1 Bèfalèsiì nè Bèsadùsiì e li nkɨ̀ˈɨ̂ abua Yesò, me kɨ enyɔ̀ˈte atò shu abua tò nê tà nyɨˈte awɔb àlȩ̂ nê Mbɔ̧ɔ̧mà ka tà tsàà vi la. 2 Yesò bɨ̀ɨ̀lè nê, “Nàa ngɨ̀ è wua nyèmtèsi ègwelebuule è me fəəte, bɨ nê àbȩ aa sàˈa me bɔ̌. 3 È wu a ntɔtetsɔ̌ˈ ègwet è me fene, mbɨ̀ŋ me kwèle, bɨ nê mbɨ̀ŋ naa lu. Bɨà nkòa ndȩ̀ ègwelebuule shu ndɨ àbȩ àa wu la, ka bɨ̀ ka wu eko shu ndɨ àbȩ àa la. 4 Bòt laane wu bòt kàbɔ̀ŋ bɔ̀ɔ ka bɔa Mbɔ̧ɔ̧mà la. Bɨà nkɨà nê è nyɨˈte awɨ̧ àlȩ̂ ka bɨ̀ ka wu eye. Ndàˈ èwuu ànəa kà ye fɨ̀ˈ màa nyɨˈte awɨ̧ la wu à yu Mbɔ̧ɔ̧mà li ngɨ̀ ane Jɔnà la.” Tà ghɨ̀ ale, sà àwɔb me ghǎ. 5 Bɔkatè Yesò è ntu̧ èlemè wu bɔ̀ ghǎ aguŋ, bɔ ku̧u̧te na bɔ lèène nɨa bled la. 6 Yesò shu abua yɔb nê, “Bɨ̀ me ko awɨ̧ mè mbààba awɨ̧ ane yis Bèfalèsiì bɔ̂ Bèsadùsiì.” 7 Bɔ bùˈ me làˈa a kètsìà wɔb shua nê, “Tà làˈ ànəa yis anè ndɨ̀ wu ba me kɨˈɨ bà ka nɨa bled la.” 8 Yesò è ko ànəa bɔ làˈà la, tà bììte awɔb nê, “Bɨ̀a bòt kà zi èntɨ̧ɨ̧ wɨ̧ ane ya̧ ntsɔ̧̀, bɨ ghɨ̀ na ka me làˈa kètsìà wɨ̧ shua nê bɨ bakà bɔ bled à? 9 Ètsə bɨ̧ e bele kà zìˈì ndzààtè? Bɨ lèènè tèta̧a̧te bled tu tetà̧â̧ e ndɨ nɨŋ njɨ̌ bòt bètɔsì batà̧â̧ la à? Bɨ li fete bankì basòˈa? 10 Kò bɨ lèènè teta̧ tu tesà̧à̧mbe e ndɨ nɨŋ njɨ̌ bòt bètɔsì bakwì la mɨ̧̂ à? Bɨ li fete bankì basòˈa? 11 A ghɨ̀ na ka à ka kɔˈ àtsəa yɨ̧ nê mâ ghɨ̂ e nka wua ndàˈà ànəa bled à? Bɨ̀ me ko awɨ̧ ane yis Bèfalèsiì bɔ̂ Bèsadùsiì.” 12 Bɔ bê nko nê tà ghɨ̂ tà kà wua ndàˈà ànəa bled, tà wua shua wû nê, bɔ̀ me ko awɔb ane àghɨa Bèfalèsiì nè Bèsadùsiì àa nyɨ̀ˈta la. 13 Àfɨˈa Yesò li nga a Sìsalìà Filìpȩ la, tà bììte bɔkatè bi nê “Bòt àa shua nê Wa̧ Wòt wu wà à?” 14 Bɔ bɨ̀ɨ̀lè nê “Bòt ko aà shua nê à wu Jɔ̌n ndzìà èdzî, èbeko e shua nê à wu Èlȩjà, èbeko e mè shua nê à wu Jèlèmìà, ka nè èbe bèa shua nê à wu ndàˈàtɔŋ nyaˈ Mbɔ̧ɔ̧mà kǒ la.” 15 Tà bììte a wɔb nê “È me wu awɨ̧, bɨ shu nê è ngu wàà?” 16 Simùn Pità bɨ̀ɨ̀lè nê “À wu Fɔ̧̀ wu Mbɔ̧ɔ̧mà yɔˈ ntsà la, Wa̧ Mbɔ̧ɔ̧mà yǔ̧.” 