Wü Mürü Tima ka Yesu 2

1Te koro gbü sïkpï teke ʼbasu de füh ye nzükpa (50), fütanga sïkpï te Yesu zükü tete gbü kpi, sïkpï la, ah ka-ye de mere sïkpï ka karama ka wü Yïsarayele, te wüh ngbü eï Petekosïta ne. Fü wü kpara ka Yesu abiti te-wü ʼburu, kpah ba e te ewü ngbü emere gügü ne. 2Wüh te eje de, fü giri e angbü ewü gbu gbu gbu gbu bane, baka mere wege. Fü giri e la awü gbü mere kambü, de te ewü ngbü gbügbü na ne ʼburu. 3Fü ewü awu e te ngbü eci aci ba mi-wa, te koro baya esüka ewü, ngbü kpah gbü nzö ewü biri biri ʼburu. 4Fü Nzïla Wazi Me asi emaguma ewü ʼburu. Fü ewü akpo da emala ngari Me fü wü kpara, gbü wü gara ganzi mö, te ewü je gügü la de, angü Nzïla Wazi Me to wazi la fü ewü me-ye. 5Gbü sïkpï la, mere bi wü kpara koro ta ngbü agbü Yerüsalema, teka karama la. Wüh de wü gara wü di enga Yïsarayele, te ewü yia gbü nga nzö sü füh kotö ne ʼburu, teka aku gba fü Me agbü Yerüsalema. 6Te wüh je giri e la bala, fü mere bi wü kpara la aci, akpe akoro gbü sü la, teka awu ngü, te ngbü emere te-ye de kpala. Fü ngü la aga gbü jia ewü afa sü, angü wüh ngbü eje ngü de te wü kpara ka Yesu ngbü emala la, gbü wü mö ka-ewü biri biri ʼburu. 7Fü komö ewü agu ka ngü la ʼduwa agu. Angü wü kpara la koro te nga nzö sü füh kotö ne ʼburu. Gara ewü ka-wü cu wü di enga Yïsarayele, gara ewü de ganzi kpara, te ewü le adi emere gele ka wü Yïsarayele. Wü gara kpara yia agbü Parutiya, gara gbü Madayï, gara gbü Elama, gara gbü Mesopotamïya. Gara ewü de wü kpara ka Yudaya, gara yia gbü Kapadokïya, gara gbü Potïyü, gara gbü Asïya. Gara koro agbü Fïrïgïya, gara gbü Pafïlïya, gara gbü Ezepeto, gara gbü Libiya, gbamari ede Kurene. Gara ewü de wü kpara ka Rüma, gara ewü de wü kpara ka Kürete bete wü kpara te ewü koro gbü sü ka wü Arabï. Fü ewü akpo da eyi-ta tete-wü, gü ba, "Apa! De bane neh ene ngü ne? Wü kpara, te ewü ngbü emala ngü la, wüh ʼburu de wü kpara ka Galïlaya. Amba ah mere baye, te ani ngbü eje wü kpeke ngü ka Me de gömö ewü la, zu bü cu gbü wü mö ka-ani kpikpi ye kpikpi ye ne?" 12Fü ngü la aga te nga jia wü kpara la ʼburu. Fü ewü angbü tïne bü de yitangü gömö ewü bü ʼdaaa, gü ba, "Apa! Mene ngü de bala ne ngbü egü tïne fe? Si-ngü la ena adi baye? Ah de wazi ka Me de? Me mere ngü la me-ye de?" 13Esüka wü kpara te ewü je ngü la, wü gara kpara ngbü efala wü kpara ka Yesu la nda-wü afala, gü ba, "Ho! Wü kpara la ngbü eküya ka-wü aküya de fï de?" 14Petero, fü yi ayia te nga yi nzükpa de füh ye ʼbasu ne le ʼburu tikpi. Fü mü akpo emala ngü fü mere bi wü kpara la, de mere ri mü kpa tikpi, gü ba dene, "De-yi, wü di enga wüna, wü di enga Yïsarayele, ngü de te ma ele amala fü yi ne, ah le fü yi aje si-ngü la, awu mbi mbi mbi. 15Yi ngbü efï nda-yi, gü ba, wü kpara ne küya aküya de fï? Aʼa, ah bala nda de, angü dene la bü lö-ra menewa ka kpurutokokpï. Wüh ngbü eküya gügü kpurutokokpï bala aküya fanü? 16Ngü de te a ngbü emere ne, a maka wazi ka Nzïla Wazi Me, kpah baka ngü ta te Me mala nganga na gügü, gömö mürü dofo Yüwele, 17gü ba, 'Dene ngü te ni, Me, ena amere gbü sïkpï, te ni ena atima kpara ka-ni füh kotö ne tete. Gbü sïkpï la, ni ena ato wazi ka Nzïla Wazi ni fü wü kpara ka-ni ʼburu. Wü jaji komoko de wü jaji