Wü Mürü Tima ka Yesu 3

1Gbü gara sïkpï, fü wü Petero ayia ake Yüwane, anü kpa etambasü ka Mere Kambü ka Me agbü Yerüsalema, teka agbo nga ïrï Me kpala. 2Wüh te ekoro emö ʼbaranga ka tambasü la, fü ewü amaka gara komoko de lö ye walawala, gbamari ede möngïtï la. Angü, gbü wü sïkpï ʼburu, komoko la ngbü engbü ede möngïtï kpala, da eyo e te wü kpara, de te ewü ngbü ekoro erï gbü ʼbaranga la. Wüh ngbü ebï engu ganzi, eo kötö kpala, angü ah tï anü nü nda de, kü baka e te ewü yaka engu tete. 3Te komoko la wu wü Petero ake Yüwane yia eyi erï kpala, fü engu ayia ayo e te ewü. 4Fü wü Petero ake Yüwane arü, angbü eceka engu de kpeke jia. Fü Petero amala ngü fefe, gü ba, "De-ye deyï, ye ceka la ani akine." 5Fü komoko la ae jia ye, angbü eceka ewü kpah de kpeke jia, angü ah fï nda-ye, gü ba, ni ena amaka mba e esaka ewü. 6Fü Petero amala ngü fefe, gü ba, "Mü efï nda-mü gü ba, jiase ladü esaka ra? Aʼa, jiase nda ma. Amba gara e ladü esaka ra sene, te ma ena ato fü mü. Ma emala fü mü, te ïrï Yesu, Miri te Me tima fü nih ne, mü yia eyia tikpi, de mü nü nü!" 7Fütanga ngü la, fü Petero azoro kpa komoko la ka kokpa, ae engu tikpi. Bü kece bane de, fü Me ato wazi gbü lölö na. 8Cinzili, fü komoko la aviti, arü füh lö ye, akpo ʼduwa enü nü, da eviti de tadu, da egbo nga ïrï Me. Fü ewü arï tïne de wü Petero tundu kpa etambasü ka Mere Kambü ka Me. 9Fü mere bi wü kpara awu engu, te ngbü enü nü, da egbo nga ïrï Me, de mere tadu te ye. 10Fü wü kpara la awu, gü ba, komoko la, ah de komoko ta te ani ngbü ewu da eyo e te wü kpara, de lö ye walawala ne. Fü komö ewü ayia agu teka ngü la. 11Ngü ka komoko la ga gbü jia wü kpara la ʼburu, fü ewü aci akpe anü kpaka wü Petero kpala, teka aceka ngü la cu de jia wü, angü komoko la ce tïne nga wü Petero nda de. 12Te Petero wu ngü la bala, fü ah amala ngü fü mere bi wü kpara la, gü ba, "De-yi, wü di enga wüna, wü di enga Yïsarayele, ah mere baye? Ngü ka komoko te küwa ne, ga gbü jia yi fa sü bala? Yi ngbü efï nda-yi, gü ba, kpara küwa engu neh de tete-a? Anga a maka mere wazi la, angü a de züka wü kpara gbü jia Me? Aʼa, ah bala de. Komoko ne küwa ka-ye duu teka wazi ka Yesu! 13Mere Me to wazi la fü Yesu kükürü de, angü ah tima engu me-ye. Amba nda-yi, yi le ngü kaka ta de, fü yi azoro engu, anü di engagira Miri Pïlatü, de ah mörö engu. Pïlatü le ta ace kpa tete, angü ah maka siti ngü kaka de. Yi le nda-yi ʼburu ʼburu de. 14Yesu ka-ye de züka kpara, te Me tima fü yi, amba yi le engu nda-yi de. Yi le ta nda-yi bü Baraba, siti kpara te ngbü emörö wü kpara ne, de Miri Pïlatü ce kpa tete na fü ani, da Yesu. 15Miri te Me tima fü nih, teka aküwa nih ne, yi mörö engu ta me-yi. Dela züka ngü? Me le ngü la nda de, fü ah ayia azükü engu gbü kpi la. Nda-a, a wu ngü la cu de jia a. 16Yi wu komoko ne de? Ah tï ta eyi anü nü bala? Ah maka wazi la baye baye? Yesu to wazi fefe me-ye! Angü ah to maguma ye eyi fü Yesu, fü Yesu aküwa engu! 17Wü di enga wüna, tïtïne, ma wu eyi, gü ba, ngü ta te yi mere de wü mere kovo ka-yi, te yi mörö Yesu tete na ne, yi mere ta ngü la bala, angü yi wu si-ngü la mbi mbi de. 18Amba Me mere ngü la bala me-ye, teka areke ngü, baka ngü ta te engu mala gömö wü mürü dofo ta gügü ne ʼburu, gü ba, 'Kurisito te ni ena atima füh kotö ne, ah ena azü cïnga bala.' 19Wü di enga wüna, yi fü maguma yi efü. Yi du, yi le ngü ka Yesu, teka fü Me aboro wü siti ngü ka-yi, fü ah adu aküwa yi, afü yi ba wü di ye. 20Te di bala, yi ena amaka mere tadu gbü sïkpï te Yesu ena adu akoro tete na. Yesu ena adu füh kotö ne fanü, angü engu de Kurisito te Me fe engu eyi gügü, teka aküwa nih. 21Enatikine, Yesu Kurisito ngbü engbü ka-ye agbü kpï. Ah le de engu ngbü ka-ye kpala, zalü akoro di gbü sïkpï te Me fe me-ye. Gbü sïkpï la, engu ena adu akoro füh kotö ne, teka areke wü ngü ʼburu toto, baka te Me mala ta gömö wü mürü dofo ka-ye ne. 22Müse mala ta ngü ka Yesu, gü ba, 'Mere Me ena atima gara mürü dofo fü wü, gbü nguwa wü, te ena amala ngü ka Me fü wü kpah baka ni. Ah le de wü je wü ngü ka Me ʼburu gögömö. 23Te mü je ngü kaka de, wüh ena amörö mü asidi!' Dela ngü ta te Müse mala teka Yesu. 24Fütanga Müse, fü Samüwele amala kpah nga wü ngü la de wü bu ye wü mürü dofo ʼburu. Ngü ta te wüh mala nganga la, ah de ngü ka Yesu te ngbü emere te-ye gbü wü sïkpï ne. 25Wü di enga wüna, ah le de yi fü maguma yi enatikine. Ah le de yi le ngü, ta te Me mala fü wü kundu nih, gömö wü mürü dofo ne. Ah le de yi je rïrï ka Me, angü yi de wü nguwa vüngüte kaka. Angü Me mala ta fü Abarayama, gü ba, 'Ni ena aküwa nguwa wü kpara füh kotö ne ʼburu, bü teka ngü ka kundu wü, Abarayama.' 26Wü di enga wüna, ma le amala fü yi enatikine, gü ba, kpara te Me tima füh kotö ne teka aküwa nih ne, ah ka-ye de Yesu. Ah tima engu kpaka nih, wü di enga Yïsarayele feke, teka fü engu ato wazi fü nih ʼburu, teka fü nih ace wü siti ngü ka-nih, adu ale ngü kaka." Dela ngü ta te wü Petero mala, teka ngü ka komoko de lö ye walawala, te engu küwa ne.

will be added

X\