MATAIYO 14

1Sauga toto o Helodi, iya Galili wali tologugui, Yeisu wasana i hago, 2inoke i baek wana totuwalali elal i ba, “Diyon Tobabitaiso tei, i lutem yaomal elana. Heiya te kaiwena wana gasisi i gan ge ginol yawiyawi i awaawaginol.” 3- 4He valila Helodi Helodiyas i oe alona hi alolon, Helodiyas iya Helodi talina Pilipi, lagona. Diyon i mimi baaba Helodi elana i ba i ola, “Nige bosowaina nu alolonan.” Baena, inoke Helodi wana totuwalali i patunal Diyon hi lib hi yowan ge hi teli dela. 5Helodi nuwana ni tagapaaliga, yaa gamagalau i lovakunagil, kaiwena Diyon hi abulilek-an iya palopita etega. 6Helodi wana lan ab elana, Helodiyas natuna meluyovana i sagasaga boda mataliyaa. Wana sagasaga Helodi i yaliyaya-an hot, 7inoke i papasila i ba, “O sila nam, ebo hauna gun nu awanuni, nasi na pewa.” 8Hinana i baek elana inoke iya i baek Helodi elana, i ba, “Diyon Tobabitaiso mwamwalina nu gotomwa, balomana nu loke mwaha elana, nu pwatanim ge nu pem eliyau na kite.” 9Kin nuwana i nak, yaa i ba nihi ginol ni ola galok wana nuwatu, kaiwena iyaka i papasila bolo hi na pati o elana mataliyaa. 10Inoke i ba Diyon mwamwalina hi gotomwa del elana. 11Balomana hi loke mwahaa inoke hi pwatanim hi pek yova elana ge iya i pwatanik hinana elana. 12Yaka Diyon wana tohago hi nem, tuwana hi ahe ge hi na hi teli salaiya, inoke hi nok hi na Yeisu wana wasa hi pek. 13Yeisu wasa i hago inoke panuwa o i eguluwai, i heya wagaa ge hi na papaeliya ge nihi mimwaumwau. Gamagalau wana egon wasana hi hago, yaka wali panuwa hi eguluwagil ge aeliyaa hi tatauliulil. 14Yeisu i gailau, inoke sauga boda i kitel atena i lomwanagil ge wali tokasiyebwa i pwamolol. 15Sauga panuwa i kokoyavi, wana tohago hi nem elana hi ba, “Panuwa ya ana bwaga i gan ge kelaubwa bulin ni gan. Boda u patunal nihi na awan elal ge aliya nihi pwapwamola.” 16Analiya Yeisu i lahe i ba, “Bahi nihi egon. Komiu aanan etegana nuku pek nihi an.” 17Hi baek elana hi ba, “Beleid nimala panuna ge moti eluwa ya te i gan eliyama.” 18Yaka i ba, “Ku pwatanim eliyau.” 19Yaka abwe i ba gamagalau nihi misiyoan mwawin pwatanaa, yaka beleid nimala panuna ge moti eluwa i ahe, matana i lihin labulabumwa ge i ba mulolu Yehoba elana. Inoke beleid i pigebagebal-an, i pek wana tohago elal ge heliya abwe hi guyauan gamagalau elal. 20Gamagalau gegewel hi anan tineliya i kiya, inoke wali an teli tohago hi abubun, ana egowa elulutega eluwa. 21Bolo hi anan, bolau ali gewi tabam paib tausan, yaa evenakau ge wawayau ali gewi nige hi aahe. 22Inoke Yeisu i ba wana tohago nihi gaiha wagaa nihi houwa nihi alupanet labi etega ge iya gamagalau ni patunal nihi egonan. 23I patunal hi egonan i mowasi, inoke iya maisena i na i ha oyaa ge i awanun. Bulin i gan iya maisena i miminaa to, 24he waga iyaka ana bwaga i gan panuwa elana, bagol waga i tagapagenagena-an nabiyan, kaiwena mana i yu pahanal. 25Mweluluga kekeisi tili kilok ge sikis kilok ali hawawala, inoke Yeisu i nem eliyalil i nawaa hoga pwatanaa. 26Wana tohago hi kite i nawanawa hoga pwatanaa inoke hi lovakun hi ba, “Gagayumwa!” Inoke hi loi ginebi ge wali lovakun. 27Yaka etimwawa Yeisu i baek elal i ba, “Atemiu ni matuwa! Nau te. Bahi lovakun!” 28Pita i ba, “Babala, ebo tunahot owa, u ba na nawaa hoga pwatanaa ge na nowa elam.” 29Anana Yeisu i lahe i ba, “U nem.” Inoke Pita i gailau i nawanawa hoga pwatanaa i nok Yeisu elana. 30Yaa sauga mana i kite, yaka i lovakun ge i telipuna lobek, inoke i yoga i ba, “Babala, u pwamwalau!” 31Etimwawa Yeisu nimana i paelu ge i pihikan, yaka i ba, “Wam abulilek nige i bwabwata! Hauna kaiwena u nuwa lalabui?” 32Sauga hi gaiha wagaa yaka mana i mwatomwa. 33Inoke bolo hi miminaa wagaa hi kululu elana hi ba, “Tunahot, owa Yehoba natuna.” 34Hoga hi alupanet-an hi na hi tan panuwa Genesaleta. 35Gamagalau Yeisu hi kite inoke hi atena iya to, yaka wasa hi palelu awanina gegewena elal ge tokasiyebwa gegewel hi pwatanim. 36Yaka hi awanun elana tokasiyebwa ana kaliko buhuna ya nihi pibose, inoke bolo hi pibose, gegewel hi molu.

will be added

X\