Wü Mürü Tima ka Yesu 22

1Pawülü gü ba, "Wü di enga wüna, yi je la ngü de te ma emala ne." 2Te wü kpara la je, gü ba, Pawülü ngbü ero mö fü ani, gbü ngü Ebere, te di de mö ka-ani, wü di enga Yïsarayele ne, fü ewü adu anga tïne ʼduwa anga ʼburu ngbiii, eda güje wü kpakaka. Fü Pawülü adu amala ngü fü ewü, gü ba, 3"Ma zu de enga Yïsarayele. Wüh bï ra ta agbü Tarasu, amba ma ga cu gbü Yerüsalema sene. Kpeke e-gü-tamu-ngü, de ïrï ye Gamaliyele ne, gü tamu ngü ta fere cu me-ye. Ah ngbü ta egü tamu rïrï ka gele ka wü kundu nih fere. Gümü ngü ka Me fa ta te ra sü, kpah baka nda-yi, te yi ngbü emere de enatikine ne. 4Teka ngü la, fü ra angbü eto cïnga te wü kpara, de te wüh ngbü efa nga Miri Yesu ne, efa sü, baka te ma ena amörö ewü amörö. Ma ngbü ta ezozoro wü komoko de wü würüse, te ewü le ngü ka Yesu ne, ʼburu, egü agbü ku. 5Mere kpara ka wü mürü gele bete wü gara cögbörö kovo tï eyi amala nga ra fü yi, gü ba, ngü la ka-ye fanü. Angü wüh to ta köcökpa esaka ra me-wü, teka fü ra anü di agbü Damaseke, azoro wü di enga Yïsarayele, de te ewü to maguma wü fü Yesu ne, adu de ewü gbü Yerüsalema sene, teka ato kuru te ewü. 6Baka te ma nü koro gbamari ede Damaseke, etü ra, fü ra awu gara e, te yia ci gbü jia ra baka ülele ka mügbara la. 7Te e la ci tete gbü jia ra, fü ra ayia atï gbuuu! kötö. Fü ra aje ri kpara, te ngbü emala ngü fere, gü ba, 'Sawula, Sawula, mü ngbü eto cïnga te ra bala, neh teka ne?' 8Te ma je ngü la, fü ra ayi-ta kpara la, gü ba, 'Mere kpara, mü de neh da?' Fü kpara la alügü ngü fere, gü ba, 'Ni de Yesu, de te ma ngbü eto cïnga tete na ne.' 9Wü kpara de te a ngbü endoro de ewü ne, wu e de te ci ne eyi. Amba ri kpara de te ngbü ero mö fere ne, wüh je nda-wü de. 10Fü ra ayi-ta ngü, gü ba, 'Mere kpara, ma ena amere baye?' Fü Miri Yesu amala ngü fere, gü ba, 'Ma yia eyia tikpi, ma nü agbü Damaseke, angü wü ngü de te ma ena amere ne, wüh ena asere fere ʼburu kpala.' 11Teka e de te ci gbü jia ra gbele gbele ne, ma du ceka kpï tïne de. Fü wü kpara, ta te a ngbü enü de ewü ne, azoro kpa ra, agbeke ra, anü de ra agbü Damaseke. 12Gara komoko ta ladü agbü Damaseke kpala, de ïrï ye Ananïya. Ah de kpara te le ngü ka Me, da eje wü rïrï kaka ʼburu. Ah kpah de kpara, te wü di enga Yïsarayele de kpala le ngü kaka fa sü. 13Fü Ananïya akoro amaka ra, arü gbamari ede ra, amala ngü fere, gü ba, 'Sawula, enga wüna, jia mü ü te-ye eü.' Ah bü te emala ngü la enza de, bü ʼduwa, fü jia ra aü te-ye, raaa! Fü ra awu engu. 14Fü Ananïya adu amala kpah gara ngü fere, gü ba, 'Mere Me fe ra eyi. Te di bala, fü engu asere ngü, te engu le de ma mere ne. Ah fe ra kpah teka awu Miri Yesu, E-küwa-nih, de jia ra, kpah teka eje riri na. 15Kükürü de, angü ah le de ma ngbü emala nga Yesu fü wü kpara ʼburu, baka ngü de te ma wu cu de jia ra ne.' 16Fü Ananïya adu amala tïne fere, gü ba, 'Ma ngbü ecï nga ne? Ah le de ma yia eyia kere, ma ku kpah gba fü Miri Yesu, de ah boro siti ngü ka-ra. Fü ra aza babatïza te ïïrï na.' 17Fütanga ngü la, fü ra ayia adu akoro agbü Yerüsalema. Gbü gara sïkpï, fü ra