1 Timoteyo 6

1Mene labï te ngbü emere tima fü kpara te le ngü ka Me de, mü mala fü ewü, de wüh di eo lümü wü mere kpara ka-wü la, ao kpekpeke, angü wü kpara ena asiti ïrï Me teka ngü ka-ewü, gü ba, "Nih ngbü erï wü kpara de siti rïrï." 2Te mere kpara kaka di kpah kpara ka Miri Yesu la, engu mere e adi efala mere kpara ka-ye la de. Ah mere e afï, ga, "Angü dela enga ni ni gbü ngü ka Yesu, ni ena aje ngü kaka baye?" ah mere e amala bala de. Baka te mere kpara kaka di de kpara ka Miri Yesu ne, engu di eje ngü kaka tïne efa sü, angü mere kpara kaka la de züka kpara, te le ngü ka Yesu Kurisito, te Me ngbü kpah ele engu. Wayi, ye ra Timoteyo, dela eyi wü ngü, de te mü ena angbü erï wü kpara ka Yesu di, fü ewü angbü emere. 3Mene kpara te ngbü erï wü bu ye de gara rïrï, te di kpikpi ye ne, ah de siti kpara. Angü rïrï ka-nih, ah de züka ngü ka Miri Yesu Kurisito, te ngbü egü tamu züka kaje ka Me fü nih fanü fanü ne. 4Mene kpara te ngbü eto gara rïrï de bala, ah ngbü ecu ngü ye, ga, "Ni de mere kpara, te ni wu ngü ʼburu kpo," amba ah wu ngü ʼburu ʼburu de. Tima kaka-na ka-ye bü teka adi ega yïkï, teka wü gara töndö ngü kükürü. Teka ngü la, ah ena akpo angbü ekpi kanga, da ewü nga de wü bu ye, da efala ewü. Angü ah ngbü efï nga ngü, ga, wü bu ni nda-wü ʼburu de siti wü kpara. 5Fïngangü kaka siti bala, angü ah je züka rïrï ka Me nda kpah de. Ah ga, "Ni ngbü emere tima ka Me," amba de! Ah o fïngangü ka-ye ʼburu teka züka ngü, te ni ena amaka gbü tima la. 6Fanü fanü, mü tï eyi amaka mere bi züka wü ngü gbü tima ka Me. Amba ah de wü ngü de füh kotö ne nda de. Te mü mere tima ka Me de maguma mü biringbö, fü mü ace ngü ka gümü e asidi, te mü mere bala, mü ena angbü de tadu fanü fanü. 7Wüh o maguma wü teka wü e de füh kotö ne, neh teka ne? Ta te ewü bï mü füh kotö ne, wü e la ladü esaka mü? Kpah bala, gbü ra te mü ena akpi tete, mü ena aza wü e ka-mü la, ago di? 8Te di bala ne, te mü maka mba enga zü-e, bete kala bongo te mü ena ato eküte mü la, mü fï nga ngü de, mü ngbü ka-mü de tadu te mü, angü wü e la tï eyi ale ta-ngü te mü. 9Mene kpara te o fïngangü ka-ye teka amaka bi jiase, ah ena amaka mere cïnga gbü ngü la. Angü Satana ena afiti engu, de ah tï gbü yïmba ka-ni. Te di bala, ah ena adürü te kaje ka Me asidi, fü ah akpi akpi fï mere badi. 10Angü, te mü o maguma mü ʼburu teka jiase la, ngü la ena aza mere bi wü siti ngü ʼburu, akoro di gbü nzö mü. Wü gara kpara ce ngü ka Me eyi, teka gümü jiase. Fü ewü amaka mere kuru teka ngü la. 11Timoteyo, ye ra, mü mere e angbü ba siti wü kpara la de, angü mü nda-mü de mürü tima ka Me. Te di bala, mü to maguma mü