Wü Mürü Tima ka Yesu 26

1Fütanga ngü la, fü Miri Agiripa ayia amala ngü fü Pawülü, gü ba, "Tïtïne ye tï eyi amala ngü ka-ye fü ani." Fü Pawülü ayia tikpi akpo da emala ngü, da eda kpa ye, gü ba, 2"Wayi, Miri Agiripa, teka wü ngü ʼburu de te wü di enga Yïsarayele to ngbanga ra di, gü ba, ma de siti kpara ne, ma de mere tadu enatikine teka amala ngü ka-ra la engagira mü. 3Kükürü de, angü ma wu eyi, gü ba, mü wu rïrï ka gele ka-nih, wü di enga Yïsarayele, kpo. Mü wu ngü ka yïkï, te a ngbü ega esüka a gbü ngü ka Me ne, kpah eyi. Te di bala, ma endaʼba te-ra fü mü, de mü gu maguma mü, teka aje la ngü de gömö ra ne. 4Wü di enga Yïsarayele ʼburu wu ngü ka-ra kpo, akpo gbü jaji te ra, zalü akoro dene. Angü ma kpah de enga Yïsarayele, te ga esüka ewü. Wüh bï ra ta agbü Tarasu. Amba fü ra akoro angbü cu gbü Yerüsalema teka mere bi wü re. 5Te wüh ena ale ta ale amala zu ngü la, de bane wüh ena amala nga ra fü mü ta me-wü, angü wüh wu kpo, gü ba, akpo gügü, ma ngbü fï bü da eo to ra, teka amere wü rïrï ka Me ʼburu, angü ma de Farusi. 6Dela si-ngü te wüh ï ra engagira mü di enatikine, angü ma o maguma ra ʼburu ʼburu te ngü, ta te Me mala fü wü kundu nih, gü ba, 'Ni ena azükü wü kpara ka-ni gbü kpi ne.' 7Amba, mere Miri, dela si-ngü te wü di enga Yïsarayele ʼburu ngbü eo maguma wü, teka adi emere tima ka Me di, biti de ra ne, teka de Me zükü ani gbü kpi. Te di bala, wü di enga wüna, wü di enga Yïsarayele, le ato ngbanga ra enatikine, neh teka ne? Ah bü teka ngü te ma gü ba, Me zükü Yesu gbü kpi eyi ne? Dela züka ngü? 8De-yi, wü di enga wüna, fïngangü ka-yi gü ba, Me tï azükü kpara gbü kpi de? Yi efï bala neh teka ne? Ngü la ena afa Me afa? 9Fanü fanü, cu de-ra dene, ta gügü ne, ma ngbü ta kpah etïrï wü kpara, de wüh mere e ale ngü ka Yesu de. 10Ma kpo ta da emere wü ngü la agbü Yerüsalema, angü wü mere kovo ka-nih yia ta to wazi fere me-wü teka ngü la. Fü ra akpo angbü ezoro bi wü kpara ka Yesu, da egü ewü agbü ku. Te wüh le amörö ewü la, ngü engu ngbü ereke te ra kpah areke. 11Ma ngbü ta endondoro kpa esambü ka wü biti-te ka-nih agbü Yerüsalema ʼburu, da egïrï wü kpara ka Yesu la, teka adi eto mere kuru te ewü, de wüh ce ngü ka Yesu ace. Ma ngbü ta kpah eo makpü te ewü emaguma ra efa sü. Fü ra angbü da eto cïnga te wü kpara ka Yesu la, zalü koro di agbü tö ka wü ganzi kpara nengete. 12Wayi, mere Miri, gbü gara sïkpï, fü ra ayia teka anü to kpa fügö, agbü Damaseke, angü wü mere kovo ka-nih to ta wazi fere, teka de ma nü, ma mere wü kpara ka Yesu de kpala, kpah baka ta te ma ngbü emere mene ewü de agbü Yerüsalema ne. 13Mere Miri, ma su wu de! Ah te ekoro etü ra, o ra di la bü te kaje enü, fü gara e ayia aci gbü jia ra, baka ülele ka mügbara la. E la, ci fa ra te ngbü esü ka! Fü wazi Me ayia alofo sü ede a raaa! de wü kpara de te a ngbü enü de ewü ne ʼburu. 14Fü a ayia atï ʼburu kötö de wü kpara la. Fü ra ayia aje ri kpara, te mala ngü fere gbü mö ka-nih, wü di enga Yïsarayele, gü ba, 'Sawula, Sawula, mü ngbü eto cïnga te ra bala, neh teka ne? Mü wu de, gü ba, ma fa ni de wazi? Mü baka yiti te le anü nü de, fü ewü angbü emï engu teka ngü la. Mü ngbü embü te-mü de ngü la kükürü, ʼduwa te mü ena ace ngü la, adu ale ngü ka-ra.' 15Te ma je ngü la bala, fü ra ayi-ta ngü, gü ba, 'Mere kpara, ye de neh da?' Fü ah ayia alügü ngü fere, gü ba, 'Ni de Yesu, de te ma ngbü eto cïnga tete ne. 16Amba ma yia eyia, ma rü tikpi. Angü ni sere te-ni fere kükürü de, ni fe ra eyi ba mürü tima ka-ni. Wü ngü de te ma wu de enatikine ne, ah le de ma mala fü wü kpara, kpah de wü gara ngü, te ni ena adu asere fere sidi ne. 17Ni ena atima ra agbü