Mateo 1

1Ja'a kuu ɨɨn lista taka yɨvɨ ni kikoyo nuu ñuyɨvɨ na jana'an jiin Cristo Jesús, ja ni kuu ya jna'an David jiin Abraham. 2Abraham ni kuu tata Isaac, ti Isaac ni kuu tata Jacob. Jacob ni kuu tata Judá jiin uu ga ñani da. 3Judá ni kuu tata Fares jiin Zara, ti nana da ni kuu Tamar. Fares ni kuu tata Esrom, ti Esrom ni kuu tata Aram. 4Aram ni kuu tata Aminadab, Aminadab ni kuu tata Naasón, Naasón ni kuu tata Salmón. 5Salmón ni kuu tata Booz, ti nana da ni kuu Rahab. Booz ni kuu tata Obed, ti nana da ni kuu Rut. Obed ni kuu tata Isaí. 6Isaí ni kuu tata rey David, ti rey nación Israel ja ni nani David jiin ñasɨ'ɨ Urías, ni ka kuu tata Salomón, ko ja ni ji'i Urías sa ni kaku Salomón. 7Salomón ni kuu tata Roboam, Roboam ni kuu tata Abías, Abías ni kuu tata Asa. 8Asa ni kuu tata Josafat, Josafat ni kuu tata Joram, Joram ni kuu tata Uzías. 9Uzías ni kuu tata Jotam, ja ni kuu tata Acaz, ti Acaz ni kuu tata Ezequías. 10Ezequías ni kuu tata Manasés ja ni kuu tata Amón, ti Amón ni kuu tata Josías. 11Josías ni kuu tata Jeconías jiin uu ga ñani da. Ti kuiya yukan ni ka'iin yɨvɨ ñuu Israel presu nuu yɨvɨ ñuu Babilonia. 12Yukan na ti Jeconías ni kuu tata Salatiel, Salatiel ni kuu tata Zorobabel, 13Zorobabel ni kuu tata Abiud, Abiud ni kuu tata Eliaquim, ti Eliaquim ni kuu tata Azor. 14Azor ni kuu tata Sadoc, Sadoc ni kuu tata Aquim, Aquim ni kuu tata Eliud. 15Eliud ni kuu tata Eleazar, Eleazar ni kuu tata Matán, ja ni kuu tata Jacob. 16Jacob ni kuu tata José, chaa ni kuu yɨɨ María. Ti María ni kuu nana Jesús ja nani Cristo, ni taji Yandios ja ndiso ya jniñu ña'nu. 17Ja yukan kuu ja undi uxi kuun yɨvɨ ni ka kuu ja ni keja'a undi Abraham ti ni jaa undi David, ti uxi kuun ga tuku ja ni keja'a jiin David, ti undi kuiya ni ka ja'an yɨvɨ Israel presu nuu yɨvɨ ñuu Babilonia. Ti uxi kuun ga tuku ja undi kuiya yukan, ti ni jaa kuiya ni kaku Cristo, ja ni taji Yandios ya, ndiso jniñu ña'nu. 18Sia'an ni kuu na ni kaku Cristo Jesús. Nana ya María, iyo tratu ña ja nanda'a ña jiin José. Na ti najna'an ga ña jiin José, ti ja ni jaku'un se'e ña. Ti maa Espíritu Santo ni sa'a ja na jaku'un se'e ña. 19Ɨɨn chaa va'a ni kuu José, ti tu ni kuni da ja stuu da maa da nuu yɨvɨ ja xndoo da ña, chi ni ndo'o ini da ja xndoo xe'e da ña. 20Ni ndo'o ini da sia'an, ti ni kenda ɨɨn ángel ja junukuachi nuu Yandios. Ti ni ka'an ángel un jiin da nuu ñujani, ti ni kachi: ―José, ro'o ja kuu ra jna'an rey David na jana'an, koto yu'u ra ja ki'in ra María ja kuu ñasɨ'ɨ ra, chi se'e ñu'un chii ña un vaji nuu maa Espíritu Santo. 21Ti nu na kaku suchi lulu un, ti skonani ra i Jesús. Sia'an konani suchi lulu un chi maa i kuu ja nama sɨkɨ kua'a ñanijna'an i, yɨvɨ ka iyo kuachi ―ni kachi ángel Yandios un. 22Taka un ni kuu nava na kundaa taka jnu'un ni kachi profeta Isaías na jana'an, na ni ka'an da jnu'un Yandios: 23Jaku'un se'e ɨɨn ña'an lulu un, ti kuu i ɨɨn suchi yɨɨ. Ti suchi lulu un konani i Emanuel, ja kuni ka'an: “Kancha Yandios jiin yo.” 24Nu ni ndoto José, ti ni sa'a da nava ni ta'u ángel Yandios un jniñu. Ti ni jaka da María ja na kuu ña ñasɨ'ɨ da. 25Ko tu ni ka najna'an da, chi ni ndatu da undi ni kaku se'e ña. Ti ni ka skonani da i Jesús.

will be added

X\