü, te ewü wu ngü kpah eyi awu mbi mbi mbi. Yi fe wü kpara baka lorozi, teka fü a ace tima ka magafa e la esaka ewü. 4Nda-a tima ena adi nda-ye teka adi eku gba fü Me, kpah da emala ngari Me fü wü kpara." 5Fü fïngangü la areke gbü jia wü kpara ka Yesu la ʼburu. Fü ewü ayia afe gara kpara de ïrï ye Setefanü, te to maguma ye ʼburu fü Me. Wazi ka Nzïla Wazi Me si kpah eyi emamaguma. Wüh fe kpah Fïlïpo, de wü Porokoro, Nikanora, Tïmüna, Parumena, bete Nikola, te di de ganzi kpara ne. 6Te wüh fe wü kpara la tete, fü ewü aza ewü, ao engagira wü mürü tima ka Yesu. Fü wü mürü tima ka Yesu ao kpa wü gbü nzö ewü, teka fü Me ato wazi ye fü ewü, gbü tima ka-ewü ka magafa e la. 7Fütanga ngü la, ngari Me ngbü fï bü da ewü gbü Yerüsalema ʼburu. Wü kpara ka Yesu ngbü kpah esibi efa sü. Gara wü mere kovo ka wü Yïsarayele ngbü ta kpah bü eto maguma wü fü Yesu fanü. 8Setefanü ta de biri kpara esüka ewü, de te wüh fe ewü teka tima ka magafa e ne. Ah ta de kpeke kpara te Me to wazi fefe. Ah ngbü kpah emere tima ka Me de wazi fa sü, kpah da eküwa wü mürü keke, da emere gara wü kpeke ngü gbü jia wü kpara. 9Gbü gara sïkpï, fü gara wü di enga Yïsarayele te ewü le ngü ka Yesu de, fü ewü ayia akpo ega yïkï gömö Setefanü teka ngü ka Yesu. 10Amba gbü yïkï ka-ewü la, wüh tï afa engu nda-wü de, angü Setefanü ngbü elügü ngü fü ewü de wazi ka Nzïla Wazi Me. 11Te wü kpara la wu bala, fü ewü ayia amere mani, ase wü gara kpara de jiase, de wüh nü su wu eküte Setefanü, gü ba, "Ah ka-ye de siti kpara! Ani maka ta engu te ngbü efala Me! Ah ngbü kpah efala Müse, ta te to Rïrï ka Me fü ani ne!" 12Fü ngü ake te mere bi wü kpara afa sü. Fü wü angbe cögbörö kovo ka wü Yïsarayele aje ngü te ewü mala la, fü ngü la ake te ewü kpah afa sü. Fü ewü atima wü kpara teka azoro Setefanü, akoro di engagira ani. 13Fü ewü aï kpah wü gara kpara, de wüh koro, wüh mala nga siti ngü ka Setefanü engagira ani gbü mere mabiti. Fü wü kpara la ayia amala ngü de wu eküte Setefanü, gü ba, "Siti ngü ka komoko la fa sü! Ah ngbü fï bü da emala siti ngü te Mere Kambü ka Me ka-ani ne, bete Rïrï ka Müse, 14gü ba, 'Yesu ena afü ngü la ʼburu. Ah ena amürü Mere Kambü ka Me ka-ani ne amürü. Ah ena afü kpah Rïrï ka Me, de ta te Müse to fü ani ne, teka ato nda-ye rïrï.' " 15Te wü mere kpara gbü mabiti la je ngü la bala, fü ewü akpo da eceka Setefanü kpekpeke, de siti maguma. Fü ewü awu gbüra Setefanü te ngbü eci baka nda malayïka ka Me.

will be added

X\