Wü Mürü Tima ka Yesu 1

1Wayi bala, enga wüna Teyofile, ngü ta te ma ba gbü gina köcökpa ka-ra ne, ah de nga ngü ta te Yesu kpo de tima ka-ye, da erï wü kpara di, 2zalü koro gbü sïkpï te engu go tete agbü kpï. Amba, o engu go agbü kpï la de, ah to rïrï fü wü mürü tima ka-ye ta te engu fe ewü la, gbü wazi ka Nzïla Wazi Me, teka tima te ewü ena amere sidi nga ye. 3Angü fütanga kpi kaka-na, engu ngbü ekoro da esere te-ye fü wü mürü tima ka-ye la teka sïkpï teke ʼbasu, teka fü ewü awu, gü ba, ni zükü gbü kpi eyi fanü. Ah ngbü kpah da erï ewü de ngari Me. 4Gbü gara sïkpï, o wü Yesu ngbü eyi tundu de wü kpara ka-ye la, fü engu ayia ato rïrï fü ewü, gü ba, "Yi mere e ayia agbü Yerüsalema sene de. Ah le fü yi angbü sene, acï nga ngü ta te Wüba gü ba, ni ena ato fü yi ne. Ah de Nzïla Wazi Me, ba e te ma mala nganga na fü yi, gü ba dene, 5'Yüwane to ta babatïza fü yi de ngu kükürü, amba sidi ne, Me ena ato babatïza fü yi, fü ah ato kpah wazi ka Nzïla Wazi ye fü yi.' Ngü la ena amere te-ye fanü fütanga sïkpï mba cüküʼdaye." 6Fütanga ngü la, fü wü kpara ka Yesu abiti te-wü edede, ayi-tata, gü ba, "Mere kpara, sïkpï te ye ena ato wazi fü ani, wü di enga Yïsarayele, teka fü ani aliki wü vügü ka-ani tete, ah ena adi elaye?" 7Fü Yesu alügü ngü fü ewü, gü ba, "Ngü ka sïkpï la, ah de ngü ka-yi nda de. Kükürü de, angü ngü la, ah ka-ye de ngü ka Wüba, angü ah wu ngü ka sïkpï engu la ka-ye me-ye. 8Amba nda-yi, sidi nga sïkpï mba cüküʼdaye, yi ena amaka wazi ka Nzïla Wazi Me, te ena akoro angbü gbü nzö yi. Ah ena ato wazi fü yi teka adi emala nga ra di fü wü kpara. Yi ena akpo de ngü la gbü Yerüsalema sene, kpah agbü nga nzö sü ka Yudaya, Samarïya, zalü koro di agbü adu sü füh kotö ne ʼburu." 9Te Yesu mala ngü la fü wü kpara ka-ye nza tete, ʼduwa fü Me adu aza engu gbü jia ewü, ago di kpaka ye agbü kpï. Wüh du wu engu tïne de, ka sangu te koro gba engu gbü jia ewü. 10O wüh ngbü la fï bü eceka kpï agbü kpï, fü ewü agü jia wü, gbo! te wü kpara ʼbasu, de bu bongo te wü. 11Fü wü kpara la amala ngü fü ewü, gü ba, "De-yi wü kpara ka Galïlaya, yi ngbü erü fï bü da eceka kpï agbü kpï de bala, teka ngü ka Yesu, de te Me za engu, go di agbü kpï ne? Fanü fanü, te gara, engu ena adu akoro füh kotö ne kpah bala." 12Dela ngü te mere te-ye kpa füh da de ïrï ye Olïve ne. Fütanga gogo ka Yesu agbü kpï ne, fü wü kpara ka Yesu ayia kpa füh da la, adu agbü Yerüsalema, angü sü la ka-ye gbamari ede mere kötï la. 13Te wüh du koro agbü Yerüsalema, fü ewü anü arï kpa esambü te di ga füh kiri ye, angü ah de kambü te ewü ngbü gbügbü na. Wüh ta de wü Petero, Yüwane, Yakobo, Anderïya, Fïlïpo, Toma, Batülümayo, Matayo, Yakobo ye Alofaya, bete Sïmüna be kpah te Yuda ye Yakobo. 