1 Timoteyo 3

1Nih wu eyi kpo, ga, ah de züka ngü te kpara le eyi angbü mere kovo, te ena adi erï wü kpara de ngari Me. 2Te di bala, te mü ena afe wü kpara de bala, ah le mene kpara te mü fe engu la, ah di de züka kpara, te o fïngangü ka-ye, teka adi emere wü ngü, te ena areke gbü jia Me. Ah le de ah o jia ye ʼduwa duu teka wara ye biringbö. Ah di de kpeke kpara, de nzö ye mbi, te wü kpara ena adi ecu ngüngü acu. Ah di kpara te ena angbü emere ngü fü wü ganzi kpara ereke areke, te ewü koro ngba kpa gba ka la. Engu di kpah kpara, te wu da erï wü kpara mbi mbi mbi. 3Ah mere e adi enzö fï efa sü de. Ah mere e adi ewü nga, da egü gü kpah de. Ah di de kpara te ngbü ka-ye ziii. Ah mere e angbü eo maguma ye teka jiase de. 4Ah di de kpara te tï eyi ao kötï, aceka kpï fütanganga na reke ʼduwa areke. Fü wü jaji kaka-na adi eje rïrï kaka-na, da ecu ngüngü na acu. 5Angü te kpara ceka kpï fütanga kötï ka-ye mbi de la, engu ena aceka kpï fütanga wü kpara ka Me, neh baye baye? 6Mü fe mene kpara te to maguma ye fü Miri Yesu eyi gügü. Angü te mü fe to kpara, te yiri gbü ngü ka Me nda la de, e-wu neh da, ah ena akpo da ecu ngü ye, gü ba, ni de mere kpara. Te ah bala, ah ena adu afü te-ye adi emere ngü baka nda Satana. 7Ah le de yi fe mene kpara, de te wü kpara wu engu eyi ʼburu, gü ba, engu de züka kpara ka Me fanü fanü. Angü te Satana le afiti engu la, ah le de engu rü kpekpeke, angü wü kpara ena asiti ïrï Me teka ngü kaka. 8Kpah bala, teka ngü ka wü gara kpara, te ewü ngbü ele ta-ngü te wü kovo ka Me ne, wüh di kpah de kpeke wü kpara, de nzö wü mbi. Ah le de maguma ewü di biringbö, de wüh mere e adi emala ngü ʼbasu ʼbasu de. Wüh mere e adi enzö fï efa sü kpah de. Wüh mere e adi de wü mürü kü, anga kpara te eo gümü jiase ne kpah de. 9Wüh di de kpara, te ewü ngbü elala eküte rïrï te Me to fü nih. Fü ewü adi emere ngü la de maguma wü ngbee biringbö. 10Yi di eceka mene kpara, te yi ena afe engu teka tima la, aceka kpo kpo kpo feke. Te engu tï eyi kpini te nga jia yi la, fü engu adu tïne akpo tima la, amere. 11Teka wü mene würüse gbü tima ka Me ne, wüh di kpah kpeke wü würüse, te ewü ngbü emere züka ngü. Wüh mere e adi mene wü würüse, de te ewü ngbü emala ambalaʼba eküte wü kpara ne de. Wüh di mene wü würüse, de te ewü di de nzö wü mbi, te ewü ena adi emere tima ka Me de maguma wü biringbö. 12Kpah bala, kpara te ena ale ta-ngü te wü kovo gbü tima ka Me la, ah le de engu o jia ye duu teka wara ye biringbö, ah o kötï, fü ah adi eto rïrï fü wü jaji agba ye ereke areke. 13Dela wü kpara te yi ena afe ewü, ao gbü tima ka Me, angü wüh ena adi emere tima la mbi mbi mbi, kpah da erï wü bu wü de züka rïrï ka Yesu Kurisito, fü wü kpara ʼburu awu ewü ba kpeke wü kpara. 14Dela ngü te ma ba fü mü, teka ngü ka wü kpara ka Yesu Kurisito, angü ah le de wü kpara ka Yesu ngbü fï bü da emere züka ngü, te reke areke gbü jia Me. Ma kpakine eyi mari teka akoro kpaka yi kpala kere. Amba te ma koro kere kpah de la, mü ena atanga wü ngü, de te ma ba la, fü mü awu mene wü züka kaje, te wü kpara ka Me ena angbü eza, adi emere züka ngü te nganga na. Angü tima ka wü kpara ka Me, ah teka agü tamu zu ngü ka Yesu Kurisito fü wü kpara ʼburu. 16Angü to Ngü Mürü ka Me, de te engu gü tatamu fü nih la, ah eyi de mere ngü te ga fa sü le! Ah de ngü ka Yesu, kpara te wüh bï engu kpah ba nih ne. Fü Nzïla Wazi Me ato wazi fefe, angü ah de Ye Me fanü fanü. Wü malayïka ka Me wu engu kpah kpo. Fü wü kpara te engu tima ewü ne, ayia amala ngü kaka-na gbü wü sü füh kotö ne ʼburu nde. Fü mere bi wü kpara aci ale ngü la, gü ba, engu de Ye Me fanü. Fütanga tima kaka füh kotö ne, fü Me adu aza engu, ago di kpaka ye agbü kpï, de mere wazi. Dela ngü ka Me te engu tima Yesu di. Te di bala, ah le de nih le rïrï ka Yesu de maguma nih biringbö.

will be added

X\