Romanos 9

1Aju' in nma'ne' axte' qu'n okslalqine' te Qajaw Jesukrist, mixti' njaw nchane'. Qu'n aju' Xewb'aj Xjan inq'mante toj wanmiye' qa axju' nma'ne': 2q'achq'al nch'yon wanmiye' ex nim nb'ise' intzaj, 3expe' jaku' waq'we' wib' tu'n tkub' tz'e'ysa'n nwitz ex tu'n wel pa'n tij Jesukrist, naqwit jaku' b'ent kykletju' nwnaqile' jun xnyajile' kyuk'i'l. 4Qu'n aj Israelqe' ex mache jaw sk'o'n tu'n kyok te tk'wal Dyos. Aku' Dyos ten kxol tuk'i'l t-spik'umal, b'aj kyej b'entti'j tyol Dyos kyuk'i'l, xitq'o'nju' tkawb'il Moyses kye, xiq'ma'n kye se'n tu'n kb'ichante toj k'u'lb'il ex b'ajx tziya'n txqan ti'xti' kye. 5K'walb'ajqe' kyeju' ojtxi' qyajilb'en; ex kyi'j tzaja' tyajajil Jesukrist tej tok te xjal, aju' Dyos tib'aj tkyaqil, nimanxwitju' tb'i kukxju'. Ikxwitju'. 6Ex mixti' nxi' nma'ne' qa mixti'wt xjapunju' tzajni ttziya'n Dyos kye aj Israel; ate' tu'n tpaj mya kkyaqilju' kyajilb'en ẍe'ok te aj Israel. 7Ex mya kkyaqilju' tyajilb'en Ab'raam ẍe'ok te tk'wal, qu'n ate Dyos q'mante te Ab'raam kjalu: O'qekxju' tk'wal Isaak che okyel te tyajila. 8A ntma'nju' qa lay qo ok te tk'wal Dyos naqx tu'n qa tzajni qyajil ti'j Ab'raam; o'kxqekye' che okyelju' te tk'wal Dyos ayeju' njapun tzajni ttziya'n Dyos kyu'n. 9Qu'n aja'lu tzaj ttziya'n Dyos te Ab'raam: Chin ule' toj jun ab'q'itl ex ajtzun wule' ma'toq tz'itz'ji tal Sara chi Dyos te Ab'raam. 10Expe' mya o'kx ja'lu. Qu'n aye'ju' kab'e' tal Reb'eka yuẍqe' tk'walju' qyajilb'en Isaak, 11- 13tej na'mxtoq kyitz'ji, expe' na'mxtoq t-xikyb'incha'n b'a'n mujqa taq'wix tzajtma'n Dyos te Reb'eka: Aju' tzikb'aj k'okyel te tmajen itz'inb'aj, chij. Ex ikx intma'nju' Tu'jil kjalu: Nk'u'jlaye' Jakob' ex el wik'u'ne' Esawu, chij. Tu'ntzun ja'lu ntyek'u'na' Dyos qa ate njaw sk'onkye'ju' xjal se'nxju' tajb'il, myate' tu'nju' kb'inchb'en. 14¿Ma oktzun kxe'l qma'n qa mya tnik'alti'j Dyos tu'n ja'lu? ¡Mikxa'te'! 15Qu'n tmate Dyos te Moyses: Qa wajb'ile' tu'n ttzaj q'aq'an nk'u'je' ti'j jun xjal ok ktzajel q'aq'an, exqa wajb'ile' tu'n ttzaj laqj nk'u'je' ti'j jun xjal ok kxe'l nb'incha'ne'. 16Qu'mtzun minti' njaw sk'o'nte xjal tu'n Dyos tu'nju' tajb'il mujqa tu'nju' in tipumali'n tib', naq o'kx tu'nju' ntzaj q'aq'an tk'u'j Dyos ti'j. 17Qu'n xitma'n Dyos teju' nimaqkawil toj Ejipt toju' Tu'jil kjalu: Matz'ok nq'o'na te nimaqkawil naqx tu'n txi' nyek'une' wipumale' teya tu'nju' knb'incha'ye' tuk'ila ex tu'n wok ojtzqi'ne' kyu'n xjal te tkyaqil twitz tx'otx'. 