würüse, wüh ena angbü emala ngari ni fü wü kpara de wazi ka Nzïla Wazi ni la, baka wü mürü dofo ka Me. Nzïla Wazi ni ena angbü esere ngari ni fü wü kaʼdörö de wü kovo gbü roto. 18Ni ena ato wazi ka Nzïla Wazi ni fü wü kpara ka tima ka-ni, wü komoko de wü würüse ʼburu, teka fü ewü angbü emala ngari ni fü wü bu wü di. 19Gbü sïkpï la, ni ena amere wü lara ngü gbe, gara kpa tikpi agbü kpï kpala, gara füh kotö kpakine. Wüh ena awu e ba ngüte, de wa, bete nguwa te gba sü kpuuu! 20Ra ena afü te-ye ba biti. Fe ena afü te-ye kpah afü didiki baka ngüte la. Fütanga ngü la, ni ena akoro füh kotö ne ba Mere Miri. 21Te di bala, mene wü kpara te ewü ena aku gba fü ni, de ni küwa ani, wüh ena aküwa ʼduwa me-wü.' Dela ngü ta te Me mala gömö mürü dofo Yüwele, teka wazi ka Nzïla Wazi Me, ba e te yi wu de enatikine." 22Fü Petero adu amala kpah gara ngü fü wü kpara la, gü ba dene, "Wü di enga wüna, yi je la ngü de te ma le amala fü yi ne. Kpara te Me tima fü yi, teka aküwa yi, ah ka-ye de Yesu. Ah le ta de yi wu ngü la mbi, angü Me to ta wazi fefe, teka aküwa wü mürü keke, kpah da emere mere bi wü gara kpeke wü ngü di. Ah mere wü ngü la cu gbü jia yi, gbü Yerüsalema sene. Ngü la rï gbü nzö yi la de? 23Me tima Yesu eyi fü yi, fü yi aza nda-yi engu, ato fü wü siti kpara, teka fü ewü abere engu, amörö füh rü gbegbete. Dela ʼburu kaje te Me fe ta me-ye, reke eyi gügü baka fïngangü ka-ye. 24Amba Me le de engu ngbü esa wazi ka kpi nda de, fü ah ayia azükü engu gbü kpi la asidi. 25Miri Davidi mala ngü ka züzükü ka Yesu la ta eyi gügü. Angü Nzïla Wazi Me gü tamu ngü la eyi fefe me-ye, gü ba, 'Me ena atima Mere Miri füh kotö ne teka aküwa wü kpara.' Angü Me kïna kïna fefe ta eyi, gü ba, 'Te gara, ni, Me, ena aza gara kundu kundu ye, ao engu Mere Miri baka ye.' Te di bala, Davidi ba ngü teka Yesu gbü gara ci ka-ye, gü ba dene, 'Wüba Me, ma wu eyi, gü ba, mü ladü ake ra. Mü tï ace ra nda-mü de. Gbü wü sïkpï ʼburu, mü ngbü eto wazi fere. Ma ngbü de mere tadu teka ngü ka-mü. Ma gbo nga ïrï mü, de ci de koko mini. Te ma ena akpi, ma tï akpe cürü kpah de. Angü mü le ra de maguma mü ʼburu. Mü tï ace ra gbü kpi nda-mü de. Küte ra tï azi gbü tö kpah de. Mü mala ngü la eyi fere, gü ba, "Mü ena azükü ra gbü kpi." Mü ena aza ra, ago di kpaka mü agbü kpï kpala. Fü nih angbü de nih ma de mere tadu fï mere badi.' Dela ngü ta te Davidi ba gbü Ngari Me, teka ngü ka Yesu." Fü Petero adu amala kpah gara ngü fü wü kpara la, gü ba dene, "Wü di enga wüna, yi wu cu me-yi, gü ba, kundu nih Davidi ne kpi ta eyi gügü, fü ewü ati engu gbü mbükü. Zalü akoro enatikine dene, mbümbükü fï bü ladü esüka nih sene. Ah zükü gbü kpi nda de. 31Te ah bala, ngü te engu mala, gü ba, 'Me tï ace ni gbü kpi de ne,' si-ngü gbü ngü la neh baye? Davidi mala ngü la teka ngü ka-ye nda de. Ah mala neh teka da? Ah mala ngü la de wazi ka Nzïla Wazi Me, teka ngü ka Kurisito, Mere Miri te Me ena atima sidi nga ye. Me gü tamu ngü ka Mere Miri la fefe eyi gügü, fü engu amala ngü kaka la, gü ba, 'Me tï ace engu gbü kpi de. Küküte tï azi gbü tö kpah de.' 32Mere Miri la, ah ka-ye de Yesu, angü biri kpara te Me zükü engu gbü kpi, ah ka-ye duu Yesu kpikpi ye. Yesu zükü gbü kpi