1 Ka nasa'a chaa Israel uu viko ja tu ka naa ini da na ni keni'in Yandios maa da naa da ñuu Egipto, ja ni kunda'u ini ya maa da. Ti viko un kuu viko pascua, jiin viko ka yee da staa stila tu yɨ'ɨ levadura. Ko kumani uu ga kɨvɨ ja kuu viko un. Ti sutu ka kuña'nu jiin chaa ka xna'an ley ini veñu'un un, ka kuni jnɨɨ xe'e da Jesús, ti ka'ni da ya. 2 Ko ka ndajnu'un da: ―Tu kuu sa'a yo kɨvɨ viko ja'a, chi sandau ndondaa yɨvɨ sɨkɨ yo ―kachi da. 3 Yukan ti kancha Jesús ve'e Simón ñuu Betania, ɨɨn chaa ni jna'an kue'e ndɨ'yɨ te'yu. Nukoo ya yu'u mesa yee ya staa. Ti yukan ni jaa ɨɨn ñasɨ'ɨ yɨnda'a ña ɨɨn tɨndo'o lulu alabastro. Ti ñu'un chitu aceite perfume mani ita nardo, ja nchaa ya'u xaan tonto. Ni ta'u ña tɨndo'o lulu un, ti ni chu'un ña perfume un xini Jesús. 4 Ti sava yɨvɨ kanchuku un, tu ni ka jajna'an ini i jniñu sa'a ña un. Ti ni ka ka'an i: ―Tu stɨvɨ ña un perfume un sia'an niku. 5 Sa ti ni kuya'u, ti ni'in ña xu'un ti kuu tejna'an yo nuu yɨvɨ nda'u niku ―kachi da. Ti ni ka kɨtɨ ini da nuu ña. 6 Ko ni kachi ya jiin da: ―Sia ña, ndoo ka skɨtɨ ra ini ña. Jniñu ni sa'a ña jiin ri, iyo va'a. 7 Yɨvɨ nda'u, chi nɨnɨ kanchuku i jiin ra naa ra, ti nu ka kuni ra ti kuu chindee ra i. Ko ru'u, chi ansu sia'an ni kuncha ri jiin ra naa ra. 8 Ña'an ja'a ni sa'a ña nava iyo ini ña, chi ja ni chi'i tu'va ña perfume yɨkɨ kuñu ri ja kuu kɨvɨ kuū ri. 9 Kuni ra ja nɨ tu'u ñuyɨvɨ, sava'ni ga nanu na ka'an i jnu'un ri ja na sketa'u ri yɨvɨ, ti kani i jnu'un jniñu ni sa'a ña ja'a ja na nuku'un ini yɨvɨ un maa ña ―kachi ya. 10 Yukan ti Judas, ɨɨn chaa ñuu Cariote, ja suni kandee da jiin ndɨ uxi uu ndaja'a un naa da, ni ja'an ndajnu'un da jiin sutu ka kuña'nu un, ti ni kachi da ja nakua'a da Jesús nuu da naa da. 11 Nu ni ka jiniso'o chaa un jnu'un ni ka'an Judas, ni ka kusɨɨ xaan ini da, ti ni ka ka'ñu da xu'un nuu da. Yukan ti ni keja'a nduku da nasa nakua'a da Jesús nuu chaa un naa da. 12 Maa kɨvɨ keja'a viko ka yee staa stila tu yɨ'ɨ levadura un, suni kɨvɨ un ka ja'ni da lélú ja ka soko da ja kuu viko pascua. Ti ndaja'a ya ni ka jikajnu'un da ya: ―¿Nanu kuni ni ja na kin satu'va na ja kuxini yo vijna pascua? ―kachi da jiin ya. 13 Yukan na ti ni taji ya uu da, ti ni kachi ya jiin da: ―Kua'an naa ra undi ñuu, ti yukan ndejna'an ra jiin ɨɨn chaa ndiso ɨɨn kɨyɨ nducha, ti