18Qu'mtzun ate Dyos ntzaj q'aq'an tk'u'j ti'j alkyexku' xjal, ex ikx inkub' tch'uẍsa'n tanmiju' alkyexku' xjal. 19Ex ktzajel tma'na weye': Qanatzun ikju' se'n ntma'na, ¿titiquntzun intma'na Dyos qa aju' ichan ti'j tpaj extzunqa mix-a'lo' kmyolteju' tajb'il? 20Yajtzunta ichan ¿titi'ta toklen tu'n toktena xjelul te Dyos? ¿Ma jaku'tzulo txi' tma'nju' tx'otx' k'wil teju' xkub' b'inchante: Titiqu'n ẍin kub'a' tb'incha'na kjalu chiwt? 21Qu'mtzun aju' b'inchal k'wil ati toklen tu'n tb'inchante xoq'l se'nxku' tajb'il, ex tu'nxju' xoq'l jaku' b'enta jun k'wil tu'n xa'wanku' mujqa jun k'wil se'nxju' txqantl. 22Tajb'ilte Dyos tu'n tq'o'nte techlal ti'ju' tipumal ex tu'n tyek'u'nte tz'e'ysb'il witzb'aj, extzun minti' tb'incha, qu'n atixi'x tpasensi kyi'ju' xjal atitoq tu'n kxi' toj tz'e'ysb'il witzb'aj. 23Ik'x kyilju' xjal tu'n Dyos naqx tu'n tyek'u'nte tajwalil tb'anilxi'x qe, qu'n matzaj q'aq'an tk'u'j qi'j ex matxi' qo jaw t-sk'o'n tu'n qten junx tuk'i'l. 24Qu'mtzun matxi' qo txokl tu'n Dyos, ate' junjun kxol aj Juda ex junjuntl mya aj Judaqe'. 25Iku' se'n ntma'n toju' u'j kyej ttz'ib'a'n Osey kjalu: Aye'ju' xjal myataq ntanamqe'ye', ok che okyel nq'o'ne' te ntaname'; ex aye'ju' myataq k'u'jlanqe' wu'ne', kche ntxka'ye' ex che nk'u'jlaye'. 26Ex axtzu' toju' najb'il ja xa'ya' qma'n kye: Ayekye' mya ntanamqe'ye' atzun ja'lo ok che okyel q'o'n te tk'wal Dyos aj itz', chiju' u'j te Osey. 27Atzunte Isayiy yolin kyi'ju' aj Israel kjalu: Maskye txqan kb'etju' aj Israel ikse'n tz'awun ttzi ninnjab', naq jte'te' che kletel, 28qu'n ate Qman Dyos kjapumelte' tyol toj tkyaqil twitz tx'otx'. 29Ik se'nxtlju' tma Isayiy nejku': Naqwit mixti' kyej klo'nju' qyajajil tu'n Dyos nimtipumal, matxiwtlo qob'aj se'nkye te Sodom ex komor. 30¿Titi'tzun kqma' tu'n ja'lu? Qa aye'ju' xjal mixti' nche ximan tu'n kyok te tnik'alti'j, matxi' che ok te tnik'alti'j tu'n Dyos naqx tu'nju' kyokslab'l. 31Aye'tzunju' aj Israel lepchqe'ktaq ti'ju' jun kawb'il tu'n kyok te tnik'alkyi'j, layx b'ent kklet tu'n Dyos. 32¿Tiquntzun? Qu'n aju' toj knab'l qa atzu' che kletela' tu'n Dyos tu'nju' kb'inchb'aj, mya tu'nju' kyokslab'l. Qu'mtzun ẍe' jawa' tz'aq tiju' ab'j te trakpuje'n 33aju' intma'n toj Tu'jil kjalu: Kb'el nq'o'ne' jun ab'j toju' tnam Syon, jun ab'j tu'n kjaw trakpuj xjal ti'j; alkyetzunte matz'ok qe tk'u'j ti'j laytzun kub' ch'ixwitzu'.

will be added

X\