17 Yesò bê nê “Ntsɔ̧̀ wu àwɔ̀ Simùn Ba-Jɔnà. Ngu nê ànə̂ yaa à ka dzəa abua wɔ̀bȩ̌, a dzəa abua Tǎt am wu a ègwet la. 18 È wu ale, tsiˈ è shu awê nê à wu Pità, maa ghɨ̌ a chɔsì am a ègwet èwu làa ane ndɨ ka è màà ngu wû èvə è ka ko enɨ wùà la. 19 Maa ŋa nkȩte kèfɔ̧̀ Mbɔ̧ɔ̧mà abua yê. À tsia ànə̂ a sitsǎˈ, ko bɔɔ tsia ayùà a ègwet, ntsɔˈɔ ànə̂ a sitsǎˈ, ko bɔɔ tsɔ̀ˈɔ ayùà a ègwet mɨ̧̂.” 20 Yesò ghɨ̀ ale, mbɔ̂ sə̀ŋkè ètǔ̧ bɔkatè bi nê bɔ̀ ka shu wòt nê ye wu Fɔ̧̀ wu Mbɔ̧ɔ̧mà yɔˈ ntsà la. 21 E buˈu àfɨˈa mbɔŋ e ghà nè mbì, Yesò bùˈ me shu bɔkatè bi ndɨ yèa ghǎ a Jèlusalèm e tàˈa ye ngoˈ a tèkitebu bɔɔjuŋ nè bètǎt bèntsìà mèpɨ̧̀ Mbɔ̧ɔ̧mà ndɔ̀ˈ nè bènyɨˈtà mbɨ̧te Musì la. Nè, bɔɔ̀ li ebùŋè àvi ka naa me wu ane èlibȩ betat yea yu̧u̧me. 22 Pità nɨa tò bɔ sə̀ˈtè àwɔb, tà bùˈ me fèèle atò shua nê “Chaˈ a Tè, Mbɔ̧ɔ̧mà ka mbɨ̧̀ɨ̧̀ne nê èwuu ayaa nè ànə̂ à ghɨ ane yê.” 23 Ka Yesò ghèble avi shu abua Pità nê, “Lɔˈ a ngèt ya̧ à Satàn! Àà nkèla alu̧ am. Mènə̀ maà à mɨ̀ɨ̀tà la ka dzəa abua Mbɔ̧ɔ̧mà, è dzə̀ nè abua bɔbȩ.” 24 Àfɨˈa mbɔŋ Yesò shu abua bɔkatè bi nê “Wòt me kɨ eghȩ̀ȩ̀ne ateka ta̧, tà sà mènə̀ mi ègème ŋèˈe mbasa vi nkùŋè am. 25 Wòt me baabe àtsəa zi ko taa pfə, ka wòt tà ŋà àtsəa zi ambo ya̧ la, naa peme. 26 Wòt wua ane njɨ̀a èghɨ sitsǎˈ ègème, mbɔ̂ nyɔ̂ zìambɔŋ tà ko nê ye vi ghàà? Kò àghɨa ko aà və betsiˈa wòt ŋa nɨŋ nchùˈ àtsəa zi la à? 27 Wa̧ Wòt naa li kɨˈɨ bɔ̂ bɔntu̧ bi ane ènɨ̧ tǎt vi, etsɔˈɔ wòt ègème ane àghɨa tà ghɨ̀ la. 28 Ane nkǔŋ, tsiˈ è shu awɨ̧ nê bòt ko aa adzìˈ yaa betsiˈa èvə è ka nɨ awɔb kà bɔ ye Wa̧ Wòt nkɨ̀ˈa nè Kèfɔ̧̀ Mbɔ̧ɔ̧mà la.”