kundikun ra da ki'in ra jiin da. 14 Ti nuu ndɨvɨ da un, yukan ka'an ra jiin maa chaa xiin ve'e un: “Kachi maa Maestro na ja nanu iyo ɨɨn ve'e ja kua'anuu ni nuu kuxini da jiin ndaja'a da vijna kɨvɨ pascua”, kachi ra. 15 Ti maa da na xna'an nuu ra ɨɨn ve'e ka'nu ja kendo piso nuu sukun, ti yukan ja iyo nakoo, ti satu'va ra naa ra ja kuxini yo ―kachi ya. 16 Ti kuankoyo da undi ñuu un, ti ni ka nani'in da taka nava ni kachi Jesús. Yukan ni ka satu'va da ja kuxini. 17 Nu ni kuaa, ti ni jaa Jesús ve'e un jiin ndɨ uxi uu ndaja'a ya. 18 Ti nu kanchuku da ka yee da staa nuu mesa un, ni kachi Jesús jiin da naa da: ―Jandaa na kachi ri ja ɨɨn ro'o ja yee staa jiin ri ja'a, nakua'a ru'u nuu chaa ka jito u'u ru'u ―kachi ya. 19 Ti ndaja'a un ni ka kukui'ya xaan ini da ja sia'an ni ka'an ya. Ti ndɨ ɨɨn ndɨ ɨɨn da ni ka kachi: ―¿Xi saña kuu nu? ¿Xi saña kuu nu? ―kachi da naa da. 20 Ti ni kachi ya: ―Ja ndɨ uxi uu ro'o naa ra ɨɨn ra kuu, ja chutoo staa stila nu ko'o ri, yukan kuu. 21 Kundaa nava yoso nuu tutu Yandios ja nakua'a da maa se'e Yɨvɨ Ñuyɨvɨ nuu chaa ka jito u'u ya. Ko xaan ga ka'nu nundo'o kondo'o chaa kin nakua'a ru'u. Sa nu tu ni kaku da niku ―kachi ya. 22 Nɨ ka yee da staa. Ti ni ki'in Jesús ɨɨn staa stila, ni jikanta'u ya nuu Yandios, ni sakuachi ya, ti ni tejna'an ya nuu ndaja'a ya, ti ni kachi ya: ―Kaji naa ra. Ja'a kuu nanu yɨkɨ kuñu ri ―kachi ya. 23 Yukan na ti ni ki'in ya ɨɨn vaso vino, ni nakuanta'u ya nuu Yandios, ti ni ja'a ya nuu da ja na ko'o da tɨ'lɨ tɨ'lɨ. 24 Ti ni kachi ya jiin da: ―Ti nɨñɨ ri un stuu ja ni sa'a Tata ri Yandios ɨɨn tratu jaa. Ti yukan kuu ja ka'an ndaa kuɨtɨ ja nama ri sɨkɨ kua'a xaan yɨvɨ, chi nɨñɨ ri ja katɨ ri ki'in, yukan kuu ja chunaa ri nuu yɨvɨ naa i. 25 Ko na kachi ndaa ri ja tukaa ga ko'o ri vino ja'a jiin ñanijna'an yo, kɨvɨ ka nasa'a i viko ja'a, undi na jaa kɨvɨ ko'o yo nuu kancha Tata ri Yandios, chi yukan kuu nuu ni'in ri ɨɨn jniñu ña'nu ga, ti yukan ta'u ri jniñu jiin maa ya nuu tendɨ'ɨ nɨ tu'u ja iyo. Ti yukan kuu nuu nasa'a jaa yo viko ja'a naa yo ―ni kachi Jesús. 26 Ni ndɨ'ɨ ni ka kuxini da, ti ni ka jita da ɨɨn himno, ti kuankoyo da undi yuku Olivos. 