1 Tesalonika 3

1Teka ngü la, a ngbü fï bü efï nga yi de mere bi sïkpï. Angü gümü yi ngbü eke a ʼduwa ba-neh-ene-la. Fü a aga dene, te ah tïne eyi bala, ah le de a tima Timoteyo kpaka yi kpala, de ah to wazi fü yi, teka de yi i maguma yi, arü kpekpeke. Teka ne de, angü Timoteyo de züka kpara, te mere tima ka Me kpekpeke. A ga, te a ngbü gbü Atenayï sene kpikpi a la, ah mere e de. Timoteyo nü enü kpaka yi kpala, de ah to wazi fü yi agbü Tesalonika la. 3Angü yi ena ace ngü ka Me, teka cïnga, te wüh ngbü eto eküte yi la. Angü ma mala ngü la ta eyi fü yi, ga, "Te yi le ngü ka Yesu eyi la, wü kpara ena ato kuru te yi ato." Tïtïne ngü la koro eyi fanü. Angü Me ngbü eto cïnga fü nih, wü kpara ka-ye, teka are maguma nih di. De te di eyi bala ne, ah le de yi rü arü kpekpeke gbü ngü la. 5Dela si-ngü de te ma tima Timoteyo kpaka yi tete na ne, ah dela. Angü ma ngbü efï nga yi efa sü. Ma wu de, anga Satana fiti yi dene eyi, teka de yi ce ngü ka Me, ka ngü ka kuru la? Te ah bala, amba mere züka tima, te a mere teka amala ngari Me fü yi ne, ah ena angbü kükürü. Fü ra ayia atima Timoteyo tüngü la, teka de ah nü, ah ceka yi, de ah du, ah mala nga yi fere. 6Amba tïtïne, baka te Timoteyo du koro, amala nga yi fü a ne, ma ngbü de mere tadu te ra fa sü. Angü ah gü ba dene, "Yi ngbü fï bü elala gbü nga Miri Yesu. Fü yi angbü ele te-yi de wü bu yi. Kpah bala, yi ngbü da efï nga a efa sü, baka e te kpara ngbü sene kpah efï nga yi ne." 7Ngü ka-yi la ngbü eto wazi fü a, gbü mere cïnga te ngbü kpah emere a de kpakine ne. 8Fü maguma a adu agu, teka ngü ka-yi de te a je, ga, "Angü yi zoro lö Miri Yesu eyi de kpa yi ʼbasu ne." 9Wü di enga wüna, ngü de te yi ngbü emere de kpala ne, ah ngbü eto tadu te a efa sü. Teka ngü la, kpara gbo nga ïrï Me tïne eyi cu fa sü de maguma a ʼburu, teka te a je nga yi de bala. 10A ngbü kpah eku gba fü Me teka yi, de ra de biti, da endaʼba te-a fefe, de ah ü kaje fü a, de a lügü nga a, du koro kpaka yi kpala, teka arï yi de züka rïrï. Angü wü gara du rïrï ka Me ladü, te ma rï yi di la de. 11Dela gba ka-a, te a ngbü eku fü Wö nih Me, kpah fü Miri Yesu, teka de wüh ü kaje fü a, de a du koro kpaka yi kpala. 12Miri Yesu di de yi, da eto wazi fü yi, de yi di ele te-yi di esüka yi, de maguma yi biringbö, kpah baka e te a ngbü ele yi ne. Fü yi ale wü kpara kpah ʼburu ba e la, anü de ngü la kpa engagira nü. 13Te di bala, ah le de Miri Yesu to wazi fü yi, teka fü yi ace wü siti ngü ka-yi le ʼburu, adu angbü emere wü ngü te ngbü ereke gbü jijia. Te ah bala, te gara, gbü sïkpï te Miri Yesu ena adu akoro tete na, de wü malayïka ka-ye zalü ʼburu nde, yi ena arü engagira Wö nih Me, de mere tadu, angü yi eyi de züka wü kpara kaka fanü fanü.

will be added

X\