Romanos 8

1Qu'mtzun ja'lo mixti'tl tz'e'ysb'il witzb'aj kyeju' mujli kten tuk'i'l Jesukrist. 2Qu'n aju' kawb'il te Xewb'aj Xjan ntzaj q'onte qchwinqlal toj tb'i Qajaw Jesukrist, inklonqe teju' tkawb'il il ex kamik. 3Qu'n ate Dyos matxi' tb'incha aju' mixti' b'ent tu'nju' tkawb'il Moyses, qu'n aju' tajb'il qchib'jil nimxi'x tipumal kyetwitzju' kawb'il, Ate Dyos matzaj tchq'o'nju' tk'wal te chojb'il kyil xjal, qu'mtzun aju' tk'wal ok te xjal ex kub'ti'j il tu'n tej tjaw twitz krus. 4Ma tb'inchate Dyos ja'lu tu'n qok tnik'alqi'j ex tu'n tjapunju' kawb'il qu'n, qu'n mixti' nqo' anq'intl se'nxju' tajb'il qchib'jil, naq o'kx se'nxju' tajb'il Xewb'aj Xjan. 5Qu'n aye' xjal nche anq'in se'nxju' tajb'il kychib'jil, o'kxtzu' nche ximana' ti'j; aye'tzunju' nche anq'in se'nxju' tajb'il Xewb'aj Xjan, o'kxtzu' nche ximana' ti'ju' te Xewb'aj Xjan. 6Aju' qa o'kxtzu' nqo' ximana' ti'ju' tajb'il qchib'jil in qo'x tiq'i'n toj kamik; atzunju' qa o'kx nqo' ximana' ti'ju' te Xewb'aj Xjan ntzaj tq'o'n qchwinqlal ex nak'b'il qe. 7Aye'ju' nche xima'n ti'ju' tajb'il kychib'jil nche ok te ajq'oj ti'j Dyos, qu'n mya kyajb'il tu'n tjapunju' kawb'il kyu'n. 8Qu'mtzun aye'ju' nche anq'in se'nxju' tajb'il kychib'jil mixti' ntzalaj Dyos kyi'j. 9Aye'tzunkye' mixti' nche anq'intlkye' se'nxju' tajb'il kychib'jile', naq o'kx se'nxju' tajb'il Xewb'aj Xjan, qu'n aju' Xewb'aj Xjan ati kyoje. Qatzun ati jun xjal mixti' Xewb'aj te Krist toj lay tz'ok te Krist. 10Qatzun najli Krist toj kyanmiye', ex ikxju' Xewb'aj Xjan najli kyoje ex mache k'amliye' tu'n Dyos, maskyepe' aju' kxmilale' kkyimil tu'n tpaju' il. 11Qatzun najliju' Xewb'aj kxole' aju' jaw anq'in Jesus tu'n, axtzun kjawil anq'in kxmilaljuye' tu'n kxol kyimni naqx tu'nel T-xew Qman Dyos aj ati kxole'. 12Qu'mtzun e'ntzik ex e'witz'in, ati jun ti'xti' ilti'j tu'n qb'inchante, myate tu'n txi' qb'incha'n tajb'il qchib'jil. 13Qu'n qa nche anq'ine' se'nxju' tajb'il kychib'jile' kche kyimile', qatzun mixti' xikq'o'ne' anb'il teju' tajb'il kychib'jile', oktzun che anq'iltze'. 14Qu'n kkyaqilju' ẍaqlu'nqe' tu'n Dyos, tk'wal Dyos qe'. 15Aye'tzunkye' mixti' xkk'amkye' jun Xewb'aj Xjan tu'n kyok q'o'ne' tu'n te majen ex tu'n kxob'e', ma kk'amkye' Xewb'aj Xjan lu tu'n kyoke' te tk'wal Dyos ex tu'n txi' kma'ne' te: ¡Qman! 16Ex axju' Xewb'aj Xjan lu in tmujb'a'n tib' tuk'ilju' qanmi tu'n tmante qa tk'wal Dyosqo'. 17Tu'ntzunju' qa tk'wal Dyosqo', ati qoklen ti'ju' etzb'il aj oje tzaj ttziya'n Qman Dyos qe, aj kb'el qaq'pu'n tuk'i'l Qajaw Jesukrist qama tzik'x yajb'il qu'n junx tuk'i'l, ex qo' jawil nimantzuntz junx tuk'i'l. 18Awe' nkub' nxima'n qa aju' yajb'il nik'x qu'n ja'lo, mixti'x tz'oka' teju' ninb'il tzultq'o'n Dyos qe. 19Kkyaqilju' xjal te twitz tx'otx' inxi'x che ayon teju' kmuj tu'n kka'yinte alkyeqeju' tk'wal Dyos. 20Qu'n aju' tch'isb'en Dyos ok mixti'tl tajb'en, ex mya' tu'nxwit tib', qu'n axte Dyos ojetoq kub' nk'unte; ex aye'ju' tch'isb'en Dyos q'uqlix kk'u'j ti'j 21tu'n kklet tu'n tjaq' tkawb'il il ex te kamik, ex tu'n tten kyuk'ilju' tk'wal Dyos toj tzaqpib'lkye. 22Qu'n b'i'n qu'n qa toju' tq'ijlalil ja'lo aju' tch'isb'en Dyos inxi'x ẍch'in ex nyajt nakuj jun qya xi'toq titz'ji tal. 23Ex mya o'qekxju' tch'isb'en Dyos nche yajt, ex ikxqe inqo' yajt tu'nju' matxi' qk'amju' Xewb'aj Xjan toj qanmi te tnejel ti'xti' kxolju' txqantl tzultq'o'n Dyos qe. Ex nqo' yajti b'a'nxi'x tu'nju' nqo' ayon tu'n qok te tk'wal Dyos, tu'ntzun tkletju' qxmilal te k'ixk'oj ex kamik. 