27 Yukan ti ni kachi Jesús: ―Tendɨ'ɨ ra naa ra kuichanuu ti xndoo ra ru'u jakuaa vijna, chi sia'an ka'an nuu tutu Yandios: “Chi Yandios, kua'a ya jnu'un ja na kuū pastor, ti rɨɨ da un kuichanuu tɨ ki'in tɨ.” 28 Ko kɨvɨ na nandoto ri, ti koxnuu ri ki'in ri ñuu Galilea, ti yukan kundatu ri ro'o naa ra ―kachi ya. 29 Yukan na ti ni kachi Pedro: ―Vasu tendɨ'ɨ da na xndoo ni'in, ko saña tu xndoo kuɨtɨ na maa ni ―kachi da. 30 Ti ni kachi Jesús jiin da: ―Jandaa na kachi ri nuu ra, ja kuu jakuaa vijna, nu ti kana ga li'i uu jinu, ti kachi ra uni jinu ja tu jini ra ru'u ―kachi ya. 31 Ko Pedro, nɨ ini da ka'an da: ―Vasu na kuū na jiin ni, ko tu xndoo kuɨtɨ na ni'in ―kachi da. Ti tendɨ'ɨ ndaja'a ya un, suni sia'an ni ka ka'an da. 32 Nu ni ka jakoyo da nuu nani Getsemaní, ti ni kachi ya jiin da naa da: ―Ja'a ni kunchuku ra ti ru'u na kin kankanta'u ri nuu Yandios ―kachi ya. 33 Yukan ti kua'an ya tɨ'lɨ ga ichi ndaku un jiin Pedro, Santiago jiin Juan. Ti ni keja'a kukui'ya xaan ini ya, ti kaña ini ya. 34 Ti kachi ya jiin da: ―Jatu añu ri ja kukui'ya xaan ini ri, chi ja ni kuyajni kuū ri. Ko ja'a ni kundatu ra naa ra ti koto kusu ra ―kachi ya. 35 Yukan na ti ni jika ya tɨ'lɨ ga, ti ni jakunjitɨ ya, ti jikanta'u ya, ja nu kuni Yandios, ti tu kondo'o ya nundo'o kii nuu ya. 36 Ti ni kachi ya: ―Tata maa na, ja kuu maa ni, taka ni ja kuu sa'a ni. Nusa ti chajiyo ni saña nuu nundo'o vaji nuu na. Ko ansu nava kuni maa na, chi nava kuni maa ni ―ni kachi ya. 37 Yukan na ti na nandeokuñɨ ya nuu ka'iin ndaja'a ya un, ko ni jini ya ja ka kixi da, ti ni kachi ya jiin Pedro: ―Simón, ¿ja kixi ra nu? Tu ni kuu kundito ra vasu ɨɨn hora nusa. 38 Koto kusu ga ra naa ra. Kanajaa, ti kakanta'u nuu Yandios ja na kotu'va ra nava tu kotojnuni ja'u'u un o'o, ti chisa'yɨ ra ru'u, kachi ra ja tu ka jini ra ru'u. Chi va'a ndiyo ini ra ja siuku ra, ko yɨkɨ kuñu ra, chi tu iyo ndee ini. 39 Yukan ti kua'an tuku ya, ti ni jikanta'u ya, ti suni jnu'un un ni ka'an tuku ya. 40 Nu ni nandeokuñɨ tuku ya, ni jini ya ja ka kixi tuku da, chi ka ji'i xaan da ma'na ja undi ka kuvee nduchi da, ti tu ni kujnuni nasa kachi da nuu ya. 41 Ti nu ni nandeokuñɨ ya jinu kuu uni, ni kachi ya jiin da: ―Vijna na, ndetatu ti kusu naa ra. Ko ja ni jaa hora ja ru'u, maa Se'e Yɨvɨ Ñuyɨvɨ, nakua'a da ru'u nuu yɨvɨ ka nchakuachi. 