2 Timoteyo 3

1Timoteyo enga ra, dene kpeke ngü te ma le amala fü mü. Nih, te nih to maguma nih eyi fanü fanü fü Me ne, wü vügü ka-nih ena asibi afa sü, zalü akoro di gbü sïkpï te Yesu ena adu akoro tete na. 2Angü siti wü kpara fa gbü sïkpï ne eyi sü. Wü gara ewü le wü bu wü de. Wüh le ʼduwa ngü ka-wü, da eo to wü ʼburu teka angbü emaka jiase. Wü gara ewü ngbü da ecu ngü wü, da egbo nga ïrï wü, da esoko wü bu wü. Wü gara ewü je ngü ka wü wö wü de. Wüh fï nga wü kpara te ewü ngbü ele ta-ngü te ewü kpah de. Wüh ngbü fï bü da emere wü ngü, te siti gbü jia Me fa sü. 3Wüh le wü mürü wü agba wü kpah de. Wüh wu cïnga kpara ʼburu de. Wü gara ewü ngbü emala ambalaʼba eküte wü bu wü. Gara ewü je rïrï ʼburu ʼburu de. Gara ewü de mürü gü. Wüh le amere züka ngü nda-wü kü de. 4Wü gara ewü ngbü efiti wü bu wü de mani, eto fü wü vügü. Wü gara ewü de wü mürü kögö-nzö. Wü gara ngbü eʼdu ngü wü, gü ba, "Ani de kpeke kpara! Ani wu ngü fa sü!" Wüh le ngü ka Me nda-wü ʼburu ʼburu de. Wüh le ka-wü ʼduwa ngü de füh kotö ne, angü ah ngbü eto tadu fü ewü me-ye. 5Gara ewü gü ba, "Ani de kpara ka Me," amba maguma ewü ka-ye ʼbasu ʼbasu. Ngü ka-ewü tï de ngü ka Me nda de, angü wüh wu wazi Me nda-wü kpah de. Mü di ekpe wü kpara la akpe. Mü mere e adi engbü de ewü de. 6Gara siti wü kpara baka e la eyi ladü, te ewü ngbü efiti wü kpara. Angü wüh ngbü ekoro agba wü kpara, fü ewü akpo da emala töndö rïrï fü ewü, gü ba, ah de rïrï ka Me. Fü ewü afiti wü kpara, te ewü wu ngü mbi mbi de, baka wü gara würüse, te ewü ngbü ekpe cürü, teka mere bi siti ngü ka-wü. Angü wazi ewü teka ace siti ngü ka-wü la di nda ma. 7Wüh ngbü ta ele awu zu ngü ka Me, amba wüh tï awu ngü la de, teka siti rïrï la. 8Wü kpara te ewü ngbü efiti wü kpara de töndö rïrï de bala, wüh de wü vügü ka Me, kpah baka Yane ake Yambere tane, te ewü di de wü vügü ka Müse ne. Wü mürü fiti la ngbü eo fïngangü ka-wü ʼburu teka siti ngü. Te di bala, Me ena ato kuru te ewü ato. 9Fü ngü ka-ewü anza. Angü wü kpara ʼburu ena awu töndö ngü ka-ewü la, kpah baka e ta te wüh wu töndö ngü ka wü Yane ake Yambere ne. 10De-mü Timoteyo, ah le de mü rü kpekpeke kpah baka ra. Mü wu ngü te ma ngbü emere ne ʼburu kpo. Mü wu ngü te ma ngbü erï wü kpara di kpah kpo. Mü wu eyi, gü ba, ma ngbü eo jia ra fï bü teka tima ka Me. Mü wu kpah kpo, gü ba, ma ngbü eo to ra ʼburu teka ngü ka Me, fü ra angbü kpah ele wü bu ra, de maguma ra ʼburu. Mü wu mere cïnga te wüh to eküte ra, teka ngü ka Yesu Kurisito ne, kpah kpo. Mü wu kpah kpo, gü ba, gbü wü ngü la ʼburu, ma rü fï bü kpekpeke. Mü wu ngü ta te mere ra agbü Atïyokïya ake Ïkoniyo bete Lïsïtera ne kpah kpo. Amba fü Miri Yesu ayia aküwa ra gbü wü ngü la ʼburu. 12Angü wü kpara ʼburu te ewü le afa nga Yesu Kurisito, wüh ena amaka cïnga füh kotö ne amaka bala. 13Amba siti rïrï ka wü mürü fiti la ena anü fï bü kpa engagira nü. Wüh ena angbü fï bü da efiti wü kpara, da eo maguma wü teka siti rïrï ka-wü la. 14Timoteyo, enga ra, te di bala ne, ah le de mü rü kpekpeke, da elala eküte zu ngari Yesu, te mü je gömö a ne. Mü wu eyi, gü ba, ah de zu ngü fanü fanü, angü a mala ngü la fü mü me-a. 15Kpah bala, mü maka ngü la kpah eyi gbü Ngari Me, angü mü kpo da etanga ngü la kü gügü, gbü jaji te mü. Angü Ngari Me la, ah de kpeke ngü, te gü tamu kaje eyi fü mü, teka fü mü ato maguma mü fü Yesu Kurisito, fü mü aküwa. 16Angü wü kpara te ewü ba Ngari Me la, wüh ba ngü la ta ʼburu esa ri Me. Me to ngü la fü nih, teka arï nih de züka rïrï, kpah teka agü tamu wü siti ngü ka-nih fü nih, kpah teka ato wazi fü nih, de nih di emere wü ngü, te ena areke gbü jia Me di. 17Te ah bala, te mü de kpara ka Me la, ah le de mü di etanga Ngari Me la, teka fü mü awu züka ngü, de te ngbü ereke gbü jia Me. Fü mü amaka kpah wazi, teka amere tima la di.

will be added

X\