24Qu'n naqx tu'nju' q'uqli qk'u'j matxi' qoklet. Qatzun aju' nqo' ayon ti'j inok qka'yintl, mya'tzun q'uqb'ab'l k'u'jb'ajtlte', qu'n ¿alkye jun nayon ti'ju' ojetoq tz'ok tka'yi'n? 25Qatzun aju' nqo' ayon te na'mxtoq tok qka'yi'n, inkub' qayo'nxi'tl maskye nqo' yajt tu'n tpaj. 26Ex ikxte Xewb'aj Xjan inqo' toni'n qa xi'toq qkub'numj. Qu'n mixti' b'i'n qu'n se'n tu'n qna'na' Dyos, atzunte' Xewb'aj Xjan inkub'san qi'j twitz Dyos ex ntjyo'n tu'me'l se'n tu'n tyolina' qi'j. 27Ate Dyos nb'aj ka'yinte toj qanmi, ojtzqi'n tu'n titi' ntma'nju' Xewb'aj Xjan, qu'n ina' kub'sanju' Xewb'aj twitz kyi'ju' ttanam se'nxju' tajb'il Dyos. 28B'i'nqe' qu'n qa ntb'incha'n Dyosju' b'a'n kye kkyaqilju' xjal nche k'u'jlante, aj oje e'txokli tu'n Dyos se'nxju' tb'is tk'u'j. 29Aye'ju' xjal ok che okslal te Dyos ojtzqi'nqe'tl tej ttzajlen qen twitz tx'otx' qa che okyel te tk'wal Dyos, tu'ntzun tokju' tk'wal te tzikb'aj kyeju' txqantl xjal. 30Aye'tzunju' e'jaw sk'o'n tu'n Dyos ojtxi', e'tzaj txko'n; ex aye'tzunju' e'ttxok mache oktq'o'n te tnik'alti'j; ex aye'tzunju' eb'jo'k q'o'n tnik'alkyi'j matxi' q'o'n kyoklen tu'n Dyos tu'n kten junx tuk'i'l toj tajwalil. 31¿Titi'tzuntl qma' ti'j tkyaqil ja'lu? ¡Qa ati Dyos quk'i'l, alxi'xkye kb'entil tkub' qi'j tu'n! 32Qu'n ate Dyos minti' kub' t-xk'a'yinju' tk'wal, matzaj tq'o'n tu'n tkyim te chojb'il kyil kkyaqil xjal, ¿Se'n taq'witzun qa lay tzaj tq'o'n tkyaqilju' ti'xti' qe junx tuk'ilju' tk'wal? 33¿Alxi'xkye jun k'okyelten poqolkyeju' oje che jaw sk'o'n tu'n Dyos? Ate Dyos nok q'onkye te tnik'alkyi'j. 34¿Alxi'xkye jun kb'el tz'e'ysante qwitz? Mix-a'lo' qu'n aku'te Qajaw Jesukrist kyim; expe' jaw anq'in kxol kyimni ex ati ja'lo toj tb'a'nq'ob' Dyos, ex aku'te nkub'san twitz Dyos qi'j. 35¿Alxixkye k'elil pa'nqe ti'ju' tk'u'jlalil Jesukrist? ¿Ma aloju' yab'il, aju' yajte'n, aju' b'is, aju' we'yaj, aju' qa mixti' kxb'alun, aju' xob'ajil mujqa aju' xob'ajil tu'n tpaj qa xqo kub' b'yo'n? 36Se'nju' ntma'n toj Tu'jil kjalu: Naqx tu'n tpaja neljiya qi'je' tu'n qkyime' tkyaqil q'ij; ik nqo' ok q'o'na'ye' se'nqeju' rit nche'x iq'i'n toj b'yob'lkye. 37Ex maskye ikju' naq tu'nel Qajaw Jesukrist nqo kanb'ana' toj tkyaqil. 38Qu'mtzun q'uqlixi'x nk'u'je' qa mixti'x jun ti'xti' k'elil pa'nqe' ti'ju' tk'u'jlalil Dyos: Lay b'ent tu'n kamik, tu'nju' chwinqlal, kyu'nju' anjl, kyu'nju' tajaw taq'wixilju' ati kyipumal ex min q'ancha'lqe', ex lay b'ent kyu'nju' ate' ja'lo, exqe'ju' che ul yajxi'tl, 39ex lay b'ent kyu'nju' ti'xti' tqe' tzmax jawni, ex tzmax kub'nix ex lay b'ent tu'n jun ti'xti' tb'inchb'aj Dyos. ¡Mix-a'lox jun ti'xti' k'elil pa'nqe' ti'j tk'u'jlalil matxi' tzaj tyek'u'n Dyos qe naqx tu'nel Qajaw Jesukrist!

will be added

X\