Tito 3

1Na'nxa kye okslal tu'n kyniman kye kawil ex kye tzyul kawb'il, tu'n kyq'o' kawi'kyib' ex tu'n kyb'inchante b'a'n kukxju'. 2Tu'n lalun che yolin taq'wix ti'j juntl, tu'n lalun che q'ojin, tu'n kyok b'a'nwnaq, me's kyanmi kyuk'i'l kykyaqil xjal. 3Qu'n ikyxtoqqe tnejel, mixti'xtoq qnab'l ex min nqq'a' kawi'qib'; tzpetni qo'toq ex k'a'yi'nqib' te tkyaqil achb'il te twitz tx'otx'. Tojtoq taq'wixil nqo anq'ina' ex ntoq tx'a'lti'j qk'u'j ti'j juntl, ik'b'il qo'xtoq ex ntoq qik'o'n qib' qxolilex. 4Atzunte Dyos Klolqe matzaj tyek'u'n t-xtalb'il ex tk'u'jlalil kyi'j kykyaqil xjal, 5mya tu'nwt b'a'nwt nqb'incha'n, tu'nku'te tlaq'b'il tk'u'j xqo tkola', maqo ttx'aj ex maqo ok te ak'a'j wnaq tu'n, matzaj tq'o'n qchwinqlal ak'a'j tu'n Xewb'aj Xjan. 6Matzaj tq'o'n Dyos Xewb'aj Xjan nimxi'x qe tu'nel Jesukrist Klolqe, 7tu'ntzun qk'met tu'n Dyos naq tu'n t-xtalb'il, ex tu'n qk'monteju' chwinqlal tejumajx nqo ayon ti'j. 8Axxi'xte' lu, wajb'ile' ilti'j tu'n txitma'na kye, tu'ntzun kyb'inchante okslalju' b'a'n. B'a'nte' tkyaqil ja'lu ex ati kyajb'en kye kykyaqil. 9Naq o'kx lalun taq' anb'ila kyeju' wulje'n mixti'x kyajb'en, kyi'ju' tz'ib'a'n kyi'j ojtxi' qyajilb'en, e'tx'a'ltik'u'jb'aj ex wulje'n kyi'ju' ntma'n toj tkawb'il Moses. Mixti'x kyajb'en ex mixti'x knab'l. 10Qa ati jun nkub' tq'o'n pa'jtib'il kyxol okslal, tzak'unxa jumaj mo kamaj; qatzun min nok toj twi', xla'jamixa kyxol okslal, 11qu'n kanli twitza, aju' nb'inchante ikju' matxi' tz'el txalpuj toj tokslab'l, ex tu'ntpajxu' til nela' ik'et. 12Ajtpon nchq'o'ne' Artemas mujqa a Tikyiko, lwix pona ka'yilweye' Nikopolis, qu'n atzu' nximana'ye' tu'n tex jb'alil wu'ne'. 13Q'onk tilila tu'n tonina ti'j Senas pjul kawb'il ex ti'j Apolo, q'onxa tkyaqilju' nojqelan kye toju' kyb'e. 14Tu'n tel kykno'n qtzik mo qitz'in tu'n kyb'inchante b'a'n ex tu'n kyonin qa ati nojqelan, tu'ntzun twitzan kyaq'unb'en. 15Nxi' q'olb'e'na kyu'n kykyaqilju' ate' nk'etze'. Q'onxa q'olb'eb'l kyeju' nche tzalaj quk'i'l toj okslab'l. Awt Dyos tzaj q'onte t-xtalb'il kyib'aje' kykyaqile'.

will be added

X\