1 Timoteyo 4

1De-mü, ye ra Timoteyo, mü rü kpekpeke, da erï wü kpara de zu ngari Me. Angü Nzïla Wazi Me mala eyi fü nih mbölö, gü ba, "Gbü adu wü sïkpï ne, wü gara kpara ena ace ngari Me, afü te-wü, adi eje ngü ka Satana, te siti wü di enga me ena adi efiti ewü di, de siti wü rïrï kaka la" 2Wü kpara la, wüh ena arï ewü ma, wüh je ngü nda-wü de. Wüh gü ba, "Ani de wü kpara ka Me," amba wüh ngbü nda-wü erï wü bu wü de töndö ngü ka Satana la, 3ga, "Me le de wü kpara ka-ni mere e aza würüse de." Amba Me mala bala nda de. Gara ewü gü ba, "Te mü zü so gara wü nü, ah kpah de siti ngü gbü jia Me." Ngü la, ah de ngü ka Satana, te wü kpara la ngbü efiti wü bu wü di. Te ena adi de nih, wü kpara ka Yesu Kurisito, nih wu nda-nih kpo, ga, wü e-mazü te Me o ewü me-ye ne, wüh ʼburu de züka zü-e. Angü Me o wü e la ʼburu, to ewü e-mazü tete, fü nih adi ezü. Te di bala ne, gara zü-e ena adu afü te-ye, asiti gbü jia Me, neh baye baye? Nih, de te nih le ngü ka Me eyi ne, ah le de nih za e-mazü ʼburu te Me ngbü eto fü nih ne de tadu, da egbo nga ïïrï na. 5Te mü ku gba fü Me teka zü-e ka-mü la, Me o kpa ye fefeh de? Te Me to e fü mü, mü ena adu ace e la neh baye? Angü Me gü ba, "Wü zü-e ʼburu mbi." 6Enga ra, dela zu ngari Me, te mü ena arï wü bu mü di. Mü de kpeke kpara, angü mü lala eyi eküte züka rïrï ka Me. Te di bala, ah le de mü ngbü fï bü da erï wü bu mü de ngü la, teka fü mü angbü züka kpara ka tima ka Yesu Kurisito, te fe mü, o, teka tima la. 7Mü mere e afü te-mü, adu aje töndö rïrï ta gügü ne, nda-mü de, angü ngü la ena asiti rïrï ka Me. Mü to maguma mü ʼburu teka amere tima ka Me kpekpeke. 8Te mü ngbü kpekpeke teka amere tima ka kötï, ah esiti de. Amba, te maguma mü ngbü kpekpeke teka amere tima ka Me la, züka ngü de te mü ena amaka gbü ngü la, ena afa nda kötï ka. Angü ngü ka kötï ena anza anza. Amba ngü ka Me nza nda de. Te di bala, züka ngü te mü ena amaka gbü tima ka Me la, ah ena angbü fï mere badi, zalü akoro di agbü sü ka Me agbü kpï. 9Dela kpeke ngü fanü fanü. Ah le de nih to maguma nih ʼburu teka ngü la. 10Te di bala, nih to maguma nih, teka angbü emere tima ka Me la kpekpeke, de wazi nih ʼburu, angü nih ena amaka küküwa gbü ngü la. Nih o jia nih eyi teka Mere Me, angü ah ngbü eküwa wü kpara, te ewü to maguma wü eyi fü Yesu Kurisito ne ʼburu me-ye. 11Dela ngü de te mü ena adi emala fü wü bu mü, da erï ewü di. 12Enga ra, mü ngbü ba kpeke kpara, angü wü kpara ena awu mü ba jaji. Mü di emere ngü kpekpeke, teka fü ewü adi eo lümü te mü. Mü di emere züka ngü gbü jia Me, kpah da ele ngü kaka de maguma mü biringbö. Mü di ele wü bu mü de maguma mü, kpah da emala züka ngü fü ewü ereke areke. Mü di eceka te-mü ʼbe teka ngü ka wü würüse, teka fü mü angbü nzïla. Te mü mere züka ngü ka Me la bala, ngü la ena agü tamu züka kaje fü wü kpara ka Yesu Kurisito, fü ewü angbü efa nga mü tete. 13Mü ngbü fï bü da erï wü bu mü de ngü ka Me, zalü akoro di gbü sïkpï, te ma ena adu akoro tete. Mü di etanga Ngari Me, da esere si-ngü la fü ewü. 14Mü mere e ace ngü la kpo fï de, angü dela tima te Me to fü mü, fü mü adi emere. Angü Me to ta wazi fü mü teka tima la, esaka wü kovo, gbü sïkpï ta te ewü o kpa wü tete gbü nzö mü, teka tima ka Me ne. Me to wazi fü mü ta kpah gbü wü ngü te wü kovo la mala teka mü gbü wazi ka Nzïla Wazi Me, gü ba, "Mü ena angbü ba kpeke kpara gbü tima ka Me." 15Dela wü ngü te mü ena ao maguma mü teka adi emere. Te mü mere bala, wü bu mü ena acu ngü mü, ga, mü te enü de ngü la kpa engagira nü. 16Timoteyo, enga ra, mü o to mü fï bü teka amere züka ngü gbü jia Me, da erï wü bu mü de zu ngü ka Me la. Angü te mü mere bala, mü ena amaka küküwa, fü mü aküwa kpah wü mene kpara, te ewü ena aje ngü la gömö mü la.

will be added

X\