wü gara sü nengete nengete, teka amala ngari ni kpah fü wü ganzi kpara. Gbü wü sü la ʼburu, ni ena adi ladü ake ra, teka aküwa ra esaka wü di enga Yïsarayele, kpah de wü ganzi kpara la. 18Ma nü, ma mala ngari ni fü wü kpara ʼburu, teka de wüh fü maguma wü, ace siti ngü ka-wü, akoro angbü züka wü kpara ka Me, de wüh ce ngü ka Satana, adu ara fü Me. Fü ewü ato maguma wü fü ni, Yesu, teka fü Me aboro siti ngü ka-ewü, fü ewü amaka sü agba Me.' Dela ngü te Miri Yesu mala fere, gbü sïkpï te engu fe ra baka mürü tima ka-ye tete. 19Miri Agiripa, te di bala, dene ngü te ma emala fü mü. Ma le ace ngü, de te Miri Yesu sere fere ne, nda-ra de. Ma ngbü fï bü emere rïrï kaka la. 20Te di bala, ma kpo ʼduwa gbü sïkpï la, emala ngari Me fü wü kpara, teka de wüh fü maguma wü, wüh du kpaka Me, da emere wü ngü te ena areke gbü jijia, teka asere fü wü kpara, gü ba, fanü fanü, ani fü maguma ani eyi. Ma kpo de ngü la ʼduwa ciki gbü Damaseke, koro di agbü Yerüsalema. Fü ra andondoro gbü nga nzö wü sü ka wü Yïsarayele ʼburu, zalü koro di agbü wü tö ka wü ganzi kpara nengete nengete kpah ʼburu. 21Dela si-ngü te wü di enga Yïsarayele zoro ta ra di, etambasü Mere Kambü ka Me agbü Yerüsalema. Fü ewü akpo da egïrï kaje teka amörö ra tete na ne. 22Fü Me ayia aküwa ra esaka ewü, zalü akoro di dene. Te di bala, fü ra ayia arü engagira yi dene, teka amala ngari Me fü yi, wü mere kpara de wü kükürü kpara ʼburu. Ngü te ma ngbü emala ne, ah de kükürü ngü, te ma ngbü efï me-ra, ne de. Ah ngbürü de zu ngü te wü Müse mala ta gügü, de wü bu ye, wü mürü dofo ka Me ʼburu. Fü ewü adu kpah aba ngü la gbü Ngari Me, 23gü ba, 'Te gara Me ena atima Mere Miri füh kotö ne, teka aküwa wü kpara. Amba ah le de Miri la maka cïnga feke, fü ah akpi. Te di bala, engu ena azükü fi me-ye gbü kpi esüka wü kövö ʼburu, teka asere ngü ka küküwa fü nih, wü di enga Yïsarayele, kpah de wü ganzi kpara ʼburu.' " 24Baka te Pawülü ngbü la fï bü emala ngü ka-ye la bala ne, ʼduwa fü Feseto ayia aba rere, akolo ngü ka Pawülü, gü ba, "Apa Pawülü! Ye röfö aröfö! Ceka la, bi ngü te ye tanga ne, siti nzö ye eyi!" 25Fü Pawülü ayia alügü ngü fefe, gü ba, "Ako Miri Feseto, ma röfö aröfö de, baaa. Wü ngü de te ma ngbü emala ne, ah de töndö ngü ka maröfö nda de. Sisi na ladü. 26Miri Agiripa wu ngü la eyi ʼburu. Ah bala de? Angü ngü la mere ta te-ye gbü jia wü kpara ʼburu. Teka ngü la, fü ra angbü emala ngü engu fefe mbölö. 27Te di bala, de-mü Miri Agiripa, ngü te wü mürü dofo ba gbü Ngari Me ne, mü le de? Wayi, ma wü eyi, gü ba, mü le ngü la eyi." 28Fü Miri Agiripa ayia amala ngü fü Pawülü, gü ba, "Ye fï nda-ye, gü ba, ye ena afü ni, akoro di ba kpara ka Yesu, bü kere kere bala?" 29Pawülü, fü mü alügü ngü fefe, gü ba, "Te ena adi kpah bü kere kere, anga ferrre la, ma ngbü eyi-ta Me teka mü, Miri, bete wü kpara ʼburu, de te ewü ngbü eje ri ra enatikine ne, de Me fü maguma yi ʼburu, fü yi akoro kpara ka Yesu baka ra. Amba ah le fü yi amaka cïnga baka nda-ra, te wüh ngbü ei ra de nyarï ne, de." 30Fü ri Pawülü la ayia agürü maguma cögbörö wü kpara la ʼburu. Fü Miri Agiripa, ayia de wü Feseto ake Berenike, bete wü cögbörö kpara, te ewü di de ewü ne, akoro kpa etanü. 31Fü ewü akpo da emala ngü la esüka wü, gü ba, "Apa! Wü wu eyi? Gbü jia ani, komoko la mere siti ngü, te tï fü ewü amörö engu, anga ai engu gbü ku tete ne, nda de." 32Fü Miri Agiripa ayia amala ngü fü Feseto, gü ba, "Te Pawülü ena ayi-ta ngü, gü ba, 'Ni le de miri ka wü Rüma kolo ngü ka-ni me-ye,' ta de la, de bane ani ena ace engu." Dela ngü ka Pawülü engagira Miri Agiripa Erode ake Miri Feseto, agbü Kayïsarïya.

will be added

X\