42 Ndoko naa ra na cho'o, chi ja vaji chaa ni nakua'a ru'u un ―kachi ya. 43 Ni ka'an ga Jesús sia'an, ti ja ni chaa Judas, ɨɨn ja ni kuu ndɨ uxi uu ndaja'a un. Ti vekoyo yɨvɨ kua'a jiin da, ka yɨnda'a i espada jiin yujnu. Vekoyo i jiin jniñu ni ka ta'u taka sutu ka kuña'nu jiin chaa ka xna'an ini veñu'un ka'nu un jiin taka chaa ka kuña'anu ñuu Israel. 44 Ichi kuankoyo da ni kachi Judas jiin chaa un naa da: ―Chaa teyu'u ri nuu, chaa un kuu ja nanduku yo. Jnɨɨ naa ra. Koto sia ra ki'in ―ni kachi da. 45 Ti nu ni jaa Judas, ni tu'va da nuu Jesús, ti ni kachi da: ―Maestro, maestro ―kachi da. Ti ni teyu'u da nuu ya. 46 Yukan ti chaa un ni ka jnɨɨ ni da ya. 47 Ti ɨɨn chaa ka'iin jiin Jesús un, ni jista da espada da, ti ni ja'ncha da so'o ɨɨn muzu sutu kuña'nu ga. 48 Yukan na ti ni kachi Jesús jiin chaa ni ka jnɨɨ ya un: ―¿Va nu ɨɨn ñakui'na kuu ri ja vekoyo ra jiin espada jiin yujnu ja jnɨɨ ra ru'u ki'in ri presu nu? 49 Ti taka kɨvɨ ni xna'an ri nuu ra naa ra ini veñu'un ka'nu un, ti tu ni ka jnɨɨ ra presu ru'u. Ko sia'an kuu ja na kundaa nava ka'an nuu tutu Yandios ―kachi ya. 50 Ti yukan tendɨ'ɨ ndaja'a ya ni ka jinu da kuankoyo da. 51 Ko ɨɨn chaa lulu ni chindikun da jata yɨvɨ kuankoyo jiin Jesús, ti suku da nɨnɨ ɨɨn sa'ma, ti suni ni ka jnɨɨ chaa un maa da. 52 Ko ni keni'ni chaa lulu un chii sa'ma un, ti vichi lɨɨ da, ko ni kundee da kua'an da. 53 Yukan ti kuankoyo yɨvɨ un jiin Jesús undi ve'e ɨɨn sutu kuña'nu ga, chi yukan ni ka ndututu taka sutu ka kuña'nu un, taka chaa ka kuña'nu jiin taka chaa ka xna'an ley ini veñu'un ka'nu un. 54 Ti Pedro ndikun jika da ichi jata chaa kuankoyo jiin Jesús, ni kɨvɨ da yuxe'e palacio un, ti ni nukoo da jiin policía un ka nanduxin da yunu'un. 55 Ti sutu ka kuña'nu un jiin taka chaa ka kuña'anu ñuu Israel, ka nduku da nasa ka'an kuachi ga da sɨkɨ Jesús, chi ka kuni ka'ni da ya. Ko tu kujnuni na jnu'un ga ka'an da. 56 Ti kua'a yɨvɨ ni ka xndoña'an, ja ka chakuachi sɨkɨ Jesús, ko tu ni kejna'an kuɨtɨ jnu'un ka ka'an da. 57 Ti sandɨ'ɨ ni ga ni ka ndokuɨñɨ sava da, ti ni ka kankuachi da sɨkɨ ya sia'an: 58 ―Saña naa na, ni ka jiniso'o na jnu'un ni ka'an da: “ru'u, xnaa ri veñu'un ja'a, ja ni ka sa'a yɨvɨ naa i jiin ndaja'a i, ti nuu uni kɨvɨ, ti na sa'a tuku ri ɨnga veñu'un ja tu kuu jiin nda'a yɨvɨ”, sia'an ni kachi chaa jña ―kachi da naa da. 59 Ko vasu sia'an, tu ni keja'an tuku jnu'un ka ka'an da sɨkɨ ya. 60 Yukan na ti ni ndokuɨñɨ maa chaa kuu sutu kuña'nu ga un nuu chitu un, ti