14Gbü wü sïkpï ʼburu, wüh ngbü ta ebiti te-wü, da eku gba fü Me de maguma wü biringbö. Wü di enga ni ye Yesu kpah ladü de ewü kpala, bete Marïya ni ye Yesu, de wü gara würüse, ta te ewü ngbü endoro de ewü. 15Gbü gara sïkpï, fü wü kpara ka Yesu ayia abiti te-wü baka wü kpara kama biri teke biri (120). Fü Petero ayia esüka ewü, amala ngü fü ewü, gü ba, 16"Wü di enga wüna, ma ele amala gara ngü fü yi teka ngü ka Yuda Keriyota, angü ah le de nih fe gara kpara dada na. Yi wu siti ngü kaka kpo. Angü ah ta de biri kpara esüka nih, te Yesu fe engu ta teka tima kpah baka nih. Fü ah adu afü te-ye vügü ka Yesu, agü tatamu, fü wü marajümïya azoro. Te di bala, ah le de nih fe gara kpara dada, baka ngü ta te wüh ba gbü Ngari Me tekaka. Angü Nzïla Wazi Me mala ngü kaka ta eyi gügü gömö Miri Davidi." 18Petero mala bala, angü wü kpara agbü Yerüsalema je eyi ʼburu, ga, Keriyota kpi eyi teka siti ngü ka-ye. Wüh to ta jiase fefe teka ngü ka Yesu. Te engu kpi tete, fü ewü aza jiase la, ase sü di, teka adi eti wü kpara gbügbü na. Amba engu ta de gina kpara te nzönzö tï gbü sü engu la, angü ah kpi, fü bubu na asü, fü nzanza na akoro etanü ʼdaaa. Teka ngü la, fü ewü agü ïrï sü la gbü mö ka-wü, gü ba, "Akela damu", baka e te wüh gü ba, "Sü ka ngüte". 20Fü Petero adu amala gara ngü fü ewü, gü ba, "Angü Davidi ba ngü teka Keriyota gbü gara ci ka-ye, gü ba, 'Ah le fü sü kaka afü te-ye ndama, biri kpara mere e angbü kpala kpo fï de.' Gara gü ba, 'Ah le fü gara kpara aza tima dada na.' 21Te di bala, wü di enga wüna, ah le de ngü la mere te-ye fanü. Ah le fü ani afe gara kpara da Keriyota, teka ale ta-ngü te ani gbü tima ka-ani, da emala nga züzükü ka Miri Yesu ne fü wü kpara. Ah le kpara de te ani ngbü ta endoro de wü Yesu tundu de ewü, o Yesu ngbü ta la endoro de tima ka-ye füh kotö sene ne, akpo gbü sïkpï te Yüwane to babatïza tete fefe, zalü koro di gbü sïkpï te engu yia tete esüka ani, go agbü kpï." 23Te wüh je ngü la bala, fü ewü afe wü kpara ʼbasu, Yüsefa Barasaba, ake Matatïya. 24Fü ewü ayia ayi-ta Me, gü ba, "Ako Me, mü wu ngü te di emaguma wü kpara ʼburu. Esüka wü kpara de ʼbasu ne, ah tï fü mü agü tamu mene kpara te mü fe engu eyi, 25teka fü engu aza tima da Keriyota, teka amala ngari mü, angü Keriyota kpi ce tima la eyi." 26Esüka ïrï wü kpara ʼbasu de te wüh fe ewü ne, fü ewü aza ïrï kpara te Me fe eyi esüka ewü. Fü ïrï Matatïya akoro bü me-ye. Fü engu erï esüka wü mürü tima ka Yesu nzükpa de füh ye biri ne.

will be added

X\