1 Petero 5

1Wü di enga wüna, ma kpah de mere kovo ka Me baka yi. Ma wu cïnga te wüh to eküte Miri Yesu Kurisito ne, cu de jia ra. Nih ngbü ʼburu eo jia nih eküte Yesu, angü engu ena adu akoro füh kotö sene de mere wazi ye. Engu ena ato kpah wazi fü nih, wü kpara ka-ye, gbü sïkpï la. 2Te di eyi bala ne, ma ngbü emala fü yi, wü mere kpara, kpekpeke, gü ba, ah le de yi ceka kpï fütanga wü kpara ka Yesu mbi mbi mbi. Angü wüh baka wü kambiliki, te Me to ewü eyi esaka yi, teka fü yi adi eceka kpï fütanga ewü. Yi mere e amere tima la de maguma yi ʼbasu ʼbasu de. Yi mere tima la de tadu, angü Me to tima la fü yi cu me-ye, de yi di emere. Yi mere e angbü de gümü jiase de. Amba ah le de gümü wü kpara ka Yesu la di emere yi me-ye, teka fü yi adi eceka kpï fütanga ewü ereke areke. 3Yi mere e angbü gbü nzö wü kpara ka Yesu la de wazi de, angü Me to ewü me-ye esaka yi. Yi di erï ewü ferrre. Yi di kpah fï bü emere züka wü ngü, te nga wü sïkpï ʼburu, teka fü ewü awu züka kaje te yi ngbü emere la, fü ewü adi emere kpah bala. 4Te yi mere bala, Yesu, te di de mere kpara ka-nih ne, ena ato mere wazi fü yi, te tï anza de, gbü sïkpï te engu ena adu akoro tete. 5Teka ngü ka-yi, wü kaʼdörö, ah le de yi di eje rïrï ka wü mere kpara ka-yi. De-yi, wü kpara ka Yesu ʼburu, ah le fü yi adi eo ngü ka-yi kötö, da ele ta-ngü te wü bu yi ferrre. Angü wüh ba ta eyi gbü Ngari Me, gü ba, "Te mü ngbü ecu ngü mü la, Me tï ale ngü ka-mü nda de. Amba te mü ndaʼba te-mü fefe, baka mürü cïnga la, Me ena ato wazi fü mü, teka züka maguma ye." 6Te di bala, ah le de yi füwa te-yi engagira Me, angü engu tï eyi ato wazi fü yi gbü sïkpï ka-ye, te engu le me-ye. 7Yi mere e asiti fïngangü ka-yi, angbü de cïnga teka wü e, de. Yi ce wü ngü la ʼburu esaka Me, angü engu tï eyi aceka kpï fütanga yi me-ye. 8Yi rü kpekpeke da ecï sü! Angü vügü ka-yi, Satana, ladü gbamari. Engu ngbü endondoro, da engböngbö de gba, baka mere moko kami, te ngbü egïrï nü azoro, azü. 9Yi mere e akpe cürü Satana de. Yi i maguma yi gö! de yi rü kpekpeke gbü ngü ka Yesu. Baka te wüh ngbü eto mere bi cïnga te yi, teka ngü ka Yesu ne, yi mere e ace ngü ka Yesu de. Angü wü di enga ni yi, wü kpara ka Yesu, gbü wü sü füh kotö ne ʼburu, ngbü kpah ezü cïnga efa sü baka nda-yi la. 10Yi rü kpekpeke, da etüka te-yi gbü wü cïnga la. Angü, fütanga sïkpï mba cüküʼdaye, Me ena adu aküwa yi gbü ngü la, teka züka maguma ye. Angü Me fe yi me-ye, teka fü yi aküwa fï mere badi, agbü sü ka-ye, agbü kpï, teka ngü ka Yesu Kurisito. Me ena areke ngü ka-yi kpah ʼburu me-ye. Engu ena ato wazi fü yi, teka fü yi arü di kpekpeke. 11Ah le de nih gbo nga ïrï Me, angü engu de Mere Miri ka-nih me-ye, fï mere badi! Ah di bala. 12Dela mba enga ngü, te ma ba, tima fü yi, teka ato wazi fü yi. Enga wüna, Sïlïvanü, te di de züka kpara ka Yesu ne, ah le ta-ngü te ra, da eba köcökpa ne me-ye. Ma ngbü emala fü yi kpekpeke, gü ba, ngü ka Yesu ne, ah de zu ngü ka Me, te engu to fü nih, teka züka maguma ye. Ah le de yi rü kpekpeke gbü ngü la. 13Wü kpara ka Yesu agbü Rüma kpakine to mandï fü yi. Mbarase ka-ra, Marako, to kpah mandï fü yi. 14Yi to kpah mandï fü wü kpara ʼburu, da efaka te-yi, de züka maguma yi, te ïrï Miri Yesu. Me di de yi, de ah to gu ngü fü yi, gbü ngü ka Yesu Kurisito. Wü di enga wüna, dela adu ngü te ma le amala fü yi, ah bala. De-ra Petero.

will be added

X\