Romanos 3

1¿Titi'xixtzun tajb'en tu'n qok te aj Juda mujqa tu'n tokju' qechil ti'j qchib'jil? 2Nim kyoklen toj chukchaq tu'me'l. Tnejelxi'x kyeju' xjal aj Juda saja' q'o'na' tyol Dyos. 3¿Titi'tzun kb'ajel ikju'? ¿Ma laytzun japun tyol Dyos tu'n tpaj min nche okslan junjunju' aj Juda te? 4¡Lay tb'inchate Dyos ikju'! Ate Dyos kjapumelte' tyol tu'n tkyaqil, maskye nche chan kye xjal yol; chiju' Tu'jil kjalu: Ilti'j k'elel tnik'tzil qa axju' ntma'na, ex kb'elkyi'j xjal tu'na ajtoka toj xjel, chij. 5Qatzun tu'nju' taq'wix nqb'incha'n nelaxi'x tnik'tzil qa tnik'alte Dyos ti'j ¿Titi' kxe'l qma'n? ¿Ma mya tnik'alti'j Dyos tu'nju' nkub' ttz'e'ysa'n qwitz?(Inchin yoline' kse'nx yolin alkyexku' xjal) 6¡Mikxa'ju'! Qu'n naqwit mya tnik'alte Dyos ti'j, ¿Se'n taq'witzun kb'entela' ttz'e'ysante kwitzju' xjal? 7Extzunqa aju' qchajyolil najb'en tu'n tjaw ajwanlinxi'x tb'i Dyos ex tu'n telxi'x tnik'tzil qa tnik'alti'j, ¿titiquntzun kb'ela' tz'e'ysa'n qwitz?, chechije'. 8Expe' nkma'ne', ¿Titiqu'n minti' nxi' qb'incha'n taq'wix tu'ntzun tulju' b'a'n? Ape' nkyma'n junjun wi'je' qa a in npakb'anjuye' naqxwit tu'n nkub' b'o'lje'; b'a'n tu'n ttz'e'ysetkye' xjal lu kywitz. 9¿Se'ntzun tten? ¿Ma b'a'nqoxi'xtzun tu'n aj Judaqo' kyekwitz txqantl xjal? ¡Minti'! Qu'n qkyaqil toqo'kx tjaq' tkawb'il il maskye aj Judaqe' ex maskye mya, 10qu'n chiju' tz'ib'a'n toj Tu'jil kjalu: ¡Mix-a'loxte xjal tnik'alti'j, tk'ixpewt jun! 11Mix-a'lo' jun xjal nkane toj tnab'l; ex mix-a'lox jun xjal njyon ti'j Dyos. 12Kkyaqil matxi' che'x toju' myab'a'n b'e; ex kkyaqilx matxi' che b'inchan myab'a'n. ¡Mix-a'loxte nb'inchante b'a'n! ¡Mixti'x tk'ixpe'wt jun! 13Iky toj tqul kse'n jun muqb'il k'ab'li, tu'nju' taq' nchana' yol, ex naku'j tokxju' ttz'u'lub' kan toj ttzi 14ex naqxi'x yasu'n tokx toj ttzi ex myab'a'n yol. 15Ojqelxi'x kyelju' tqan tu'n tb'yon xjal; 16Jaxjaku' nche b'eta' naqx tqe'k xitul ex yajulkye xjal, 17ex min kyojtzqi'nju' b'e te nak'b'il. 18Ex mixti'x ch'i'n tchi Dyos kye, chiju' tz'ib'a'n toj Tu'jil. 19B'i'n qu'n tkyaqil ntma'nju' tu'jil kawb'il, atzu' ntma'n kyeju' tqe'kx tjaq'u' kawb'il lu, tu'ntzun mix-a'lotl kyolil ex tu'n telkynik' kkyaqilx qa ati kyil twitz Qman Dyos; 20qu'n mix-a'lox jun kq'malte qa tnik'alxi'xti'j twitz Dyos tu'nju' qa njapunju' kawb'il tu'n, qu'n aju' u'j te kawb'il o'kx tajb'enju' tu'n telqnik' ti'j qa aj ilqo'. 21Atzun ja'lo, axte Dyos saj yek'unte se'n tu'n qoka' tnik'alxi'xqi'j, mya tu'nju' kawb'il, expe' axju' kawb'il inq'mante exqe'ju' t-sanjelal Dyos kjalu: 22naqx tu'nju' okslab'l ti'j Qajaw Jesukrist qo k'metela' tu'n Dyos, qu'n junelniqo' toj twitz: 23kkyaqil xjal matxi' che b'inchan il ex matxi' che el lq'e ti'j Dyos. 24Atzunte Dyos tu'nju' tk'u'jlalil matxi' kub' tnajsa'nju' qil, ex maqo kolpet tu'n toj il naqx tu'nel Qajaw Jesukrist. 25Ate Dyos tzaj chq'onte Jesukrist tu'n tkub' qojlu' tchk'el te najsb'il qil. Kb'el tnajsa'nte qil tu'n qokslab'l ti'j. Iktzu'n ntyek'u'na' Dyos qa tnik'alxi'xti'j tu'nju' makub' tnajsa'n qil ojtxi', 26qu'n atina' tpasensi. Ate Dyos ntyek'u'n qa tnik'alxi'xti'j, ex tu'ntzunju' tnik'alti'j nche tk'mo'nju' xjal nche okslan te Jesus. 27¿Se'n taq'wi tu'n tjaw tnima'ntib' jun xjal twitz Dyos? ¡Mixti'x tu'me'l! ¿Tiqu'ntzun? Mya tu'nju' ma japunju' tkawb'il Moyses tu'n, ate' tu'nju' ma tz'okslan te Jesus. 28Iktzun tu'me'lju': Intk'mo'nte Dyos xjal noqx tu'n tokslab'l tij Jesus, ex myate' qama japunju' tkawb'il Moyses tu'n. 29¿Ma o'kxtzun kyuk'i'l aj Juda ta'ya' Dyos? ¿Ma mixti'tzun kyuk'ilju' txqantl xjal mya aj Judaqe'? ¡Atite' kyuk'i'l kkyaqil xjal te tkyaqil twitz tx'otx', 30qu'n noqna' o'kx jun Dyos ati: aju' Dyos in k'monkye xjal qa ati kyokslab'l, ex myate' nxi' tka'yi'n qa ati kyechel ti'j kychib'jil mujqa mixti'! 31¿Ma tu'ntzunju' okslab'l nela' qi'nju' tipumal kawb'il? ¡Myate'! Impe'na' nok qq'o'nxi'xtl toklenju' kawb'il tu'nju' qokslab'l.

will be added

X\