HIBILU 8

1He nuwatu bwabwatana toto bana ha baaba i ola hiwe: wala topowon bwabwatana ololana o i gan, iya iyaka i na labulabumwa ge i misiyowa Yehoba Tobwabwatana Hot wana abamisiyo wawasana labena awonaa. 2Iya i topowon limi bwabwalena labulabumwa, limi o iya Petupatupa Limena tutunahotina toto Yehoba i pamilil, nige gamagalau hi papamilil. 3Topowon bwabwatana maisena ge maisena wana tuwalali te gamagalau wali mulolu ni pwatanik ge wali gegi powonina ni powopowon-an Yehoba elana. Inoke kila wala topowon bwabwatana al ge bosowaina bugul etega ni powonan. 4Binimala ebo iya ni minaa panayawiya, he nige ni totopowon, kaiwena topowon nonowal heliya iyahe powon hi awaawaginol i ola Logugui ana baaba. 5(Heliya hi topowon limi bwabwalena elana toto i minaa panayawiya, iya limi bwabwalena toto labulabumwa kakanununa ya. He i ola, kaiwena sauga Mosese nuwana Petupatupa Limena ni pamilil, Yehoba i baek elana i ba, “Nu matahikan te ana taltal ni olaolaek toto ya pankitewa oya pwatanaa.”) 6Yaa Yeisu i minaa labulabumwa ge powon tuwalalena toto iya i awaawaginol heliya wali tuwalali i bwata lake. Wali tuwalali i bwata lake, kaiwena bateli vavaluna toto iya iyaka i pamilil gamagalau ge Yehoba ali luwaluwala bateli houhouwena i waisi lake. He waisi toto bateli vavaluna i bateli kaiwela bateli houhouwena ana waisi i lake. 7Binimala ebo bateli houhouwena nige ana nak etega ni gagan, he nige bateli vavaluna ana nuwatu ni gagan. 8Yaa Yehoba gamagalau wali gegi i kite pwawa, inoke i bateli bateli vavaluna kaiwena, i ba i ola hiwe: Babala i ba, “Sauga i nenem bateli vavaluna na ginol boda Isileli ge boda Yuda kaiweliya. 9Bateli toto ya, nige ni oola toto valila ya ginol tubuliyau kaiweliya, sauga toto ya aheliya nimaliyaa ge ya en tagilagil Itipita. Yaa heliya bateli toto ya ginol o ana baaba nige hi hehenapu-an, inoke nau Babala ali en ya pek. 10He bateli toto sauga mulaa abwe na ginol boda Isileli kaiweliya ni ola hiwe. No logugui na teliya wali nuwatu elana ge nihi atena, ge na leliya ateliyaa ge nihi henapuan. Nau na ola wali Yabowaine, ge heliya nihi ola no gamagalau. 11Inoke nige bosowaina gamagal etega wana heliyam ni pankite Babala kaiwena, o ebo etega ni baek talina elana ni ba, ‘Binimala owa Babala nu atena,’ kaiwena gamagalau gegewel nihi atenau, bwagana heliya gamagalau bwagabwaga ya o ebo alaliya gaganil. 12Wali ginol nanakina na nuwayoho, ge wali gegi nige al na nunuwahikan.” 13He bateli o i awa vavaluna-an, inoke eliyana i pamasal te bateli toto houwan iyaka i beyaunana. Ge bugul toto iyaka i bebeyaunana ge i pwaha sauga kekeisi abwe ni mowasi hot.

will be added

X\