Romanos 5

1Maqo tk'amte' Dyos ex maqo oktq'o'n tnik'alqi'j naqx tu'n qokslab'l, ja'lo atitzun nak'b'il qxol naqx tu'nelju' Qajaw Jesukrist. 2Qu'n naqx tu'nel Jesukrist xqopona' lq'e tk'etz Dyos ex tu'nju' qokslab'l, tu'ntzun qtzalaj toju' t-xtalb'il ex matxi' kub' qwab'a'n qib' ex nimxi'x tzalajb'il qe tu'nju' q'uqlok qk'u'j ti'j tajwalil Dyos. 3Ex myanaq o'kxju' lu, ex ikx nqo' tzalaj toju' yajb'ilqe; qu'n b'i'na' qu'n qa aju' yajb'il ntzaj q'onte qipumal tu'n qkub' we' b'a'nxi'x ex tu'n tik'x qu'n, 4ex tu'ntzunju' nik'x qu'n inqo' ok ka'yi'n tu'n Dyos, ex atzuntzu' noka' qexi'x qk'u'j ti'j Dyos. 5Atzunju' q'uqb'ab'l tu'n Dyos lay kub'naj, qu'n ina' qna'n toj qanmi ati tk'u'jlalil Dyos qi'j tu'nju' Xewb'aj Xjan tzaj tq'o'n qe. 6Qu'n tej mixti'xqe tu'me'l qu'n tu'n qklonte qib' qib'xqib', ul Jesukrist kyimel tu'n tpaj qil tojxi'xju' tq'ijlalil. 7Axxi'x, mix-a'lox jun xjal jaku' taj tu'n tkyim tu'n tpaj juntl. Maskyepe' tu'n tpaj jun xjal tnik'alti'j; extzulo jaku'x taj jun xjal tu'n tkyim qa tu'n tpaj jun b'a'n xjal. 8Atzunte Dyos oje tzaj tyek'u'n qe qa nqo tk'u'jla'n, qu'n kyimju' Jesukrist tu'n qpaj maskye aj ilqotoq. 9Ja'lotzun naqx tu'n xkyim Jesukrist, matxi' qo' mk'et tu'n Qman Dyos ex matxi', qu'mtzun qo kletil tu'n ajttzaju' tz'e'ysb'il witzb'aj toj b'ajsb'il q'ij. 10Qu'n tej ajq'ojqotoq ti'j Dyos, axte Dyos xb'inchante tu'n tb'entl qten tuk'i'l naqx tu'nel tkamik Jesukrist aju' tk'wal, qu'mtzun q'uqlixi'x qk'u'j qa qo' kletel tu'n, tu'nju' majaw anq'in Jesus ex kyetl qten tuk'i'l. 11Ex mya o'kx ja'lu, ex inxi'x qotzalaj ti'j Dyos naqx tu'nel Qajaw Jesukrist, qu'n tu'nte Krist xb'enta qten tuk'i'l Dyos. 12Ikytzu'n, naq tu'n jun ichan oka' il kyxol kykyaqil xjal ex tu'nju' il oka' kamik, qu'mtzun kykyaqil xjal nche kyim naqx tu'n tpaj mache b'inchan il. 13Atitltoqte' il kyxol xjal, tej na'mxtoq ttenju' kawb'il; mixpeti' nq'manjtztoq qa atitoq kyil xjal tej na'mxtoq tulju' kawb'il. 14Ttzajlenxpe' qete' toj tq'ijlalil Adan ex pon kanunx toj tq'ijlalil Moyses, kawinju' kamik kyib'aj kykyaqilju' eb'inchan il, maskyepe' aju' kyil mya e'ik'wit tib'aj jun chaq'b'il, kse'n tb'incha Adan, ju' ntechla'n ti'j Krist atitoq tulel. 15Expe' lay b'ent tok qmujb'a'n til Adan tuk'ilju' xtalb'il matxi' tzaj tq'o'n Dyos qe. Qu'n naq tu'n tpaj jun xjal b'inchan il, nim txqan xjal e'kyim; ex atzunte' t-xtalb'il Dyos naq tu'n jun ichan aju' Jesukrist sula' tq'o'n, nim toklen ex b'a'n sela' kye kkyaqil xjal. 16Aju' til jun xjal layx pon kanun kxe'nju' xtalb'il saj tq'o'n Dyos qe, qu'n naq tu'nju' jun il tb'incha Adan sajaju' kamik ex tz'e'ysb'il witzb'aj kye xjal; atzunte' t-xtalb'il Dyos ntb'incha'n tu'n qok tnik'alti'j maskye ati txqan qil nejku'. 17Qu'n naq tu'n jun il tb'incha Adan nche kyima' xjal kkyaqil, ex ikx naq tu'n jun wnaq aju' Jesukrist qo anq'ila' ex qk'ama' t-xtalb'il Dyos tu'n qok te tnik'alti'j, qu'n naq jun oyaj saj tq'o'n Dyos qe. 18Naq tu'nju' til Adan saja' tz'e'ysb'il witzb'aj kyib'aj kkyaqil xjal, ex ikxtzu'n naq tu'n jun xjal kyim ex tb'incha tnik'alti'j, xqo' k'monjtza' ex ktzajel q'o'na' qchwinqlal tejumajx tu'n Dyos. 19Iku' se'n e'ok kkyaqil xjal aj il tu'n tpaj til jun xjal; ex ikxtzu'n tu'me'lju' nim xjal knajsetel kyil ex che k'metel tu'n Dyos naqx tu'nel juntl wnaq aju' Jesukrist, ok tnik'alxi'xti'j. 20Tej tulju' kawb'il jaw ch'iyxixtlju' il; ex tetzunj ẍch'iyju' il, ma tzajxi'x laqj tk'u'jtl Dyos kyi'j xjal. 21Extzunqa matxi' kawinju' il kyib'aj kkyaqil xjal ex ma' che kyim tu'n, ikxtzunte tk'u'jlalil Dyosju' ati tipumal tu'n ttzaj tq'o'n qchwinqlal tejumajx ex tu'n qok te tnik'alti'j naq tu'nel Jesukrist.

will be added

X\