fanü, angü a wu ngü la cu de jia a. 33Fütanga ngü la, fü Me aza Yesu, anü di, ao ba Mere Miri gbü kokpa ka-ye agbü kpï kpala. Fü engu ato wazi ka Nzïla Wazi ye fefe, kpah ba e te engu mala. Enatikine, Yesu tima Nzïla Wazi ye eyi gbü nzö a dene. Fü a amaka wazi gbü ngü la, teka amala ngü kaka fü yi gbü mö ka-yi biri biri ʼburu, kpah ba e te yi ngbü eceka enatikine ne. 34Angü Davidi ba ta kpah gara ngü, te Nzïla Wazi Me sere fefe, gü ba, 'Me mala ngü fü Miri ka-ni, gü ba dene, "Ye ngbü gbü kokpa ka-ni sene. Angü ni fe ye, o eyi Mere Miri. Te di bala, ye ena angbü gbü nzö wü kpara ʼburu! Angü ni ena ao wü vügü ka-ye ʼburu esa lö ye!" ' Yi efï nda-yi, gü ba, Davidi de kpara te Me za, go di agbü kpï? Aʼa. Ah bala de. Amba ah mala ta ngü la teka Yesu. 36De-yi, wü di enga wüna, wü Yïsarayele, dela ngü te ma le amala fü yi enatikine. Yesu ka-ye de kpara te Me tima engu teka aküwa nih. Nda-yi, yi mörö engu, amba Me ce engu gbü kpi la nda de! Ah o engu kpah eyi Mere Miri gbü nzö wü kpara füh kotö ne ʼburu." 37Te mere bi wü kpara la je ngü te Petero mala de bala, fü maguma ewü akolo ʼduwa tuu! Fü ewü ayi-ta Petero de wü gara wü bu ye la, gü ba, "Apa! Wü di enga wüna, kpara ena amere tïne dene neh baye?" 38Petero, fü mü ayia amala ngü fü ewü, gü ba, "Yi fü maguma yi efü, adu ale ngü ka Yesu Kurisito, de yi za babatïza te ïïrï na. Fü Me aboro siti ngü ka-yi, ato Nzïla Wazi ye fü yi. 39Angü dela ngü te Me kïna te-ye di gügü, gü ba, 'Ni ena aküwa wü kpara ʼburu, te ni fe ewü, ba wü kpara ka-ni ne.' Ah mala ngü la eyi, teka yi de wü di yi, kpah teka wü kpara, te ewü ngbü gbü wü gara sü nengete ne ʼburu." 40Fü Petero amala kpah gara bi wü ngü fü ewü, gü ba, "Fanü fanü, Yesu ka-ye de kpara te Me tima teka aküwa ani." Fü ah amala ngü la fü ewü kpekpeke, gü ba, "Wü le ngü ka Yesu, teka fü wü aküwa esaka mere kuru, te Me ena ato fü siti wü kpara füh kotö ne te gara." 41Fü mere bi wü kpara esüka wü kpara, te ewü ngbü eje ngü gömö Petero la, ayia ato maguma wü fü Yesu. Fü wü Petero ato babatïza fü ewü, wü kpara la ta kutu bata gbü sïkpï engu la. 42Fü wü kpara la ao maguma wü, teka angbü eje rïrï gömö wü mürü tima ka Yesu. Fü ewü angbü engbü tundu de wü di enga ni wü, de maguma wü biringbö, gbü wü sïkpï ʼburu. Fü ewü angbü ezü wü e ka-wü ʼburu tundu, kpah da ebiti te-wü tundu, teka adi eku gba fü Me, da egbo nga ïïrï na. 43Ta gbü wü sïkpï la, fü wazi ka Nzïla Wazi Me asi emaguma wü mürü tima ka Yesu. Fü ewü angbü eküwa wü mürü keke, kpah da emere mere bi wü gara kpeke ngü. Teka ngü la, fü wü kpara angbü ecu ngü ka-ewü. 44Wü kpara ka Yesu la, ngbü ta engbü ka-wü ʼburu tundu, da ebiti wü e ka-wü ʼburu tundu, teka adi ele ta-ngü di esüka wü. 45Gbü wü ngü la, wüh ngbü kpah ecïnzï gara wü e ka-wü, teka agafa jiase la fü wü bu wü biri biri ʼburu, baka te cïnga ka-ewü di ladü. 46Gbü wü sïkpï ʼburu, wüh ngbü ebiti te-wü kpa etambasü ka Mere Kambü ka Me. Fü ewü angbü ezü wü e ka-wü esüka wü ʼburu de tadu, kpah de züka maguma, da egbo nga ïrï Me. 47Fü ngü ka-ewü la angbü ereke gbü jia wü kpara ʼburu efa sü. Teka ngü la, gbü wü sïkpï ʼburu, fü Me angbü eto wü gara kpara esüka ewü, te engu fe teka aküwa.

will be added

X\