fü Me, fü mü ao fïngangü ka-mü ʼburu, teka adi emere wü ngü te reke areke gbü jijia, kpah teka adi engbü ziii, da ele wü bu mü de züka maguma mü. Mü di etüka te-mü, da erü kpekpeke gbü ngü ka Miri Yesu. 12Mü i maguma mü ai, baka kpara te ngbü emere gü teka ngü ka Me. Mü zoro ngü ka Me la de kpa mü ʼbasu, teka fü mü aküwa fï mere badi. Angü Me fe mü eyi teka küküwa la. Mü fï la nga sïkpï ta te mü kïna te-mü, gbü jia mere bi wü kpara, gü ba, "Ni to maguma ni eyi fü Me fanü fanü ne." 13Timoteyo, ye ra, wü ngü te ma mala fü mü la, ah de kpeke ngü. Ah le de mü di emere wü ngü la zalü ʼburu. To mü mere e aïrï tete kpo fï de. Ma mala ngü la fü mü kpekpeke de ïrï Mere Me, angü ah ngbü eküwa wü kpara füh kotö ne ʼburu me-ye. Ma mala ngü la kpah de ïrï Yesu Kurisito, angü engu rü ta kpekpeke ba komoko engagira Miri Pïlatü. Mü di emere wü ngü la bala, zalü gbü sïkpï te Yesu Kurisito ena adu akoro tete na. Fü Miri Yesu aceka mü ba züka kpara ka-ye. 15Nih gbo nga ïrï Me, angü engu de kpara, te ena agü tamu Yesu Kurisito fü nih gbü sïkpï la. Nih gbo nga ïrï Me, angü ah de Mere Miri duu me-ye, te fa wü miri füh kotö ne nde ʼburu. 16Nih gbo nga ïrï Me, angü gara kpara kpala bakaka kpa füh kotö akine nda ma. Nih gbo nga ïrï Me, angü te engu di dela, ah tï akpi nda kü de. Nih gbo nga ïrï Me, angü ah ngbü engbü ka-ye gbü züka sü kpa tikpi te eci aci ba ra, te kpara tï ae jia ye, aceka de. Nih gbo nga ïrï Me, angü ah ngbü me-ye gbü nzö nih, fï mere badi. 17Mü rï wü kpara, te ewü di de mere bi jiase esaka wü ne, de wüh mere e adi ecu ngü wü de. Wüh mere e ao maguma wü teka mere bi jiase ka-wü la kpah de. Angü wü jiase, de wü e de füh kotö ne, ena anza ka-wü ʼburu anza. Wüh di eto maguma wü fü Me, angü engu de kpara te ngbü eto züka wü e engu la fü nih ʼburu me-ye, de nih ngbü de tadu tekaka. 18Mü rï ewü de wüh di emere wü züka ngü, te ena areke areke gbü jia Me. Ah le de wüh di ele ta-ngü te wü bu wü. Wüh mere e angbü mürü zü de. 19Te wüh ngbü emere züka ngü bala la, wüh ena amaka mere züka ngü te gara, angü Me ena ale ta-ngü te ewü ale. Fü ewü aküwa, angbü de mere tadu agbü sü ka Me agbü kpï kpala, fï mere badi. 20Wayi, ye ra Timoteyo, mü zoro rïrï ka Me de kpa mü ʼbasu mini. Angü ah de kpeke rïrï te engu to fü mü, teka fü mü adi erï wü bu mü di. Wü gara kpara ladü, te ewü ngbü ega yïkï, da efiti wü kpara de töndö rïrï ka-wü. Mü mere e ao fïngangü ka-mü te siti rïrï ka-ewü la de. Wüh gü ba, "Ani wu ngü fa sü," amba de! Wüh dürü ka-wü te kaje ka Me eyi asidi. Me di de yi, da ele ta-ngü te yi de züka maguma ye. Dela adu ngü ka-ra. De-ra Pawülü.

will be added

X\