ayia anü kpa etambasü Mere Kambü ka Me, teka aku gba fü Me. Fü Miri Yesu ayia asere te-ye fere, baka ngü gbü roto. Fü ah amala ngü fere, gü ba, 'Ma yia eyia gbü Yerüsalema sene kere asidi! Angü ngari ni, te ma ena angbü emala fü wü di enga Yïsarayele agbü Yerüsalema ne, wüh tï ale nda-wü de.' 19Fü ra alügü ngü fefe, gü ba, 'Wayi, mere kpara, amba ah le ta de wüh le ngü te ma ngbü emala fü ewü ne, angü wüh wu eyi kpo, gü ba, ma ngbü ta ekpü wü kpara ka-mü, fü ra angbü endondoro esambü ka biti-te, gbü wü nga nzö sü ʼburu, da egïrï wü kpara ta te ewü to maguma wü fü mü, Yesu, ne, da emiki ewü, egü agbü ku. 20Kpah bala, o wüh ngbü ta emörö züka kpara ka-mü, de ïrï ye Setefanü ne, ma ta kpah ladü kpala. A ngbü ta emere ngü la de ewü, angü ta te wüh ngbü esötö engu de teme ne, wü kpara la gbi ta züka bongo ka-wü, ce o esaka ra, de ma ceka kpï fütanganga.' 21Fü Miri Yesu amala ngü fere, gü ba, 'Ma yia eyia, angü ni ena atima ra agbü wü gara sü nengete, teka amala ngari ni fü wü ganzi kpara.' " 22Fü wü kpara la aje ngü de gömö Pawülü la, zalü te adu ngü de te engu nü, gü ïrï wü ganzi kpara. Fü ngü la asiti te ewü, angü wüh le ngü ka wü ganzi kpara nda-wü de. Fü ewü akpo esösörö bongo ka-wü, da ecö tö, ebu kpa tikpi, da eba rere, gü ba, "Ah le de wüh nza ngü ka komoko la anza! Wüh mörö engu amörö! Ah tï fü engu aküwa kpo fï de!" 24Te mere kpara ka wü marajümïya, te di gbü nzö ewü ʼburu, wu, gü ba, maguma wü kpara la siti eyi eküte Pawülü fa sü ne, fü ah ayia ato rïrï fü wü marajümïya ka-ye, de wüh za Pawülü, nü di agbü ʼbaranga ka-wü. Te wüh rï tete kpala, fü ah adu amala fü ewü, de wüh süma Pawülü de juru, teka de ah mala si-ngü, de te wü kpara ngbü ebu komö wü tete na la, mbi mbi mbi. 25Fü wü marajümïya ayia ai Pawülü, aza juru, de ani süma engu di. Fü Pawülü amala ngü fü gara kpara fütanga mere ewü la, gü ba, "Apa! Ah mere baye? Te ni di de kpara ka Rüma, wü ena asüma ni, o wüh ye süka ngü ka-ni la de, teka ne? Rïrï ka-ani, wü Rüma mala bala?" 26Te mere kpara la je ngü la bala, fü ah ayia anü amala ngü la fü mere kpara ka-ye, gü ba, "Ye ceka te-ye ʼbe! Angü komoko la ka-ye de enga Rüma!" 27Te mere kpara la je ngü la bala, fü cürü ayia arï tete. Fü ah ayia anü ayi-ta Pawülü, gü ba, "Ye mala la zu ngü fü ni. Ye de enga Rüma fanü?" Fü Pawülü alügü ngü fefe, gü ba, "Wayi, ni de enga Rüma fanü." 28Mere kpara ne gü ba, "De-ni bane, ni to mere bi jiase teka afü te-ni, akoro enga Rüma." Fü Pawülü alügü ngü fefe, gü ba, "Amba nda-ni, wüh bï ni nda-wü kü enga Rüma." 29Baka te wü marajümïya, de te ewü le ta asüma Pawülü, je, gü ba, engu de enga Rüma ne, fü ewü ayia ace engu. Fü cürü arï kpah te mere kpara ka-ewü teka ngü la. Angü kpara te di de kpara ka Rüma, wüh tï ai engu gbü ku bü kükürü bala ne de. 30Te kpï seke tete, mere kpara ka wü marajümïya la ngbü fï bü egïrï si-ngü ka Pawülü, te siti te wü di enga Yïsarayele ne. Te di bala, fü engu atima ngü fü wü angbe cögbörö kovo ka wü Yïsarayele, de wüh biti te-wü. Fü engu ayia aza Pawülü anü di engagira ewü.

will be added

X\