ni jikajnu'un da Jesús: ―¿Tu ka'an kuɨtɨ ra nusa? ¿Xi jandaa kuu jnu'un ka ka'an da sɨkɨ ra nu? ―kachi da jiin ya. 61 Ko Jesús tu ni ka'an kuɨtɨ ya. Yukan na ti ni jikajnu'un tuku sutu kuña'anu un ya: ―Kachi nu maa ra kuu Cristo, Se'e Yandios ii, ja kancha andɨvɨ ―kachi da. 62 Ti ni kachi Jesús: ―Maa ri kuu, ti kuni ra naa ra ja maa Se'e Yɨvɨ Ñuyɨvɨ, nukoo ya nda'a kua'a Yandios ti kuña'nu ya jiin ya. Suni kuni ra nchaa ya ñuyɨvɨ ja'a nuu viko andɨvɨ un ―kachi ya. 63 Nu ni jiniso'o sutu ña'nu ga un, ni ndata da sa'ma da ja ni kɨtɨ ini da, chi ni ndo'o ini da ja yɨsɨkɨnchaa Jesús maa Yandios jiin jnu'un un. Ti ni kachi da jiin yɨvɨ ka'iin un: ―¿Nau ɨnga testigo nandɨ'ɨ yo ja'a naa yo? 64 Ja ni ka jiniso'o ra ja ka'an ndeva'a da sɨkɨ Yandios. ¿Nasa ka ndo'o ini ra naa ra? ―kachi da. Ti tendɨ'ɨ yɨvɨ un ni kachi ja na kuū ya. 65 Yukan na ti sava yɨvɨ un ni ka tɨvɨ sɨ'ɨ nuu ya. Ni ka jasɨ nduchi ya jiin sa'ma, ti ni ka kani jikɨ nuu ya, ti kachi: ―ro'o chaa ka'an jnu'un Yandios, kachi nau ja ni kani ro'o ―kachi jiin ya. Yukan na ti soldado ka'iin un, ni ka ja'a jikɨ nuu ya. Yukan kuu ja ni jna'an Jesús nu ni ka xndichi da ya. 66 Ti nukoo Pedro nuu yuxe'e un, ti ɨɨn ña'an junukuachi ve'e sutu kuña'anu ga un, ni ya'a ña ichi chukan. 67 Ti nu ni jini ña nduxin da ñu'un, ni nde'e va'a ña nuu da, ti ni kachi ña: ―ro'o, suni ni yaku ra jiin Jesús, chaa ñuu Nazaret un ―kachi ña jiin da. 68 Ko Pedro ni kachi da ja tu jini da: ―Tu jini ri na jnu'un ka'an ra jiin ri ―kachi da. Ti ni kenda da kua'an da ichi yuxe'e un ni jakuɨñɨ da. Ti yukan ni kana ɨɨn li'i. 69 Ñaa junukuachi un, ni jini tuku ña nuu da, ti ni keja'a ka'an ña jiin taka yɨvɨ ka'iin un: ―Suni ndaja'a chaa yukan kuu chaa ja'a ―kachi ña. 70 Ko Pedro ni kachi tuku da ja tu jini da. Ni kuu nuu ga, ti chaa ka'iin un ni ka kachi da jiin Pedro: ―Ndaa ndixia kuu ja ro'o kuu ɨɨn ndaja'a Jesús un, chi suni chaa Galilea kuu ra ―kachi da. 71 Ko ni kachi tuku Pedro: ―Va kunchakuachi na nu na xndoña'an na, ko ka'an ndaa kuɨtɨ na ja tu jini na chaa ka ka'an ni un ―kachi da. 72 Ko nɨ ka'an ga da sia'an, ti ni kana li'i jinu kuu uu. Ti yukan ni nuku'un ini da jnu'un ni ka'an Jesús: “Nu ti kana ga li'i jinu kuu uu, ti kachi ra uni jinu ja tu jini kuɨtɨ ra ru'u.” Ti yukan ni nakani xaan ini da, ti ni jakunchaa da nde'e da.
