Romanos 2

1Qu'mtzun qa ati junkye' nyolin myab'a'n ti'j juntl, tib'ajx kb'el tz'aqa' tyol, qu'n ax ntb'incha'njuya kse'nx nkyb'incha'n txqantl. 2Ex b'i'n qu'n qa ate Dyos nkub' ttz'e'ysa'n kwitz xjal toj tu'me'lxi'x qa ati kyil. 3Atzunta nyolina kyi'j txqantl extzun ax nxi' tb'incha'nju'ya kse'nkye, lalun kub' t-xima'na qa lay kub' tz'e'ysa'n twitza tojxi'x tu'me'l tu'n Dyos. 4Inel tik'una tk'u'jlalil Dyos, exju' tpasensi ex tu'nju' nik'x tkyaqil tu'n, ex min nximana ti'j tu'n tk'ujlalil Dyos kb'antela' tanjtzti'j tanmiya. 5Tu'ntzunju' matxi' kub' tch'uẍsa'na tanmiya ex min tajb'ila tu'n tanjtzti'ja tk'etz Dyos, matxi' tz'oktena ch'uqilte txqan il tib'aja ex majx kb'el tz'e'ysa'n twitza ajtpon tq'ijlalil tu'n Dyos 6ex ktzajel tq'o'n Dyos tu'me'l t-xel teyile junjun kse'nxju' tb'inchb'en. 7Tzultq'o'n Dyos chwinqlal tejumajx kyeju' noktilil kyu'n tu'n kb'inchanteju' b'a'n, ex kyeju' noktilil kyu'n tu'n kkanb'ante ninb'ilkye toj kya'j ex tu'n kkanb'anteju' ti'xti' layx che b'aj; 8extzun kb'el ttz'e'ysa'n kwitzju' pi'sqe' tu'n tkyaqil ttx'u'jil, aye'ju' min nche niman te Dyos ex o'kx nche ximana' ti'j taq'wixil. 9Tzul yajb'il ex k'ixk'oj kyib'aj kkyaqilju' xjal nche b'inchan myab'a'n, tnejelxi'x kye aj Juda, ex kyeju' xjal mya aj Juda. 10Atzunte Dyos tzul tq'o'nju' ninb'il ex nak'b'il kye kkyaqilju' xjal nche b'inchan b'a'n, tnejelxi'x kye xjal aj Juda, ex kyeju' xjal mya aj Judaqe'. 11Qu'n junelni qekye' xjal kykyaqil toj twitz Dyos. 12Kkyaqilju' mache b'inchan il mixti'toq b'inju' tkawb'il Moyses kyu'n, che kyimel ex mixti' toklen kawb'il kyi'j, aye'tzu'n mache b'inchan il extzun b'i'nju' tkawb'il Moyses kyu'n, tu'nxju' kawb'il lu che okyela' toj xjel. 13Qu'n myaye'kye tnik'alkyi'ju' b'i'n kawb'il kyu'n, o'qekxkye' in japun kyu'n tnik'alkyi'j twitz Dyos. 14Qu'n aye'ju' xjal mya aj Judaqe' ex mixti'ju' tkawb'il Moyses toj kyq'ob', tu'nx knab'l nkyb'incha'nju' intma'n kawb'il lu ex innelkynik' ti'ju' b'a'n ex myab'a'n. 15Qu'mtzun inkyek'u'n tu'nju' kychwinqlal qa tz'ib'a'nju' kawb'il toj kyanmi. Aye'x nche na'nte ex ajtkub' kxima'n jun ti'xti' lwiy nelkynik' ti'j qa b'a'n mujqa myab'a'n. 16Ajtzun kyok kykyaqil xjal toj xjel tu'n Jesukrist twitz Dyos kse'nx intma'nju' tpakb'al b'a'n nxi' npakb'a'ne', majx che b'je'lel chik'e' kykyaqilju' kb'inchb'en xjal toj ewaj. 17Aya ntma'na qa aj Judaya, q'uqlok tk'u'ja ti'ju' tkawb'il Moyses, ex njaw tnima'n tib'a tu'n tpaj. 18Noktq'o'n tib'a qa tojtzqi'na tajb'il Dyos, ex aju' kawb'il lu ntzaj yek'unte teya tu'n tjaw tjyo'na ti'xti' b'a'nxi'x. 19Ex q'uqlok tk'u'ja ti'ja qa aya kxe'l ẍaqlunkye moẍ ex kb'el q'onte spik'un toj kb'eju' ate' toj qlolj; 20qa aya q'ol xnaq'tzb'il kyeju' mixti' b'a'n kyu'n ex kyeju' mixti'xi'x kyojtzqib'l naq tu'nju' atzu' ta'ju' kawb'il toj tq'ob'a inq'onte ojtzqib'l ex nyolin ti'ju' axx. 21B'a'nte' qa aya nxnaq'tzan kyeju' txqantl, ¿tiquntzun min nt-xnaq'tza'n tib'a tib'xtib'a? Ina' tpakb'a'na kye xjal qa taq'wix tu'n kyelq'an, ¿tiquntzun nelq'aniya? 22Extzunqa ntma'na kye xjal tu'n lalun che ajpajin, ¿titiquntzun nxa'ya' tb'incha'na? Ex qa nche el tik'una witzileb', ¿tiquntzun netza' telq'ana kyq'inumal toj kja? 23Njaw tnima'n tib'a tu'nju' ati kawb'il tuk'ila, extzun nel tch'ixaw Dyos tu'na qu'n minajun nokslana te. 24Tu'me'lx tu'nju' Tu'jil tyol Dyos intma'n kjalu: Aye'ju' xjal mya okslalqe' nche yolin myab'a'n ti'j Dyos tu'n kpaje', chij. 25Ati tajb'enju' techila ti'j tchib'jila qa njapunju' tkawb'il Moyses tu'na; qatzun mixti' njapun tu'na mixti'x tajb'en. 26Atzunju' xjal qa mixti' tok techil ti'j tchib'jil extzun njapunju' kawb'il tu'n, ikx tz'elpuna' kse'nju' atok techil ti'j tchib'jil. 27Alkyete njapun kawb'il tu'n, maskye mixti' tok techil ti'j tchib'jil, kxe'l q'o'n toklen tu'n tkawin tib'aju' xjal ati kawb'il tuk'i'l ex tok techil ti'j tchib'jil qa min njapun tu'n. 28Lalun kub' kyxima'ne' qa aj Juda qe'ye' naq tu'n che anq'ine', ex tu'n tok kyechele' ti'j kychib'jile'. 29Ate' xjalju' aj Judaxi'x aju' njapun tkawb'il Dyos tu'n, myaju' kykawb'il xjal te twitz tx'otx'. Alkyetzun xjal ikntb'incha'nju' kjawil nimsa'n tu'n Dyos ex mya kyu'n xjal.

will be added

X\